Erom juon Rikaļoor an Irooj Jisōs Kraist

Ta meļeļein erom juon rikaļoor an Irooj Jisōs Kraist? Juon rikaļoor ej juon eo me em̧ōj an peptaij im ej ikdeleel n̄an bōk ioon etan Rilo̧mo̧o̧r im ļoor E. Juon rikaļoor ej kajjieon̄ erom āinwōt E ilo an kōjparok kien ko An ilo mour in, ļapļo̧k an āinwōt juon rikkatak kappukot n̄an erom āinwōt an maajta.

Elōn̄ armej rej ron̄ naan in rikaļoor im rej ļōmņak ej meļeļein wōt “rikaļoor.” Ak rikaļoor eo em̧ool ej watōke juon rikaļoor. Ļōmņak in eļapļo̧k jān ekkatak im mour kōn ļaajrak in m̧wil ko an juon make. Rikaļoor rej mour bwe m̧wil ko an Kraist ren m̧ōttan ko rekajoor ilo kadkadier, ilo wāween aer libobo kōn juon jetōb ekajoor.

Ron̄jake kūr eo an Rijilōk Piter n̄an erom juon rikaļoor an Rilo̧mo̧o̧r:

“Kom̧win kanooj kate kom̧, im n̄an ami tōmak kom̧win kobaik erreo; im ilo ami erreo, jeļāļo̧kjeņ;

“Im ilo jeļāļo̧kjeņ, jatōr; im ilo ami jātor, kijenmej; im ilo ami kijenmej, wānōk;

“Im ilo ami wānōk, jouj n̄an doon; im ilo ami jouj, yokwe.”¹

Āinwōt ami jeļā, erom kajoor ilo jetōb āinwōt juon rikaļoor ej aikuj eļapļo̧k jān juon wōt jerbal. Ilo raan ko an Rilo̧mo̧o̧r eo, elōn̄ ro raar watōk er riwānōk ilo juon ak elōn̄ wāween mour ko aer. Rej kōm̧m̧ane ta eo ij ņa etan n̄e rekōņaan pokake. N̄an waanjon̄ak, rej kōjparok kien eo bwe ren jab jerbal ilo raan in Jabōt ak rej kōnanaiki Rilo̧mo̧o̧r kōn an kōmour armej ilo raan eo ekwojarjar.² Rej leļo̧k jipan̄ n̄an ro riaikuj ak leļo̧k wōt jān bwein jeraam̧m̧an ko aer—men ko me rejjab aikuji.³ Rej jitlo̧k ilo aer mejān būrom̧ōj.⁴ Rej jar bwe armej ren lo aer jar.⁵ Jisōs eaar ba, “Rekar ruwaaktok n̄an Ippa kōn tier, ak burueer rej ettoļo̧k jān Eō.”⁶ Em̧m̧aan im kōrā ro remaron̄ mije wōt m̧wil ko ak makūtkūt ak rejjab lukkuun kōņaan erom āinwōt E ilo būruōer.

Kōn men kein, Jisōs eaar kwaļo̧k:

“Elōn̄ renaaj ba n̄an Eō ilo raan eo, Irooj, Irooj, kōm ar jab rūkaanij kōn Etam̧ ke, im kajutakļo̧k tim̧oņ ro kōn Etam̧ ke, im kōm̧anm̧an elōn̄ men in bwilōn̄ kōn Etam̧ ke?

“Innām Inaaj ba n̄an er, ‘I ar jaje kom̧; kom̧win ilo̧k jān Eō, kom̧ rej kōm̧m̧an nana.”⁷

Mwil ko an Rilo̧moo̧r, ilo ad mour kaki, rejjab jet jeje ko jen ļoori ak laajrakin jerbal ko me rej aikuj tōprak. Rej jet m̧wil ko reaorōk, im rej ippān doon, ko me rej ejaak ilo kōj elōn̄ ilo wāween ko. Ilo bar juon wāween, jejjab maron̄ bōk juon m̧wil an Kraist ilo ad jab barāinwōt bōki im im̧we ro jet. Ilo an juon m̧wil kajoorļo̧k, innem bar m̧wil ko jet rej kajoorļo̧k.

Ilo 2 Piter im ilo Katak im Bujen ko jekjeņ 4, jej ekkatak bwe tōmak ilo Irooj Jisōs Kraist ej pedped eo. Jej jon̄e tōmak ko ad kōn ta eo ej tōl kōj n̄an kōm̧m̧ane—itok jān pokake. “Eļan̄n̄e kom̧ naaj tōmak ilo N̄a kom̧ naaj wōr ami kajoor n̄an kōm̧m̧an jabdewōt men emennin aikuj ilo N̄a.”⁸ Tōmak ej āinwōt juon men eo ej kōmōkaj ak ukōt juon jerbal. N̄e ejjeļo̧k jerbal, ejjeļo̧k mour erreo, tōmak ko ad ejjeļo̧k aer kajoor n̄an kōmourur mour ko ad āinwōt juon rikaļoor. Ilo m̧ool, e mej tōmak eo.⁹

Im kiiō, Piter ej kōmeļeļeiki, “ami tōmak kom̧win kobaik erreo.” Erreo in eļapļo̧k jān erreo eo ilo kōjparok kien erreo. Ej erreo im ekwojarjar ilo kōļmenļo̧kjeņ im ilo ānbwin. Erreo ej barāinwōt kajoor. N̄e jej tiljek ilo ad mour kōn gospel eo, enaaj wōr ippād kajoor n̄an erreo ilo aolep ļōmņak, en̄jake, im kōm̧m̧an. Kōļmenļo̧kjeņ ko ad reppeļļo̧k n̄an bōk im̧we ko an Jetōb Kwojarjar im Meram an Kraist.¹⁰ Jej jutak kōn Kraist ilo ta ko jej ba im kōm̧m̧ani ak barāinwōt ilo ad jeļā wōn kōj.

Piter ej wōnm̧aanļo̧k wōt, “Ilo ami erreo, jeļāļo̧kjeņ.” N̄e jej mour erreo, jejeļā kōn Jemedwōj Ilan̄ im eo Nejin ilo wāween eo ejeņoļo̧k. “Eļan̄n̄e jabdewōt armej e kōņaan kōm̧anm̧an ankilaan, e naaj jeļā kōn naan in katak eo.”¹¹ Jeļāļo̧kjeņ in ej juon naan in kam̧ool an juon make, eo ej itok jān en̄jake eo an make. Ej jeļāļo̧kjeņ eo me ej ukōt kōj bwe ad “meram ej eddāp n̄an [An] meram” im “erreo ej iakwe [An] erreo.”¹² Ilo ad mour erreo, jej jino iaļ eo ad kōn naan in “Ij tōmak” n̄an mejān kajjik eo aibojoj kōn naan in “Ijeļā.”

Piter ej rojan̄ kōj n̄an kobaik “ami jeļāļo̧kjeņ jatōr; im jatōr kijenmej.” Āinwōt jet rikaļoor ro rejatōr, jej mour ilo gospel in ilo wāween eo ebeļaņ im e dim. Jejjab “ettōr m̧ōkajļo̧k jān kajoor eo [ad].”¹³ Kajjojo raan jej wōnm̧aanļo̧k wōt ilo ad jab po ilo kapo ko an mour in.

Jatōr ilo wāween in, eļapļo̧k kijenmej ippād im lōke Irooj. Jemaron̄ pedped ioon karōk eo An ilo mour ko ad, men̄e jejjab maron̄ loe kōn lukkuun mejād.¹⁴ Kōn menin, jemaron̄ “ikōn̄ wōt im jeļā ke [E ej] Anij.”¹⁵ N̄e jej jelm̧ae apan̄ ko reļļap, jej kajjitōk, “Ta eo konaaj kar kōņaan bwe in ekkatak jān en̄jake in?” Kōn karōk im kōttōpar ko An ilo buruōd, jej wōnm̧aanļo̧k wōt ejjab wōt ilo ad niknik ilo men otemjej ak barāinwōt niknik ilo ad kijenmej im m̧ōņōņō.¹⁶

Kijenmej in, Piter ej katakin, bwe ej tōl kōj n̄an wānōk. Āinwōt an Jemād kijenmej ippād, Ajri ro Nejin, jej kijenmej ippān ro jet im ippād make. Jej lan̄lōn̄ ilo anemkwōj an ro jet im iien ko rem̧m̧an n̄an er bwe ren eddōkļo̧k “lain im bar lain,”¹⁷ “meramļo̧k im meramļo̧k m̧ae raan eo eweeppān.”¹⁸

Jān jatōr n̄an kijenmej im jen kijenmej n̄an wānōk, pekaatokid ej oktak. Ewōr ippād jouj, eo ej m̧wil n̄an kwaļo̧k kadkadin aolep rikaļoor ro rem̧ool. Āinwōt riSamaria eo em̧m̧an, jej etal n̄an jikin ko n̄an kwaļo̧k naan n̄an jabdewōt ro me rej aikuji, jekdoon n̄e rejjab jet ro mōttad.¹⁹ Jej kōjeraam̧m̧an ro rej kaje kōj. Jej kōm̧m̧an em̧m̧an n̄an ro rejjab em̧m̧an n̄an kōj.²⁰ Elōn̄ ke m̧wil eļapļo̧k an wānōk ak an Kraist?

Ij kam̧ool bwe kijejeto ko ad n̄an erom rikaļoor ro an Rilo̧mo̧o̧r rej lukkuun ippān doon m̧ae iien jej “libobo” kōn iakwe eo An.²¹ Iakwe in ej kwaļo̧k kadkadin juon rikaļoor an Kraist:

Eļan̄n̄e ij kōnono kōn lo ko an armej im enjeļ, a yokwe e jab ippa, em̧ōj aō erom kōba ettōn̄tōn̄, ak simbal e aen̄wān̄wā.

“Im eļan̄n̄e ewōr ippa bwe in rūkaanij, im I jeļā men ko rettino otemjej, kab mālōtlōt otemjej; im eļan̄n̄e tōmak otemjej ippa, bwe in kōm̧m̧akūt toļ ko, a yokwe e jab ippa, n̄a jekdo̧o̧n.”²²

Im tōmak, kōjatdikdik, iakwe-em̧ool ej kwaļo̧k ekkar eo an n̄an jerbal in an Anij.²³ “A kiiō e pād wōt … men kein jilu; im eo eļap iaer ej iakwe em̧ool.”²⁴

Ro jeiū im jatū, kiiō eļapļo̧k jān kar mokta, jejjab maron̄ erom “rikaļoor jet wōt iien”! Jejjab maron̄ erom juon rikaļoor kōn juon wōt un in katak ak eo juon. Kajjojo m̧wil ko rej itok jān ad tōmak ilo Kraist—ekitbuuj m̧wil ko me jaar kōnnaan kake rainin—ko remenin aikuj bwe jen kajoor wōt im mour tiljek ilo raan kein āliktata.

Ilo ad ikdeleel n̄an kajjieon̄ erom rikaļoor ro rem̧ool an Jisōs Kraist, m̧wil kein renaaj ippān doon im kajoor ilo kōj. Enaaj ejjeļo̧k oktak ikōtaan jouj n̄e jej kwaļo̧k ad jouj n̄an rikōjdat kōj im jouj jej kwaļo̧k n̄an ro mōttad. Enaaj ļapļo̧k ad m̧ool n̄e ejjeļo̧k en ej loe āinwōt n̄e ro jet rej kalimjōk kōj.Enaaj ļapļo̧k ad wūjlepļo̧k kōj n̄an Anij n̄e jej jerbal n̄an ro jet āinwōt n̄e jej pād ilo juon jikin ettino.

Ij kam̧ool bwe aolep remaron̄ erom rikaļoor ro an Rilo̧mo̧o̧r. Rikaļoor ejjab ba kōn jete am iiō, kwe leddik ke ļaddik, ak kwe ria. Ilo aolepān mour ko ad āinwōt juon rikaļoor, jej āinwōt Armej ro Rekwojarjar ilo Raan-ko āliktata, kobaik kajoor ko ad n̄an kōjeram̧m̧an ro jeid im jatid ipeļaakin laļ in.Kiiō ej iien n̄an kalim̧m̧uri kōj make n̄an erom rikaļoor ro An kōn aolepād ad kajoor.

Ro jeiū im jatū, em̧ōj kūr n̄an erom rikaļoor ro an Rilo̧mo̧o̧r. Kōm̧m̧an bwe kweilo̧k in eļap en am iien em̧m̧an n̄an “jino āinwōt ilo iien ko etto, im itok n̄an [E] kōn aolepān būruōmi.”²⁵ En̄in ej Kabun̄ eo An. Ij kwaļo̧k aō kam̧ool ejeņoļo̧k bwe Ej mour.En kōjeraam̧m̧an kōj ilo iaļ in n̄an erom rikaļoor ro reperan im rej wūjlepļo̧k aer. Ilo etan Jisōs Kraist, amen.