2010–2019
Mo chedal a Rubak er Kid el Jesus Kristo
April 2017


Mo chedal a Rubak er Kid el Jesus Kristo

A rokui el blekeradel el mokdubech lokiu a klaumerang er a Kristo a rokui el meklou a belkul el uchul e kede mo dechor el mesisiich er chelechal urirul klebesei.

Ngera belkul sel bo dechedal a Rubak el Jesus Kristo? Ngikel chedal a mla metecholb e soal nguu a ngklel a Osobel e oltirakl er Ngii. A chedal a melasem el mouai Ngii e oltirakl a Llechul er tial klengar, el diua mesuub el daiksang el soal moua mastang er ngii.

Betok el chad a rongesii a tekoi el chedal e omdasu el kmo a belkul a kuk di “oltirakl.”E ng di a meral chedal a ngara teletelel. Tiang a kmo ng diak di losuub e loltirakl a telib el blekeradel. A chedal a kiei el ngara teletelel a Kristo a ulecholt er a klengar er ngii, el meral ngara rengul.

Morrengeser a okedongel a Apostol el Petrus el mochedal a Osobel:

“Bo le meduch a rengmiu, modekiar a klaumeraer kau er a kldung; e modekiar a kldunger a klemedengei;

“E modekiar a klemedengei er a ultebechelreng; e modekiar a ultebechelreng er a telekangel; e modekiar a telekangel er a omeluu er a Dios;

“E modekiar a omeluu er a Dios er a ulekerreu; e modekiar el ulekerreu el mora rebebil er kemiu er a beltikelreng.”1

Me chelecha el bla mesang tiang, a mo mesisiich el chedal a ousbech er a diak el dil tal omeruul ng betok el omeruul. Sera le temel Osobel, e te mle betok a leko te melemalt er a kuk chimo er a tekoi ra klengar er tir. Te ngar omererull el kumekedong er ngii el kmo di oltirakl a sorir. El ua tiang, te oltirakl er a Chedaol sils meng diak loureor e ngdi te oltuub er a Osobel sel lomekungil er a chedaol sils.2 Te omelecha tenget el mora remechebuul eng di a ikel lomesteris a der—el diak lousbech.3 Te ngar olsengerenger el olecholt el ngar a mederir.4 Te meluluuch leng sorir a le moues ra rechad.5 A Jesus a dilu, “Te me kmeed er ngak lokiu a tekoi el lolekoi, eng di a rengrir a cheroid er ngak.”6 Tirkaikid el chad a mo melasem el mo ungil er a kuk di ta er a belekeradel malechub a omeruul e ng di ng diak a belkul el kmo te chedal el ngara rengrir.

A Jesus a millekoi, el kirir tirkaikid:

“Betok a mo kmu er ngak el kmo, Rubak Rubak, kemam ng dimlak ki mobang ngklem el omlaoch? e ulebang klem el oltobed a mekngit el chelid e meruul a mengasireng el tekoi?

“Isei e ak mo dmu er tir el kmo, ng kmal dimlak kudengel kemiu; bom cheroid er ngak, kemiu el mekngit el chad.”7

A blekerdelel a Osobel, el osenged er ngii, a diak el llechukl el kuk di doltirakl malechub eng blechebechel a tekoi el bo doruul. Aikal a kabekbuk el blekeradel, sel medechel el mora tang, a dmak e mukdubech ra chelsel a rengud. El uatiakid, ng diak el sebeched el nguu a dita el blekerdelel a Kristo e diak doai a ikel bebil malechub el sebechel el mengetikaik ra rebebil. E le sel bo mesisiich er a ta er a blekeradel, me a ikel bebil meng uaisei.

Ngara 2 Peterusme a Doctrine and Covenants section  4, e kede subii el kmo a klaumerang er a Rubak el Jesus Kristo a dodai. Ke de mesa delechel a klaumera er kid ra omeruul el doruul—lokiu otireklel a llach. A Rubak a “mla kmu sel sekum e kede oumerang,” er ngii eng mo rengii a “klisichel el remuul a rokui el tekoi lokiu ngii.”8 A klaumerang a ngodechid. Sel lak a ungil urered, e diak de kedung, e a klaumerang a diak a klisichel ngoikid el mo chedal. Me sel le uaisei, ea klaumerang a ulekeuad.9

Me a, Peterus a silodii, “Mdechelir a klaumeranger a kldung.” A kldung a diak el dil klikiik ra delebois el tekoi. Ng klikiid e chedaol a uldesued ma bedenged. A kldung a dirrek el klisiich. Sel blak a rengud el kiei loltirakl er a ebangkelio, eng morngii a klisiched el mokedung er a rokui el ngara uldesued, domelchesiu, ma doruul. E a rengud a moungil metebengar Chedaol Reng me a Llemesel a Kristo.10 Ke de mo uaia Kristo el diak el dil ngara omelkinged ng dirrek el moteleteled.

A Peterus a millemolem, “Mdechelir el mora kldunger [kau], a klemedengei.” Sel de kiei el kedung, e kede mo medengelii a Demad er a Babeluades me a Ngelekel er a tokubets el teletael. “Alsekum me a chad a meruul a soal [a Chedam], eng mo medengei osisechakl.”11 Tial klemedengei a sioning el blal nguu, el ngiluu ra tekoi el luruul. Tia a klemedengei a ngodechid, maleuaisei e a “llemesed a moultab er a [Llemesel]” me a “kldung el dobang a soal kldung el ngar[Ngii].”12 Ngokiu a kldung el klengar, e kede okiu omerael er a “A kuumerang” el mora klebokel el basio er a “Ak kmedengei.”

A Petrus a melisiich er kid el mo dochelir “a klemedengei er a ultebechelreng; me a ultebechelreng el mora telekangel.”Sel de ultebechel a rengud el chedal, e kede kiei el ngara ebangkelio el tabesul e chelellakl el teletael. Ng diak de “rurt el mo imis ersel [sebeched].”13 Bek el sils e kede merael el bedul medad, el diak de meterob er a omiich el ringel er tial beluulechad.

A de uaisei el ultebechel a rengud, e ng mokdubech a telekangel el oumerang er a Rubak. E kid a mosebeched el ultuil er a blal udesuii el kirel a klengarer kid, ngii mesel lak el sebeched el mes lolab a mad.14 Maleuaisei, eng sebeched e “chelellakl e medengei el kmo [Ngii a] Dios.”15 Sel de chebangel a sesengel a ringel, e ke de oker, “Ngera sel Kau a soam ak subii er tial omeruul?” A Uldesuel me a moktek er Ngii el ngara rengud, e kede merael bedul uchei el diak di doutekangel a rokui ke de bai outekangel lungil el klou a rengud.16

Tial telekangel, ea osisecheklel a Petrus, a ngoikid el mo teletelel a dios. El diua Chedam el klou a rengul el kired, a Rengelekel, e kede mo klou a rengud er a rebebil me kid. Ng soad el chad a sebechel melilt me a techall el mortir el mukeroul “derta el suobel,”17 “el di merael el mo dmiich el mo er sel cherrungel el sils.”18

Meng ngara ultebechelreng el mora telekangel, e ngara telekangel el mora omeluu ra dios, e a blekerdeled a mengodeh. E kid a mo bekururrau el mora ta er kid el ngii a cholechotel a meral chedal. El di uai ngikel Ungil Samaritan, e kede merael mora bita el rael el mo olngeseuer a ngiid el chad lousbech a ngesou, ngii mesel diak el tara resechelid.19 Kede omekngeltengat ra rokui el melbeakl er kid. E meruul a ungil el mo er tirkel ouketui er kid.20 A ngii di el ungil blekeradel di ua teletelel a chelid malechub eng diua Kristo?

Ak kuuchais el kmoselblak a rengud el kirel a mochedal a Osobel eng meral medechel a blekerdelel me er kid dil merkmo bo “dobang” a beltkil a rengul.21 Tial beltikereng a meral teletelel a chedal a Kristo.

“Oomko ng sebechek el melekoi a tekingir a rechad el molmuut ra reanghel, e ng di diak a bltikerreng er ngak, e ak di uaia mekngit a ngerel el tumetum ma lechub eng merreboch el kambalang.

“Ma omko kmeduch el omlaoch, e medenge berrotel el tekingel a Dios, ma rokui el tekoi el lodenge rechad, e oumerang, meng sebechek el ngmukl a rois, e ngdi diak a beltikelreng er ngak, e ng diak a ultutelek.”22

Ng klaumerang, urunguled, ma beltikelreng a rullid meng sebeched a urerel a Dios.23 “Me chelcha e bo molab… aika el edei; e ng di a kot el ngar bab er ngii a dmolech el beltikelreng.”24

Rodam ma rodos, chelecha eng kmal kired, el diak di “douralmsils el chedal”! Ng diak el kired el chedal lokiu a kuk di ta er a osisechakl. A rokui el blekeradel el meskid a klaumerang er a Kristo—uldimukl er ngii a ikel ble dosaod er chelechang—a rokui el dousbech el melisiich er kid er chelecha el uriul klebesei.

Me sel blak a rengud el melasem el mo meral chedal a Jesus Kristo, e a ikal blekeradel a mo mouak, e medechel, el mouldak el melisiich er kid. Ng mo diak a klekakerous er a blekokouii er el doba el mora cherreued me a rsechelid. Ke de meral mo melemalt el chad ngii mesel lak a chad lomes. E meral mo oltiakl er a Dios er a chelsel a buai el ua sel de ngara rekeblid.

A kuuchais el kmo a rokui el chad a sebechir el mo chedal a Osobel. A mo chedal a diak el ultuir ra rekim, shechal ma redil, malechub a beluu el om chad er ngii. Ngokiu a derta el chedal, e kid el Uriul-klebesei el Santo, a toketekii a klisiich el mo omekngeltengat er a rodam me a rodos er kid er tial beluulechad. Chelechang eng mlamo taem el deluut el tibir a rengud el mo chedal el meral blak a rengud.

Rodam me a rodos, ke de rokui el mlokedong el mochedal a Osobel. Mei me tial ongdibel bol techellem el mo “omuchel el diua cheuodel taem, e mei er [Ngii] el oba rengud el rokir.”25 Tiang a Ikelesia er Ngii. Ak kuchotii a sioning er ngak el kmo Ngii a ngar. Bo lomekngeltengak er kid er a meral blakelreng er kid el merael mo mesisiich el chedal. El loba ngklel a Jesus Kristo, amen.