2010–2019
Wiahla Werek en atail Kaun Sises Krais
Epreil 2017


Wiahla Werek en Atail Kaun Sises Krais

Wiewia mwahu kan koaros me kin kohsang ni atail kin pwoson Krais kin konehng kitail nan atail nananti ni imwin rahn akan.

Ia wehwehn en wia werek en atail Kaun Sises Krais? Werek en Sises Krais wia aramas emen me pepdaisehr oh piladahr en alehda mwaren Sounkomouro oh idawehn Ih. Werek en Sises Krais men kin nantihong en duwehla Ih sang ni eh pahn kapwaiada kosonned en mour wet, duwehte aramas emen me ahpwtehnkaskasukuhlda oh kin songosong en duwehla ah kauno.

Aramas tohto kin rong lepin lokaia werek oh medewe me e wehwehkihte “me kin idawehn.” Ahpw werek mehlel men wia aramas emen. Met kin anahne kitail en wia laudsang onopte oh wiewia en aramas emen. Werek en Sises Krais kan kin nantihong wia wiewiahn Krais kan pwehn kasalehda ihs irail ni palingehn.werek

Rong ahnWahnparon Pihter luhk me pid kitail en wiahla werek en Sounkomouro:

“Wia uwen amwail kak, kapatahiong amwail pwoson wiewia mwahu; oh kapatahiengwiewia mwahu marain;

“Oh ong marain kanengamah; oh ong kanengamah meleilei; oh ong meleilei poadidi;

“Oh ong poadidi kadek en perien; oh ong kadek en perien limpoak mehlel.”1

Ni duwen ahmw kak kilang, pwehn wiahla werek kehlail oh sarawi men kin anahne kitail en wia me tohto sang ehute. Nan rahn akan en Sounkomouro, me tohto me kosoaia me irail wia aramas pwung kei nan soangen ahl tohto. Irail kin wia dahme I kahdaniki pilada peik. Karasepe, Irail kapwaiada kosonned en wauneki rahn en sapad ahpw kawehki sounkomouro Ah ketin kamwahuiala aramas rahn sarawio.2 Irail kin kiheng mwohni rehn aramas akan ahpw ithe mwohni— irail sohte anahne.3 Irail kin wiahda mesen luwet ansou me irail kin kaisihsol.4 Irail kin kapakap ngihl laud pwe koaros en kak rong.5 Sises mahsanih, “Irail kin karanihie ni kilin ewerail kan, ahpw arail mongiong kan kin dohsangie.”6 Soangen aramas pwukat kin kilkilangete pwehn mwahu nan wiewia de mwekid ahpw irail sohte kak duwehla Ih nan arail mohngiong kan.

Sang ni mepwukat, Sises mahsanih:

“Ni rahn en kadeiko eh pahn leledo, me tohto pahn ndahngie, Kaun, Kaun, se saikinte kohpada ni mwaromwi? oh ni mwaromwi se kausalahr tepel kan? oh ni mwaromwi se wiadahr kidelepen doadoahk kaselel?

“Oh eri I pahn ndahieng irail, me I sehseikumwail: kohkohwei sang ie, kumwail me mour suwed kan.”7

Wiewia ken en Sounkomouro, me kitail wehwehkiher, sohte wia kisin likou ntingdi ieu me kitail anahne idawehn de kileledi en soahng kan me kitail anahne kapwaiada. Wiewia pwukat wia wiewia kei me konehng, lalaudla, me kin keirda nanloaletail kan nan soangen ahl kei. Ni ekei kawehwe, kitail sohte kak alehdi ehu wiewiahn Krais oh sohte alehdi doadoahngki mehteikan. Ma ehu wiewia pwukat kin kehlail la, a me tohto pahn pil kehlailla.

Nan 2  Piter oh nan Doctrine and Covenants iralaud  4, kitail esehla me pwoson Kaun Sises Krais me wia poahsoan. Kitail kin kilang uwen atail pwoson sang dahme kitail kin wia—sang niatail peik. “Ma kumwail pahn pwoson ie,” Kauno ketin inoukidahr me, “kumwail pahn ahneki manaman en wia mehkoaros me kin konehng pahi.”8 Pwoson kin kihong kitail dahme kitail en kamwahuiala. Ma sohte doadoahk, sohte mour mwakelekel, atail pwoson pahn sohte ahneki manaman en kahrehda wiewia mwahu. Ni mehlel, pwosono mehla.9

Oh, Piter pil kawehwe, “Kapatahiong amwail pwoson wiewia mwahu.” Wiewia mwahu wet laudsang momourikihte kosonned en mwakelekel. E kin anahne mwakelekel oh sarawi nan madamadau oh paliwar. Wiewia mwahu pil wia manaman. Ma kitail pahn momouriki rongamwahuo, kitail pahn ahneki manaman en kin mwakelekel nan madamadau koaros, pepehm, oh wiewia. Atail madamadau kan kin mengeiengala idawehm Ngehn Sarawi oh Marain en Krais.10Kitail kin duehla Krais kaidehnte ni atail koasoai oh wiewia ahpw pil ihs kitail.

Piter doulahte, “Kapatahieng ahmw wiewia mwahu, marain.” Ni atail kin momouriki mour mwakelekel, kitail kin karaniala Samatail Nanleng oh Sapwellime Ieros nan soangen ahl ehu me kesemwpwal. “Mehmen me pahn wia kupwur en [Sahmo], e pahn ese duwen padahk wet.”11 Marain wet wia ahn emen kadehde, me kin kohsang ni dahme e kin lelohng. Dehdehki koht kin wekidkitailla, pwe atail “marain en kak patehng Sapwelime marain” oh atail “wiewia mwahu kin poakohng Sapwellime wiewia mwahu.”12Sang ni atail wiewia mwahu, kitail kin sohla koasoaiahte “I kamehlele” oh kin koasoaia “I ese.”

Piter kaweidekinkitail en kapatahiong “dehdehki Koht ese kaunda paliweramwail; oh ese kaunda paliweramwail kanengamah.” Kitail sohte kak “tang marahra sang [atail] kehl.”13 Rahn koaros kitail kin kohkohla mwowe, oh kin mihla pahn kasongosong kan en sampah.

Ma kitail pahn kanengahmah nan soangen ahl wet, kitail kin kakairada meleilei oh koapwoaroapwoarki Kauno. Kitail kak kasik sapwellime koasoandi ong atail mour, mendahte ma kitail sohte kak kilangki mesetail kan.14 Eri, kitail pahn kak “ahneki meleilei oh ese me Ih iei Koht.”15 Ansou me kitail kin lelohng kahpwal, kitail kin peki, “Komw kak ketin seweseie pwe I en koledi mehkot sang kahpwal wet?” Sang ni Sapwellime pilahn oh koasoandi kan nan atail mohngiong kan, kitail kin wenla mwowe oh powehdi soahng koaros kaidehnte ni kanengamah ahpw kin pweida.16

Kanengamah wet, me Piter padahngki, kahluaikitail ong mour en kauno. Nin duwen Sahmo eh kin ketin kanengamahieng kitail, Sapwellime seri kan, kitail pil kin kanengamahiong mehteikan oh pil pein kitail. Kitail kin kesemwpwaliki pilipil en mehteikan oh ansou mwahu me e kin kihong irail en kekeirda “ekis ekis,”17 “marainla lao unsekla.”18

Sang wiewia mwahu ong kanengamah, oh sang kanemngamah ong mour en kauno, mwomwetail kan kin wekila. Kitail kin alehda kadek ong mehteikan me kin kasalehda werek mehlel men en Krais. Duehte mehn Sameria Mwahuo, kitail kin kotehkihla ahl akan pwehn padahkohng irail akan me anahne sawas, mendahte ma irail sohte wia kempoakepahtail.19 Kitail kin kepeia irail akan me kin kerieikitail. Kitail kin wia me mwahu ong me kin luduhkinkitail.20 Mie ehu soangen wiewia me sarawihsang de duwehte wiewia en Krais?

I kadehdehki me soahng koaros me kitail kin natihong wia pwehn wiahla Werek en Sounkomouro kin lalaudla lao kitail kin “alehdi” Sapwellime limpoak.21Limpoak wet iei wiewia me kawehwehda duwen emen werek en Krais:

“Mendahte ma I lokaiahki lokaiahn aramas oh tohnleng kan, ahpw ma I sohte ahneki limpoak unsek, I pahn duwehte ngilen koronihda, de ngilen mehn keseng me mete.

“Oh mendahte ei ahneki kisakis en kohpada, oh wehwehki soahng kopwuriamwei koaros, oh marain koaros, oh mendahte ei ahneki pwoson laud, me pahn kahrehda ei kak kamwakid dohl akan, ahpw sohte ahneki limpoak unsek, sohte ngehi mehkot.”22

Iei pwoson, koapwoaroapwoar, oh limpoak unsek me kitail anahne ahneki pwehn wia doadoahk en Kauno.23 “Oh met dadaur … soahng silu wet; ahpw me keuieu laud sang mepwukat iei limpoak unsek.”24

Riei ohl oh lih oko, met me laudsang koaros, kitail sohte kak wia werek en Krais ekeite ansou”! Kitail sohte kak wia werek en Sises Krais emen ni soangen padahk ehu de pilehu. Soangen wiewia kan me kin kohsang pwoson Krais—iangahki mehkan me kitail koasoaiapenehr rahnwet—udahn pahn seweseikitail en kak uhda kehlail nan imwin rahn pwukat.

Ni atail pahn wia uwen atail kak koaros pwehn wia werek mehlel kei en Sises Krais, soangen wiewia pwukat pahn tengedi, kekeirda, oh kehlailla nan loaletail kan. Sohte wekisang en impai me kitail ahneki ong atail imwin tihti kan oh me kitail kin kiheng kempoakepahtail kan. Kitail pahn kak mehlel ansou me sohte me kilkilang kitail pil duwehte ansou me mehteikan kilekilang kitail. Kitail pahn mehlelieng Koht ansou me kitail kin patehng mehteikan duwehte atail kin kelehpw nan atail pere.

I kadehdehki me koaros kak wia werek en Sounkomouro. Kaidehnte uwen sounpar ehu, ohl de lih, de tiahk, de me ahneki pwukoah me kak wiahla werek en Krais. Sang ni ahn emen emen kitail atail wiewia mwahu, kitail, ni duwen atail wia Souleng en Imwin Rahn Akan, kakairada kehl en sewese riatail ohl oh lih akan nan sampah pwon. Met iei ansou me kitail anahne pwurehng inoukihda me kitail pahn wia Sapwellime werek ni uwen atail kak koaros.

Riei ohl oh lih akan, kitail koaruhsie malipilipohngehr wia werek en Sounkomouro. Mweidohng tiepene wet en wia amwail ansou mwahu en “tepida duwehte mahso, oh kohdo [Reh] ni mohngiongimwail unsek.”25 Sapwellime mwomwohdiso met. I wia ahi kadehde tohrohr me E ketin ieias. En ketin kapaikitailda nan atail ansou reirein ropirop en wiahla tohnpadahk ngoang oh sarawi.. Ni mwaren Sises Krais, amen.