Ci Loj Zuj Zus Mus txog Hnub uas Zoo Tag Nrho
Txawm yog ib lub sij hawm nyuaj tshaj plaws thiab tsaus ntuj nti los, tseem muaj qhov kaj thiab qhov zoo nyob ib puag ncig peb.
Povlauj tau hais ib zaj lus txog kev cia siab rau cov Neeg Kauleethaus:
“Peb niaj hnub raug kev nyuaj siab, tiam sis peb tsis poob siab; muaj qee zaus peb kawg tswv yim, tiam sis peb tsis tws kev;
“Peb raug luag tsim txom, tiam sis Vajtswv tsis tso peb tseg, luag muab peb ntaus ntog tiam sis peb tsis tuag.”1
Lub hauv paus ntawm Povlauj txoj kev cia siab yog dab tsi? Cia li mloog seb nws piav li cas: “Tus Vajtswv uas hais tias, qhov kaj cia li ci hauv qhov tsaus ntuj tuaj, tus ntawd yog tus Vajtswv uas ua kom qhov kaj ci tuaj rau hauv peb lub siab, qhia kom peb paub Vajtswv lub hwj chim uas ua rau Yexus Khetos lub ntsej muag ci ntsa iab.”2
Txawm yog ib lub sij hawm nyuaj tshaj plaws thiab tsaus ntuj nti los, tseem muaj qhov kaj thiab qhov zoo nyob ib puag ncig peb. Lub Kaum Hli Ntuj tas los, Thawj Tswj Hwm Dieter F. Uchtdorf hais kom peb nco ntsoov tias, “Nyob ib ncig ntawm peb muaj qhov kaj thiab qhov tseeb ntau … es kuv xav paub saib peb puas saib tej ntawd rau nqi tiag tiag.”3
Tiam sis, tus yeeb ncuab yeej xav kom peb tsom ntsoov rau “tej kev tsaus ntuj uas muaj huab zig niab … uas npog noob neej tej qhov muag … ua kom noob neej tej siab tsis mloog lus … , thiab kom lawv … ploj mus.”4
Txawm li ntawd los, tus Tswv to taub zoo tag nrho peb tej teeb meem niaj hnub nim no, es Nws cog lus tias, qhov uas yog Vajtswv li yog qhov kaj; thiab tus uas txais qhov kaj, thiab mus ntxiv nrog Vajtswv, yuav txais qhov kaj ntxiv; thiab qhov kaj ntawd yuav ci loj zuj zus mus txog hnub uas zoo tag nrho.5
Peb yog Vajtswv cov me nyuam. Nws twb tsim peb kom peb txais qhov kaj, mus ntxiv nrog Vajtswv, thiab txais qhov kaj ntxiv. Txij thaum chiv keeb los, peb twb coj raws li qhov kaj; peb tau coj raws li Leej Txiv Saum Ntuj Ceeb Tsheej thiab Nws txoj hau kev. Peb sab ntsuj plig yeej xav nrhiav qhov kaj.
Kuv tau hnov qhov tseeb nyob mus ib txhis nyob hauv ib qhov chaw uas tsis tau xav tias yuav hnov. Thaum kuv ua hauj lwm rau ib lub tsev txhab nyiaj loj, lawv caw kuv koom ib hoob kawm rau cov thawj coj nyob ntawm lub tsev qib siab University of Michigan. Nyob hauv hoob kawm, tus Xib Hwb Kim Cameron qhia txog lub ntsiab cai ntawm kev ua ib tug thawj coj zoo thiab qhov uas ua rau tib neeg mus rau qhov kaj. Nws piav hais tias: “Qhov no hais txog qhov uas tag nrho txhua yam uas muaj txoj sia yeej nrhiav tej yam uas muaj qhov kaj thiab txav deb ntawm tej yam uas tsis muaj qhov kaj. Tsis hais tej yam me me thiab yooj yim los yog tib neeg tej txheej txheem uas loj loj heev, txhua yam uas muaj txoj sia yeej xav tau tej yam zoo thiab txav deb ntawm tej yam tsis zoo.”6
Muaj kev tshawb fawb uas txhawb nqa nws tej lus, es nws thiaj li hais txog peb lub ntsiab cai ntawm tej kab lig kev cai zoo nyob hauv yus qhov chaw ua hauj lwm: kev khuv leej, kev zam txim, thiab kev ris txiaj.7 Qhov uas tib neeg xav tau qhov zoo (qhov kaj) yeej yog qhov tseeb, vim txoj Kev Kaj ntawm lub Ntiaj Teb, Yexus Khetos, tau coj yam ntxwv txog tej cwj pwm zoo li no!
Cov kwv tij thiab cov muam, thov kom nej txais kev nplij siab hais tias yeej muaj qhov kaj uas peb txais tau. Cia kuv hais peb yam uas ua rau peb yeej nrhiav tau txoj kev kaj.
1. Lub Koom Txoos txoj Kev Kaj
Lub Koom Txoos yog txoj kev kaj rau ib lub ntiaj teb uas tsaus ntuj zuj zus tuaj. Yeej yog ib lub sij hawm zoo kawg ua ib tug mej zeej nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Lub Koom Txoos no yeej muaj dag muaj zog tshaj yav tas los8 thiab muaj zog tuaj txhua hnub thaum cov mej zeej tshiab koom peb, tsim tej pawg ntseeg tshiab, hu cov tub txib ntxhais txib tshiab, thiab tej qhov chaw tshiab qhib rau lawv qhia txog txoj moo zoo. Peb pom cov uas tsis tshua muaj siab ntseeg lub Koom Txoos rov qab los uas yog los ntawm tej txuj ci tseem ceeb txhua hnub raws li Thawj Tswj Hwm Thomas S. Monson qhia tias yuav muaj thaum peb mus cawm tib neeg.
Tsis ntev tas los kuv mus xyuas cov tub hluas ntxhais hluas nyob hauv Paraguay, Uruguay, Chile, thiab Argentina thaum lawv ua rooj sab laj txog kev Ntxiv Dag Zog rau cov Tub Hluas Ntxhais Hluas. Muaj ob peb txhiab tub hluas ntxhais hluas uas siv ib lub lim piam kom lawv txoj kev hlub tus Cawm Seej muaj zog tuaj ces lawv rov qab mus tsev ua kom txoj kev kaj thiab txoj kev hlub ntawm Khetos ci ntsa iab rau lawv tsev neeg thiab cov phooj ywg.
Nim no, yeej yuav muaj neeg uas thuam lub Koom Txoos. Yeej ib txwm zoo li ntawd thiab yeej yuav muaj li ntawd mus txog thaum kawg. Tiam sis peb yuav tsum tsis txhob cia lawv txoj kev thuam ua rau peb tsis hnov qhov kaj uas peb txais tau. Kev paub qhov kaj thiab kev nrhiav qhov kaj yuav ua rau peb txais tau qhov kaj ntxiv.
Nyob hauv ib lub ntiaj teb uas tsaus ntuj zuj zus tuaj, lub Koom Txoos txoj kev kaj yuav ci loj zuj zus mus txog hnub uas zoo tag nrho!
2. Txoj Moo Zoo txoj Kev Kaj
Txoj moo zoo txoj kev kaj yog txoj kev uas “ci zuj zus mus txog hnub uas zoo tag nrho lawm,”9 thiab ci ntsa iab tshaj plaws nyob hauv peb tsev neeg thiab cov tuam tsev nyob thoob plaws lub ntiaj teb.
Phau Qhia Kuv txoj Moo Zoo hais tias: “Los ntawm qhov kaj ntawm txoj moo zoo, tsev neeg daws tau lawv tej kev tsis sib haum, kev sib cav sib ceg, thiab tej teeb meem. Tej tsev neeg uas tau tawg los ntawm tej kev tsis sib haum rov qab los nyob ua ke tau los ntawm txoj kev hloov siab lees txim, kev zam txim, thiab kev ntseeg lub hwj chim ntawm Yexus Khetos txoj Kev Theej Txhoj.”10 Tam sim no yog lub sij hawm tseem ceeb heev uas peb tsev neeg yuav tsum ua txoj kev kaj ci ntsa iab rau txhua tus nyob ib puag ncig. Tsev neeg yuav kaj zuj zus ntxiv thaum lawv haj yam muaj kev hlub thiab ua siab dawb siab zoo. Thaum peb ua rau peb tsev neeg muaj “kev ntseeg, … kev hloov siab lees txim, kev sib haum xeeb, kev hlub, [thiab] kev khuv leej,”11 peb txhua tus yuav hlub tus Cawm Seej ntxiv thiab ib leeg hlub ib leeg ntxiv. Peb tsev neeg yuav muaj zog tuaj, thiab txoj kev kaj nyob hauv peb txhua tus yuav ci ntsa iab tshaj.
Phau Bible Dictionary qhia peb tias, “Tsuas yog lub tsev thiaj li muaj piv tau rau qhov dawb ceev hauv lub tuam tsev.”12 Tam sim no peb muaj 155 lub tuam tsev thiab yuav muaj ntxiv thaum yav tom ntej. Muaj tsev neeg ntau ntxiv uas ua kev sib khi ua ke rau lub sij hawm no thiab mus ib txhis li. Cov mej zeej xa tej npe tshiab ntau ntxiv rau lub tuam tsev kom ua kab ke cawm seej rau lawv cov poj koob yawm txwv. Peb muaj kev xyiv fab thiab ua koob tsheej nyob ob sab ntawm daim ntaub thaiv tiag tiag!
Nyob hauv ib lub ntiaj teb uas tsaus ntuj zuj zus tuaj, txoj moo zoo txoj kev kaj yuav ci loj zuj zus mus txog hnub uas zoo tag nrho!
3. Khetos txoj Kev Kaj
Yus yeej hais tsis tau txog txoj kev kaj nyob hauv lub ntiaj teb yog tias yus tsis hais txog txoj Kev Kaj ntawm lub Ntiaj Teb, uas yog Yexus Khetos. Qhov uas qhia tias peb Leej Txiv Saum Ntuj Ceeb Tsheej hlub peb yog qhov uas Nws foom koob hmoov rau txhua leej txhua tus kom muaj Khetos txoj Kev Kaj pab lawv rov qab los tsev. Thawj Tswj Hwm Boyd K. Packer qhia hais tias: “Khetos tus Ntsuj Plig yeej nyob. … Khetos txoj Kev Kaj yeej nyob txhua qhov chaw ib yam li hnub ci. Tib neeg nyob qhov twg los, yeej muaj Khetos tus Ntsuj Plig nyob ntawd.”13 Khetos txoj kev kaj “caw thiab yaum kom ua zoo”14 thiab npaj txhua tus uas nrhiav qhov zoo thiab qhov tseeb kom txais tau tus Vaj Ntsuj Plig Dawb Huv.
Tus Cawm Seej qhia tias Nws yog txoj kev kaj uas ua rau nej lub qhov muag pom kev, txhawb nej txoj kev to taub, thiab ua rau txhua yam muaj txoj sia.15 Khetos txoj Kev Kaj yuav pab peb pom lwm tus zoo li tus Cawm Seej pom lawv. Peb yuav hlub thiab to taub lwm tus tej teeb meem ntxiv. Yuav pab peb ua siab ntev rau cov uas tsis teev tiam Vajtswv zoo li peb los yog tsis ua hauj lwm pab lwm tus zoo li peb. Yuav pab peb to taub txoj hau kev zoo siab ntxiv thiab pom hais tias peb txhua tus muaj feem nyob hauv txoj hau kev ntawd. Ua rau peb muaj lub hom phiaj thaum peb ua txhua yam. Txawm yog peb yuav zoo siab kawg thaum peb haj yam to taub Khetos txoj Kev Kaj los, peb yeej yuav tsis muaj kev xyiv fab npaum li thaum peb pom Khetos txoj Kev Kaj nyob hauv lwm tus: peb tsev neeg, phooj ywg, thiab cov neeg uas peb tsis paub.
Kuv muaj kev xyiv fab zoo li ntawd thaum kuv hnov txog ib pawg neeg tua hluav taws uas sib zog cawm ib lub tsev ceg txheem ntseeg nyob hauv California Sab Qab Teb thaum xyoo 2015. Hluav taws kub heev, es tus thawj coj ntawm pawg tua hluav taws hu ib tug phooj ywg LDS seb cov khob txais lub cim nco txog thiab tej cuab yeej dawb ceev nyob qhov twg es lawv thiaj cawm tau tej ntawd. Nws tus phooj ywg qhia nws tias tsis muaj cuab yeej dawb ceev li ntawd thiab cov khob txais lub cim nco txog tsis ua li cas vim yooj yim yuav tshiab. Tiam sis tus thawj coj xav tias lawv yuav tsum ua ntxiv, nws thiaj li txib nws pawg neeg tua hluav taws rov qab mus hauv lub tsev uas tseem kub hnyiab khaws txhua daim duab txog Yexus Khetos cia kom cawm tau. Lawv kuj tso ib daim duab nyob hauv lub tsheb vim lawv cia siab tias Vajtswv yuav saib xyuas cov neeg tua hluav taws ntawd. Tus thawj coj txoj kev ua siab dawb siab zoo thiab txoj kev txawj hnov txoj Kev Kaj tshoov kuv lub siab thaum ib lub sij hawm nyuaj thiab plhom sij heev.
Nyob hauv ib lub ntiaj teb uas tsaus ntuj zuj zus tuaj, Khetos txoj Kev Kaj yuav ci loj zuj zus mus txog hnub uas zoo tag nrho!
Kuv rov qab hais Povlauj tej lus hais tias: “Peb yuav tsum muab tej cuab yeej tiv rog ntawm txoj kev kaj los hnav.”16 Kuv ua tim khawv txog tus Khetos. Nws yog txoj Kev Kaj ntawm lub Ntiaj Teb. Thov kom peb yuav txais dag zog los ntawm txoj kev kaj ntawm kev koom ua ke ntau dua nyob hauv lub koom txoos thiab kev ua raws li tej ntsiab cai ntawm txoj moo zoo nyob hauv peb tsev neeg. Thov kom peb yuav pom Khetos txoj Kev Kaj nyob hauv lwm tus thiab pab lawv pom nyob hauv lawv tus kheej. Thaum peb txais txoj kev kaj ntawd, peb yuav tau koob hmoov uas yog txoj kev kaj ntxiv, mus txog thaum hnub zoo tag nrho thaum peb pom “Leej Txiv ntawm cov teeb,”17 peb Leej Txiv Saum Ntuj Ceeb Tsheej. Kuv ua tim khawv li no los ntawm txoj Kev Kaj ntawm lub Ntiaj Teb lub npe, uas yog Yexus Khetos lub npe, amees.