2010–2019
Maramarainla lau lel rahn en unseklao
Epreil 2017


Maramarainla lao lel Rahn en Unseklao

Mehndahte ansou apwal oh rotorot, mie marain oh mwahu kan kin kapel kitail pene.

Paul ehukiong mehn Korint kan padahk en koapworopwor kaselel ehu:

“Kitail kin ale kahpwal wasa koaros,ahpw sohte kin masepwehkada; kitail kin pwunodada, ahpw e sohte kin kihsang atail koapwoaroapwoar;

“Kalokolok ahpw sohte udihsang; pwupwidi, ahpw sohte ohla.”1

Dahme kiheng ahn Paul koapwoaroapwoar? Rong ah pasapeng: “Iei Koht, me mahsaniheng maraino en dakada nan rotorot, pil dakeradahr nan atail mohngiong kan, pwe en ketikiheng kitail marain en loalokongkihla me lingan en Koht kin sansalda sang ni silangin Sises Krais.” 2

Mehndahte nan ansou apwal oh rotorot laud, mie marain oh mehkot mwahu kin kapelkitailpene. Oakotohpe samwalahro, Presiden Dieter F. Uchtdorf kataman kin kitail me, “Lapalahn marain oh mehlel kapel kitailpeneher me I men ese ma kitail pwungki mehlel dahme kitail ahniki.”3

Ahpw, sehdan pahn kakete kol kitaildi ong nan “rotorot mosul … me pahn kakete karotongala mahs akan, … kakeluwakiala … mohngiong kan … , oh … kahluwai … kitail sang.”4

Ahpw, sang ni esehla mehlel kahpwal akan en rahn pwukat, Kauno ketin inoukihda me: “Mehkot me pid Koht iei marain; mehmen me kin alehda marain, oh momourki Koht, kin alehdi marain laud; oh maraino pahn wie maramarainla lao lel rahn en unseklao.”5

Kitail seri en Koht kei. Kin aliale marain, wie momouriong Koht, oh kalkalaudehla atail marain iei ihme kitail kepikipikda en wia. Sangete ni tapio, kitail kin idawehn maraino; kitail kin idawehn Samatail Nanleng oh Sapwellime koasoandio. Rapaki maraino me pali ngenitail kan udahn pahn kin wia.

I rongehr mehlel poatoapoat wet me padahkpe inenen kaselel nan wasa ieu me I sohte kasik. Ansou me I wie doadoahk ong lapalahn bank ehu, I ahpw lukong I en towehda program ehu nan University en Michigan. Ansou me programo tepda, Professor Kim Cameron kasukuhlki iren madamadau en kaun mwahu oh soahng kan me pahn wekidekla sang sounkaweid mwahu. E kaweweh me: “Met me pahn sewese system koaros me momour ong nan positive energy [marain]oh kohsang nan negative energy [rotorot]. Sang single-cell organisms ong complex human system, soahng koaros me momour sosohki pilipil en kohla nan marain oh kohsang nan rotorot.”6

Mehn sewese kaludehla kaskuhl kan, e pil doulahte koasoaia soahng siluh me kesemwpwal me wia kisehn kepweipen doadoahk kan: limpoak, mahk, oh kaping kalahngan.7Met udahn e sansal mwahu pwe ma aramas pahn sohpeilahng [marain] mehlelo, atail wiwia oh karasaras kin mwahula sang ni Marain en Sampah, Sises Krais, iei Ih maraino!

Riei ohl oh liho kan, menlao kamehlele me mie marain kohieng kitail. I kak kaweid kinkitail wasa siluh me kitail pahn kalapw diarada ie marain:

1. Marain en Mwomwohdiso

Mwomwohdiso iei mehn kamarain lingaling ehu ong sampah rotorot wet. Met wia ansou mwahu ehu ken wiahla tohn Mwomwohdiso en Sises Krais en Souleng en Imwin-Rahn akan! Mwomwohdiso wet kekehlailla sang mahs8 oh wie kekeirda nan ehu ehu rahn akan ansou me towe kapw kan kin iangkitala, pwihn tohto kokouda, tohto me kin malipil ong misineri, oh wasa tohto ritidahr ong rongamwahuo. Se kilang irail kan me solahr kohdo pil pwurpwurodohr sang ni kaudial me kohieng Presiden Thomas S. Monson kin wahdo manaman nan ehueheu rahn akan.

Rahnteiko I pwarek irail pwihn pwulopwul kan en Paraguay, Uruguay, Chile, oh Argentina ni ansou me irail wia arail kapokon kan en For the Strenght of Youth. Erein wihk ehu mwahnakapw oh peinakapw kid samwa kangkakehlailih arail limpoak ong sounkomouro, irail ahpw pwuralahr rehn arail peneinei kan oh kempoakepahrail kan oh kasalehiong irail maraino oh limpoak en Krais.

Kilang, miehte me pahn kin kawe de kailongki Mwomwohdiso wet.Iei me wiewiawihier ni tapio oh pil pahn wiewiawihte lao lel ni imwi. Kitail sohte kak mweidohng soagen kailok pwukat en kihsang kitail marain me mie ong kitail. Pohnese maraino oh raparapahki maraino pahn kalaudehla marain me miher rehtail.

Sampa pahn wie rotorotala, ah marain en Mwomwohdiso pahn dakada oh wie maramarainla lao lel rahn en unseklao.

2. Marain en Rongamwahuo

Marain en rongamwahuo iei ahl en marain me “pahn wie dakadak lao lel rahn en unseklao, ”9 oh e kin dakada lingaling nan atail peneinei kan oh nan tehnpas sarawih kan wasa koaros nan sampah.

Preach My Gosple masanih me: “Sang ni marain en rongamwahuo, peneinei kan kak kamwahuiala sawewe kan, akamai kan, oh kahpwal akan. Peneinei kan me kin okihla sohte wewepene kak mwahula sang ni arail pahn koluhla, mahkpene, oh pwoson manaman en Sawpellimen Sises Krais Tomwo.”10 Met kohla, atail peneinei udahn pahn wia mehn kamarain mwahu ong irail kan me mihmi limwahtail. Marain pahn laudla nan peneinei ma irail pahn kalaudehla limpoak oh kadek. Ma atail peneinei kan pahn poahsoankihda “pwoson, … koluhla, mahk, wahu, limpoak, [oh] pohnese mehteikan,”11 kitail pahn kehn atail limpoak ong Sounkomouro oh emen emen eh wie lalaudla. Peneinei pahn kehlaila, oh maraino pahn wie kekeirda loalatail.

Kitail wadekehr nan Bible Dictionary me, Ihte imwatail kan me kak rasehng tehnpas sarawi me sarawi.”12 Ansouwet atail tehnpas sarawi 155 wie doadoahkehr oh ekei pil pahn wiawihda ansou keren. Peneinei tohto me katengtengpenehr ong mour soutuk. Towe kan pil walahngehr ahd tohto en arail peneinei kan me melahr nan tehnpas sarawi pwe irail en welianiraildi oh wiada tiahk sarawi kan. Kiheng kitail popohl laud oh pil perperenkiehr atail esehier dahme wiewiawi paliet oh palio veilo!

Sampa wet pahn wie rotorotala, ah marain en rongamwahuo pahn maramarainla lao lel rahn en unseklao.

3. Marain en Krais

Ke sohte kak koasoaia marain nan sampah ma ke sohte pahn koasoaia Marain en Sampah, Sises Krais. Kasansal en limpoak me sang rehn Samatail Nanleng iei me koaros me kohdo nan mour wet kapaikidahr Marain en Krais pwe ih me pahn kapwurei itailla Reh. Presiden Boyd K. Packer padahngki me: “Ansou koaros Ngehn en Krais kin ketiket mwo. … Marain en Krais iei marain en ketipin nan sampah. Wasa koaros me mour mie iei Ngehn en Krais.”13 Marain en Krias “kin luke oh kiheng ineng en men wiewia tohr me mwahu”14 oh kaunopada koaros me kin raparapahki me mwahu oh mehlel irail en alehdi Ngehn Sarawi.

Sounkomouro padahngki me Ih me maraino me kin “kamarainiada pworen mesemw kan,” “kamwadangahla ahmw wehwehki,” oh “kiheng mour ni soahng koaros.”15 Marain en Krais pahn seweseikitail en kilang mehteikan sang ni sihlanginmedewe Sounkomouro l. Kitail pahn poakepoake oh wewekihla laud arail kahpwal akan. E pahn sewese kalaudehla atail kanengamah ong irail kan me sohte iang atail Mwomwohdiso. E pil pahn seweseikitail esehla koasoandi lapalap en pereno oh esehla me kitail me wia kisehn koasoandien limpoako. E kin kiheng kitail mour, weweh oh kahrepen mehkoaros me kitail kin wia. Uwen peren koaros me pahn kodohng kitail sang ni atail pahn esehla laud Marain en Krais, sohte pahn pahrekiong popohl me kitail pahn kehn ni ansou me kitail pahn kilang Marain en Krais eh pahn doadoahk rehn mehteikan—peneinei, kempoakepahtail kan oh pil aramas torohrteikan.

Kilel
Sewese kakunla imwen mihting luldao

I pehmehr soangen pepehm en popohlo ni ansou me I rongada pwihn en kokun kisiniei komwad ehu arail song irail en sewese stake center me mihmi nan Southern Californiahu nan Sulai en pahr 2015. Ni ansou me kisinieio lulidao, kaun en pwihno ahpw eker emen irail me iang atail Mwomwohdisoht oh idek iawasa me dipwsou kesempwal kan kin wie nekinekie oh kep en kamadipw sarawih ko pwe irail en kak alehdi. Kempoakepao ndahng me sohte mehkot kesemwpwal oh kep kan irail kin kasauseli. Ahpw arail kauno ahniki pepehm en wia mehkot, eri e pwurehng kadarala pwihno nan ihmw lullulo pwe irail en kihdihsang kilel en Sises koaros me wie langalang ni dihd ko pwe ren dehr lulla. Irail kihdi ehu nan sidohsahn kokun kisinieio pwe re koapwoaroapwoarki me irail pahn kak apwalih, mehkot sairie ni ansou me I rongada uwen kadek, mwahu oh mwadang en pehmada Maraino ahpw mehlel nan ansou keper oh apwal wet.

Kilel
Kidihsang kilel en sounkomouro koaros pwe ede lulla
Kilel
Soun kokun kisinieiko iangahki kilel en Sounkomouro

Sampa wet pahn wie rotorotala, ah Marain en Krais pahn dakada oh marmarainla lao lel rahn en unseklao!

I pil men kapwurehieng dahme Paul mahsanih me: “Kitail kapwatikihda tetehn mahwin en maraino.”16 I kadedehki Krais. Ih me Kamarainpen sampah. I koapwoaroapwoarki me kitail pahn kehlailkihda marain me kohiengkitailo sang ni atail pahn kin patehng soahng koaros me kin wiawi nan Mwomwohdiso oh momourki padahk en rongamwahuo nan atail peneinei kan. Pwe kitail en pil kak kilang Marain en Krais loalen mehteikan oh seweseirail pwe irail en kak pein kilangada. Ansou me kitail pahn alehda maraino, kitail pil pahn kapaikihda marain laud, lao lel rahn en unseklao ansou me kitail pahn pwurehng kilang “Atail Pahpah en maraino ,”17iei Samatail Nanleng. I kadedeh ni mwar sarawi en Marain en Sampah, iei Sises Krais, amen.