Weteaki nakon te Mwakuri

Ni katoa ririki tebwina tengaa ataeinimwaane ao ataeinnaine, ao a mwaiti taanga aika a kara, aika a ingainga ni kan karekei aia reta ae onoti mai Salt Lake City. Kanoan te reta e roota te aomata n aki toki are e kanakoaki nakoina, n ai aroia naba kaain te utu ao mwaitiia riki aomata tabeman. Inanon rokona, te tinaniku e na bae ni karauaki ni kaukaki raoi ma te taonaki n nano ke n ienikuri ni kaukia ma te kukurei. Warekan te reta ae onoti aei bon te namakin ae aki kona ni mwanuokinaki.

Te reta e tiainaaki iroun te Beretitenti n ana Ekaretia Iesu Kristo ibukiia Aika Itiaki ni Boong Aika Kaitira, ao moan taekan tiententi aika uoua a warekaki n aron ane imwiina: Ko weteaki n taekan te reta bwa ko na beku bwa te mitinare n ana Ekaretia Iesu Kristo ibukiia Aika Itiaki ni Boong Aika Kaitira. Ko mwiokoaki bwa ko na mwakuri n te ______ Mition.”

Taiaoka n ataia bwa te moan tiententi bon te wewete ni beku n aron te mitinare ae bwanin ana tai n ana Ekaretia te Uea ae e a tia ni kaokaki. Te kauoua n tiententi e kaotaki te mwioko ni mwakuri n te tabo ae onoti ao te mition. E kakawaki ibukira ni kabane n oota ni kakawakin te kaokoro imarenan baika a kabwarabwaraaki n tiententi aika uoua aikai.

Ni katein te Ekaretia, n angiin te tai ti maroroakin aron te wewete ni beku n te aba n aron Argentina, Poland, Korea, ke te United States. Ma te mitinare e aki weteaki nakon te tabo; ma, teuanne ke neienne e weteaki bwa e na beku. Ngkai E kabwarabwara te Uea rinanon te Burabeti Iotebwa Timiti n 1829 bwa ngkana iai nanomi ni kan beku ibukin te Atua, kam weteaki nakon te mwakuri.”²

Tatabeua wewete ibukin te mition ao mwioko, ke te manga moan mwiokoaki rimwi, bon man uaan te kaotioti rinanoia ana toro te Uea. Te wewete nakon te mwakuri e roko mairoun te Atua rinanon te Beretitenti n te Ekaretia. Te mwioko nakon teuana mai ibuakon mition aika 400 a mwakuri ngkai ni katobibia te aonaaba e roko mairoun te Atua rinanoia kaain te Kooram n Abotoro ake Tengaun ma Uoman, ni mwakuri man ana kariaia ana toro te burabeti ae maiu. B’ai n tituaraoi ake b’ain te tamnei n te taetae ni burabeti ao te kaotioti e kaineti ma wewete nakon tian mition ni kabane ao mwioko.

Tiekition 80 n te Doctrine ao Covenants bon rongorongon wetean Stephen Burnett nakon te nakoa ni mitinare are karaoaki iroun te Burabeti Iotebwa Timiti n 1832. Kamatebwaian te wewete aei nakon te Tari Burnett e kona ni buokiira ni (1) kamataataira riki n te kaokoro imarenan te “weteaki nakon te mwakuri” n aron te mitinare ao “te mwiokoaki nakon te beku” n te tabo ae onoti ao (2) ni kabwanina ara kakaitau ibukin mwiokoara aika tabu n tataekina te euangkerio.

Te kibu 1 n te mwakoro aei bon te wewete nakon te beku: E taku te Uea nakon ana toro ae Stephen Burnett: Nako ngkoe, nako ngkoe nakon te aonaaba ao n tataekina te euangkerio nakoia aomata nako ake a roko iaan tangin bwanaam.³

N ae kakukurei, te kibu  2 e kaongoa te Tari Burnett ibukin toana ni mitinare: E taku te Uea bwa ngkai e kainnanoa toana Stephen Burnett, E na anga ana toro ae Eden Smith bwa toana ni mitinare.⁴

Te kibu 3 e kaota te tabo are a na mwakuri iai mitinare aika uoman aikai: E taku te Uea bwa e riai n nako Stephen Burnett n tataekina te euangkerio. Ao ngkana tao e nako meang ke e nako maiaki, ke e nako mainuku ke e nako maeao, e aki akaaka, ibukina e aki kona ni kairua.⁵

I aki kakoaua bwa te kibuntaeka “e aki kakawaki” n aron ae kamanena te Uea n te boki ae tabu aei n iangoia bwa E aki tabe bwa te tabo raa ae a na mwakuri iai Ana toro. Ni koauana, iai taben nanona iai. Ma ibukin te mwakuri n tataekinan te euangkerio bon ana mwakuri te Uea, E kaungaiia, kawakiniia, ao ni kairiia Ana toro ake iai irouia te kariaiakaki. N aroia mitinare a kataia ni karikiia bwa a na tau ao bwaai ni mwakuri aika konabwai inanon Baina ao ni karaoa aia kabanea n tamaroa ni kakoroi bukin aia beku ma te kakaonimaki, ngkanne ma Ana ibuobuoki a “aki kona ni kairua”—n te tabo are a beku iai. Tao teuana te reirei are e reireiniira iai te Tia Kamaiu bwa te mwioko nakon te beku n te tabo ae e onoti e riai ao e kakawaki ma e karako kakawakina nakon te wewete nakon te mwakuri.

Te kibu ane imwiina e katuruturui anua aika kakawaki ibukiia mitinare ni kabane: E taku te Uea bwa a riai ni kabwarabwarai bwaai ni kabane ake a ongo, ao ni kakoauai raoi, ao ake a ataia bwa e koaua.”⁶

Te kabanea ni kibu e kauringa te Tari Burnett ao ngaira ni kabane man weteara ake a roko iroura bwa ti na nako ni beku, E taku te Uea bwa kaetieti ake e anga Stephen Burnett bon Ana kantaninga, ao E a tia ni weteia ao Ngaia bon Ana Tia Kaboingkami, ae Iesu Kristo. Amen.⁷

Tabeman ibuakomi kam na bae n titirakini ngkami bwa bukin tera I rineaki bwa N na marooro inanon ana tetere ni maungatabu te nakoanibonga e taraa ni bebete ataakin te kaokoro imarenan te weteaki nakon te mwakuri ao te mwioko n nako ni beku. Kaekaan ami titiraki aei irou e bon rangin ni bebete: te bwai are I rinanona e reiakinai bwa reirei aikai a aki rang oota raoi iai angiia kaain te Ekaretia.

Bukin maroroakinan te bwai aei bwa I reiakinaki iai n ae okioki n taekan te tabeaianga, te raraoma ao namakinan te mamaa irouia angiia mitinare ni bukina aika mwaiti ngke a manga bitaki mwiokoaia ni mwakuri n te tabo ae kaokoro inanon aia tai ni mwakuri. Bitakin mwioko aikai n tabetai a riai ni baika a na riki ao kaangaanga n aron taian kabuanibwai ao ikoaki, waeremwe ao totoko ni karekean au visa, bibitakin ana moti te tautaeka, ni karaoakin ao kateirakeaia taan mwakuri aika boou, ke rikiraken ao bibitakin kainnano aika reitinako ni katobibia te aonaaba n te mwakuri n tataekina te euangkerio.⁸

Ngkana e a manga bitaki mwiokoan te mitinare nakon te tabo ae boou, karaoakina bon ti te arona naba ma are te moan mwioko. Kaain te Kooram n te Tengaun ma Uoman a ukora ana kairi te Tamnei ni karaoan bitakin mwioko aikai.

I taetae ma te mwaane ae kakaonimaki n te tai ae nako are e tibwaua nakoiu ana namakin. N te boowi, I a bon tibwa tia ni kamataata te kaokoro imarenan te weteaki nakon te mwakuri ao te mwioko nakon te mwakuri. Te tari ae raoiroi aei e iobai ma ngai ao e taetae nakoiu ma rannin matana, “Baike ko buokai n reiakin n te bong aei e kabebetea rawawatau are I a tia ni uouotia iaon angau ae riaon 30 te ririki. Ngke te mitinare n ataei ngai, I mwiokoaki moa bwa N na mwakuri i South America. Ma I aki kona ni karekea au visa, ngaia are e a bitaki mwiokoau nakon te United States. N ririki ni kabane aikai ao I miimi bwa bukin tera I aki kona ni beku n te tabo are I weteaki nako iai. Ngkai I a ataia I weteaki nakon te mwakuri ao tiaki nakon te tabo. I aki kona n tuangkami bwa mwaitira ae I a tia ni buokaki iai n te atatai aei.”

E rawawata nanou iroun te mwaane ae tamaroa aei. Ngkai I a tia n taekin reirei aikai ni kabuta te aonaaba, a mwaiti aomata ake a tia ni kaoti aia namakin n ai aron raoi te mwaane are I kabwarabwara. I maroroakina te reirei aei ngkai ibukina bwa a na akea temanna kaain te Ekaretia ae e na uota te rawawata ae aki riai aei n te aki mataata, aki koaua, un, te maamaa n te mwioko n nako ni mwakuri.

E taku te Uea nakon te Stephen Burnett bwa e riai n nako n tataekina te euangkerio. Ao ngkana e na ko meang, ke nako maiaki, ke nako mainuku, ke nako maeao, akea te kaangaanga iai, bwa e aki kona ni kairua.⁹ Ngkai kam iangoa taekan te boki ae tabu aei ao ni kauki nanomi, au kantaninga ao au tataro bwa kam na kaoa te Tamnei ae Raoiroi ni uoti nanomi nakon te atatai, te kamaiuaki, ao te kabouaki are kam kainnanoi.

Teuana bukina ae I a tia n namakina kairau (iroun te Tamnei) ni maroroakina atuun te reirei aei bon au atatai n aron tuangakiia mitinare aia tabo inanon ririki aika mwaiti n nako. Ibukiia abotoro ake Tengaun ma Uoman, akea te bwai ae kamatoa koauan reitinakon te kaotioti ni bong aikai ae mwaaka riki nakon ukoran ataakin ana kantaninga te Uea ngkana abotoro ake tengaun ma uoman a kakoroi bukin tabera n tuangiia mitinare aia tabo ae a na nako ni mwakuri iai. I kakoaua bwa te Tia Kamaiu e ataira (ngaira n tatabemaniira) ao iai taben nanona ibukira “temanna imwiin temanna” ao e kinaira n arara.

I tangiria ngkai ni maroroakina aan te reirei ni kakimototoa ma angiin te tai ti aki taraa raoi iteran te katauraoi ibukin te wewete nakon te mwakuri.

Teniua taeka aika irekereke ni kabwarabwarakin anua ni katauraoi ao rikirakeia natin te Atua mwaane: te nakoanibonga, tembora, mition. N tabetai ngaira kaaro, raao, ao kaain te Ekaretia, ti kabanea ara tai ae korakora iaon aia katauraoi mitinare ibukiia ataeinimwaane are ti a kakea iai bonganan kawai tabeua irarikin te kawai ni karaoi ao ni kawakin berita aika tabu (ma te Atua) are e riai ni karaoaki imwain te mwakuri ni mitinare. Te mwakuri n aron te mitinare bon teuana mai buakona ma tiaki tii kanoan te katauraoi ae na karaoaki ni kawain karekean aam ae matoatoa ni karikirakea tamneim ni maanin maium. Te nakoanibonga ao kakabwaia n te tembora, a na uaia ni katiaaki moa imwaain rokom n am tabo ni mwakuri, a kainnanoaki naba ibukin kamanoara ao kakorakorakira n tamneira ni kabuta maiura.

Ataeinimwaane, ngkai kam kakoroi bukin ami beku n te Nakoanibonga ae te Aaron, ke te nakoanibonga ae inano riki, kam katauraoi ngkami ni karekea ao ni kakorakora te tuea ao te berita ibukin te nakoanibonga ae te Merekitereka ke ae rietaata riki. ¹⁰ Kororaoin temanna bon te bwai ae rangi ni kainnanoaki ibukin karekean te nakoanibonga ae rietaata riki. Te mwakuri n ibuobuoki n te nakoanibonga ae imwaaimi. Katauraoi ngkai n anga ami ibuobuoki ae e na uaana. Taiaoka reiakinna n tangiria ao n teimatoa n tau. Ko riai n tau. Teimatoa n tau.

Imwiin karekean te Nakoanibonga ae te Aaron ao te wewete nakon te beku, e kona ni kamanoaki te ataeinimwaane ma te mwaaka¹¹ rinanon berita aika tabu ao otenanti n te tembora ae tabu. Te nako n te tembora ao karekean aekakin namakin akanne man tembora a rimoa korakoraia ni karaoan te mwakuri ni mitinare ae bwanin taina. Taun temanna bon te bwai ae rangin kainnanoaki ibukin karekean kakabwaia man te tembora ibukimi ataeinimwaane ao ibukiia ni kabane kaain te Ekaretia. Ngkai kam maiu ni kaineti ma tuan te euangkerio, kam kona n rin n ana auti te Uea ao n irii waakin otenanti aika tabu ni karokoa am ririki ni maiu ae tebwi tabun te ririki. Am tangira ibukin ao ataakin otenanti n te tembora e na kakorakorako ao ni kakabwaiako ni karokoa tokin maium. Taiaoka reiakinna n tangiria ao n teimatoa n tau. Ko riai n tau. Teimatoa n tau.

Angiina ataeinimwaane ao ataeinnaine a kaman reke aia beeba ni kariaiakaki nakon te tembora ae tianaki taina. Ngkai kaain te nakoanibonga ae te Aaron kam na kakaei araia kaain ami utu ao ni karaoi bwabetito ao kamatoa ibukiia inanon te tembora. Kateimatoaan am beeba ni kariaiakaki nakon te tembora e kaotia ae ko tau, ao te beku ibukiia tabeman inanon te tembora bon te mwakoro ae kakawaki ibukin te katauraoi ni karekea (ao ni kamwakura) te Nakoanibonga ae te Merekitereka.

Ataeinimwaane, ngkami ni kabane bon mitinare ngkai. Ni kabane ake irarikimi, ni katoa bong, bon raoraomi ao kaain rarikim ake a raroa man te koaua ibukina bwa a aki ataia bwa a na kunea iaa. ¹² Ngkai kam kairaki iroun te Tamnei, kam kona ni tibwaua te reirei, te kakao, te tekiti are e na kabwarabwarai nakoia raoraomi koauan te euangkerio ae e a tia ni kaokaki. Kam na aki ao n aki riai n tataninga weteami nakon te mwakuri ni mitinare.

Ngkai kakabwaia n te nakoanibonga, te tembora, ao kakabwaia n te mition a ikotaki “ni kabane n tii teuana … inanon Kristo”¹³ ao ni kaota te iwawaaki i nanon, n ana iango ao n tamnein te mitinare, ni kona ni karaoa te mwakuri.¹⁴ E na rikirake ana konabwai ni kakoroa nanon tabena n anganaki te kariaiakaki n tei ibukin te Uea Iesu Kristo. Te mwaaka n tamnei ni bootaki ma karinean berita n te nakoanibonga ao te tembora, karekean mwaakan te aro n atua¹⁵ rinanon otenanti n te nakoanibonga,¹⁶ ni beku n aki iangoiko moa, ao tataekinan te euangkerio nakoia natin te Atua e angan te ataeinimwaane te konaa n riki n “nene man ni matoatoa inanon te onimaki”¹⁷ ma “ni kateaki i nanona ma te kateimatoaaki inanon [Kristo].”¹⁸

Inanon mweengara ao n te aro, ti riai ni kabaerantii teniua baika a kakawaki n ana banna te Uea ni katauraoaia ao n rikirakeia natin te Atua mwaane aika kakaonimaki: te nakoanibonga, tembora, ao te mition. Bwaai aika teniua aikai a kainnanoira bwa ti na tangiria ao n teimatoa n tau. Kam na tau. Teimatoa n tau.

Tariu aika tangiraki, I berita bwa b’ai n tituaraoi ake b’ain te tamnei n te taetae ni burabeti ao te kaotioti e kaineti ma am wewete nakon te mwakuri n tataekina te euangkerio ao katabeam nakon te tabo ae onoti ke te tabo ni mwakuri. Ngkai kam katauraoi ngkai ma te nanomwaaka n ami ibuobuoki ni kamwakura te nakoanibonga ao te ibuobuoki n te tembora, ami kakoaua ibukin koauan maiun te Uea e na kakorakoraaki. Am tangira Ibukina ao Ana mwakuri e na kaona nanom. Ngkai kam reiakinna n tangiria n tau, kam na riki bwa bwaai ni mwakuri ni bain te Uea ni kakabwaiaia ao ni beku ibukiia aomata aika mwaiti.

Ni kimwareireiu, I kakoaua bwa Tamara are i Karawa ao Natina ae Tangiraki, Iesu Kristo, a maiu. Ni katabeaki n Aia mwakuri n ibuobuoki bon te teuana te kakabwaia ae ti kona ni karekea. I kakoaua n aran te Uea Iesu Kristo ae tabu, amen.