Gintawag sa Buluhaton

Kada tuig pulo ka linibo ka mga lamharon nga lalaki kag babayi, kag madamo nga may-edad na nga mag-asawa, ang nalangkag nga nagahulat sa pagbaton sang espesyal nga sulat halin sa Salt Lake City. Ang unod sang amo nga sulat nagaapekto sa katubtuban sang tawo nga ginpadalhan sini, subong man ang mga miyembro sang pamilya kag madamo nga iban pa nga mga tawo. Pag-abot sini, ang sobre mahimo ng mahipid kag pasensyoso nga ginabuksan ukon ginagisi sing may kalangkag kag nagadali. Ang pagbasa sining espesyal nga sulat isa ka eksperiyensya nga indi gid malimtan.

Ang sulat pirmado sang Pangulo sang Ang Simbahan ni Jesucristo sang mga Santos sa Ulihing mga Adlaw, kag ang una nga duha ka mga dinalan nagasiling: “Ginatawag ikaw nga mag-alagad bilang isa ka misyonero sang Ang Simbahan ni Jesucristo sang mga Santos sa Ulihing mga Adlaw. Madestino ka sa pag-alagad sa ______ Mission.”

Pat-ini nga ang una nga dinalan amo ang tawag nga mag-alagad bilang full-time nga misyonero sa ginapanumbalik nga Simbahan sang Ginuo. Ang ikaduha nga dinalan nagapakita sang takay nga magtrabaho sang natalana nga lugar kag misyon. Ang importante nga kinalain nga ginpahayag sa sining duha ka mga dinalan kinahanglan gid naton mahangpan.

Sa kultura sang Simbahan, masami kita nagahambal parte sa tawag nga mag-alagad sa isa ka pungsod pareho sang Argentina, Poland, Korea, ukon sa Estados Unidos. Pero ang isa ka misyonero wala gintawag sa isa ka lugar; kundi, gintawag sia sa pag-alagad. Kasubong sang ginpahayag sang Ginuo kay Propetang Joseph Smith sang 1829, “Kon may handum kamo sa pag-alagad sa Dios ginatawag kamo sa buluhaton.”²

Ang tagsa ka mission call kag takay, ukon ang pagsaylo sa ulihi, isa ka resulta sang bugna paagi sa mga alagad sang Ginuo. Ang pagtawag sa buluhaton nagahalin sa Dios paagi sa Pangulo sang Simbahan. Ang pagkadestino sa isa sa masobra 400 ka misyon nga nagaoperar sa karon sa bug-os nga kalibutan naghalin sa Dios paagi sa isa ka miyembro sang Korum sang Napulo’g Duha ka mga Apostoles, nga nagagiho nga may pahanugot sang buhi ng propeta sang Ginuo. Ang espirituhanon ng dulot sang panagna kag bugna nagaupod sa tanan nga mission call kag mga takay.

Ang Seksyon 80 sang Doctrine and Covenants isa ka rekord sang pagtawag sa misyon kay Stephen Burnett ni Propetang Joseph Smith sang 1832. Ang pagtuon sining tawag kay Brother Burnett makabulig sa aton nga (1) mahangpan sing mas maathag ang kinalain sang “pagtawag sa buluhaton” bilang isa ka misyonero kag “pagtakay sa pagpangabudlay” sa isa ka partikular nga lugar kag (2) mas mahatagan sang bili ang aton indibidwal kag balaan nga responsibilidad sa pagbantala sang ebanghelyo.

Ang bersikulo 1 sining seksyon isa ka tawag sa pag-alagad: “Yari karon, ginasiling sang Ginuo sa imo akon alagad nga Stephen Burnett: Maglakat ka, maglakat ka sa kalibutan kag magwali sang ebanghelyo sa tagsa ka tinuga nga malab-utan sang imo tingug.”³

Talalupangdon, ang bersikulo 2 nagapahibalo kay Brother Burnett parte sa iya natalana nga kaupod nga misyonero: “Kag bangod nga luyag mo sang isa ka kaupod, igahatag ko sa imo ang akon alagad nga si Eden Smith.”⁴

Ang bersikulo 3 nagapakita kon sa diin ining duha ka mga misyonero magaalagad: “Gani, maglakat kamo kag magwali sang akon ebanghelyo, bisan sa aminhan ukon sa nabagatnan, sa sidlangan ukon sa natundan, wala sing kabilinggan, tungod kay indi gid kamo magsayop.”⁵

Wala ako nagapati ang ang dinalan nga “wala sing kabilinggan,” nga gingamit sang Ginuo sa sining balaan nga kasulatan, nagakahulugan nga wala Sia nagaulikid kon sa diin magpangabudlay ang Iya mga alagad. Sa matuod gani, dako ang Iya pag-ulikid. Pero bangod nga ang buluhaton sang pagwali sang ebanghelyo buluhaton sang Ginuo, Iya ginapapagsik, ginagiyahan kag ginatuytuyan ang Iya awtorisado nga mga alagad. Kon nagatinguha ang mga misyonero nga mangin mas takos kag may ikasarang nga mga instrumento sa Iya mga kamot kag nagahimo sang ila masarangan agud matutom nga tungdan ang ila mga katungdanan, dayon kaupod ang Iya bulig sila “indi gid magsayop” kon diin man sila mag-alagad. Ayhan isa sa mga leksyon nga ginatudlo sa aton sang Manluluwas sa sini nga bugna amo nga ang pagkadestino sa pag-alagad sa isa ka lugar kinahanglanon kag importante pero ikaduha lamang sa tawag sa buluhaton.

Ang madason nga bersikulo nagadagmit sang importante nga mga kwalipikasyon para sa tanan nga mga misyonero: “Gani, ibantala ang mga butang nga inyo nabatian, kag matuod nga ginapatihan, kag nahibaluan nga matuod.”⁶

Ang katapusan nga bersikulo nagapadumdom kay Brother Burnett kag sa tanan sa aton kon kay sin-o matuod-tuod nagahalin ang tawag nga mag-alagad, “Yari karon, amo ini ang kabubut-on niya nga nagtawag sa inyo, ang inyo Manunubos, bisan si Jesucristo. Amen.”⁷

Mahimo ang pila sa inyo nagapamangkot sa inyo kaugalingon kon ngaa ginpili ko nga hambalan sa priesthood nga sesyon sang pang-kabilugan nga komperensya ining daw maathag na nga kinalain sang pagtawag sa buluhaton kag sang pagdestino sa pag-alagad. Ang akon sabat sa inyo palamangkutanon tama ka prangka: ang akon eksperiyensya nagtudlo sa akon nga ang ini nga mga prinsipyo wala mahangpi sang lubos sang madamo nga mga miyembro sang Simbahan.

Ang solo nga pinakadako nga rason sa pagtamod sining bagay amo ang natukiban ko sa kadugayon parte sa dulumdumon, kabalaka, kag bisan pa gani sang pagkanugon nga nabatyagan sang madamo nga mga misyonero nga sa pila ka rason ginsaylo sa iban nga lugar nga pagaalagaran sa tion sang ila pag-alagad. Ang subong nga mga pagsaylo kon kaisa kinahanglanon gid tungod sang mga hitabo kag sirkumstansya pareho sang pisikal nga mga aksidente kag pagkasamad, pagka-atrasar kag kabudlayan sang pagkuha sang mga visa, pulitikal nga ginios-gios, pagtuga kag pagpuno sang bag-o nga mga misyon, ukon sang padayon nga nagabag-o nga mga panginahanglan sa bug-os nga kalibutan sa buluhaton sang pagbantala sang ebanghelyo.⁸

Kon ang isa ka misyonero ginasaylo sa iban nga lugar nga pagaalagaran, ang proseso pareho gid sina sang una nga pagdestino. Ang mga miyembro sang Korum sang Napulo’g Duha nagapangayo sang pagpadasig kag giya sa paghimo sining mga pagliwat sang destino.

Naistorya ko sang an-o lang ang isa ka matinuohon nga lalaki nga nagpaambit sa akon sang unod sang iya tagipusuon. Sa isa ka miting, bag-o ko lang ginpaathag ang kinalain sang pagtawag sa buluhaton kag pagdestino sa pagpangabudlay. Ang ining maayo nga utod nagkumusta sa akon kag nagalumaw-lumaw na nagsiling sa akon, “Ang nga butang nga ginbuligan mo nga akon matun-an karon nga adlaw naghakwat sang kabug-at sa akon mga abaga nga ginkarga ko sa masobra 30 katuig. Sang lamharon pa nga misyonero, ang una ko nga destino didto sa Bagatnan nga Amerika. Pero wala ako makakuha sang visa, amo nga ang akon destino ginsaylo sa Estados Unidos. Sa sining tinuig natingala gid ako kon ngaa wala ako makatigayon sa pag-alagad sa lugar kon sa diin ako gintawag. Nahibaluan ko na karon nga gintawag ako sa buluhaton kag indi sa isa ka lugar. Indi ko masaysay sa imo kon paano ako nabuligan sining ihibalo.”

Natandog ang balatyagon ko para sa sining mabuot nga tawo. Sa akon pagtudlo sining tig-una nga mga prinsipyo sa bug-os nga kalibutan, indi maisip na nga mga indibidwal ang nagpahayag sa akon sa tago sang amo man nga sentimyento sang tawo nga bag-o ko lang ginlaragway. Ginatandog ko ining topiko subong nga adlaw tungod wala sing bisan isa ka miyembro sang Simbahan ang dapat magkulo sang kabug-at sang sayop nga paghangop, wala kasigurohan, kasakit, ukon pagkakonsensya parte sa isa ka destino sa pag-alagad.

“Gani, maglakat kamo kag magwali sang akon ebanghelyo, bisan sa aminhan ukon sa nabagatnan, sa sidlangan ukon sa natundan, wala sing kabilinggan, tungod kay indi gid kamo magsayop.”⁹ Samtang ginabinagbinag ninyo ining balaan nga kasulatan kag ginabuksan ang inyo tagipusuon, nagalaum ako kag nagapangamuyo nga inyo agdahon ang Balaan nga Espiritu nga dalhon sa sulod sang inyo kalag ang paghangop, ang pagpaayo, kag pagpanumbalik nga inyo kinahanglan.

Isa pa ka rason nga nabatyagan ko nga hambalan ang ini nga topiko amo ang akon personal nga eksperiyensya sa pagdestino sang mga misyonero sa sulod sang madamo na nga tinuig. Para sa Napulo’g Duha, wala na sang mas nagapamatuod sing mabaskog sang kamatuoran sang nagapadayon nga bugna sa ulihing mga adlaw sangsa paghibalo sang kabubut-on sang Ginuo samtang ginatungdan namon ang amon responsibilidad sa pagdestino sang mga misyonero sa ila natalana nga mga lugar sang pagpangabudlay. Nagasaksi ako nga ang Manluluwas nakakilala kag nagaulikid sa tagsa sa aton sing tag-isa-isa kag ngalan sa ngalan.

Gusto ko karon hambalan sing makadali ang isa ka importante pero masami nagakalimtan nga aspeto sang paghanda para sa tawag sa buluhaton.

Tatlo ka mag-alangot nga mga tinaga ang nagapaathag sang sulukdan sang pagpanghanda kag pag-uswag sang mga anak nga lalaki sang Dios: priesthood, templo, misyon. Kon kaisa bilang mga ginikanan, mga abyan, kag mga miyembro sang Simbahan, grabe gid ang aton pagtutok sa pangmisyonero nga pagpanghanda sang mga lamharon nga lalaki nga mahimo nalimtan na naton sa isa ka bahin ang iban nga importante nga mga tikang sa dalan sang kasugtanan nga kinahanglan matuman antes magsugod sa full-time nga pag-alagad sa misyon. Ang pagtrabaho bilang misyonero isa matuod diri pero indi lamang ang solo nga importante nga halintang sa proseso sang pagpasad sang mapag-on nga pundasyon para sa bug-os kabuhi nga pagtubo sa espirituhanon kag pag-alagad. Ang mga bugay sang priesthood kag templo, alangay nga mauna sangsa pag-abot sa gindestino nga lugar sang pagpangabudlay, kinahanglanon man sa pagpapag-on kag pagpabakod sa aton sa espirituhanon sa bug-os naton nga kabuhi.

Mga pamatan-on, samtang ginatuman ninyo ang inyo katungdanan sa kag ginatahod ang Aaronic ukon mas manubo nga Priesthood, nagahanda kamo sa pagbaton kag pagtuman sang pangako kag kasugtanan sang Melchizedek ukon mas mataas nga priesthood.¹⁰ Ang personal nga katakos amo ang solo nga pinakaimportante nga rekisitos para mabaton ang mas mataas nga priesthood. Ang bug-os kabuhi nga pag-alagad sa priesthood yara sa atubang ninyo. Maghanda na karon paagi sa masunson nga paghatag sang makahuluganon nga serbisyo. Palihog tun-i nga palanggaon ang katakos kag magpabilin nga takos. Magmangin takos. Magpabilin nga takos.

Pagkatapos nga mabaton ang Melchizedek Priesthood kag ang tawag nga mag-alagad, ang isa ka pamatan-on sarang masangkapan sang hinganiban sang gahum¹¹ paagi sa mga kasugtanan kag mga ordinansa sa balaan nga templo. Ang pagkadto sa templo kag pagpalatom sang espiritu sang templo sa inyo nagauna sa epektibo nga pag-alagad bilang full-time nga misyonero. Ang personal nga katakos amo ang solo nga pinakaimportante nga rekisitos sa pagbaton sang mga bugay sang templo nga napertineser sa inyo nga mga pamatan-on kag sa tanan nga mga miyembro sang Simbahan. Samtang nagapangabuhi kamo suno sa mga sulukdan sang ebanghelyo, sarang kamo makasulod sa puluy-an sang Ginuo kag magpasakop sa sagrado nga mga ordinansa sa bug-os ninyo nga mga tinuig bilang mga lamharon. Ang inyo pagpalaangga kag paghangop sang mga ordinansa sa templo magapabakod kag magabugay sa inyo tubtob buhi. Palihog tun-i nga palanggaon ang katakos kag magpabilin nga takos. Magmangin takos. Magpabilin nga takos.

Madamo nga pamatan-on kag bataon nga babayi ang nagakapot na sang current limited-use temple recommend. Bilang mga nagakapot sang Aaronic Priesthood ginapangita ninyo ang mga ngalan sang inyo mismo pamilya kag nagahikot sang mga bunyag kag kompirmasyon para sa mga miyembro sang inyo pamilya sa templo. Ang paghupot sang inyo temple recommend nagapakita sang inyo katakos, kag ang pag-alagad sa iban sa templo isa ka importante nga bahin sang paghanda para sa Melchizedek Priesthood.

Mga pamatan-on, ang tagsa sa inyo isa na karon ka misyonero. Ang tanan sa inyo palibot, sa adlaw-adlaw, amo ang mga abyan kag mga kasilingan “nga wala lamang makasalapo sang kamatuoran tungod wala sila makahibalo kon sa diin ini pangitaon.”¹² Samtang ginagiyahan sang Espiritu, sarang kamo magpaambit sang isa ka panghunahuna, pangagda, isa ka text ukon tweet nga magapakilala sang inyo mga abyan sa mga kamatuoran sang ginpanumbalik nga ebanghelyo. Indi na ninyo kinahanglan hulaton nga mabaton ang opisyal nga tawag agud mapagsik nga mag-entra sa pang-misyonaryo nga buluhaton.

Sa pagtipon sang mga bugay sang priesthood, templo, kag misyon “nga natingob sa isa … kay Cristo”¹³ kag maghikot sa tagipusuon, hunahuna, kag kalag sang isa ka lamharon nga misyonero, sarang sia mangin kwalipikado para sa buluhaton.¹⁴ Ang iya ikasarang magadako agud matungdan ang responsibilidad sang pagtindog nga representante sang Ginuong Jesucristo. Ang espirituhanon nga kabaskog sang kombinasyon sang pagtahod sang priesthood kag kasugtanan sa templo, pagbaton sang “gahum sang pagkadiosnon”¹⁵ paagi sa mga ordinansa sang priesthood,¹⁶ maalwan nga pagserbisyo, kag pagwali sang wala’y katapusan nga ebanghelyo sa mga anak sang Dios nagatugot sang isa ka pamatan-on nga mangin “malig-on kag di-malingkang sa pagtuo”¹⁷ kag “nakapanggamot kag napasad kay [Cristo].”¹⁸

Sa aton mga puluy-an kag sa simbahan, dapat kita maghatag sang balanse nga pagdagmit sa tatlo ka mga elemento sang pagpanghanda kag pag-uswag sang matinuohon nga mga anak sang Dios: priesthood, templo, misyon. Ining tatlo nagapangayo sa aton nga palanggaon ang pagkatakos kag magpabilin nga takos. Magmangin takos. Magpabilin nga takos.

Pinalangga kong kauturan, ginapangako ko nga ang espirituhanon nga dulot sang bugna magaupod sa inyo tawag nga mag-alagad sa pagbantala sang ebanghelyo kag sa inyo pagkadestino sa isa ka lugar ukon mga lugar sang pagpangabudlay. Kon inyo matutom nga handaan karon paagi sa maalwan nga pag-alagad sa priesthood kag sa templo, ang inyo panaksihon sang buhi nga kamatuoran sang Ginuo mangin mabaskog. Ang pagpalangga sa Iya kag sa Iya buluhaton magapuno sa inyo tagipusuon. Sa inyo pagtuon nga palanggaon ang mangin takos, kamo mangin mabaskog nga instrument sa mga kamot sang Ginuo sa pagbugay kag pag-alagad sang madamo nga tawo.

Nga may kasadya, nagasaksi ako nga aton Amay nga Langitnon kag ang Iya Pinalangga nga Anak, nga si Jesucristo, buhi. Ang mangin mapagsik sa Ila pag-alagad amo ang isa sa pinakadako nga bugay nga sarang naton mabaton. Nagasaksi ako sa sini sa balaan nga ngalan ni Jesucristo, amen.