Hu Mus Ua txoj Hauj Lwm No

Txhua xyoo muaj kaum txhiab tus tub hluas ntxhais hluas, thiab ntau khub niam txiv laus, uas tos ntsoov txais ib tsab ntawv tshwj xeeb los ntawm Salt Lake City. Tej yam uas sau hauv tsab ntawv no yeej hloov tus neeg uas txais tsab ntawv lub neej, thiab hloov nws tsev neeg thiab neeg coob ntxiv lub neej. Thaum tsab ntawv no tuaj txog, ib txhia ua siab ntev ua tib zoo qhib hnab ntawv thiab ib txhia zoo siab dhau lawv thiaj muab ntuag kom qhib kiag. Qhov uas yus nyeem tsab ntawv no yeej yog ib lub sij hawm tshwj xeeb uas yus yeej yuav tsis hnov qab.

Tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg sau npe rau tsab ntawv no thiab thawj ob kab lus hais tias: “Vajtswv hu koj ua ib tug tub txib ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tau txib koj mus ua dej num rau Qhov Chaw Tshaj Tawm txoj Moo Zoo ______.”

Thov nco ntsoov tias kab lus thib ib yog ib txoj kev hu nws los ua ib tug tub txib nyob hauv tus Tswv lub Koom Txoos. Kab lus thib ob yog kev txib ua dej num hauv ib qhov chaw tshaj tawm txoj moo zoo. Qhov sib txawv ntawm ob kab lus no yeej yog ib qho tseem ceeb rau peb txhua tus to taub.

Nyob hauv lub Koom Txoos no, ntau lub sij hawm peb hais tias Vajtswv hu peb ua tub txib hauv ib lub teb chaws xws li Argentina, Poland, Kaub Lim Teb, los yog Teb Chaws Amelikas. Tiam sis Vajtswv tsis hu ib tug tub txib rau ib qho chaw; tiam sis, Vajtswv hu nws ua hauj lwm pab. Ib yam li tus Tswv hais dhau los ntawm tus Yaj Saub Yauxej Xamiv thaum xyoo 1829, yog nej muaj tej kev xav ua hauj lwm rau Vajtswv ces Vajtswv hu nej mus ua txoj hauj lwm no.²

Txhua txoj kev hu thiab kev txib, los yog rov qab txib, yog los ntawm kev tshwm sim uas los rau tus Tswv cov tub qhe. Ib txoj kev hu ua hauj lwm yog los ntawm Vajtswv dhau los ntawm tus Thawj Tswj Hwm ntawm lub Koom Txoos. Ib txoj kev txib mus rau ib qhov chaw ntawm 400 qhov chaw tshaj tawm txoj moo zoo nyob thoob plaws lub ntiaj teb yog los ntawm Vajtswv dhau ntawm ib tug hauv Pawg Kaum Ob tug Thwj Tim, uas tus Tswv tus yaj saub tso cai rau nws ua li ntawd. Txhua txoj kev hu thiab kev txib cov tub txib yog los ntawm lub txiaj ntsim qhia tej uas yuav muaj los yav tom ntej thiab lub txiaj ntsim txais kev tshwm sim.

Tshooj 80 ntawm phau Lus Qhuab Qhia thiab Kev Khi Lus yog qhov uas tus Yaj Saub Yauxej Xamiv hu Stephen Burnett ua ib tug tub txib thaum xyoo 1832. Kev kawm txog Tij Laug Burnett txoj kev hu pab tau peb (1) to taub hais tias “kev hu ua hauj lwm” ua ib tug tub txib thiab “kev txib ua dej num” hauv ib qho chaw txawv li cas thiab (2) to taub zoo dua txog qhov uas Vajtswv muab kev lav ris rau peb kom tshaj tawm txoj moo zoo.

Nqe 1 ntawm tshooj no yog kev hu ua hauj lwm: “Tseeb tiag, tus Tswv hais li no rau koj kuv tus tub qhe Stephen Burnett: Koj cia li mus, koj cia li mus rau cov neeg hauv ntiaj teb thiab tshaj tawm txoj moo zoo rau txhua tus neeg uas hnov koj lub suab.”³

Nqe 2 qhia Tij Laug Burnett txog nws tus khub ua tub txib: “Thiab rau qhov koj xav tau ib tug khub, kuv mam muab kuv tus tub qhe Eden Smith nrog koj.”⁴

Nqe 3 hais txog qhov uas ob tug tub txib no yuav tsum ua dej num hauv qhov chaw twg: “Yog li ntawd, neb cia li mus thiab tshaj tawm kuv txoj moo zoo, txawm yog mus rau sab qaum teb los sis sab qab teb, mus rau sab hnub tuaj los sis sab hnub poob, tsis ua li cas, vim neb yuav mus tsis taus yuam kev.”⁵

Kuv tsis ntseeg hais tias tej lus “tsis ua li cas” raws li tus Tswv hais hauv nqe vaj lug kub no qhia hais tias Nws cov tub qhe ua hauj lwm qhov twg los Nws tsis xav li cas. Muaj tseeb tiag, Nws yeej xav li cas heev. Tiam sis vim txoj hauj lwm tshaj tawm txoj moo zoo yog tus Tswv txoj hauj lwm, Nws tshoov Nws cov tub qhe lub siab thiab coj lawv mus. Thaum cov tub txib siv zog ua neeg tsim nyog thiab ua cuab yeej hauv Nws txhais tes thiab ua zoo npaum li lawv ua tau kom ua raws li lawv tej dej num, ces nrog Nws txoj kev pab lawv mus tsis taus yuam kev. Tej zaum ib zaj lus tseem ceeb uas tus Cawm Seej qhia peb hauv kev tshwm sim no yog qhov uas kev txib ua dej num hauv ib qho chaw yeej tseem ceeb heev tiam sis qhov tseem ceeb tshaj plaws yog kev hu ua hauj lwm.

Nqe tom qab ntawd qhia txog tej yam uas tag nrho cov tub txib yuav tsum muaj peev xwm ua: “Yog li ntawd, tshaj tawm tej yam uas neb tau hnov, thiab ntseeg tiag, thiab paub hais tias muaj tseeb.”⁶

Nqe kawg qhia Tij Laug Burnett thiab peb txhua tus leej twg yog tus uas hu peb tiag tiag, “Saib seb, qhov no yog raws li lub siab nyiam ntawm tus uas tau hu neb, neb tus Txhiv Dim, tus uas twb yog Yexus Khetos. Amees.”⁷

Ib txhia tej zaum xav paub yog vim li cas kuv tau xaiv hais txog qhov uas kev hu ua hauj lwm yeej txawv ntawm kev txib ua dej num nyob hauv tuas pov thawj hwj ntawm lub tuam rooj sab laj no. Kuv teb lo lus nug no meej hais tias: hauv kuv lub neej kuv pom tias ntau tus mej zeej ntawm lub Koom Txoos tsis to taub tej ntsiab cai no.

Qhov tseem ceeb tshaj plaws vim li cas kuv hais txog qhov no yog tej uas kuv tau kawm txog ntau tus tub txib uas tau txais kev rov qab txib mus rau lwm qhov chaw thaum lawv ua tub txib es ua rau lawv txhawj thiab xav tias lawv muaj txim. Tej lub sij hawm yuav tsum rov qab txib ib tug tub txib mus rau lwm qhov chaw vim muaj xwm txheej xws li kev raug mob, cov ntawv visa los lig los yog muaj teeb meem, muaj kev kub ntxhov hauv ib lub teb chaws, tau tsim thiab tsis muaj tub txib txaus hauv tej qhov chaw tshaj tawm txoj moo zoo tshiab, los yog tej xwm txheej uas pheej hloov nyob thoob plaws lub ntiaj teb thaum tshaj tawm txoj moo zoo.⁸

Thaum rov qab txib ib tug tub txib mus rau lwm qhov chaw, tus txheej txheem ua li ntawd yeej zoo ib yam li tau ua thaum xub thawj. Cov hauv Pawg Kaum Ob tug Thwj Tim nrhiav kev tshoov siab thiab txoj kev pab thaum lawv txib cov tub txib mus rau lwm qhov chaw.

Tsis ntev tas los kuv hais lus rau ib tug neeg rau siab ntseeg uas qhia txog nws tej kev xav hauv nws lub siab. Nyob hauv ib txoj kev sib ntsib, kuv nyuam qhuav piav txog qhov uas kev hu ua hauj lwm thiab kev txib ua dej num txawv li cas. Tus tij laug zoo no tuav kuv tes thiab los kua muag hais lus rau kuv hais tias, “Tej yam uas koj tau pab kuv kawm hnub no twb tshem ib lub nra ntawm kuv mus, ib lub nra uas kuv tau nqa tau 30 tawm xyoo. Thaum kuv yog ib tug tub txib, thaum xub thawj kuv txais kev txib mus rau Amelikas Sab Qab Teb. Tiam sis kuv tsis tau ib daim visa, ces tau hloov kuv txoj kev txib mus rau lub Teb Chaws Amelikas. Txij thaum ntawd kuv xav paub vim li cas kuv ua tsis tau hauj lwm hauv qhov chaw uas Vajtswv hu kuv mus. Tam sim no kuv paub tias Nws twb hu kuv ua hauj lwm thiab tsis hu kuv rau ib qhov chaw. Kuv tsis pom qab hais tias qhov uas kuv to taub li no tau pab kuv npaum li cas.”

Ua rau kuv lub siab mob heev pab tus txiv neej zoo no tu siab. Thaum kuv tau qhia tej ntsiab cai tseem ceeb no nyob thoob plaws lub ntiaj teb no, muaj ntau tus neeg suav tsis txheeb uas tau hais rau kuv ib yam li tus txiv neej uas kuv nyuam qhuav piav txog no. Kuv hais txog qhov no hnub no vim tsis muaj ib tug mej zeej ntawm lub Koom Txoos uas yuav tsum ris lub nra ntawm kev to taub yuam kev, kev tsis paub tseeb, kev txhawj xeeb, los yog kev muaj txim txog ib txoj kev txib ua dej num.

“Yog li ntawd, neb cia li mus thiab tshaj tawm kuv txoj moo zoo, txawm yog mus rau sab qaum teb los sis sab qab teb, mus rau sab hnub tuaj los sis sab hnub poob, tsis ua li cas, vim neb yuav mus tsis taus yuam kev.”⁹ Thaum nej xav txog tej lus ntawm nqe vaj lug kub no thiab qhib nej lub siab, kuv cia siab thiab thov kom nej caw tus Vaj Ntsuj Plig Dawb Huv tshoov nej lub siab kom to taub thiab kho nej zoo.

Ib qho ntxiv vim li cas kuv tau txais kev tshoov siab hais txog qhov no yog kuv txoj kev txib cov tub txib tau ntau xyoo no. Rau Pawg Kaum Ob tug Thwj Tim, tsis muaj ib yam dab tsi ntxiv uas qhia tias peb muaj kev tshwm sim hauv hnub nyoog kawg no zoo dua li thaum peb thov kom paub tus Tswv lub siab nyiam thaum peb txib cov tub txib mus rau lawv tej qhov chaw ua dej num. Kuv ua tim khawv tias tus Cawm Seej paub thiab saib xyuas peb txhua tus “ib tug dhau ib tug” thiab ib lub npe dhau ib lub npe.

Tam sim no kuv xav hais txog ib qho tseem ceeb uas neeg tsis tshua nco qab txog kev npaj txais kev hu ua hauj lwm.

Muaj peb lo lus uas yuav pab nej paub tus txheej txheem rau cov uas yog Vajtswv cov tub npaj thiab vam meej: pov thawj hwj, lub tuam tsev, kev ua tub txib. Tej lub sij hawm peb cov niam tsev txiv tsev, cov phooj ywg, thiab cov mej zeej ntawm lub Koom Txoos tsom ntsoov rau cov tub hluas txoj kev npaj mus ua tub txib peb thiaj tsis tshua nco qab txog tej kev khi lus tseem ceeb uas yuav tsum ua ua ntej yuav mus ua cov tub txib txoj hauj lwm. Kev ua hauj lwm ua ib tug tub txib yeej yog ib qho tiam sis tsis yog tib qho tseem ceeb ntawm tus txheej txheem tsim ib lub hauv paus rau kev siv tas yus lub neej loj hlob ntawm sab ntsuj plig thiab pab lwm tus. Cov koob hmoov ntawm lub pov thawj hwj thiab lub tuam tsev, ob qho uas muaj ua ntej yus txais kev txib mus rau ib qho chaw ua tej dej num, yeej txhawb nqa thiab ntxiv dag zog rau peb sab ntsuj plig tas peb lub neej.

Cov tub hluas, thaum nej ua nej tej dej num thiab hwm lub Pov Thawj Hwj Aloos, uas yog lub pov thawj hwj yau zog, nej npaj txais thiab rau siab ua raws li kev lav lus thiab kev khi lus ntawm lub Pov Thawj Hwj Mekixedes, uas yog lub pov thawj hwj hlob.¹⁰ Kev ua neeg tsim nyog yog tib qho tseem ceeb tshaj plaws uas nej yuav tsum ua kom txais tau lub pov thawj hwj hlob. Yav tom ntej nej yuav siv nej lub pov thawj hwj tas nej lub neej ua hauj lwm pab lwm tus. Cia li npaj tam sim no los ntawm kev ua hauj lwm uas muaj nqis kom pab lwm tus. Thov nej cia li nyiam ua ib tug neeg tsim nyog tas mus li. Cia li ua neeg tsim nyog. Nyob kom tsim nyog mus li.

Tom qab nws txais lub Pov Thawj Hwj Mekixedes thiab kev hu ua hauj lwm, ib tug tub hluas txais tau lub hwj chim¹¹ los ntawm tej kev khi lus thiab cov kab ke hauv lub tuam tsev dawb huv. Yuav tsum mus rau hauv lub tuam tsev thiab muaj lub txiaj ntsim ntawm lub tuam tsev hauv yus lub siab ua ntej ua tau hauj lwm zoo ua ib tug tub txib. Kev ua neeg tsim nyog yog tib qho tseem ceeb tshaj plaws uas nej yuav tsum ua kom txais tau cov koob hmoov ntawm lub tuam tsev rau nej cov tub hluas thiab tag nrho cov mej zeej ntawm lub Koom Txoos. Thaum nej ua raws li tej kev cai ntawm txoj moo zoo, nej yuav mus rau hauv tus Tswv lub tsev thiab ua tej kab ke dawb ceev thaum nej yog ib tug tub hluas xwb. Qhov uas nej nyiam thiab to taub cov kab ke hauv lub tuam tsev yuav txhawb nqa thiab foom koob hmoov rau nej tas nej lub neej. Thov nej cia li nyiam ua ib tug neeg tsim nyog tas mus li. Cia li ua neeg tsim nyog. Nyob kom tsim nyog mus li.

Ntau cov tub hluas ntxhais hluas twb muaj ib daim ntawv tso cai nkag tuam tsev uas siv qee zaus xwb lawm. Nej cov uas tuav lub Pov Thawj Hwj Aloos, nej nrhiav tau tej npe ntawm nej poj koob yawm txwv thiab sawv lawv cev ua kev cai raus dej thiab ua kev pom zoo rau lawv hauv lub tuam tsev. Qhov uas nej muaj ib daim ntawv tso cai nkag tuam tsev tas mus li qhia tias nej yog neeg tsim nyog, thiab kev pab lwm tus hauv lub tuam tsev yog ib qho tseem ceeb ntawm kev npaj txais lub Pov Thawj Hwj Mekixedes.

Nej cov tub hluas, nej txhua tus yog ib tug tub txib tam sim no. Nyob ib puag ncig nej, txhua hnub, muaj cov phooj ywg thiab neeg zej zog uas tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg.¹² Raws li tus Ntsuj Plig coj nej mus, nej qhia tau nej cov phooj ywg txog qhov tseeb ntawm txoj moo zoo thaum nej hais ib yam raws li nej xav, nej caw nws, los yog nej ntaus ntawv rau nws. Nej tsis tas tos ntsoov thiab yuav tsum tsis txhob tos ntsoov nej txoj kev hu kom mob siab ua cov tub txib txoj hauj lwm.

Thaum muab cov koob hmoov ntawm lub pov thawj hwj, lub tuam tsev, thiab kev ua tub txib sau “ua ke … nyob hauv Yexus Khetos”¹³ thiab nyob ua ke hauv ib tug tub txib lub siab lub ntsws thiab tus ntsuj plig, nws yeej yuav tsim nyog ua txoj hauj lwm.¹⁴ Nws haj yam yuav muaj peev xwm txais kev tso cai sawv tus Tswv Yexus Khetos cev. Qhov uas ua rau yus sab ntsuj plig muaj zog thaum yus ua raws nraim li tej kev khi lus ntawm lub pov thawj hwj thiab lub tuam tsev, yus txais “lub hwj chim ua li Vajtswv”¹⁵ dhau ntawm cov kab ke pov thawj hwj,¹⁶ tsis xav txog yus tus kheej, thiab tshaj tawm txoj moo zoo uas kav ib txhis rau Vajtswv cov me nyuam yeej ua rau ib tug tub hluas “nyob ruaj nrees thiab khov kho coj raws li txoj kev ntseeg”¹⁷ thiab “rau siab ntseeg [Khetos].”¹⁸

Nyob hauv peb lub tsev thiab hauv lub koom txoos, peb yuav tsum hais txog peb yam ntawm tus Tswv txheej txheem rau Vajtswv cov tub uas rau siab ntseeg kom lawv npaj thiab vam meej: pov thawj hwj, lub tuam tsev, ua tub txib. Peb yuav tsum nyiam ua neeg tsim nyog thiab nyob kom tsim nyog mus li kom tau peb yam no. Cia li ua neeg tsim nyog. Nyob kom tsim nyog mus li.

Kuv cov kwv tij uas kuv hlub, kuv cog lus tias nej yuav muaj lub txiaj ntsim txais kev tshwm sim thaum nej ua nej txoj hauj lwm kom tshaj tawm txoj moo zoo thiab ua raws li qhov uas tau txib nej mus rau ib qhov chaw ua dej num. Thaum nej rau siab npaj dhau ntawm kev ua hauj lwm pov thawj hwj thiab ua hauj lwm hauv lub tuam tsev, nej zaj lus tim khawv txog qhov uas muaj tus Tswv tiag tiag yuav muaj zog ntxiv. Txoj kev hlub Nws thiab Nws txoj hauj lwm yuav puv nej lub siab. Thaum nej kawm kom nyiam ua ib tug neeg tsim nyog, nej yuav hloov los ua ib tug cuab yeej hauv tus Tswv txhais tes kom foom koob hmoov thiab pab ntau tus neeg.

Nrog kev zoo siab, kuv ua tim khawv tias peb Leej Txiv Saum Ntuj Ceeb Tsheej thiab Nws Leej Tub uas Nws Hlub, Yexus Khetos, muaj txoj sia nyob. Qhov uas peb ua Nkawd txoj hauj lwm yeej yog ib txoj koob hmoov zoo kawg uas peb txais tau. Kuv ua tim khawv li no los ntawm Yexus Khetos lub npe dawb ceev, amees.