Malipilip ong doadoahk

Nan pahr koaros serepein pwulopwul oh pwutak pwulopwul kid samwa kei oh pwopwoud mah tohto kin kaskasik en alehdi kisin likou kesempwal ehu sang Salt Lake City. Audepen kisin likou kiset kin wekidala mehlel - aramas me ekin dokdokehu, pil iangahki peneinei kan oh pil aramas tohto. Ni ahkin leledo, e kin kak en teiteipeseng ni keneinei oh sohte pwurur de sang ni peren laud kin kak teiteida ni karuaru. Wadawad en kisin likou kiset kin wia ehu ansou me soun wadawado kin sohte kak moanokehla.

Kisin likou wet kin sain sang Presiden en Mwomwohdiso en Sises Krais en Souleng en Imwin-rahn akan, oh wadawad riau me tep koasoia duwe met: “Komwi luhkehngehr en papah ni omw pahn wia misineri en Mwomwohdiso en Sises Krais en Souleng en Imwin-rahn akan. Komw koasoandiengehr en wia pwukoah doadoahk wet nan _______Misin.”

Menlau tehk mwahu me keieu en wadawado iei luhk ehu en wia misineri men me pahn papahki ah i ansou unsek nan sapwellimen Kauno Mwomwohdiso kopwurupwurdohu. Keriau en wadawado kasalehda wasa me doadoahk en misin wet pahn wiawi ie. E kesempwalehng kitail en wewehki ia kesempwal en dahme ehu ehu wadawad riau wet men kasalehieng kitail.

Nan tiahk en Mwomwohdiso wet, kitail kin kalapw koasoia luhk en papah nan wehi kan me rasohng Argentina, Poland, Korea, de nan wein Amerka. Ahpw misineri men sohte kin luhkehng ni ehu wasa; ahpw irail kin luhkehng en papah. Kauno ketin kasalehieng Soukohp Joseph Smith nan pahr 1829[kid welipwiki rieisek duwau] me ma kumwail ahniki ineng en papah Kauno, kumwail alehdier pwukoahu.²

Ehu ehu luhk en misin oh pwukoah, de pwukoah me kin kohdo mwuhr kan, iei sang ni pweidahn kaudiahl sang sapwellimen Kauno soun papah kan. Luhk en doadoahk wet kin sang rehn Koht ohng Presiden en Mwomwohdiso wet. Pwukoah ohng ehu misin me tohtosang 400 [pahpwiki] me mieansouwet nan sampah kin kohsang rehn Koht ohng irail toweh kan en Wahnpoaren Ehk-riemeno, me wie doadoahk sang ni mweimwei en sapwellimen Kauno soukohp. Kisakis kan en ngehn en kokohp oh kaudiahl iei me wia kisehn misin oh koasondi kan koaros.

Iralaud 80[welihsek] en Doctrine and Covenants koasoia rekohd en luhk ehu en misin ohng Stephen Burnett sang rehn Soukohp Joseph Smith nan pahr 1832[kid welipwiki silihsek riau]. Onopki luhk wet me kohieng Brother Burnett pahn kak sewesei kitail en (1)[keiou] wehwehkihla ni sansal wekpeseng en nanpwungen “luhk ong doadoahk wet” sang ahmwl wia misineri oh “koasoandier en doadoahk” ni wasa kis oh (2)[keriau] kapingki mehlel ni unsek pein atail oh kapwukoah kesempwal akan en pahkihwei rongamwahu wet.

Ire tikitik  1[ehu] en iralaud wet wia ehuluhk en papah: Kauno ketin masaniong Sapwellime soun papah Stephen Burnett me en kohwei nan sampah oh kalohngkhwei rongamwahuo ohng aramas akan koaros me pahn rong ngile.”³

Me kaperen , ire tikitik 2[riau] padahkiong Brother Burnett duwen ienge misinerio: Kauno masahni me pwehki Stephen Burnettanahne en mie ienge, E pahn ketkiong Sapwellime soun papah Eden Smith.”⁴

Ire tikitik 3[siluh] kasalehda wasa me misineri riemen et pahn doadoahk ie: Kauno mahsani me Stephen Burnett en kohla oh kalohngki rongamwahuo. Oh mendahte ma e kohla pali mese, de pali kapi, de pali epeng, de pali ehir, e sohte pahn wiada mehkot, pwehki sohte mehkot sapwung e pahn wiahda.”⁵

Ansou me Kauno mahsani nan ire tikitik wet me sohte mehkot sapwung e pahn wiahda, I sohte kamehlele me E songosong mahsani me E sohte “katapaniki” iawasa me Sapwellime soun papah kan doadoahk ie. Ni mehlel, E inenen katapaniki. Ahpw pwehki doadoahk en kalohngki rongamwahu iei Sapwellime doadoahk, E kin kamarainih, kaweid, oh kahluwa Sapwellime soun papah kan me ahniki mweimwei. Ni ansou me misineri kan kin nantieng oh sohte uhdisang kolokol arail warohng oh kak en wia Sapwellime soun doadoahk oh wia arail kak koaros en kapwaiada arail pwukoah kan ni pwoson,, eri sang ni Sapwellime sawas irail sohte kak wiahda sapwung was koaros me re papah ie. Ahpw ehu padahk me Sounkomouro padahkiong kitail nan kokohp wet iei me wasa me pwukoahn doadoahk wet pahn wiawi ie inenen katapan oh kesempwal ahpw e sohte nohn malipilipieng doadoahko.

Ire tikitik mih mwurio kasalehda kesempwal pen en misineri kan arail warohng wia pwukoah doadoahk wet: Kauno mahsani me irail anahne kasalehda soahng kan me irail rongehr, me irial udahn kamehlele, oh me irail ese me iei me mehlelo.”⁶

Keimwseklahn irehu katamanki Brother Burnett oh kitail koaros ohng isime luhk en papah wet kin kohsang, Kauno mahsani me kaweid kan me E ketkiheng Stephen Burnett iei Kupwure, oh iei me E malipehier ih, oh me iei Ih ah Soukomouro, Sises Krais.”⁷

Ekei kumwail mwein pahn medmedewe dahme karehda I pilada ien padahngki nan tiepenehn prihsduhd en kapokon lap wet me pidada wekpeseng en luhk en pwukoah doadoahk oh wasa me pwukoah doadoahk wet koasondi en wiawi ie. Ei pasapeng ohng amwail keinemwe iei me pahn inen oh sansal: soahng kan me I lelehngehr padakihengiehier me iren padahk pwukat sohte nohn wehwehieng pali tohtohn Mwomwohdiso wet.

Kahrepe keiou me I padahngkihki ire wet iei sang ni dahme I eselahr sang mahs kohkohdo duwen kapwunod, kasaloh, oh pepehm en koluhla memisineri tohto kan kin ahneki sang ni welialidahn arail wasahn pwukoah doadoahk pwehki kahrepe tohto kan nan erein ansoun arail papah. Soangen weliali pwukat kin ekei pak konehng en wiawi pwehki sang ni kemwekid kan me rasohng aksiden en paliwar oh ohla, kapwandalah kan oh kahpwal akan en alehdi doaropwehnpihsa, pingiping en nan kopwerment, wiawihdahn oh koasoandien nempehn tohn doadoahk en nan misin kapw akan, de mwemwekid oh wekweklah kan en anahn en sampah nan doadoahk en kalohngki rongamwahu.⁸

Ni ansou me en misineri men wasahn papah kin wekidekla, e kin indawehnte wiepe me wiawi na tapio. Toweh kan en Wahnpoaren Ehk-riemeno kin rapahki kamarain oh kaweid ni arail kin wia soangen wekidekla pwukat.

Me keren ahi kosoieng ohl pwoson men me ehukieng ie pepehm laud ehu me e ahniki nan ah mohngiong. Nan mihting ehu, I apwtehn kawewehda duwen wekpeseng en luhk ong doadoahk oh wasa me pilipilehng en wia doadoahk wet. Kempoakepai menet ahpw itik pehie oh ni pilen maseker ahpw indahngie, “Soahng koaros komw sewekiniehier ni ei esehla rahnwet kamarahradahr ai wisik toutou kan me I weuwahkier sounpar 30[silihsek] douwer powe. Ni ansou me I wia misineri pwulopwul men, wasa me I tepin pahn wia ai pwukoah doadoahk iei Pali Kapi en Amerka. Apw I sohte kak alehdi nei doaropwehn pihsa, eri ngehi uhd kohla nan Weihn Amerka. Nan erein pahr pwukat I kin medmedewe dahme karehda I sohte kak papah nan wasa me I tepin lukehng ien wia ai pwukoahn papah. Met I esehier me I lukehng en wia doadoahk en kalohngki rongamwahuo oh kaidehn wasa me I pahn kohla ie me kesempwal. I sohte kak indahieng uhk ia wen kawehwe wet ah seweseiehda.”

I poakehla ohl mwahu menet. I padahngkier padahk pwukat nan sampah, me tohto kin kasalehieng ie soangen madamadauohte me duwehte ohl me I apwtehn kawehwehda. I koskosoia ire wet rahnwet pwehki sohte emen tohn Mwomwohdiso wet anahne en weuwa soangen toutou pwukat me rasohng sawehwe kan, peikasal, tihwo, de pepehm en koluhla me pid duwen koasoandihn wasahn doadoahk.

“Kauno ketin mahsaniengehr Stephen Burnett me e anahne en kohla oh kalohngki rongamwahuo. Oh mendahte ma e kohla pali mese, de pali kapi, de pali epeng, de pali ehir, e sohte pahn wiada mehkot, pwehki e sohte pahn kak wiada mehkot sapwung.”⁹ Ni amwail kin medemedewe mahsen en ire tikitik wet oh kamehlele, I koapwoaroapwoarki oh kapakapki kumwail en luke Ngehn Sarawi en kaweidkin kumwail wehwe, kamwaupe, oh weliakapw me kumwail anahne.

Ehu kahrepen ahi pehm ien koasiahda ire wet iei soahng kan me I eselahr ni ahi kin kiheng en misineri kan arail wasahn doadoahk erein pahr tohto kei. Ohng Wahnpoaren Ehk-riemeno, sohte mehkot kin kamehlelehda dahme kin wiwiawi kohdo nan kaudiahl en imwin rahn akan me keieu manaman sang rapahki kupwuren Koht ni ansou me se kin kapwaiada aht pwukoah kan en pilada wasah kan me emenemen misineri pahn wia ah doadoahk ie. I kadehde me Sounkomouro ese oh wehwehki mehlel emenemen kitail oh edetail akan.

Ansou kiset I men ekis koasoiahda ire kesemwpwal akan ahpw dahme kitail sohte kin kalapw tehk ni ansou en kaunopadahng malipilip en wia pwukoah doadoahk wet.

Lepin lokoaia siluh me kawehwe mwomwen kaunopehng oh pweida kan ong sapwellimen Koht pwutak kan: prihsduhd, tehnpas sarawi, misin. Ekei pak kitail pahpa nohno, kempoakepahtail kan, oh toweh kan en Mwomwohdiso, kitail kin kesempwalikihte kaunopada pwutak pwulopwul kan ong doadoahk en misineri ni atail kin kak pohnsehsehla soahng teikan me inenen kesemwpwal ohng wiahda oh idihdawehn inou kan me irail wiadahr me anahne irail en kapwaiada mwohn tapihada pwukoah doadoahk en misin. Doadoahk en misineri iei ehu pwukoah doadoahk ahpw kaidehn ihte me keieu kesemwpwal en wiawi ong kokoudahn poahsoan kehlail en kekeirdahn mour oh sawas akan. Kapai kan en prihsduhd oh tehnpas sarawi, koaros me kin wiawi mwohn lela nan wasahn doadoahk, pil anahn ohngkalaudehla oh kakehlakahla palingenetail nan erein atail momour.

Pwutak pwulopwul kan, ni amwail pahn kapwaiada oh wauniki amwail pwukoah kan nan Prihsduhd en Aron me keieu tikitik, kumwail kaunopadahr en alehdi oh katehlapehla kahula oh inou en Melkesdik de Prihsduhd me keieu laud.¹⁰Pein amwail warohng iei me keieu kesemwpwal en kak alehdi prihsduhd laud wet. Amwail ansou en papah prihsduhd wet mihmi mwohmwail. Kaunopada met sang ni amwail pahn kin ansou koaros pahkihwei pwukoah doadoahk kan. Menlau esehla kesempwalki ken warohng oh warohngete. Nantiheng warohng. Nantihengwarohngete.

Mwurin alehdi Melkesidik Prihsduhd oh malipilip en papah, pwutak pwulopwul men kak ahniki manaman¹¹sang ni inou kan oh tiahk sarawi kan en tehnpas sarawi. Kohla nan tehnpas sarawi oh ahniki pepehm en ngehn sarawi en nan tehnpas sarawi kipeiukidi kaunopadahr ahl mwahu ehu ong pwukoahn papahn misineri. Pein ahmw warohng me keieu kesemwpwal ong anahn en alehdi kapai kan en tehnpas sarawi ong kumwail pwutak pwulopwul kan oh toweh kan en Mwomwohdiso wet. Ni amwail pahn momourki padahng kan en rongamwahu wet, kumwail pahn kak pidolongehng nan tehnpas en Kauno oh iang wia tiahk sarawi kan nan erein pahr akan en amwail wia me pwulpwulopwul kei. Amwail limpoak ohng oh wehwehkihla tiahk sarawi kan en tehnpas sarawi pahn kakehlailiala oh kapaiada amwail mour. Menlau esehla kesempwalki ken warohngoh warohngete. Nantiheng warohng. Nantiheng warohngete.

Me tohto pwutak oh serepein pwulopwul kolokolehr neirail kisin likou en mweimwei en pidolong nan tehnpas sarawi. Ohng kumwail me ahneki Prihsduhd en Aron kan, kumwail pahn rapahkihda eden pein amwail peneinei kan oh wia tiahk sarawi en pepdais ong irail nan tehnpas sarawio. Epwel mwahu en noumwail kisin likou en mweimwei en pidolong nan tehnpas sarawi pahn kasalehda amwail warohng oh papah mehteikan nan tehnpas sarawio wia me pil kesemwpwal ohng kaunopadahn alehdi Prihsduhd en Melkisidik.

Pwutak pwulopwul kan, emenemen kumwail wia misineri kei. Wasa koaros, rahn koaros, kempoakepahtail kan oh mehn impetail kan me sohte kak ese me mehlelo pwehki irail sehse iawasa irail pahn diar ie.”¹² Ni amwail pahn ale kaweid sang Ngehn Sarawi, kumwail kak ehuki amwail madamadau, luhk ehu, inting ehu, de lepin koasoi ehu nan inderned me pahn kak en lukehieng kempoakepahmwail kan me mehlelo duwen kopwurpwurdohn rongamwahuo. Ke sohte anahne awih ahmw ansou me malipilipo pahn kodohng uhk ahpw tepdahr wihwia doadoahk en misineri.

Ni ansou me kapai en prihsduhd, tehnpas sarawi, oh misin kin kohpene, “koaros wia ehu … rehn Krais”¹³ oh kin doadoahk pene ni mohngiong, madamadau, oh pali ngehn en misineri pwulopwul men, e kak warohng pwukoah doadoahko.¹⁴Ah pwukoah laudla ni ah kapwaiada pwukoahn ale mweimwei en Kaun Sises Krais. Manaman en kapatapene wahu en prihsduhd oh inou kan en tehnpas sarawi, alehdi manaman en koht akan,¹⁵sang ni tiahk sarawi kan en prihsduhd,¹⁶ papah, oh lohkihwei rongamwahu poatoapoat wet ohng sapwellimen Koht seri kan sewesehda pwutak pwulopwul men en kak ahniki pwoson tengeteng oh kehlail¹⁷ oh” poadedi oh kekeirda rehn [Krais].”¹⁸

Nan imwatail kan oh ni ihmw sarawi, kitail anahne kapahrekih soahng silu koa me Kauno koasonehdier ohng kaunopadahn oh pweidah kan ohng sapwellimen Koht pwutak pwoson kan: prihsduhd, tehnpas sarawi, oh misin. Soahng siluh kat koaros anahne kitail en kesempwalki warohng oh warohngete. NantihengWarohng. Nantiheng Warohngete.

Kempoakepai ko, I inouki me kisakis en ngenen kaudiahl pahn ieiang amwail malipilip en doadoahk en lohkihwei rongamwahu wet oh nan amwail wasahn wia pwukoah doadoahk wet. Ni amwail pahn insonohki kaunopada met sang ni papahn prihsduhd oh tehnpas sarawi, amwail kadehdehn mour en Koht pahn kehlaila. Limpoak ohng Ih oh Sapwellime doadoahk pahn kipehdi amwail mohngiong.Ni amwail pahn kesempwalki warohng, kumwail pahn wiahla sapwellimen Koht mehn doadoahk en kapaiada oh papah aramas tohto.

Ni peren unsek, I kadehde me Samatail Koht oh Sapwellime Ieroso, Sises Krais, ieias. Pwe kitail en iang patehng Sapwellimara doadoahk iei ehu kapai laud me kitail kak alehdi. I kadehde ni lengleng sarawi en Sises Krais, ahmen.