Cov Poj Niam Paub Meej
Cov poj niam paub meej no yeej tsom ntsoov rau tus Cawm Seej Yexus Khetos thiab muaj kev cia siab los ntawm cov lus cog tseg ntawm Nws txoj kev Theej Txhoj.
Kuv cov viv ncaus uas kuv hlub, peb hlub nej thiab ua nej tsaug rau nej tej txoj kev ua siab mos siab muag thiab kev zoo siab los txais Thawj Pawg Thawj Tswj Hwm cov lus caw thiab txoj hauj lwm #IWasAStranger. Rau rau siab thov Vajtswv, mloog tej kev tshoov siab ntawm tus Ntsuj Plig, thiab ua raws li tej kev tshoov siab.
Txawm hais tias kuv mus hauv zos los sis mus txawv teb chaws, yeej muaj cov neeg uas los hais rau kuv tias, “Koj puas nco qab kuv?” Vim hais tias kuv yog ib tug neeg tsis zoo tag nrho, feem ntau kuv yuav tau lees hais tias kuv nco tsis tau cov npe zoo li. Txawm yog li ntawd los, kuv yeej nco tau txoj kev hlub uas Leej Txiv Saum Ntuj Ceeb Tsheej muab rau kuv thaum kuv mus ntsib nws cov tub thiab cov ntxhais.
Tsis ntev tas los no kuv muaj lub cib fim mus ntsib ib co viv ncaus uas tau raug kaw qhov taub. Thaum peb yuav sib ncaim, muaj ib tug viv ncaus, hais rau kuv hais tias, “Viv ncaus Burton, thov koj nco ntsoov peb nawb.” Kuv cia siab hais tias nws thiab lwm tus poj niam uas xav kom peb nco txog lawv yuav zoo siab thaum kuv qhia ob peb tswv yim rau nej.
Cov Poj Niam Paub Meej hauv tus Cawm Seej lub Caij Nyoog: Tsom Ntsoov tus Cawm Seej Yexus Khetos.
Ib tiam dhau ib tiam peb cov viv ncaus yeej rau siab ua raws li txoj kev ntseeg ntawm kev ua thwj tim uas peb yeej sim ua thiab. “Hauv Phau Tshiab yeej muaj tej yam qhia txog cov poj niam [paub meej], txawm hais tias hais lawv npe los tsis hais, uas yeej muaj kev ntseeg ntawm Yexus Khetos [thiab Nws txoj kev Theej Txhoj], uas kawm thiab ua neej raws li Nws tej lus qhuab qhia, thiab yeej hais lus tim khawv txog Nws txoj hauj lwm, tej txuj ci, thiab tej kev zoo. Cov poj niam no yog cov thwj tim zoo thiab cov uas ua pov thawj txog Nws lub luag hauj lwm cawm seej uas tseem ceeb”1
Xav txog tej lus sau tseg no hauv phau ntawv Lukas. Thawj qhov, yog thaum tus Cawm Seej txoj hauj lwm qhuab qhia:
“Tom qab ntawd … Yexus mus txhua nrho hauv tej nroog thiab hauv tej zos, Yexus qhia Txoj Moo Zoo uas hais txog Vajtswv lub Teb Chaws. Yexus kaum ob tug thwj tim nrog nws mus,
“Thiab tej tug poj niam paub meej, … Maivliag hu ua Madalas, … thiab Yau-anas … , thiab Xuxanas, thiab coob tug ntxiv, uas tau pab nws.”2
Qhov ntxiv mus, yog tom qab Nws Txoj Kev Sawv Rov Los:
“Thiab cov poj niam paub meej … uas tuaj ntxov ntxov rau ntawm lub hleb pob zeb;
“… Tiam sis lawv tsis pom Yexus lub cev lawm. Lawv rov los qhia rau sawv daws hais tias, lawv pom cov tim tswv ceeb tsheej qhia rau lawv hais tias, Yexus twb rov muaj sia lawm”3
Kuv tau nyeem cov ntawv thiab yeej cia li nyeem dhau plaws cov lus uas zoo li tsis tseem ceeb li “cov poj niam paub meej” ntau ntau zaus dhau los lawm, tab sis tsis ntev tas los no kuv ua tib zoo xav txog cov lus no zoo dua. Xav hais tias tias seb lo lus no txhais tau li cas zoo ib yam li txuas tau rau txoj kev ntseeg, cov poj niam paub meej: “ua zoo ntxias,” “coj zoo,” “muaj peev xwm,” “coj tus,” “coj ncaj,” “paub tseeb,” thiab “tso siab tau rau.”4
Thaum kuv xav txog cov lus zoo heev no, kuv nco txog ob tug poj niam hauv Phau Tshiab uas yog cov poj niam paub meej uas hais lus zoo, muaj peev xwm, coj tus, uas ua tim kawv txog tus Cawm Seej. Txawm hais tias nkawd, zoo li yam peb, es yeej tsis yog cov poj niam zoo tag nrho, nkawd zaj lus tim khawv yeej zoo heev li.
Puas nco qab txog tus poj niam uas tsis hais npe uas nyob ntawm lub qhov dej haus es caw kom sawv los saib seb nws kawm tau dab tsi ntawm tus Cawm Seej? Nws hais nws zaj lus tim khawv meej thaum nws nug ib los lus hais tias: “Es no tsis yog tus Khetos los?”5 Nws zaj lus tim khawv thiab cov lus caw zoo heev uare rau coob … tus los ntseeg tus Tswv.”6
Tom qab nws tus nug Lazarus tuag lawm, Martha uas yog tus Tswv ib tug thwj tim thiab tus phooj ywg zoo heev no, tau hais tias, “Tus Tswv, yog hais tias muaj koj nyob ntawm no ces, kuv tus nus yeej tsis tuag.” Xav txog qhov paub meej ntawm nws cov lus uas nws hais ntxiv mus hais tias, “Tab sis kuv paub, hais tias txawm muaj li no lawm los, yog kov thov dab tsi ntawm Vajtswv, Vajtswv yeej yuav muab rau koj.” Nws hais lus tim khawv ntxiv hais tias, “Kuv ntseeg hais tias koj yog tus Khetos, Vajtswv Leej Tub, uas yuav los rau hauv ntiaj teb.”7
Peb kawm tau los ntawm cov viv ncaus no hais tias cov poj niam paub meej no yeej tsom ntsoov rau tus Cawm Seej Yexus Khetos thiab muaj kev cia siab los ntawm cov lus cog tseg ntawm Nws txoj kev Theej Txhoj.
Cov Poj Niam Paub Meej uas Ua Raws Li tej Kev Khi Lus ntawm txoj Kev Txum Tim Txoj Moo Zoo Rov Qab los: Yeej Kam Ua Kev Txi
Thaum ub, cov poj niam paub meej ua kev txi thaum lawv hais lus tim khawv thiab ua lub neej raws li Yexus tej lus qhuab qhia. Cov poj niam paub meej uas nyob rau lub sij hawm thaum muaj txoj kev txum tim txoj moo zoo rov qab los yeej ua ib yam li thiab. Drusilla Hendricks thiab nws tsev neeg yog ib co ntawm cov neeg uas hloov siab los ntseeg, ua tau raug kev txom nyem thaum cov Neeg Ntseeg raug kev tsim txom nyob hauv Clay County Missouri. Thaum muaj kev sib tua ntawm Npluav Rog tom Crooked River ua rau nws tus txiv tuag tes tuag taw. Ces nws yuav tau tu nws tus txiv thiab pab nws tsev neeg thiab.
“Muaj ib zaug uas, nws tsev neeg nyuab siab heev, vim tsis muaj zaub mos noj, ces nco tau hais tias nws hnov ib lub suab hais tias, ‘Tos me ntsis, tus Tswv mam li pab.’”
Thaum lawv yuav kom nws tus tub koom pawg Mormon Battalion, thaum chiv thawj Drusilla tsis kam thiab nws thov Vajtswv tag zog li mus txog rau thaum uas nws zoo nkaus li nws tau hnov ib lub suab hais rau nws hais tias, ‘Koj tsis xav tau lub yeej koob zoo tshawj plaws los?’ Nws hais tias, ‘Kuv yeej xav tau,’ ces lub suab hais ntxiv hais tias, ‘Koj puas tsum yog thaum yus muab tej yam tseem ceeb pub es thiaj li yuav tau tej yam tseem ceeb xwb?’”8
Peb kawm tau hais tias tus poj niam paub meej uas ua raws li lawv tej kev khi lus yeej kam muab tej yam tseem ceeb los pub.
Cov Poj NIam Paub Meej Niaj Hnub Nim No: Nco Ntsoov thiab Npaj Tos Nws Yuav Rov Qab Los
Kuv twb hais txog cov poj niam paub meej uas nyob hauv tus Cawm Seej lub sij hawm thiab thaum lub sij hawm uas txoj moo zoo uas txum tim rov qab los. Hais txog cov yam ntxwv thiab tej lus tim khawv ntawm cov poj niam paub meej nyob hauv peb lub sij hawm no ne?
Tsis ntev tas los no kuv tau mus rau teb chaw Axias, es kuv ntsib coob tug poj niam paub meej uas ua rau kuv xav ua zoo. Kuv zoo siab heev uas cov mej zeej hauv India, Malaysia, thiab Indonesia, uas rau siab ua neej raws li txoj moo zoo hauv lawv tej tsev, thiab qee zaum tseem ua ua tej yam zoo heev tab sis xawv lawv tej kev cai thiab. Cov poj niam paub meej uas laus thiab tib si nyob hauv Hong Kong thiab Taiwan yeej rau siab ntso foom koob hmoov rau lawv tsev neeg, lub koom txoos, thiab tej zej zog thaum lawv tsom ntsoov tus Cawm Seej thiab yeej kam muab tej yam zoo los pub kom thiab li ua tau raws li tej kev khi lus. Yeej muaj tib co poj niam paub meej li no uas nyob thoob plaws hauv lub Koom Txoos.
Ib tug poj niam paub meej uas tau foom koom hmoov rau kuv lub neej tau ntev ntev los lawm tau muaj ib tug mob hu ua inclusion body myositis tau li 15 lub xyoos lawm. Txawm hais tias nws zaum hauv lub laub xwb los, nws yeej zoo siab thiab hais rau nws kheej hais tias “Kuv ua tau kawg”: tej yam uas nws ua taus, xws li kuv ua taus pa, kuv nqos taus zaub mov, kuv thov tau Vajtswv, thiab kuv paub hais tias tus Cawm Seej hlub kuv. Nws tsom ntsoov Khetos paub meej ua tim khawv rau nws tsev neeg thiab cov phooj ywg.
Tsis ntev tas los no kuv tau nyeem Jenny zaj dab neeg. Thaum nws tseem ua ib tug ntxhais txib nws niam thiab nws txiv nkawd sib nrauj. Nws qhia txog qhov uas nws “ntshai ntshai rov qab los tsev.” Tab sis thaum nws ua ntxhais txib tag rau hauv teb chaw Italy, ces nws mus nres hauv lub tsev rau cov tub txib npaj los mus teb chaws Mis Kas, ho muaj ib tug poj niam paub meej,, uas yog tus thawj hwm ntawm qhov chaw tshaj tawm txoj moo zoo tus poj niam, tau ua zoo rau nws es ntsis nws cov plaub hau.
Ntau xyoo tom qab ntawd, lwm tus poj niam paub meej, hu ua Terry—ib tug thawj tswj hwm rau ceg txheem ntseeg lub Koom Haum Niam Tsev tau foom koob hmoov rau Jenny lub neej thaum Jenny raug hu los ua pawg ntseeg tus thawj tswj hwm rau lub Koom Haum Niam Tsev. Thaum lub sij hawm ntawd, Jenny tab tom sau ntawv kom tau nws daim ntawv pov thawj doctoral. Tsis yog Terry ua hauj lwm pab qhia Jenny ua ib tug thawj coj xwb, tiam sis nws kuj zov nws kam 10 xuab moos ntawm lub tsev kho mob thaum Jenny txais xov xwm hais tias nws muaj mob kab mob cancer ntshav. Terry tau mus xyuas lub tsev kho mob thiab thauj Jenny mus ntsib kws kho mob. Jenny lees hais tias, “Kuv xav tias tej zaum kuv ntuav ob peb zaug hauv nws lub tsheb.”
Txawm tias nws muaj mob los, Jenny yeej meem ua hauj lwm zoo ua tus thawj tswj hwm ntawm lub Koom Haum Niam Tsev. Txawm tias nws tsis muaj zog los, nws hu xov tooj thiab xa xov xwm hauv xov tooj thiab xa ntawv mus rau neeg coob heev los ntawm nws lub txaj mus, thiab nws tau caw nws cov viv ncaus tuaj xyuas nws. Nws xa ntawv mus rau lwm tus neeg, es hlub nws cov viv ncaus txawm tias nrug deb me ntsis. Thaum nws pawg ntseeg thov kom tau ib daim duab txog nws pawg thawj tswj hwm, lawv tau daim duab no. Vim Jenny yog ib tug poj niam paub meej, nws tau caw txhua tus sib pab ris nra, suav nws lub nra thiab.
Ua ib tug poj niam paub meej,, Jenny ua tim khawv hais tias: “Tsis yog peb nyob no kom cawm lwm tus neeg, tiam sis peb kuj nyob no cawm peb tus kheej thiab. Thiab txoj kev cawm seej ntawd los ntawm qhov uas peb nrog Yexus Khetos sib koom siab; los ntawm qhov uas peb to taub Nws txoj kev tshav ntuj thiab Nws txoj kev Theej Txhoj thiab qhov uas Nws hlub cov poj niam ntawm lub Koom Txoos. Yeej muaj li no dhau ntawm tej yam yooj yim npaum li ntsis leej twg cov plaub hau, xa ntawv txhawb nqa lwm tus neeg, los yog cia lwm tus poj niam pab peb.”9
Kuv cov viv ncaus, thaum peb tau ua xyem xyav tsis muaj siab ntseeg, poob siab, ua txhaum, los yog nkees nkees ntawm sab ntsuj plig, thov kom peb txais tus Tswv txoj kev caw los haus Nws cov dej muaj txoj sia ib yam li tus poj niam paub meej rau ntawm lub qhov dej, thiab caw lwm tus ua ib yam nkaus li ntawd thaum peb ua tim khawv paub meej hais tias: “Nov yog tus Khetos los sav?”
Thaum lub neej no tsis ncaj rau peb, ib yam li thaum Mathas tus nus tso nws tseg—thaum peb mob siab thiab kho siab, muaj tsis tau me nyuam, muaj cov neeg uas hlub peb tso peb tseg, tsis tau muaj cib fim yuav txiv thiab muaj cuab muaj yig, muaj kev sib nrauj, raug poob siab ntsus, mob paj hlwb los yog mob ntawm lub cev, muaj kev ntxhov siab, muaj yees rau ib yam dab tsi li, xyob txhiaj, los yog ntau yam ntxiv—thov kom peb nco qab ntsoov Martha thiab tshaj tawm peb cov lus tim khawv paub meej hais tias: “Tiam sis kuv paub … [thiab] kuv ntseeg tias koj yog tus Khetos, Vajtswv Leej Tub.”
Thov kom peb nco qab ntsoov cov poj niam paub meej coob heev uas tsis kam tso peb tus Cawm Seej tseg thaum Nws raug txom nyem ntsuav saum ntoo khaub lig thiab ob peb xuab moos tom qab ntawd tau txais lub cib fim ua thawj thawj cov neeg uas ua tau tim khawv paub meej thiab pom Nws sawv hauv qhov Tuag Rov Qab Los. Cia peb nyob ze Nws dhau ntawm txoj kev thov Vajtswv thiab kev kawm vaj lug kub. Cia peb txav ze rau ntawm Nws thaum peb npaj rau thiab noj lub cim nco txog dawb ceev txhua lub lim piam thiab thaum peb ceev peb tej kev khi lus thiab ua hauj lwm pab lwm tus neeg uas xav tau kev pab. Ces tej zaum peb mam li koom tau cov poj niam paub meej, cov thwj tim ntawm Yexus Khetos, uas yuav ua koob tsheej nco txog Nws thaum Nws rov qab los zaum thib ob.
Kuv cov Viv Ncaus, kuv ua tim khawv hais tias muaj Niam Txiv Saum Ntuj Ceeb Tsheej; thiab muaj peb tus Cawm Seej, Yexus Khetos, thiab Nws txoj Kev Theej Txhoj Nyob Mus Ib Txhis. Kuv paub hais tias tus Yaj Saub Yauxej Xamiv yog npaj ua ntej lub neej no kom ua tus yaj saub rau txoj Kev Txum Tim txoj Moo Zoo Rov Qab Los. Kuv paub hais tias Phau Ntawv Maumoos muaj tseeb tiag thiab yog txhais ua lus Akiv dhau ntawm Vajtswv lub hwj chim. Peb tau koob hmoov uas muaj ib tug yaj saub niaj hnub nim no, Thawj Tswj Hwm Thomas S. Monson. Hais txog tej qhov tseeb no kuv paub meej! Los ntawm Yexus Khetos lub npe, amees.
Lus Cim: Thaum lub Plaub Hlis Ntuj 1, 2017, Viv Ncaus Burton yog tso tawm ntawm nws txoj hauj lwm ua tus Thawj Tswj Hwm ntawm lub Tuam Koom Haum Niam Tsev.