Remui el Medengei el Redil
Remui el medengei el redil a oltirakl er a Osobel el Jesus Kristo e ngarngii a urungulir lokiu a telbiil er a tngakireng er Ngii.
Betik er a renguk el rodos er ngak, ng meral betik a rengmam er kemiu e mereng a suliu er a blekokeuii me a klemeriar reng el kongei er a ongit er a First Presidency me a urerel a #IWasAstrangers. A kulengit me molemolem el ngara nglunguuch, e morrenges odbechel Chedaol Reng, e bo moltirakl aike el mngai el tekoi.
A di kumais er a beluu malechub a kumais er a beluulechad, e ng diak el ngodech el tekoi sel loker a chad el kmo, “Ke dirk medengelkak?” Ng uaisei el diak meduch er a rokui, e a kuchais el kmo ngak a kmal besbes er a ngklir a rechad. E ng di, a kmal ungil medengelii sel meral beltik el reng el Chedam er a Babeluades a mla rullak el mo melchesuar sel kebetech ngak me a remekreos el ngelekel redil me a rsechal.
Ng dirk mlarngii a techellek el mo oldingel er a rebebil er a mekreos el redil er a blil a kelebus. A ki bocha mkasmesumech, e a tara redil a ulengit el kmo, “Sister Burston, a kulengit me lak mobes er kemam.” Me ngurungulek me ngii me a rebebil er a redil bo lomelchesiu el dirkak kubes er tir er chelecha el kuchais a bebil er a tekoi el ngara uldesuek.
Remui el Medengei el Redil er sel Taem er a Osobel: Oba Moktek el ngara Jesus Kristo
A remui el medengei el redil er a irechar el mei a ulechotii a teletael er a blak el reng er a roltirakl el kid a dirrek el melasm el mo er ngii. “A Beches el Renged a uldimukl er ngii a cheldecheduch er a [remui el medengei] el redil, a ulecholt a ngklir me a rediak lulecholt a ngklir el redil, el mle ultuil er a klaumera er tir er a Jesus Kristo me a [Tngakireng er Ngii], e milsuub e kiliei loltirakl Osischeklel, e ulechais el kirel a Urerel, ongasireng, me a klisichel. Tirkaikid el redil a mlo okesiu er a roltirakl e meklou a belkrir el sioning er a ureor el kirel a mo suobel.”1
Ka momtab aikakid el cheldecheduch er a chelsel a hong er a Lukas. A kot, a ulemuchel er a temel Osobel:
“A uriul er itiang … e a [Jesus] a mirrael el mo er a meklou me a mekekerei el beluu, lolisechakl a ungil klumech el kirel a rengedel a Dios: e a reteruich me a terung a ulebengkel,
“E a remui el medengei el redil, … el Maria el okedongall el Magdalene, … me a Joanna … , me a Susanna, me a lmuut el bebil, a ulebengkel.”2
A kuk tara, cheldecheduch a dilubech ruriul er a Okiis er a kodall:
“E a remui el medengei el redil …a ulemkokl el mo er a debull;
“… E a lekea le betik er a bedengel, e te merman, e melekoi, el kmo te mla … mesterir a reanghel, el dmu el kmo ngii a dirk ngar.”3
Ak mla choiuii e mesang a osisiu el meang el tekoi el “remui el medengei el redil,” el betok el taem er a memong, e ng di a kmal dirk mlo ungil melbedebek, le ng uaia le mlak el tab osengek a blekerdelir tirka el redil er a chelsel aika el cheldecheduch. Ka momtab a osisiu el tekoi el belkul a tekoi el mui el medengei el uaia mui er a klaumerang: “mui el medengei,” “omes er a klungiolel a tekoi,” “ansing,” “mesisiich,” “bleketakl,” “ungil medengei,” me a sebeched “lultuil er ngii.”4
Sel kulbedebek aika el tekoi, e ak dobedbeketerir a reteru el mui el medengei el redil er a chelsel a Beches el Renged el tir a ulechais er a mesisiich, me a lodengelii, e diak el mesim, e bleketakl el klaumerang er a Osobel. Ng uaisei, el tir a mle uai kid, el diak el cherrungel er a rokui el tekoi, e ng di a sioning er tir a omekellomes.
Kom dobedebkii ngike el diak lulecholt a ngklel redil er a chido el ulechau er a rebebil el mei me leues aike el bla el suub er a Osobel? Ng ulechais er a muiel sioning er ngii loba ker: “Ngika ng diak el ngii a Kristo?”5 A klaumera er ngii me a ongtil a meral mle mesisiich me a rebetok … a mlo oumera er ngii.”6
Uriul er a kodellel ochedal, er a Lazarus, e a Martha, el ngii oltirakl e sechelil a Rubak, a milchisii a dmolech lulmelchesiu er ngii el tekoi, “Rubak, omko ke mla er tiang, e a ochedak a dimlak el mad.” Ka momtab er a mui el klemedengei er ngii er a lolemolem el kmo, “E ng di ak medengei, er chelechang, el kmo ngii di el ngera el molengit er ngii er a Dios, e ngii el Dios a mo meskau.” Ng millemolem louchais el kmo, “A kuumerang el kmo kau a Kristo, el Ngelekel a Dios, el mlodurokl el mei er a beluulechad.”7
Kede suubii er tirkaikid el odos el kmo a remui el medengei el redil a ultuil a moktek er tir er a Osobel el Jesus Kristo e ngarngii a urungulir lokiu a telbilel a tngakireng er Ngii.
Remui el Medengei el Redil Loltirakl a Telbiil er Chelechal Taem: Kongei el mo Chuarm
A irechar, e a remui el medengei el redila mlo chuarm louhcais e oltirakl osischeklel a Jesus. A remui el medengei el redil er a uchelel Oluut me te miruul osisiu. A Drusilla Hendricks me a telungalek er ngii a mle bebil er tirkel, mle beches lobult el mo chedal a ikelesia, e mlo er a ringel er a odechelakl el mo er a Resanto er a Clay County Missouri. A bechil a mlo chitechut er a taem er a Battle of Crooked River. Me ng mlo oltekau er ngii e dirrek el mesiou er a telungalek er ngii.
“A tara kmal mle meringel el taem, el dimlak a kelel tia el telungalek, e ng dilbedebekii a ngor el millekoi er ngii el kmo, ‘Moutekangel, le Rubak a mo sobecheklau.’”
A bocha lusbechall a ngelekel sechal el mo er a Mormon Battalion, e a kot a Drusilla a dimlak el soal e mlo ngara nglunguuch el kirel lobengkel a Rubak el mo el muut er a “lemei a ngor er ngii el kmo, ‘Kau ng diak el soam sel kot el ngarbab el klebkall?’ Me ng kilengei, e kmo ‘Oi,’ e a ngor a millemolem el melekoi el kmo, ‘Me ke mekera e mo nguu a lak bom charm er a klou el ringel?’”8
Kede suubii er tirkaikid el mui el medengei el redil el kmo a doltirakl a telbiil e ng kired el kongei el mo chuarm.
Remui el Medengei el Redil er Chelechal Sils: Melbedebek e Mengedmokl el mo Oudkeu er a Luut er Ngii
Ak mla smodeterir a remui el medengei el redil er a taem er a Osobel me a taem er a uchelel Oluut er a ebangkelio. E a ikel kuk okesiu me a chisel a klaumerang er a remui el medengei el rediler chelechal sils er kid a mekerang?
A urerek el dirk mlo er a Asia, e ak liluut el mosisechakl er a rebetok el remui el medengei el redilel ki blo mkebetech. Ng kmal mlo mechas a renguk er tirkel kot el telcheroll el chedal a ikelesia er a India, Malaysia, me a Indonesia, el melasm loltirakl a siukang er a ebangkelio er a rekebelurir, el bebil er a taem e ng kmal meringel le osisechakl er a ebangkelio a blechoel lomtok a siukang er a telungalek er tir me a rekebelurir. E tirkel kuk rechad er a blirir a meketeketang el chedal a ikelesia e a rebebil er a remui el medengei el redil er a Hong Kong me a Taiwan a melemolem lomekngeltengat a klengar er a telungalek er tir, me a rechedal a Ikelesia, me a beluu el melemolem lultuil a moktek er tire r a Osobel e blak a rengrir chuarm loltirakl a telbiil. A rosisiu el remui el medengei el redil a debetik er tir er a chelsel a Ikelesia el rokir.
A tara mui el medengei el redil el ngii a ulemekngeltengat er a klengar ngak el kemanget el taem a mla mo teruich me a eim el rak el secher, er a meringel, e diak el mukar el rakd el Mengitechut a Techel a Bedengel. Ng uaisei el di ngara wheelchair, e ng di ng melasm el ngara omereng el saul e melemolem el a “Ikel Sebechel Meruul Tekoi”: e blechoel lomes aika el tekoi el ngii a sebechel meruul, el uaia ng sebechek el outeliil, ng sebechek lomerekakl, ng sebechek el meluluuch, e Sebechek el melchesuar a beltkil a rengul er a Osobel el kirek. Ng blechoel louchais er a mui el klaumera er ngii er a Kristo er a bek el sils el mo er a telungalek er ngii me a resechelil.
Ak dirk rirengesii a cheldecheduch el kirel a Jenny. Ng mla mo merek el misionari e a demal me a delal a mlo diak el bechiil er a taem el ngii a ngara mission. Ng ulechais er a uldasou el kirel a luut er ngii el mo remei el kmo “ng kmal mle medakt [er] ngii el tekoi.” E ng di uriul er a mission er ngii er a Italy, e bo el tab er a blil a merredel er a mission ruchei er a bo el rei er a beluu er a Merikel, e a tal mui el medengei, el bechil a merredel er a mission, a milkekokil mesengsongd a cheiul.
Betok el rak ruriul, e tara mui el medengei el redil, el Terry— ngklel el ngii a merredel er a Relief Society er a stake a ulemekngeltengat er a klengar er a Jenny er a lemokedong a Jenny el mo merredel er a Relief Society er a ward. Tiaikid el taem e a Jenny milngedmokl er a babilengel er a skuul el kirel a doctorate degree er ngii. A Terry dimlak di lungil okesiu el mo er a Jenny er a tekoi er a omerredel, ng dirrek el kiliei lobengkel el teruich el sikang er a ospitar er a le secher a Jenny er a rakt el leukemia. A Terry uleldingel er ngii er a ospitar e uleltak er a Jenny el mo er a ikel temel a ukeruul er ngii. A Jenny millekoi el kmo, “A kumdasou e ng mle soak lomudech er a chelsel a mlil.”
Me ng diak el iior er a secherel, le Jenny a millemolem el blak a rengul el mesiou el merredel er a Relief Society er a ward. Uldimukl er a ikel taem el sal meriked, e ngara dukellel, e ou dengua oldurokl a text me a email e siotai er a rodos el me oldingel er ngii. Ng oldurokl a kard me a tekoi el mo er a rechad, tirkel betik er a rengul rodos er ngii el kiei er a cheroid. A ward er ngii er a lolengit er a siasing er tir el ngara omerredel el mo melecha er ngii er a reksi er a ward, e tiakid a le ngiluu. Le Jenny el mui el medengei el redil e ng siotai er a rokui el chad el mo mesebechakl a berraod er a rebebil, luldimukl er ngii.
Me ngii el mui el medengei el redil, e a Jenny ouchais el kmo: “Kid a diak di de ngar tiang lolsobel er a rebebil kede dirrek lolsobel er kid. E tiaikid el teletael er a mo suobel a mei lokiu a klaukledem er kid lobengkel a Kristo, el mo medengelii a chubechub er Ngii me a Tngkaireng er Ngii me a beltik el reng er Ngii el mo er a redil er a Ikelesia. Tia dubech lokiu a mekekerei el tekoi el uaia mesengsongd a cheiul a tang; oldurokl a klemeched lolab omekellomes, bleketakl, me a chedaol tekoi er a ongiil me a chubechub; malechub e kede kongei omesiungir a rebebil er a redil el kired.”9
Rodos, sel bol mechesang osenged, rrau a rengud, mesaul a rengud, ruebet er a klengit, klengit el reng, malechub a lobereda bedenged, e a kureng me de kengei er a ongtil a Rubak el mo nguu sel lomkar el ralm er Ngii el uai ngike el mui el medengei el redilel mlara chido, e siotai er a rebebil el mo meruul er a osisiu e melemolem lurrekodel er a mui klemedengeiel sioning er kid el kmo: “Ngika ng diak el ngii a Kristo?”
Sel sal merael mo oberaod a klengar, el uai sel dilubech el mo er a Martha er a lemad ochedal— sel bo dehcebangel a ringelel a klsabisi, diak domechell, kodellir a rebetik er a rengud, dikea techellel a chebechiil me a telungalek, dertel a chebechiil, berraod er a uldasou, secherel a bedenged me a uldesued, ringel er a klechad, sebekreng, mekngit el kse, meringel el skel a udoud, malechub a betok el ungil techall— e bo dolbedebek er a Martha e dochotii osisiu el medengei el sioning er kid: “E ng di ngak a medengei … [e] oumerang el kmo kau a Kristo, el Ngelekel a Dios.”
Bo dolbedebek er tirkel betok el redil el dimlak el sorir el mo cheroid er a mekreos el Osobel er a taem el Ngii a mla er a klou el ringel er a kerus e a sesei el sikang ruriul e ng mlo er ngii a techellir el mlo kot el medengeliie sioning er sel klebokel el Okiis er a kodall er Ngii. Bol sebeched el melemolem el kmeed er Ngii lokiu a nglunguuch me a omesubel chedaol llechukl. Bo dolasm el mo kmeed er Ngii el mo kldmokl el melai er a chedaol bedengel me a rsechel er a bek el sandei er sel temel a sacrament el kirel a ongarm er a ringel el Ngii a mla er ngii e bo doltirakl a telbiil el mo mesiou er a rebebil er a ikel taem el ngesool. E seikid e kid a locha me teloi er tirkel mui el medengei el redil, el mo oltirakl er a Jesus Kristo, e mo oudkeu er sel klebokel el llut er Ngii sel lluut el mei.
Rodos, a kuchais el kirel a oubeltik el reng el Demad me a Delad er a Babeluades; me a Osobeled el Jesus Kristo; me sel cherrungel el Tngkaireng er Ngii el kired. Ak medengei el kmo a Profet Joseph Smith a milchedaol ruchei el mo profet er a Oluut. Ak medengei el kmo a Babier er a Mormon a klemrang e mlouiud lokiu a klisichel a Dios. Kede mla mukngeltengat er a ngar el profet er a chelechal sils, el President Thomas S. Monson. Aika el klemerang, a kmal mui el medengei! El ngara ngklel a Jesus Kristo, amen.
Uleklatk: Sera April 1, 2017, e a Sister Burton a kuk mlo diak lorredel er a Cheldellel a Relief Society.