Onimakinan te Atua n Aki Nanokokoraki

Tariu ao mwaneu aika kam tangiraki, I tangiria ni moana au rongorongo n te bong aei man kakoaua bwa l ataia Thomas S. Monson bon ana burabeti te Atua n bong aikai. Ana kauntira n te Moan Beretitentii ao Abotoro n Tengaun ma Uoman bon ngaiia, ni koaua, burabeti, taan mamata, ao taan kaotioti. A tei ibukin te Uea Iesu Kristo ao iai te kariaia ni katanoata Ana kantaninga ngkai e bon kaotaki nakoia. I kakoaua bwa iai te rau n touan mwiin aia reirei. Te Uea e kairiia ni kakorakora kaotan kakawakin ara onimaki iroun te Tama i Karawa ao iroun Natina, Iesu Kristo, ao n Ana Mwakuri ni Kamaiu bwa ti na aki nanokokoraki ngkana ti kaitarai kakaewenako n ara bong.

N ana Boki Moomon ti wareka taekan te mwaane ae arana Amon are e mwananga man te aba are Taraemera nakon te aba ae Riaai-Nibwaai ni ukori taekaia tarina. Ikekei e kunea te Uea ae Rimwaai ao ana aomata, ake a tautoronaki irouiia Remwanaite. Te Uea ae Rimwaai e a kaungaaki man bwaai ake e tibwauai Amon n taekaia ana botanaomata iaon Taraemera. E kaonaki nanon te Uea ae Rimwaai n te kantaninga ae korakora ao te kimwareirei are e a ikotiia ana botanaomata nakon te tembora ao e taku:

“Mangaia ae tabeki atuumi, ao kimwareirei, ao kawenea ami onimaki iroun te Atua. …

“… Ma kam na rairaki nakon te Uea ma te nano ae koaua ma ni bwanin, … ao n toro irouna ma nanomi ni kabane, … ao e na, kamaiu ngkami man te tautoronaki n aron ae boraoi ma ana babaire ma nanona.”¹

Aia onimaki ana aomata te Uea Rimwaai a rotaki man ana taeka Amon are a karaoa te berita ma te Atua n toro lrouna ao ni kawakin Ana tua, n aki ongea kaangaangan aroia. Ibukin aia onimaki, a karaoa aia babaire n rabanako mai inanon baia Remwanaite.²

Tariu ao mwaaneu, taiaoka iangoa kakawakin ana kakao te Uea Rimwaai n anganiia ana aomata ao iai irekereke nakoira. E taku, “Tabeki atuumi, ao kimwareirei, ao kawenea ami onimaki iroun te Atua.” Ma taeka aikai, Rimwaai e kaoiia ana aomata n iangoi taai aika a na roko rinanon te mata n onimaki; n onea mwiin maakuia ma te kakoaua n te kantaninga are e na roko imwin karekean te onimaki, ao n aki nanokokoraki ni kawenean ami onimaki iroun te Atua n aki ongei kaangaangan aroia.

Te maiu ae mamate bon te tai ni kataaki ike ti na taraaki ni kakoauaaki ngkana ti karaoi bwaai ni kabane are te Uea e na tuangiira.³ Aio e na kainnanoa te onimaki ae aki nanokokoraki iroun Kristo riki ni korakoran taai ni kaangaanga. E na kainnanoia bwa ti waaki nako ma te teimatoa iroun Kristo, ni kairaki iroun te Tamnei, ao n onimaki bwa te Atua e na karaoi kainnanora.⁴

N tokin ana mwakuri iaon te aba, imwain anaakina ni kabureaki, te Tia Kamaiu e reirei nakoia Ana abotoro, “Ami b’ai aon te aba te rawawata: ma kam na kabebetei nanomi; I a tia ni kataea ana kai te aba.”⁵

Iangoia raoi ma ngai n te tai aei—Iesu Kristo, Natin te Atua ae te Rikitemanna, e maiu n akea ana bure ao n tokanikai ni kariiri ni kabane, maraki, kakaewenako, ao karawawatan te aonaaba. E waanako n timtim raraana i Ketetemane; E karawawataki n te maraki ae kakamaaku ae e riaon korakoran kabwarabwarakina. E anai ni kabane Iaona marakira ao aorakira. E tei n tauraoi n ibuobuoki—ni buokiira n tatabemaniira nako—n rawawatara ni kabane. Rinanon Maiuna, karawawata, mate, ao Mangauti, E kamwaawai kaangaanga nakon kimwareireira ao ni ukoukora te rau n te aonaaba aei. Te raka man ana Mwakuri ni kamaiu e bon tabangaki nakoia te koraki ni kabane ake a Butimwaia ao a kakeaia ao nakoia te koraki ake a uouota Ana kaibangaki ao n Ririmwina n riki bwa Ana reirei ni koaua.⁶ Ngaia are, ngkana ti mwakuria ara onimaki iroun Iesu Kristo ao n Ana Mwakuri ni Kamaiu, ao ti na kakorakoraaki, rawawatara ana kabebeteaki, ao Rinanona ti na tokanikai n te aonaaba.

Tariu ao mwaaneu, ngkai ti karaua n iangoa te korakora ao te kaantaninga are ti konaa ni karekea mairoun te Tia Kamaiu, iai bukin tabekan atuura; ni kukurei, ao waakirake inanon te onimaki n akea te nanokokoraki, “bwa ane e nanokokoraki ai aron naoni marawa ae kabutaki n te ang ao e kaueeaki. … Te aomata ae nanououa ae aki teimatoa n arona nako.”⁷

Ai aron te Uea ae Rimwaai ni kaumakiia, “Kam na rairaki nakon te Uea ma te nano ae koaua ma ni bwanin, ao n toro irouna ma ni kabane nanomi, ao ngkana kam karaoa aio, ao e na kamaiu ngkami man te tautoronaki n aron ae boraoi ma ana babaire ma nanona.”⁸

Ongo nakon ana taeka te Tia Kamaiu ngkai E tuangiira:

“Ana tai rawawata nanomi: kam na onimakina te Atua, onimakinai naba. …

“Ngkana kam tangirai, ao kam na kawakin au tua. …

“Ane iai irouna au tua nako, ane e tau, ao boni ngaia are e tangirai: ao ane e tangirai ao e na tangiraki iroun Tamau, ao Ngai N na tangiria, ao N na kaotai nakoi ina.”⁹

Te Atua e tangiriira ni kaineti ma ara onimaki.¹⁰ Te onimaki bon boton te maiu ma bukina ae itiaki n akea tokina ao iangoa aron kakawakina. Te onimaki bon kamwakuran te reirei are kaira te bekumwaaka. E rang kakawaki, korakoran te maiu e kaotaki n anua aika a raraoi ao nanora ni kukurei ni karaoi bwaai ni kabane are te Atua ao Iesu Kristo e bubutiira. E kairiira ni katororobua iaon bubuan waera ni ukoukora ana kairi te Uea ao n teirake ao ni beku ma te nano ni koaua ni katiai bwaai inanon te rau ma Ana kantaninga.

N ririki aika nako ngke I beku bwa te mition beretitenti, I karekea te tareboon mairouia ana karo temanna ara mitinare ae tangiraki n tuangai taekan maten mwanena. I uringa, te tai are N na anga te kabebete, te mitinare arei ao ngai ni maroroakina ana babaire ni kamaiu te Atua ae kamiimii ibukiia natina ao e na kanga te atatai aei ni karaua nanona.

E ngae ngke e bon mimii ao nanokawaki man te kakaitara, te mitinare aei—rinanon rannimata ao onimakinan te Atua—ni kukurei ni maiun mwaanena. E taekina ana koaua raoi n aki nanokokoraki n bebeten ana nanoanga te Uea. N tokina, e tuangai bwa e na reitanako ana beku n te mition ma te onimaki ni koaua ao te mwakuri raoi nakon te berita are te Atua e anganna ma ana utu. N tain kainnanoana aei, te mitinare ae onimaki aei e katuka nanona nakon te Atua, e katuka ana onimaki ni kabane Irouna, ao ni kabooua ana motinnano ni beku ibukin te Uea ma te onimaki ao te mwakuri raoi.

Tariu ao mwaaneu, ngkana akea iroura te teimatoa n onimakina te Atua ao te nano ni beku Ibukina, te taneiai inanon te maiu ae mamate e konaa ni kairiira nakon namakinan te karawawataaki man te amo ae tinebu; ao ti na kona ni kakea nanora nakon maiuakinan bwaninin te euangkerio. Akean te onimaki, ti na kabuaa karekean te atatai ni karekei ana tamnei ni babaire te Atua ibukin bwaai are a na riki rimwi ni maiura.¹¹

N te tai ni kataaki, te kakaaitara—e aki toki n taratara—ni kataia ni kabonganai bukin ana waaki ao ni kamanenai ara atatai ae eti ni kaitarai. E kataia n imanonoira bwa akea bonganan maiuakinan te reirei n euangkerio. Taiaoka uringa bwa te aomata ae bon te aro n aomata “e aki kaki i nanona b’ai ake ana b’ai Tamnein te Atua: ba e taku ba te nanobaba.”¹² Uringa bwa Tatan “bon ana kairiribai [te] Atua, ao [e] aki toki n un mangaia, ao e anai [nanora] nakon te bure, ao karaoan ae buakaka n aki toki.”¹³ Ti riai n aki kariaia ni mwamwanaaki; ibukina ngkana ti karaoia, ara onimaki a na mamaara ao ti na kabuaa te mwaaka ni karekea ana kakabwaia te Atua.

Ngkana ti teimatoa ao ti aki nanokokoraki n ara onimaki, te Uea e na karikirakea ara atatai ni tabekiira iaon taian kakaewenako n te maiu. Ti na konaa n taobarai iango n namakin aika aki raraoi ao ti na karikirakei ara atatai n tokanikai, riki bwa tera ae e na riki, ni korakoran te kaangaanga. Aio are tera e karika angan riain rabanakoia ana aomata te Uea Rimwaai man te tautoronaki irouia Remwanaite.

Tariu ao mwaaneu, I kaoi ngkami ni kawenei ni kabane ami onimaki iroun te Atua ao inanon aia reirei Ana burabeti. I kaoi ngkami ni kabooui ami berita aika tabu ma te Atua, ni beku Irouna ma nanomi ni kabane, n aki ongei katabean aroaro n te maiu. I kakoaua bwa man mwaakan ami onimaki ae n aki nanokokoraki iroun Kristo, kam na inaomata man tautoronakimi n te bure, nanououa, n aki kakoaua, aki kukurei, ni karawawataki; ao kam na karekei ni kabane kakabwaia are a beritanaki mairoun te Tamara are i Karawa ae tangiraki.

I kakoaua bwa iai te Atua. E maiu, E tangiriira. E ongo ara tataro n ara tai ni kukurei ao inanon ara tai n nanououa, nanokawaki, ao ni bwarannano. I kakoaua bwa Iesu Kristo bon te Tia Kamaiua te aonaaba. Bon te tia Kabooira.

I kaina au taeka n te bong aei ma mwanewen te anene n taromauri “tiaki Ngkai ma n Ririki aika a na Roko,” ni kuneaki n te anene n taromauri ni Portuguese:

I taekin bwaai aikai n arana ae tabu Iesu Kristo, amen.