Tso Siab rau Vajtswv Tsis Tso Tseg Li

Kuv cov kwv tij thiab cov muam, kuv xav pib hais lus rau nej hnub no hais tias kuv paub hais tias Thawj Tswj Hwm Thomas S. Nws ob tug pab cuam hauv Thawj Pawg Thawj Tswj Hwm thiab Kaum Ob tug Thwj Tim kuj yog ib co yaj saub, cov pom tau, thiab cov txais kev tshwm sim. Lawv sawv tam tus Tswv Yexus Khetos thiab muaj cai tshaj tawm saib tus Tswv xav li cas thiab xav kom peb ua li lawv caw peb ua, raws li lawv txais kev tshwm sim. Kuv ua tim khawv hais tias peb yuav nyab xeeb yog tias peb ua raws li lawv tej tswv yim lus qhia. Tus Tswv tshoov lawv tej siab kom hais ntau zaus rau peb hais txog txoj kev muaj siab ntseeg Leej Txiv Saum Ntuj Ceeb Tsheej thiab Nws Leej Tub, Yexus Khetos, thiab Nws txoj Kev Theej Txhoj kom peb thiaj tsis ua xyem xyav thaum peb ntsib tej kev cov nyom niaj hnub nim no.

Nyob hauv Phau Ntawv Maumoos peb nyeem txog ib tug neeg hu ua Amoos uas tawm ntawm lub teb chaws Xalahelas mus rau lub teb chaws Lihais-Nifais kom thiaj nrhiav tau nws cov kwv tij lwm cov neeg Nifais. Nyob ntawd nws nrhiav tau tus Vajntxwv Leehais thiab nws cov neeg, uas puav leej raug ua qhev rau cov neeg Lamas. Tus Vaj Ntxwv Leehais zoo siab heev hais txog tej yam uas Amoos hais txog cov neeg nyob hauv Xalahelas. Nws lub siab txawm cia siab heev thiab zoo siab heev npaum li tias nws sau nws cov neeg rau ntawm lub tuam tsev ib ncig thiab hais tias:

“Yog li ntawd, cia li tsa nej taub hau thiab zoo siab, thiab tso siab rau nej tus Vajtswv. …

“… Yog nej yuav tig rov qab nrog lub siab puv npo mus cuag tus Tswv, … thiab ua hauj lwm kom tag nrho siab ntsws rau nws, … nws yuav, raws li nws lub siab nyiam thiab siab xav, coj nej tawm ntawm txoj kev ua qhev.”¹

Vaj Ntxwv Leehais cov neeg muaj siab ntseeg heev rau ntawm Amoos cov lus npaum li tias lawv nrog Vajtswv sib khi lus kom ua hauj lwm pab Nws thiab kom ua raws li Nws cov lus txib, txawm lawv nyob li cas los xij peem. Vim yog lawv txoj kev ntseeg, lawv npaj tau ib lub tswv yim thiab dim tau ntawm cov neeg Lamas txhais tes.²

Cov kwv tij thiab cov muam, thov muab xav saib tus Vaj Ntxwv Leehais cov lus caw rau nws cov neeg tseem ceeb npaum li cas rau peb thiab. Nws hais tias: “Cia li tsa nej taub hau thiab zoo siab, thiab tso siab rau nej tus Vajtswv.” Leehais siv cov lus no caw nws cov neeg saib lub sij hawm tom hauv ntej es muaj siab ntseeg thiab kev cia siab; kom muab kev tso siab ntseeg pauv lawv tej kev ntshai; thiab kom tsis txhob ua xyem xyav tiam sis tso siab plhuav rau Vajtswv txawm muaj li cas los xij.

Lub neej no yog ib lub sij hawm sim peb siab saib peb puas yuav ua txhua yam uas tus Tswv Vajtswv yuav txib kom peb ua.³ Kom ua tau li no peb yuav tsum muaj siab ntseeg rau ntawm Khetos tsis tso tseg li txawm tias muaj kev cov nyom ntau. Peb yuav tsum thawb mus lawm tom hauv ntej nrog txoj kev ntseeg Khetos khov kho, es muaj tus Ntsuj Plig coj peb kev, thiab tso siab hais tias Vajtswv yuav pab peb muaj raws li peb xav tau.⁴

Thaum Nws txoj hauj lwm hauv lub ntiaj teb no twb yuav tag, thiab ua ntej lawv coj Nws mus kaw, tus Cawm Seej qhia Nws cov thwj tim hais tias, “Neeg ntiaj teb yuav tsim txom nej: tiam sis cia li zoo siab, rau qhov kuv twb kov yeej lub ntiaj teb no lawm.”⁵

Cia li nrog kuv ua tib zoo xav ib pliag—Yexus Khetos, Leej Txiv Tib Leeg Tub, ua neej tsis ua txhaum hlo li thiab Nws kov yeej tag nrho txhua txoj kev haub kev ntxias, kev mob kev nkeeg, kev cov nyom, thiab kev tsim txom ntawm lub ntiaj teb no. Tej tee ntshav nrog tawm ntawm nws daim tawv nqaij los hauv lub vaj Khexemanes; Nws raug tsim txom nyuaj siab heev ntau tshaj qhov uas peb xav tau tawm. Nws ris peb tej kev mob kev nkeeg. Nws npaj pab peb—pab peb txhua tus—ris txhua yam nra uas peb muaj. Dhau los ntawm Nws lub neej, Nws tej kev nyiaj, Nws txoj kev tuag, thiab Nws txoj Kev Sawv Rov Los, Nws tshem txhua txoj kev thaiv peb tawm ntawm peb txoj kev zoo siab thiab txoj kev nrhiav tau kev thaj yeeb nyab xeeb hauv lub neej no. Tej koob hmoov ntawm Nws txoj kev theej txhoj yog muab rau lawv cov uas txais yuav Nws thiab xyeej lawv tus kheej tej kev ntswv siab thiab uas ua raws li Nws tej lus txib thiab ua thwj tim tiag tiag.⁶ Yog li ntawd, thaum peb muaj siab ntseeg rau ntawm Yexus Khetos thiab Nws txoj Kev Theej Txhoj, peb yuav muaj zog, peb tej nra yuav sib zog, thiab dhau ntawm tus Tswv Yexus peb yuav kov yeej tau lub ntiaj teb.

Kuv cov kwv tij thiab cov muam, thaum peb xav txog lub dag zog thiab txoj kev cia siab uas peb yuav txais tau los ntawm tus Cawm Seej, peb tsa tau peb tej taub hau, muaj tau kev zoo siab, thiab thawb mus tau tom hauv ntej muaj siab ntseeg tsis ua xyem xyav hlo li, “vim tus uas ua xyem xyav, tus ntawd zoo ib yam li tej dej hiav txwv uas cua ntsawj ntas mus ntas los. … rau qhov ib tug neeg zoo li ntawd lub siab ywj fab ywj fwj, nws yuav ua yam twg los nws ua tsis tsheej”⁷

Vaj Ntxwv Leehais kuj yaum nws cov neeg hais tias, “Tig rov qab nrog lub siab puv npo mus cuag tus Tswv, … ua hauj lwm kom tag nrho siab ntsws rau nws, yog nej ua li no, nws yuav, raws li nws lub siab nyiam thiab siab xav, coj nej tawm ntawm txoj kev ua qhev.”⁸

Cia li mloog tus Cawm Seej cov lus thaum Nws caw peb los cuag Nws:

“Nej tsis txhob txhawj thiab tsis txhob nyuaj siab, nej cia li ntseeg Vajtswv thiab ntseeg kuv. …

“Yog nej hlub kuv, ua raws li kuv tej lus txib. …

“Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub.”⁹

Vajtswv foom koob hmoov rau peb raws li peb txoj kev ntseeg.¹⁰ Kev ntseeg yog lub hauv paus ntawm txoj kev ua neej nyob raws li tej yam uas Vajtswv npaj tseg rau peb thiab tsom ntsoov qhov nyob mus ib txhis yav tom ntej. Kev ntseeg yog ib txoj ntsiab cai uas tshoov tau peb lub siab kom ua raws li. Yog ib lub hwj chim uas txhawb nqa peb tus xeeb ceem zoo thiab peb txoj kev muaj lub siab xav ua txhua yam uas Vajtswv thiab Yexus Khetos hais kom peb ua. Kev ntseeg ua rau peb txhos caug rau ntawm tus Tswv es thov kom Nws pab coj peb thiab sawv mus tso siab hais tias peb yuav ncav tau tej hom phiaj uas ua haum Nws lub siab.

Ntau xyoo dhau los thaum kuv ua hauj lwm ua ib tug thawj tswj hwm ntawm qhov chaw tshaj tawm txoj moo zoo, peb ib tug tub txib niam thiab txiv tau hu xov tooj tuaj ntsib kuv thiab qhia kuv hais tias tus tub txib tus muam tau tas sim neej. Kuv nco qab tau hais tias tus tub txib ntawd thiab kuv tau sib tham txog Vajtswv txoj kev cawm seej uas Nws npaj tseg rau Nws cov me nyuam thiab hais tias qhov uas tus tub txib paub txog qhov tseeb no yuav nplij tau nws lub siab.

Txawm hais tias tus tub txib no kuj xav tsis thoob thiab tu siab heev vim yog nws tus muam, tus tub txib no so kua muag thiab muaj siab ntseeg rau ntawm Vajtswv thiab cia li zoo siab txog nws tus muam lub neej. Nws tso siab plhuav khov kho hais tias tus Tswv hlub nws thiab nws tsev neeg. Tus tub txib no tau qhia kuv hais tias nws yuav rau siab tshaj tawm txoj moo zoo kawg siab kawg ntsws kom thiaj ua tau neeg tsim nyog txais tej yam uas Vajtswv cog lus tseg rau nws thiab nws tsev neeg. Thaum lub sij hawm nyuaj siab no, tus tub txib ntawd tig nws lub siab rau Vajtswv, tso siab plhuav rau nws, thiab rov qab cog lus tias Nws mam li rau siab ua hauj lwm pab Vajtswv kawg siab kawg ntsws.

Kuv cov kwv tij thiab cov muam, yog tias peb tsis tso siab plhuav rau Vajtswv thiab muaj lub siab xav ua hauj lwm rau Nws, tej kev cov nyom hauv lub neej no yuav coj peb los mus xav hais tias peb ris ib lub nra hnyav heev dhau; thiab peb yuav tsis muaj siab coj raws li txoj moo zoo tag nrho. Yog tias tsis muaj kev ntseeg, peb yuav tsis muaj peev xwm to taub txog Vajtswv tej kev npaj rau tej yam uas yuav muaj los rau hauv peb lub neej.¹¹

Thaum muaj kev sim siab li no, tus yeeb ncuab—uas ib txwm zov nraim peb—tus yeeb ncuab sim ntxias kom peb xav yuam kev txog ntau yam. Tus yeeb ncuab sim qhia peb hais tias qhov uas peb ua neej raws li txoj moo zoo tsis muaj qab hau dab tsi li. Thov nco qab ntsoov hais tias tib neeg ntiaj teb tej kev xav “txais tej uas Vajtswv tus Ntsuj Plig pub, rau qhov lawv pom hais tias tej ntawd tsis muaj qab hau dab tsi.”¹² Nco qab ntsoov hais tias Ntxwg Nyoog “yog ib tug yeeb ncuab rau Vajtswv, thiab tawm tsam nkaug nws tsis tu ncua, thiab caw thiab ntxias kom ua txhaum, thiab ua tej uas phem tsis tu ncua.”¹³ Peb yuav tsum tsis txhob cia Ntxwg Nyoog dag peb; vim thaum peb ua li ntawd, peb txoj kev ntseeg tsis muaj zog thiab peb txais tsis tau Vajtswv tej koob hmoov.

Yog tias peb ua ruaj nrees thiab tsis txhob ua xyem xyav hais txog peb txoj kev ntseeg, tus Tswv yuav pab peb kov yeej tej kev cov nyom uas peb muaj hauv peb lub neej. Peb yuav kov yeej tau tej kev ntswv siab phem, thiab peb yuav muaj peev xwm kov yeej tej kev cov nyom uas zoo li kov yeej tsis tau hlo li. Nov yog txoj kev ntseeg uas cia Vaj Ntxwv Leehais cov neeg khiav dim tawm ntawm txoj kev ua qhev rau cov neeg Lamas.

Kuv cov kwv tij thiab cov muam, kuv caw nej tso siab pluav rau Vajtswv thiab rau Vajtswv cov yaj saub tej lus qhia. Kuv caw nej rov qab nrog Vajtswv sib khi lus, ua hauj lwm pab Nws kawg siab kawg ntsws, txawm tias peb lub neej zoo li cas los xij. Kuv ua tim khawv hais tias dhau ntawm lub hwj chim muaj siab ntseeg Khetos, nej yuav dim tawm ntawm tej kev ua qhev rau kev txhaum, kev ua xyem xyav, kev tsis ntseeg, kev tu siab, kev txom nyem; thiab nej yuav txais tau tag nrho tej koob hmoov uas peb Leej Txiv cog tseg hais tias Nws yuav muab pub rau peb.

Kuv ua tim khawv hais tias Vajtswv muaj sia nyob. Nws muaj txoj sia nyob. Nws hlub peb. Nws mloog peb tej lus thov txog Nws txawm tias peb zoo siab los yog tu siab, poob siab, los yog tsis tshua ntseeg. Kuv ua tim khawv hais tias Yexus Khetos yog tus Cawm Seej thiab tus Txhiv Dim ntawm lub ntiaj teb. Nws yog tus Txhiv Dim.

Kuv xaus kuv cov lus hnub no yuav hais cov lus ntawm zaj nkauj hu ua “Tsis Yog Nim No Tiam Sis Nyob rau Yav Tom Ntej,” uas muaj hauv cov mej zeej Portuguese phau nkauj:

Kuv hais cov lus no los ntawm Yexus Khetos lub npe dawb ceev, amees.