Luhlahlfongi God ke Tiac Ahlohloh

Tamuhlwel ac tahmtahel sacohk, nga ke muhtwacwacack pweng luhk mihsenge ke fahkwack lah nga etuh lah Prestuhn Thomas S. Monson el pa mwet pahluh luhn God ke lwen lasr uh. Oacyacpac mwet kahsruh lal ke Prestuhnsi Se Met ac Mwet Sap Singucul Luo ah, ke pwacye, elos mwet pahluh, mwet liyactwen, ac mwet eis fwackyuck. Elos ahol Leum Jisus Kraist ac lwelahyuck nuh selos in fahkwack nuhnak ac kena Lal ma fwack nuh selos. Nga fahkwack muh oasr ohiyac wo ke kuht ukwe kai lalos. Leum El moklwelos in sramsram yohk ke ahkkweyeyacn luhlahlfongi lasr ke Pahpah Inkuhsrao ac ke Wen Nahtuhl, Jisus Kraist, ac ke Iwaclah Lal kuht in muh tiac ahlohloh ke kuht sun ma upac in pacl lasr uh.

Ke Puk luhn Mormon kuht riti ke mukul se inel pa Ammon suc suhpweyuck liki acn Zarahemla nuh ke acn Lehi-Nephi in siyuck lah fuhkah tamuhlwel wiyacl. Ke acn we el konwacack Tohkohsrah Limhi ac mwet lal, suc srohoh nuh sin mwet Laman. Tohkohsrah Limhi el ahkkweyeyuck ke ma Ammon el fahk nuh sel ke mwet lal ke acn Zarahemla. Insiyacl sesseslah ke finsrak ac engan yohk oruh el orwacni mwet lal nuh ke tempuhl ac fahk:

“Ke ma inge, kweyak nuh lucng, ac kaksak, ac likiyac luhlahlfongi lowos sin God. …

“… Kowos fin fohlohk nuh yurun Leum ke inse pwacye, … ac kuhlwacnsap nuh Sel ke nuhnkowos nohfohn, … el ac, fal nuh ke kena ac luhngse Lal sifacna, ac uskowoslac liki srohoh.”¹

Luhlahlfongi luhn mwet lal Tohkohsrah Limhi ah arulacna pihrihkyuck ke kahs lal Ammon oruh elos oraclah sie olwelah nuh sin God in kuhlwacnsapuhl ac in ahkos masap Lal, finne fuhkah ohiyac upac lalos. Ke srihpen luhlahlfongi lalos, elos kuh in oraclah plwacn se in kahingkihn srohoh luhn mwet Laman.²

Tamuhlwel ac tahmtahel, nuhnak muhnahs motko ke yohk srihpaciyacn solsol lal Tohkohsrah Limhi nuh sin mwet lal ac ke kapsra nuh sesr. El fahk, “Kweyak nuh lucng, ac kaksak, ac likiyac luhlahlfongi lowos sin God.” Ke kahs inge, Limhi el suli mwet lal in ngwet nuh ke pacl tok ke luhlahlfongi; in ahollah sahngweng lalos ke atacn finsrak ma tuhkuh ke luhlahlfongi; ac in tiac ahlohloh ke sang luhlahlfongi lalos in God finne fuhkah ohiyaclos.

Moul suhkawihl uh pa sie pacl in srihkeyuck yen kuht fah srihkweyuck in liye fin kuht ac oruh ma nuh kwewa Leum God lasr El fah sap nuh sesr.³ Ma inge fah enenuh luhlahlfongi ma tiac ahlohloh ke Kraist finne ke pacl ma upaclaclac. Ac fah enenuh kuht in fahsr nuh met ke luhlahlfongi kuh in Kraist, kolyuck sin Nguhn, ac luhlahlfongi muh God El fah sang enenuh lasr uh.⁴

Ke sahflahiyacn orekma Lal facluh, met kuhtuh liki El sruhflah, Mwet Lahngo El luti mwet tuhma lutlut Lal, “Ke kowos muta faclu kowos ac keok. Tusruktu kowos in pulaik na! Nga kutangla faclu tari!”⁵

Wiyuc motko wihn—Jisus Kraist, Wen Sefanna nuhtin Pahpah, El moul suwohswohs ac kuhtanglah mwe sruhf, ngal, ma upac, ac kweok nuh kwewa luhn facluh. Srah kahklah kacl ke Gethsemane; El kweokkihn ngal upac ma tiac kuh in ahkuhtweyucki. El eis nuh facl ngal ac mas lasr kwewa. El ahkolah in kahsruh—in kahsruh kuht kais sie—ke ma upac nuh kwewa. Ke moul, kweok, misac, ac Moulyak Lal ah, El eislah ma nuh kwewa ma kosrwekuhtlac liki engan ac mihslac ke facluh. Ma sikyak wo ke srihpen kihsac in iwaclah Lal ah ituckyang nuh sin mwet nuh kwewa suc ahokkuhnuhllah ac lahfuhkuhnuhlos sifacna ac nuh selos suc sruhkwack sahkseng Lal ac fahsr tohkohl oacna mwet tuhma lutlut pwacye Lal.⁶ Pwacnwacng, ke kuht ahkyohkye luhlahlfongi lasr ke Jisus Kraist ac Iwaclah Lal, kuht ac ahkkweyeyucklac, ma toasr lasr ac iweyucklac, ac Sel kuht ac kuhtanglah facluh.

Tamuhlwel ac tahmtahel, ke kuht motko ke kuh ac engan ma kuht kuh in eis sin Mwet Lahngo, oasr srihpac kuht in kweyak nuh lucng, kaksak, ac fahsr nuh met ke luhlahlfongi ke tiac ahlohloh, “elos su alolo elos oana noa in meoa su tuhyak ac eng uh pahlela. … Elos tafu luo in nunak lalos, ac seokak in ma nukewa.”⁷

Tohkohsrah Limhi el oacyacpac kwacfe, “Kowos in fohlohk nuh yurun Leum ke inse pwacye, … kuhlwacnsap nuh Sel ke nuhnkowos nohfohn , kowos fin oruh ma se inge, El ac, fal nuh ke kena ac luhngse Lal sifacna, ac uskowoslac liki srohoh.”⁸

Porongo kahs luhn Mwet Lahngo sifacna ke el fahk nuh sesr:

“Nik kowos fosrnga ku inse toasr. Lulalfongi in God ac lulalfongi pac in nga. …

“Kowos fin lungse nga, kowos ac akos ma sap luk. …

“Kutena mwet su lohng ac liyaung ma sap luk, el lungse nga. Ac el su lungse nga, Papa tumuk El fah lungse pac el. Nga fah oayapa lungse el ac sifacna fahkyuyak nu sel.”⁹

God El ahkinsewowoye kuht oacna ke luhlahlfongi lasr.¹⁰ Luhlahlfongi pa ac oruh kuht in moul ke srihpac ac ohiyacn liye muhtahl ma pahtpaht. Luhlahlfongi pa sie ip yohk fihsrwacsr ma oraclah oaru. Pa sie kuh yohk srihpac, moul ma ahkkahlwemyeyuck ke ohiyac wo lasr ac kena lasr in oruh ma nuh kwewa God ac Jisus Kraist Elos siyuck sesr. Ac oruh kuht in sikuckmuhtuhnte in siyuck sin Leum ke kolyuck ac in tuyak ac mukwikwi ke puhlaik in oruh ma fal nuh ke kena Lal.

Yac somlah ah ke nga kuhlwacnsap oacna sie misin prestuhn, nga tuh eis pahng sin pahpah ninac kiyacn sie sin misineri wowo lasr ah suc sruhmuhn nuh sihk ke misac luhn tuhlihk muhtwacn se wiyacl. Nga esam, ke pacl ahsor sacn, misineri sacn ac nga kuht sramsram ke plwacn in molwelah wolacna luhn God ke tuhlihk Nahtuhl ac lah etwacack inge ac kahsrwel fuhkah.

El finne lut ac ahsor ke ma upac sacn, misineri sacn—ke sronin muhta ac ke luhlahlfongi ke God—el engankihn moul luhn ma wiyacl. El fahkwack luhlahlfongi tiac ahlohloh ke pahkotwen wo luhn Leum. Ke kuh, el fahk nuh sihk muh el ac kalweni kuhlwacnsap ke misin lal ke luhlahlfongi ac oaru kwewa el in muh kuh in fal nuh ke ma God El olwelah nuh sel ac nuh sin sucu lal. Ke pacl enenuh se inge, misineri oaru sacn el ekuhllah insiyacl nuh sin God, sang luhlahlfongi lal kwewa nuh Sel, ac ahksasucye olwelah lal in kuhlwacnsapuh Leum ke luhlahlfongi ac ke oaru.

Tamuhlwel ac tahmtahel, fin wacngihn luhlahlfongi kuh lasr ke God ac wacngihn kena in kuhlwacnsapwacl, ohiyac kweok luhn moul uh kuh in kol kuht in puhla oacna kuht ahktoasryeyuck ke srenenuh toasr se; ac kuh in wacngihnlac kena lasr in moulkihn wosasuc. Fin wacngihn luhlahlfongi, kuht ac fah tilac kuh in engankihn plwacn luhn God ke ma ac fah sikyak tok in moul lasr uh.¹¹

Ke pacl upac inge, mwet lain uh—suc kwacna suk mwet suc kuh in muhnahs nuh ke mwe sruhf lal—el srihke orekmakihn etwacack ac lahlmwetmwet lasr in lain kuht. El srihke oruh kuht in luhlahlfongi muh wacngihn srihpac in moulkihn ip yohk ke wosasuc. Nuhnak muhnahs esam lah lahlmwetmwet luhn mwet luhngse ma luhn facluh “el koflana eis mwe sang ma tuku sin Ngun lun God. El su ouinge koflana kalem kac.”¹² Esam lah Satan “el sie mwet lokoalok luhn God, ac [el] acnwuck laenuhl pacl nuhkwewa, ac suli ac ahkluhngye [kuht] in oruh ma koluk, ac in oruh ma koluk pacl nuhkwewa.”¹³ Kuht tiac kuh in lwelah el in kiyacpwekuhtlac; tuh ke kuht oruh, kuht ahlohloh ke luhlahlfongi lasr ac wacngihnlac kuh lasr in eis mwe insewowo luhn God.

Kuht fin tu kuh ac tiac ahlohloh ke luhlahlfongi uh, Leum El fah ahkyohkye kuh lasr in kuhtanglah ma upac luhn moul uh. Kuht ac ahkkweyeyuck in kuhtanglah nuhnak suhfal uh ac kuht fah oraclah kuh lasr in kuhtanglah, finne ma suc luhman, tiac kuh in kutongyucklac. Pa inge ma suc ahkkweye mwet lal Tohkohsrah Limhi in kahingkihn srohoh luhn mwet Laman ah.

Tamuhlwel ac tahmtahel, nga suli kowos in likiyac luhlahlfongi lowos kwewa ke God ac ke mwe luti luhn mwet pahluh Lal. Nga suli kowos in ahksasucye olwelah lowos yurun God, in Kuhlwacnsapuhl ke insiowos kwewa, finne fuhkah ma upac in moul uh. Nga fahkwack lah ke kuh luhn luhlahlfongi tiac ahlohloh lowos in Kraist, kowos fah sukohsohklah liki srohoh luhn ma koluk, luhn tahfuh luo, luhn suhlahlahlfongi, luhn suhpwacr, luhn kweok; ac kowos fah eis mwe insewowo nuh kwewa ma uliyucklac sin Pahpah Inkuhsrao luhngse tuhmwacsr.

Nga fahkwack lah God El pwacye. El moul. El luhngse kuht. El lohng pruhe lasr ke pacl engan lasr ac ke pacl tahfuh luo, ahsor, ac enenuh lasr. Nga fahkwack lah Jisus Kraist El pa Mwet Lahngo luhn facluh. El pa Mwet in Iwaclah.

Nga kaliyac sramsram luhk mihsenge ke kahs nuh ke on “Not Now but in the Coming Years,” ma konweyuckyak ke puk in on Portuguese.

Nga fahk ma inge ke ine muhtahl luhn Jisus Kraist, amen.