Ta’u Atu i le Atua ma le Le Masalosalo

Uso e ma tuafafine pele, ou te fia amata la’u savali i le asō i le molimau atu ou te iloa o Peresitene Thomas S. Monson o le perofeta a le Atua i o tatou nei aso. O ona fesoasoani i le Au Peresitene Sili ma Aposetolo e Toasefululua, e moni lava, o ni perofeta, tagatavaai, ma talifaaaliga foi. Latou te fai ma sui o le Alii o Iesu Keriso ma ua i ai le aia tatau e folafola atu Lona mafaufau ma Lona finagalo e pei ona faaalia ia i latou. Ou te molimau atu o loo i ai le saogalemu i le mulimuli i a latou fautuaga. Ua musuia i latou e le Alii ina ia faamamafa mai le faamalosia o lo tatou faatuatua i le Tama Faalelagi ma i Lona Alo, o Iesu Keriso, ma Lana Togiola ina ia aua ne’i o tatou masalosalo pe a tatou fetaiai ma luitau o o tatou aso.

I le Tusi a Mamona tatou te faitau ai i se alii e igoa ia Amona lea na auina atu mai le laueleele o Saraemila i le laueleele o Liae-Nifae e fesili e uiga i ona uso. Na ia maua ai iina le Tupu o Limae ma lona nuu, o loo nofopologa ia sa Lamana. Sa uunaia le Tupu o Limae i mea sa faasoaina e Amona ia te ia e uiga i lona nuu i Saraemila. Na faatumulia lona loto i se faamoemoe ma le olioli tele lea na ia faapotopoto ai lona nuu i le malumalu ma faapea atu:

“O lea, ia ea i luga o outou ulu, ma ia olioli, ma tuu atu lo outou faalagolago i le Atua. …

“… Ae afai tou te liliu atu i le Alii ma le faamoemoe atoa o le loto, … , ma auauna atu ia te ia ma le filiga atoa o le mafaufau, … o le a laveaiina outou e ia e tusa ma lona lava loto ma lona finagalo, i fafo mai le pologa.”¹

Na matua aafia lava le faatuatua o le nuu o le Tupu o Limae i upu a Amona o lea sa latou osifeagaiga ai ma le Atua e auauna atu ia te Ia ma tausi Ana poloaiga, e ui lava i o latou tulaga faigata. Ona o lo latou faatuatua, sa mafai ai ona latou faia se fuafuaga e sosolaese ai mai lima o le au sa Lamana.²

Uso e ma tuafafine, faamolemole mafaufau i le taua o le valaaulia na tuu atu e le Tupu o Limae i lona nuu ma lona fitoitonu ia i tatou. Na fai mai o ia, “O lea, ia ea i luga o outou ulu, ma ia olioli, ma tuu atu lo outou faalagolago i le Atua.” Faatasi ai ma nei upu, na valaaulia e Limae lona nuu ia tagai i le taimi nei ma i le lumanai e ala i mata o le faatuatua; ia sui o latou popolega i le talitonuga i le faamoemoe e fanau mai le faatuatua; ma aua le masalosalo i le tuuina atu o lo latou faatuatua i le Atua e ui i o latou tulaga.

O le olaga faaletino o se taimi o le tofotofoga ma o le a tofotofoina ai i tatou e vaai pe tatou te faia mea uma ua poloaiina ai i tatou e le Alii lo tatou Atua.³ E manaomia e lenei mea le faatuatua le femoumoua’i ia Keriso e oo lava i taimi o le luluti o faigata. O le a manaomia lo tatou fetaomi atu i luma ma le tumau i le faatuatua ia Keriso, taialaina e le Agaga ma faalagolago atu o le a tausia e le Atua o tatou manaoga.⁴

I le faaiuga o Lana galuega faalelalolagi, a o lumanai le faapagotaina, na aoao atu e le Faaola Ona soo: “E maua foi outou e le puapuaga i le lalolagi, a ia outou loto tetele, ua ou manumalo i le lalolagi.”⁵

Mafaufau loloto faatasi ma a’u mo sina taimi—o Iesu Keriso, le Alo e Toatasi na Fanaua a le Tama, na soifua i se olaga e leai se agasala ma na manumalo i faaosoosoga, tiga, luitau, ma mafatiaga uma o le lalolagi. Na afu toto o Ia i Ketesemane; Na Ia mafatia i tiga matautia e le mafaamatalaina. Na Ia tauaveina i Ona lava luga o tatou tiga ma ma’i. Ua tu o Ia e saunia e fesoasoani mai—e fesoasoani ia i tatou taitoatasi—i avega uma. E ala atu i Lona soifuaga, mafatiaga, maliu, ma le Toetu, ua Ia aveesea ai papuipui uma i lo tatou fiafia ma le mauaina o le filemu i lenei lalolagi. O faamanuiaga o Lana taulaga Togiola ua faasafua atu ia i latou uma o e ua taliaina o Ia ma faagalo i latou lava faapea ma i latou o e tauave Lana satauro ma mulimuli atu ia te Ia e avea ma Ona soo moni.⁶ O le mea lea, a tatou faatuatua ia Iesu Keriso ma Lana Togiola, o le a faamalosia i tatou, o le a māmā a tatou avega, ma e ala atu ia te Ia o le a tatou manumalo i le lalolagi.

Uso e ma tuafafine, ao tatou mafaufau i le malosi ma le faamoemoe lea e mafai ona tatou maua mai le Faaola, ua ia i so tatou faamoemoe e sii ae o tatou ulu, olioli, ma agai i luma i le faatuatua e aunoa ma le masalosalo, “aua o lē masalosalo e tusa ia ma le peau o le sami ua sousou i le matagi ma felafolafoaiina. … O le tagata faalotolotolua e faaletumau ia i ona ala uma.”⁷

Na uunaia foi i tatou e le Tupu o Limae, “Tuu atu lo outou faalagolago ia te ia, … ma auauna atu ia te ia ma le filiga atoa o le mafaufau, afai tou te faia lena mea, o le a laveaiina outou e ia e tusa ma lona lava loto ma lona finagalo, i fafo mai le pologa.”⁸

Faalogo i upu a le Faaola a o Ia aioi mai ia i tatou:

“Aua le atuatuvale o outou loto, ia outou faatuatua i le Atua, ia faatuatua mai foi ia te a’u. …

“Afai tou te alofa mai ia te aʼu, ia outou tausi mai i aʼu poloaiga. …

“O le ua ia te ia a’u poloaiga ma tausi i ai, o ia lea e alofa mai ia te a’u: o lē alofa mai foi ia te a’u e alofaina o ia e lo’u Tama, ou te alofa foi ia te ia, ma ou faaali ia te ia.”⁹

E faamanuiaina i tatou e le Atua e tusa ma lo tatou faatuatua.¹⁰ O le faatuatua o le puna lea o le ola i se faamoemoega paia ma se vaaiga e faavavau. O le faatuatua o se mataupu faavae aoga e musuia ai le maelega. O se malosiaga taua ma ola o loo faaalia i o tatou uiga lelei ma manao ai ina ia faia ma le naunautai mea uma ua manaomia e le Atua ma Iesu Keriso mai ia i tatou. E avatu ai i tatou i o tatou tulivae ia ole atu i le Alii mo le taitaiga ma ia tulai ae ma faatino ma le talitonuga, ina ia ausia mea ia ogatusa ma Lona finagalo.

I tausaga ua mavae a o galue ai o se peresitene o le misiona, sa ou maua se valaau mai le telefoni mai matua o se tasi o matou faifeautalai pele na tau mai ai ia te a’u e uiga i le maliu o lona tuafafine. Ou te manatua, i le lagona maaleale o lena taimi, na ma talanoa ai ma lena faifeautalai i le ata ofoofogia o le faaolataga a le Atua mo Ana fanau ma le auala o le a faamafanafana ai o ia e lenei malamalama.

E ui ina sa lofituina o ia ma faanoanoa i lena mea faigata, ae sa olioli lena faifeautalai—e ala atu i ona loimata ma le faatuatua i le Atua ma Lana fuafuaga sili o le fiafia—i le olaga o lona tuafafine. Sa ia faaalia le lototele e le masalosalo i le alofa mutimutivale o le Alii. Ma le mautinoa, sa ia tau mai ia te a’u o le a faaauau pea ona ia auauna atu i lana misiona ma le faatuatua ma le maelega atoatoa ina ia mafai ona agavaa i folafolaga ua i ai i le Atua mo ia ma lona aiga. I lenei taimi o mafatiaga, na liliu atu le loto o lena faifeautalai faamaoni i le Atua, tuu atoa atu lona faalagolago atoa ia te Ia, ma faafou lana tautinoga e auauna atu i le Alii ma le faamaoni ma le filiga atoa.

Uso e ma tuafafine, afai tatou te le mauaa i le faalagolago mausali atu i le Atua ma naunau e auauna atu ia te Ia ma le filiga atoa, e mafai e aafiaga tiga o le olaga faaletino ona taitai atu i tatou ia lagona e peiseai ua mamafatu i tatou i se avega mamafa; ma e mafai ona tatou ma’umauina ai le uunaiga e ola atoatoa ai i le talalelei. A aunoa ma le faatuatua, o le a iu ina tatou ma’umauina le gafatia e talisapaia ai na mamanu a lo tatou Atua e faatatau i mea o le a tutupu mulimuli mai i o tatou olaga.¹¹

I nei taimi o tofotofoga, o le a taumafai le fili—lea o loo taulamalama mai pea—e faaaoga o tatou mafaufauga ma filifiliga e faasagatau ai ia i tatou. O loo ia taumafai e faatalitonu i tatou e leai se aoga o le ola i mataupu faavae o le talalelei. Uso e ma tuafafine, faamolemole ia manatua e “le talia e le [mafaufau o le tagata natura] mea a le Agaga o le Atua: aua o mea valea ia ia te ia.”¹² Manatua o le tiapolo “o se fili [o] le Atua, ma ua faasagatau pea ia te ia, ma ua valaau ma faatosina [i tatou] i le agasala, ma ia latou faia pea le mea leaga.”¹³. E le tatau ona tatou faatagaina o ia e faasese i tatou; aua a tatou faia, o le a vaivai lo tatou faatuatua ma aveesea ai le mana e maua ai faamanuiaga a le Atua.

Afai tatou te tumau ma aua le maslaosalo i lo tatou faatuatua, o le a faateleina e le Alii lo tatou gafatia e siitia ae ai i tatou lava i luga o luitau o le olaga. O le a mafai ona tatou faatoilaloina manaoga le lelei ma o le a tatou atiae le gafatia e foia ai, e tusa lava pe foliga e, lofituina ia faafitauli. O le mea lea na mafai ai e le nuu o le Tupu a Limae ona faia se solaaga mata’ina mai lo latou nofopologa ia sa Lamana.

Uso e ma tuafafine, ou te valaaulia outou e tuu atu lo outou faalagolago i le Atua ma i aoaoga o Ana perofeta. Ou te valaaulia outou ina ia faafou a outou feagaiga ma le Atua, ia auauna atu ia te Ia ma tou loto atoa, e ui i faigata o le olaga. Ou te molimau atu ia te outou o le mana o lo outou faatuatua ma le le masalosalo ia Keriso, o le a outou saoloto ai mai le pologa i le agasala, masalosalo, lē talitonu, lē fiafia, mafatiaga; ma o le a outou mauaina uma faamanuiaga folafolaina mai lo tatou Tama Faalelagi alofa.

Ou te molimau atu e moni le Atua. O loo soifua o Ia. E alofa o Ia ia i tatou. E faafofoga o Ia i a tatou tatalo i o tatou taimi o le fiafia faapea ma le masalosalo, faanoanoa, ma le popole tele. Ou te molimau atu o Iesu Keriso o le Faaola o le lalolagi. O Ia o le Togiola.

E faaiu atu la’u tautalaga i le asō i upu o se pese “Not Now by in the Coming Years,” o loo maua i le tusipese Potukale:

Ou te fai atu ai nei mea i le suafa paia o Iesu Keriso, amene.