Ti’aturi i te Atua ma te ’aueue ’ore

Te mau taea’e ’e te mau tuahine, tē hina’aro nei au e ha’amata i tā’u parau poro’i i teie mahana ma te fa’a’ite pāpū ē ’ua ’ite au ē te peresideni Thomas S. Monson e peropheta nā te Atua i tō tātou nei anotau. ’Oia ato’a tōna nā tauturu i roto i te Peresidenira’a Mātāmua ’e nā ’Ahuru ma Piti ’āpōsetolo, ’ei mau peropheta, ’ei mau hi’o ’e ’ei mau heheu parau. Tē mono nei rātou i te Fatu ia Iesu Mesia ’e e ti’ara’a tō rātou nō te ani i Tōna vārua ’e tōna hina’aro mai tei heheuhia mai ia rātou. Tē fa’a’ite pāpū nei au ē tē vai ra te pārurura’a i te pe’era’a i tā rātou a’o. E fa’auru te Fatu ia rātou ’ia onoono i te ha’apūaira’a i tō tātou fa’aro’o i te Metua i te Ao ra ’e i Tāna Tamaiti o Iesu Mesia ’e i Tāna tāra’ehara ’ia ’ore tātou ’ia ’arori i mua i te mau tamatara’a o tō tātou tau.

’Ua tai’o tātou i roto i te Buka a Moromona, nō te hō’ē ta’ata o Amona te i’oa tei tonohia mai te fenua o Zarahemela i te fenua o Lehi-Nephi nō te ’ite mai nō ni’a i tōna mau taea’e. I reira ’ua ’itehia mai iāna te ari’i Limehi ’e tōna nuna’a, tei fa’atītīhia ’e te mau ati Lamana. ’Ua fa’aitoitohia te ari’i Limehi e te mau ’ohipa tā Amona i fa’a’ite iāna nō ni’a i tōna nūna’a i Zarahemela. ’Ua ’ī roa tōna ’ā’au i te ti’aturi rahi ’e i te ’oa’oa, ē ’ua ha’aputuputu i tōna nuna’a i te hiero ’e ’ua parau :

« E teienei, ’a fa’ateitei nā ’outou i tō ’outou upo’o ma te ’oa’oa’, ’a ti’aturi i te Atua… 

« ’Ia fāriu mai rā ’outou i te Fatu ma te ’ā’au ato’a… ’e ’ia ha’apa’o maita’i iāna ma tō ’outou mana’o ato’a ra… e fa’aora ïa ’oia ia ’outou i tō ’outou tītīra’a, mai te au i tōna mana’o ’e i tōna hina’aro ».¹

’Ua puta hōhonu roa tē fa’aro’o o te nuna’a o Limehi nā roto i te mau parau a Amona, e ’ua fafau rātou e te Atua ’ia tāvini Iāna ’e ’ia ha’apa’o i Tāna mau fa’auera’a, noa atu te mau fifi o tō rātou huru orara’a. Nō tō rātou fa’aro’o, ’ua ti’a iā rātou i te fa’atupu i te hō’ē rāve’a ’e ’ia fa’aorahia i te rima o te mau ati Lamana.²

Te mau taea’e ’e te mau tuahine, ’a feruri nā i te faufa’a rahi o te anira’a tā te ari’i Limehi i hōro’a i tōna nuna’a ’e tā te reira fa’atupura’a nō tātou. ’Ua parau ’oia : « ’A fa’ateitei nā ’outou i tō ’outou upo’o ma te ’oa’oa’, ’a ti’aturi i te Atua ». Ma teie mau parau, ’ua ani Limehi i tōna nuna’a ’ia hi’o i te tau a muri nā roto i te mata o te fa’aro’o ; ’ia mono i tō rātou mau ri’ari’a i te mana’o maita’i nō te ti’aturiara’a e fā mai nā roto i te fa’aro’o ; ’e ’eiaha e fē’a’a i te tu’u i tō rātou ti’aturira’a i te Atua noa atu te huru orara’a.

E tau tamatara’a te orara’a tāhuti nei i reira tātou e ’ite ai ē ’ua rave ānei tātou i te mau mea tā te Fatu tō tātou Atua i fa’aue mai ia tātou.³ E tītau te reira i te fa’aro’o aueue ’ore i te Mesia noa atu te mau tau fifi rahi. E ti’a ’ia tātou ’ia nu’u i mua ma te fa’aro’o ’aueue ’ore i te Mesia, ma te arata’ihia e te Vārua, ’e te ti’aturira’a ē e fa’ati’a te Atua i tō tātou mau hina’aro.⁴

I te hope’a o Tāna misiōni i te fenua nei, i muri noa mai i tōna tāpe’ara’ahia, ’ua ha’api’i mai te Fa’aora i Tāna mau pipi : « E pohe tō ’outou i teie nei ao. E fa’aitoito rā, ’ua riro te rē o teie nei ao iā’u ».⁵

’A feruri nā nā muri iā’u hō’ē taime---Iesu Mesia, te Tamaiti Fānau Tahi a te Metua, tei ora nā ma te hara ’ore ’e tei fa’aruru i te mau fa’ahemara’a ato’a, te mau māuiui, te mau tamatara’a ’e te mau ’ati o te ao nei. ’Ua tahe tōna toto i Gesetemane, ’ua mamae ’oia i te māuiui rahi ’eita roa e nehenehe e parau. ’Ua amo ’Oia i ni’a Iāna tō tātou mau māuiui ato’a ’e mau ma’i. ’Ua ineine ’Oia nō te tauturu---nō te tauturu ia tātou tāta’itahi---’e te hōpoi’a tāta’itahi. Nā roto i Tōna orara’a, Tōna māuiui, Tōna pohe ’e Tōna ti’a-fa’ahou-ra’a, ’ua ’īriti ’Oia i te mau ha’atāfifira’a nō tō tātou ’oa’oa ’e ’ia vai te hau i ni’a i teie fenua. ’Ua tae te mau maita’i o Tāna tusia tāra’ehara i te feiā ato’a tei fāri’i Iāna ’e tei fa’a’ere ia rātou iho ’e i te feiā tei rave i Tāna sātauro ’e tei pe’e Iāna mai Tāna mau pipi mau.⁶ Nō reira, ’a fa’a’ohipa ai tātou i te fa’aro’o ia Iesu Mesia ’e i Tāna Tāra’ehara, e pūai mai tātou, e māmā tā tātou mau hōpoi’a ’e nā roto Iāna ’e rē tātou i ni’a i te ao nei.

Te mau taea’e ’e te mau tuahine, ’a hi’o ai tātou i te pūai ’e te ti’aturira’a o tā tātou e nehenehe e fāri’i nā roto mai i te Fa’aora, ’ua tāno tātou i te fa’ateiteira’a i tō tātou upo’o i ni’a, ’ia ’oa’oa, ’e ’ia nu’u i roto te fa’aro’o ma te fē’a’a ’ore, « o tei fē’a’a ra, e au ïa i te ’aru miti i patuhia e te mata’i ’e fēto’ito’i a’era… E ta’ata ’ā’au piti ïa ’e te pāpū ’ore i tōna ato’a ra mau haere’a ».⁷

’Ua onoono ato’a te ari’i Limehi, « ’ia fāriu mai rā ’outou i te Fatu ma te ’ā’āu ato’a… ’e ’ia ha’apa’o maita’i iāna mā tō ’outou mana’o ato’a ra ; ’ia nā reira ’outou, e fa’aora ïa ’oia ia ’outou i tō ’outou tītīra’a ».⁸

’A fa’aro’o mai i te mau parau iho a te Fa’aora nō Tāna tītaura’a ia tātou :

« ’Eiaha e horuhoru tō ’outou ’ā’au, e fa’aro’o i te Atua ’e e fa’aro’o ato’a mai ho’i iā’u… 

« ’Ua hina’aro ’outou iā’u ra, e ha’apa’o i tā’u parau … 

« Tei iāna tā’u ra parau ’e ’ua ha’apa’o ’oia i taua parau ra, ’oia tei hina’aro mai ’iā’u ; ’e tei hina’aro mai iā’u ra, e herehia mai ’oia e tā’u Metua ra, ’e e here ho’i au iāna, ’e e fa’a’ite atu ho’i au iāna iā’u iho ».⁹

E ha’amaita’i mai te Atua ia tātou mai te au i tō tātou fa’aro’o.¹⁰ Te fa’aro’o o te vai puna ïa o te ora e te fā hanahana ’e te hi’ora’a ātea mure ’ore. Te fa’aro’o o te hō’ē parau tumu e fa’a’ohipahia o te fa’auru mai i te ha’apa’o maita’i. E pūai itoito ora, e tupu mai i roto i tō tātou huru mau ’e te hia’ai ’ia rave ma te hina’aro mau i te mau mea ato’a tā te Atua ’e tā Iesu Mesia e ani mai ia tātou. E fa’atūturi te reira iā tātou nō te tāhopu i te Fatu nō te arata’ira’a ’e ’ia ti’a i ni’a ’e ’ia rave ma te ti’aturi nō te fa’aoti i te mau ’ohipa au maita’i i Tōna hina’aro.

E rave rahi matahiti i teie nei ’a tāvini ai au ’ei peresideni misiōni, ’ua fāri’i au i te hō’ē niuniu nā te mau metua o te hō’ē o tā mātou misiōnare here tei fa’a’ite mai ’ua pohe tōna tuahine. Tē ha’amana’o nei au i te māru o taua taime ra, ’a tauaparau ai au ’e te misiōnare nō te fa’anahora’a o te ora fa’ahiahia a te Atua nō tāna mau tamari’i e nāhea te ’itera’a i te reira i tāmahanahana iāna.

Noa atu tōna māere ’e te pe’ape’a nō teie ’ati, teie misiōnare---nā roto i tāna mau ta’ira’a ’e ma te fa’aro’o i te Atua---’ua ’oa’oa i te orara’a o tōna tuahine. ’Ua fa’a’ite ’oia i te ti’aturi ’aueue ’ore nō te aroha o te Atua. Ma te tapitapi ’ore, ’ua parau ’oia iā’u ē e tāmau ā ’oia i te tāvini i tāna misiōni ma te fa’aro’o ato’a ’e te itoito, ’ia vai ti’amā nō te mau fafaura’a tā te Atua e vai ra nōna ’e tōna ’utuāfare. I teie taime hina’arohia, ’ua fāriu te ’ā’au o teie misiōnare ha’apa’o maita’i i te Atua, ’ua tu’u i tōna ti’aturi ato’a i ni’a Iāna, ’e ’ua fa’a’āpī i tāna fafaura’a nō te tāvini Iāna ma te itoito mau.

Mai te peu ’aita tātou i fa’atumuhia i ni’a i te ti’aturi ’aueue ’ore i te Atua ’e te hia’ai nō te tāvini Iāna, e nehenehe te mau ’itera’a rau pe’ape’a o te orara’a tāhuti nei e arata’i ia tātou ’ia ’ite ē e au ra ’ua fa’ateiahahia tātou e te tuto toiaha ; ’e ’aita tātou e itoito fa’ahou i te ora tā’āto’a i te ’evanelia. ’Aita ana’e te fa’aro’o, e morohi ato’a tō tātou ’ite nō te māuruuru i te mau ’ōpuara’a a te Atua, nō ni’a i te mau ’ohipa e tupu mai i muri iho i roto i tō tātou orara’a.¹¹

I roto i tera mau taime nō te tamatara’a, te enemi---o te tāmau nei i te hiopa mai---e tamata ’oia i te fa’a’ohipa i tō tātou ’ite ’e tō tātou ferurira’a nō te fa’ahapa ia tātou. E tamata ’oia i te ha’apāpū ia tātou ē e mea faufa’a ’ore ’ia ora i te mau parau tumu o te ’evanelia. ’A ha’amana’o ē te ’ite o te natura ta’ata « e ’ore… e fāri’i mai i tā te Vārua o te Atua ra, e mea ma’ama’a ïa iāna ».¹² ’A ha’amana’o o Sātane « e enemi [nō] te Atua, ’e te tama’i noa maira ’oia iāna, ’e te parau maira ’e te tāparu noa maira ’oia [ia tātou] ’ia rave i te hara ’e te mea au ’ore ra ».¹³ ’Eiaha tātou e vaiiho iāna ’ia fa’ahema ia tātou ; ’ia nā reira tātou, e paruparu tō tātou fa’aro’o ’e e mo’e roa te mana nō te fāri’i i te mau ha’amaita’ira’a a te Atua.

Mai te peu e mea itoito tātou ’e te ’aueue ’ore i roto i tō tātou fa’aro’o, e ha’amara’a te Fatu i tō tātou ’ite nō te ti’a i ni’a mai i te mau tītaura’a o te orara’a. E roa’a ia tātou i te ha’avī i te mau ’umera’a au ’ore ’e e fa’ananea tātou i te ’ite nō te fa’a’oroma’i, noa atu e au ra e mau ha’afifira’a tuauru. Nā te reira i fa’ati’a i te nuna’a o te ari’i o Limehi ’ia rave i te hō’ē fa’aorara’a fa’ahiahia nō tō rātou fa’atītīra’a a te ati Lamana.

Te mau taea’e ’e te mau tuahine, tē ani nei au ’ia tu’u i tō ’outou ti’aturira’a ato’a i te Atua ’e i roto i te mau ha’api’ira’a a Tōna mau peropheta. Tē ani nei au ia ’outou ’ia fa’a’āpī i tā ’outou mau fafaura’a e te Atua, ’ia tāvini Iāna mā tō ’outou ’ā’au ato’a, noa atu te mau huru ha’atāfifira’a o te orara’a. Tē fa’a’ite pāpū nei au ē nā roto i te mana o tō tātou fa’aro’o ’aueue ’ore i te Mesia, e fa’aorahia tātou i te tītīra’a o te hara, o te fē’a’a, o te ti’aturi ’ore, o te ’oa’oa ore, o te māuiui ; ’e e fāri’i tātou i te tā’āto’ara’a o te mau ha’amaita’ira’a i fafauhia e tō tātou Metua here.

Tē fa’a’ite pāpū nei au ē e mea mau te Atua. Tē ora nei ’Oia ’e ’ua here ’Oia ia tātou. Tē fa’aro’o nei ’Oia i tā tātou pure i roto i tō tātou mau taime ’oa’oa ’e i roto i tō tātou mau taime fē’a’a, te ’oto ’e te hepohepo. Tē fa’a’ite pāpū nei au ē ’o Iesu Mesia te Fa’aora ’e te Tara’ehara o te ao nei.

E ’ōpani au i tā’u a’ora’a i te mau parau o te hīmene « ’Eiaha i teie nei i te mau matahiti rā i mua nei », e ’itehia i roto i te buka hīmene Potiti :

Te parau nei au i teie mau mea i te i‘oa mo‘a o Iesu Mesia, āmene.