!No Lukluk Olbaot, Lukluk Antap!
Blong invaetem ol narafala man blong kam long Kraes hem i stamba tingting blong yumi, mo yumi save fulfilim stamba tingting ia taem yumi lukluk long Jisas Kraes.
Stamba tingting blong mi hem i blong “invaetem ol narafala blong kam long Kraes.” 1 Hemia i stamba tingting blong yu tu. Yumi save mekem wok ia taem yumi stap lukluk i go long Jisas Kraes.
Mi bin kasem baptaes long sem taem wetem papa mo mama blong mi taem mi gat sikstin yia. Smol brata blong mi, Kiang-Wan, i bin joenem jos tru long angkel blong mifala, Yang Jik Li taem hem i bin gat fotin yia, mo i bin invaetem mifala blong go long jos blong hem. Wanwan long tenfala memba blong famli blong mifala i stap go long ol defdefren jos, mo mifala i bin glad tumas blong faenem trutok mo wantem blong serem glad we mifala i bin faenem long gospel blong Jisas Kraes afta long baptaes blong mifala.
Aot long mifala evriwan, papa blong mi nao i bin glad tumas blong lanem mo serem trutok. Hem i bin stap wekap eli long moning blong stadi skripja tu aoa evri dei. Afta long wok hem i bin stap mekem visit wetem ol misinari i go long ol famli, ol fren mo ol neiba blong mifala kolosap evri dei. Seven manis afta we mifala i bin kasem baptaes, 23 long ol famli blong mifala oli kam ol memba blong Jos. Folem long hemia, wan merikel blong 130 man i bin kasem baptaes long nekis yia blong hem tru long memba misinari wok blong papa blong mi.
Famli histri tu i impoten tumas long hem, mo hem i bin finisim eit jeneresen blong ol bubu blong mifala. Stat long taem ia i kam, ol blesing blong fasin we famli i jenisim laef, we brata blong mi i bin statem taem hem i gat fotin yia, i bin gro long plante defren wei, i no wetem olgeta we oli laef nomo be tu wetem olgeta we oli ded finis. Tru long wok blong papa mo ol narafala, famli tri blong mifala i kavremap 32 jeneresen, mo naoia mifala i finisim tempol wok blong plante branj. Tedei mi sapraes mo filim bigfala glad blong joenem ol bubu blong mifala mo ol pikinini blong mifala.
Presiden Gordon B. Hinckley i bin rekodem wan semfala eksperiens long Kolombas Ohaeo Tempol:
“Lukluk bak long laef blong [bigfala bubu, bubu, mo papa blong mi] taem mi sidaon insaed long tempol, mi lukluk daon long gel blong mi, long gel blong hem, … mo ol pikinini blong hem, ol apu apu pikinini blong mi. Mi luksave se mi stanap long medel blong seven jeneresen—tri bifo long mi mo tri afta long mi.
“Insaed long tabu mo klin haos ia, tingting i kam long mi long gudfala wok ia we mi mas mekem blong pasem evri samting we mi bin kasem long ol bubu blong mi i go long ol jeneresen we naoia oli kam afta long mi.” 2
Evri wan long yumi i pat blong wan famli we i no save finis. Wok blong yumi i save mekem sam jenis long ol gud o nogud wei. Presiden Hinkli i gohed, “Neva letem yuwan blong brekem koneksen blong ol jeneresen blong yu.3 Fasin blong yu blong stap fetful long gospel bae i mekem famli blong yu i kam strong moa. ?Olsem wanem nao bae yumi mekem sua se yumi stap olsem wan strong koneksen long famli blong yumi we i no save finis?
Wan dei, sam manis afta long baptaes blong mi, mi bin harem sam memba oli stap tokbaot nogud man insaed long jos. Mi bin harem nogud tumas. Mi bin go bak long haos mo talem long papa blong mi se ating bae mi nomo go long jos. I had tumas blong stap luk ol memba oli stap tokbaot nogud olgeta olsem ia. Afta we hem i lisin, papa blong mi i bin tijim mi se gospel i bin kambak mo hem i stret mo gud be ol memba, mo hem mo mi, i no stret mo gud yet. Hem i talem stret se, “No lusum fet blong yu from olgeta we oli stap raon long yu, be bildimap wan strong rilesensip wetem Jisas Kraes. !No lukluk olbaot, lukluk antap!”
Lukluk long Jisas Kraes—waes kansel blong papa blong mi, i mekem fet blong mi i kam strong moa long ol taem we mi fesem ol jalenj long laef ia. Hem i bin tijim mi olsem wanem blong laef folem ol tijing blong Kraes, olsem we i stap long ol toktok ia: “Lukluk long mi long evri tingting …; nogat tu tingting, no fraet.”4
Taem mi stap prisaed long Wasington Siatel Misin i bin ren long plante dei long yia. Be yet ol misinari oli kasem instraksen blong go aot mo proslaet long ren. Mi bin stap talem long olgeta, “!Go wok long ren ia, luk i go antap long heven, openem ol maot blong yufala, mo dring ren! Taem yu lukluk i go antap, bae yu kasem moa paoa blong no fraet blong openem maot blong yu long evri man. Hem i wan lesen blong olgeta blong lukluk i go antap taem oli stap fesem ol jalenj, iven afta long Misin blong olgeta. Plis no traem blong mekem hemia long ol ples we ea i toti.
Taem mi stap givim seves yet long Siatel Misin bigfala boe blong mi, Sanbim, i bin ringim mi, hem i man blong plei piano. Hem i bin talem se hem i gat janis blong save plei piano long Kanej Hol long Niu Yok from se hem i winim wan kompetisen. Mifala i glad tumas from hem. Be, long naet ia, taem mifala i stap pre wetem bigfala glad, waef blong mi i luksave se bae mifala i no save joenem hem long konset blong hem, mo i talem wan samting olsem ia long Papa long Heven: “Papa long Heven, mi glad tumas long blesing we yu bin givim long Sanbim. Be mi sori se mi no save go. Bae mi save go sapos yu bin givim blesing ia bifo o afta long misin ia. Mi no stap komplen, be mi sori lelebet.”
Stret we hem i finisim prea ia, hem i harem wan klia voes: “From se yu no save go, i mekem se boe blong yu i gat janis ia. ?Yu wantem jenisim hemia?”
Waef blong mi i bin sapraes. Hem i save se ol pikinini oli save kasem blesing tru long ol fetful wok blong ol papa mo mama insaed long kingdom blong Lod, be hem i fas taem we hem i andastanem pat blong hem i klia tumas. Hem i ansa long Hem semtaem. “No, no, hem i oraet we mi no save go. Letem hem i karem respek ia.
Ol dia brata mo sista, hem i no isi blong luksave lav blong Papa long Heven taem yumi stap lukluk raon wetem ol ae blong wol ia from se yumi stap lukluk faswan long ol trabol, ded, harem nogud, o fasin blong no miks wetem narafala man. Long narasaed, yumi save luk ol blesing we i stap taem yumi lukluk i go antap. Lod i talemaot, “… Taem yumi kasem ol blesing we i kam long God, hem i from fasin blong yumi blong stap obei long loa ia we blesing ia i folem.”5 Long evriwan we i stap givim eni seves long God, tingbaot se yu yu wan strong koneksen blong ol bigfala blesing blong olgeta we oli bin go bifo long yu mo ol jeneresen we bae oli kam afta long yu.
Tedei, mi glad tumas blong luk se plante long ol famli memba oli fetful long ol kavenan be mi sori blong luk se sam oli no stap wetem yumi. Elda M. Rasel Balad i talem se: “?Sapos yu jus blong kam inaktiv o livim Jos blong Jisas Kraes blong Ol Lata-dei Sent we i bin kambak, bae yu go wea? ?Bae yu mekem wanem? Jus ia blong ‘gowe’ long ol memba blong Jos mo ol lida we Lod i bin jusum bae i afektem yu blong long taem mo bae yu no save luksave naoia.” 6 Presiden Tomas S. Monson i leftemap tingting blong yumi, “Bae yumi oltaem jusum stret rod ia we i no isi be i no isi rod ia we i rong.”7
Hem i neva let tumas blong lukluk i go antap long Jisas Kraes. Han blong hem i open oltaem long yu. I gat plante jeneresen bifo long yumi mo afta long yumi we oli stap dipen long yumi blong folem Kraes blong yumi save stap olsem wan famli we i no save finis blong God.
Taem mi bin rilis long koling blong mi olsem stek presiden, ol boe blong mi oli bin glad tumas blong save gat plante moa taem wetem mi. Tri wik i pas, mi kasem koling blong kam olsem wan Seventi. Fastaem, mi ting se bae oli harem nogud, be smol boe blong mi i bin ansa wetem wan tingting we i stap daon, “Papa, no wari. Yumi wan famli we i no save finis.” !Hemia wan smol mo klia trutok! Mi bin wari smol from festaem mi bin stap lukluk raon long laef long wol ia nomo, be boe blong mi i glad from se hem i no lukluk olbaot be i lukluk i go antap wetem wan lukluk we i go kasem taem we i no save finis mo ol stamba tingting blong Lod.
Hem i no isi oltaem blong lukluk i go antap taem ol papa mo mama oli agensem gospel, taem yu memba insaed long wan smol Jos yunit, taem patna blong yu i no memba, taem yu singgel yet mo stap trae had blong mared, taem wan pikinini i gowe, taem yu sek se yu wan singgel papa o mama, taem yu gat jalenj long saed blong bodi mo ol filing, o yu wan viktim long wan trabol taem, mo sam narafala moa. Hang strong long fet blong yu long ol had taem ia. Lukluk long Kraes from paoa, ansa, mo hiling. Tru long paoa blong Atonmen blong Jisas Kraes, …Evri samting bae oli wok tugeta blong gud blong olgeta we oli wokbaot long stret laef. 8
Mi stap olsem wan witnes blong Jisas Kraes, se Hem i Sevya mo Ridima blong yumi. Taem yumi folem profet blong yumi we i laef, Presiden Tomas S. Monson, yumi lukluk i go long Kraes. Taem yumi prea mo stadi ol skripja evri dei, tekpat long sakramen wetem wan tru hat evri wik, yumi kasem paoa blong oltaem lukluk long Hem. Mi glad blong stap olsem wan memba long Jos ia mo stap wan pat blong wan famli we i no save finis. Mi lavem blong serem gudfala gospel ia wetem ol narafala man. Blong invaetem ol narafala man blong kam long Kraes hem i stamba tingting blong yumi, mo yumi save mekem wok ia taem yumi stap lukluk long Jisas Kraes. Mi testifae long ol samting ia wetem wan tingting we i stap daon long nem blong Jisas Kraes, amen.