Tai Taratara Nako, Taraa Eeta!
Kaoakiia aomata nakon Kristo bon oin ara kantaninga, ao ti kona ni kakoroa bukin te kantaninga aei n tararake nakon Iesu Kristo.
Oin au kantaninga bon “kaoakiia tabeman nakon Kristo.”1 Aio naba am kantaninga. Ti kona ni kakoroa nanon te kantaninga aei n tararake n taraa Iesu Kristo.
I bwabetitoaki ma au utu ngke 16 au ririki. Tariu ae karimwiu, Kyung-Hwan, are 14 ana ririki ni maiu, e kaaina te Ekaretia mairoun ai tamau, Young Jik Lee, ao ni kaoira nakon ana aro. Kaain ara utu aika 10 a kakaokoro aia aro, ngaia are ti kukurei ni kakaea te koaua ao n tangiria n tibwaua te kukurei ane ti kunea n ana euangkerio Iesu Kristo imwiin tiara ni bwabetitoaki.
Tamau te kabanea ni kukurei mai buakora n reiakina ao n tibwaua te koaua. E taneiai ni moantaai n uti n te moaningabong ni kamatebwai booki aika tabu ae riaon uoua te aoa ni katoa bong. Imwiin te mwakuri e iriia mitinare ni kawariia ara utu, raoraona, ao kaain rarikira e kuri katoa bong. Itiua te namwakaina imwiin tiara ni bwabetitoaki, 23 kaain au utu ao au koraki a riki bwa kaain te Ekaretia. Anne e rimwiaki man te kakai n noorakia 130 aomata ni bwabetitoaki n te ririki are imwiina ibukin ana mwakuri ni mitinare tamau ni kaainakin te aro.
Kateirikian te utu e kakawaki naba nakoina, ao e katiai waniua te roro mairouia ara bakatibu. Man te tai anne ao n nako riki, mwiin rairakiia ara utu, e moanaki iroun mwaaneu ae 14 ana ririki, e a tia n rikirake ni kawai aika mwaiti tiaki tii ibuakoia aika maiu ma ibuakoia naba ake a tia ni mate. Ni kateitei iaon ana mwakuri tamau ao tabeman, rikiia ara utu e raonaki ma 32 te roro, ao ngkai ti a katiaa te mwakuri n te tembora ibukin rikiia ara bakatibu aika mwaiti. N te bong aei I miimi ao n namakina te kimwareirei ae bati n reitiira ma ara bakatibu ao kanoara.
Beretitenti Gordon B. Hinckley e korea te taneiai naba anne n te Tembora i Columbus Ohio:
“N tarai maiuia [tibutoru te unimwaane, tibu te mwaane, ao tamau] ngke I tabe n tekateka inanon te tembora, I taraa natiu te aine, natina te aine, … ao natina, tibutoru ataei. I waekoa n nooria bwa I tei inuukan rooro aika Itiua—teniman imwaaiu ao teniman imwiiu.
“N te auti ane tabu man katabuaki n au namakin e kaoti te iango n te kabaeaki ae kamiimi are bon au bwai n anganako ni kabane ake I karekei bwa au bwai mairouia au bakatibu nakoia te roro ake a roko imwiiu.”2
Ngaira ni kabane bon mwakoron te utu ae akea tokina. Tabera e kona n riki bwa moanakin ara tai are a kona n riki iai bitaki aika kakawaki inanon kawai aika raoiroi ao aika buakaka. E reitia Beretitenti Hinckley, Tai kariaia ngkoe n riki bwa te reitaki ae mamaara ibukiia am roro.3 Ami kakaonimaki inanon te euangkerio e na kakorakoraia am utu. Ti na kanga ni kakoaua bwa ti na riki bwa te reitaki ae matoatoa n ara utu ae akea tokina?
Te bong teuana, tabeua te namwakaina imwiin au bwabetito, I ongo irouia tabeman kaain te aro ni kaai n tiribure imarenaia n te taromauri. I bon rang nanokawaki. I okira mweengau ao n tuanga tamau bwa I a riai n aki manga nako n taromauri. E matoatoa noorakia kaain te aro n tiribureia tabeman n te aro anne. Imwiin ongoraau, e reireinai tamau bwa te euangkerio e a kaman tia ni kaokaki ao e kororaoi ma kaaina a tuai raoi, ke tao teuanne ke ngai. E taetae ni kamatoa, “Tai kabuai ami onimaki ibukiia aomata ake irarikimi, ma katea ami reitaki ae korakora ma Iesu Kristo. Tai taratara nako, taraa eta!”
Tararake nakon Iesu Kristo—ana reirei ae wanawana tamau—e kakorakora au onimaki ngkana arona bwa I kaaitara ma kaangaanga inanon maiu. E reireinai bwa N na kanga ni kamwakuri ana reirei Kristo, n aron taeka aikai: ”Ti riai n taraia n ara iango nako; n aki nanououa, ao n aki maaku.”4
Ngke I tararua Washington Seattle Mition, e kakarau ni boong aika mwaiti n te ririki. N ae teimatoa, ara mitinare a tuangaki bwa a na otinako ao n nako ni mwakuri iaan te karau. I taneiai n tuangiia, “Naako iaan te karau, tararake nako karawa, kauki wiimi, ao nimma! Ngkana kam tararake, kam na kakorakoraaki ni kauki wiimi nakoia aomata nako n aki maaku.” Bon te reirei ae tei ibukiia bwa a na tararake ngkana a kaaitarai kaangaanga imwiin naba aia mition. Taiaoka tai kataa aei n taabo aika bareka.
Inanon teimatoau ni beku i Seattle Mition, I karekea au tareboon mairoun au karimoa ni mwaane. Sunbeam, are bon te tia biaano ngaia. E taku bwa e reke ana tai ni kamataku i Carnegie Hall i New York ibukina bwa e moanna n te kaboo iaon abana. Ti bon rang kukurei ao n tokabeti ibukina. E ngae n anne, n te tairiki anne, inanon tatarora ma te kakaitau, e kunea kainnabau bwa ti aki kona n raonna n ana kamataku ao e taku nakon te Tama are i Karawa n aron aei: “Te Tama are i Karawa, I kakaitau ibukin te kakabwaia ae Ko a tia n angan Sunbeam. Irarikin anne, I kabwarabure bwa I aki kona n nako ikekei. N na kaman kona n nako ngke Ko anga te kakabwaia aei tao imwaain ke imwiin te mition aei. I aki ngurengure, ma iai au namakin ae uarereke ni kabwarabure.”
Ngke e tia ana tataro, e ongo te bwanaa ae mataata: “Ibukina ngkai ko mena iaon am mition, e a tia natim te mwaane n anganaki ana tai aei. Ko na kanakoa te kakabwaia aei n nako n raonna?”
E rang miimi kainnabau. E ataia ataei a na kakabwaiaaki rinanon aia mwakuri ni kakaonimaki aia karo n uean te Atua, ma bon te moantai ae e ataa tabena ni mataata iai. E kaeka te Tama are i Karawa n te tai ae waekoa: “Tiaki, tiaki, e Tamaroa irou bwa N na aki nako. E na bon anaa te kamoamoaki anne.”
Tariu ao mwaaneu, e aki bebete ibukira bwa ti na kinaa ana tangira te Tama are i Karawa ngkana ti taratara nako ma matara ibukina ngke ti noori moa baika aki angaraoi, te bua, rawawata, ke te maroaa. N te anga teuana, ti kona n noori kakabwaia ake iaona riki ngkana ti tararake. E kaotia te Uea, Ngkana ti karekei kakabwaia nako mairoun te Atua, bon man te ongotaeka nakon te tua anne ane e kateaki iaona.5 Nakoia naake a waaki n aekakin nako mwakuri n ibuobuoki ibukin te Atua, ataia bwa ngkami reitaki aika matoatoa ibukin kakabwaia aika korakora nakoia naakana imwaaimi ao rooro akana imwiimi.
N te bong aei, I kakaitau n noori mwaitiia au utu ni kakaonimaki ni kawain aia berita ma n nanokawaki n iangoia tabeman utu ake aki kona n raoniira. E taku Unimwaane M. Russell Ballard: “Ngkana ko rineia bwa ko na aki kakaonimaki ke ni kitana ana Ekaretia Iesu Kristo ibukiia aika Itiaki ni Boong aika Kaitira ae e a tia ni kaokaki, ko na nakea? Tera ae ko na karaoia? Te babaire bwa ‘ko na aki manga nakonako ‘ma kaain te Ekaretia ao n aki manga kona n noori mwiin aia anainano ana tia kairiiri te Uea ake e a tia n rineiia.”6 E kaungaira Beretitenti Thomas S. Monson, “Ti bia rinea te eti ae matoa ma tiaki te bwai ae bebete ae kairua.”7
E tuai rangin oimwii n tararake nakon Iesu Kristo. Baina a tangaina nakoim n taainako. Iai rooro ake imwaaira ao ake imwiira a onimakiniira n iriira Kristo bwa ti aonga n riki bwa ana utu te Atua ae akea tokina.
Ngke I a motirawa man weteau ae te beretitenti n te titeiki, a kukurei natiu mwaane ni kabanea au tai ma ngaiia. Teniua te wiiki imwiina I weteaki bwa N na riki bwa te Itingaun. N te moan I taku bwa a na nanokawaki, ma ana kaeka au bina ni mwaane e kangai, “Tamau, tai raraoma. Boni ngaira te Utu ae akea tokina.” Bon te koaua ae bebete man mataata. I raraoma teutana ibukina bwa I taraa moa te maiu n rabwata, ma e kukurei natiu te mwaane ibukina e aki taratara nako ma e tararake ma matana ni kaineta te maiu ae akea tokina ao ana kantaninga te Atua.
N taainako e aki bebete te tararake ngkana am karo a kaitara te euangkerio, ngkana ngkoe kaain te Ekaretia ae uarereke kaaina, ngkana tiaki kaain te aro buum, ngkana ko tuai n iein e ngae ngke ko karaoa ae tamaroa n iein, ngkana e tiotionako natim, ngkana ko kunea bwa te karo ae akea buum, ngkana ko kataaki n te rabwata ao n te namakin, ngkana ngkoe ko irekereke ma kabuanibwai aika riki, ao a bati riki. Teimatoa iaon am onimaki n taai ni kaangaanga akanne. Tararake nakon Kristo ibukin te korakora, baeranti, ao te kamaiuaki. Rinanon mwaakan ana Mwakuri ni Kamaiu Iesu Kristo, “bwaai ni kabane a na riki bwa kakabwaiakim.”8
I kakoaua Iesu Kristo, bwa Ngaia ara Tia Kamaiu ao ara Tia Kabooira. Ngkana ti ira ara burabeti ae maiu, Beretitenti Thomas S. Monson, ti tararake nakon Iesu Kristo. Ngkai ti tataro ao ni kamatebwai booki aika tabu ni katoa bong, ao ni butimwaea te toa ma nanora ni katoa wiiki, ti karekea te korakora n taainako n tararake Nakoina. I kukurei n riki bwa kaain te Ekaretia aei ao n riki bwa mwakoron te utu ae akea tokina. I tangiria n tibwaua te euangkerio ma tabeman. Kaoakiia tabeman bwa a na nakon Kristo bon oin ara kantaninga, ao ti kona ni kakoroa bukin te kantaninga aei n tararake nakon Iesu Kristo. I kaoti koauan bwaai aikai ma te nanorinano n aran Iesu Kristo, amen.