2010–2019
Nimet Ngwetngwet Suk, Ngwetwack!
Eprel 2017


Nimet Ngwetngwet Suk, Ngwetwack!

Suli mwet sahyac in tuhkuh nuh sin Kraist pa srihpac lasr uh, ac kuht kuh in ahkfalye srihpac se inge ke kuht ngwetwack nuh sin Jisus Kraist.

Srihpac luhk pa in “suli mwet sahyac in tuhkuh nuh sin Kraist.”1 Pa inge srihpac lowos pac. Kuht kuh in ahkfalye srihpac se inge ke kuht ngwetwack nuh sin Jisus Kraist.

Petsac
Elder Choi’s family

Nga pacptaislac wi pahpah ac ninac kiyuck ah ke nga matwac yac 16. Tamuhlwel srihk wiyuck emet, Kyung-Hwan, suc yac 14, welah Alu uh sin uncle se luhk, Young Jik Lee, ac suli kuht nuh ke alu lal. Kais sie sin mempucr 10 ke sucu lasr ah wi siena alu, kuht in muh kuh in engan in sokwack ma pwacye ac kena akacsruhi engan se inge ma kuht konwacack ke wosasuc luhn Jisus Kraist tukun kuht pacptaislac.

Petsac
Pahpah tuhmwacl Elder Choi ah wi mwet sahyac

Pahpah tuhmuhk ah pa rahrah emet sesr in lotwelah ac akacsruhi ma pwacye uh. El sa in nguhtwaclihk ke lututacng uh in lutlut ke ma suhmuhslah ke lusen oa luo kais sie lwen. Tukun orekma ah elac som wi misineri ah muhtwacta yurin sucu, kawuck, ac mwet tuhlan lasr apkuhran in lwen nuh kwewa. Mahlwem itkohsr tukun kuht pacptaislac ah, 23 sin mwet ke sucu luhk ah mempucrlac ke Alu uh. Na ma usrnguck tuhkuh tohkoh ke kuht liye mwet 130 pacptaislac ke yac tohkoh an ke srihpen orekma luhn mempucr misineri luhn pahpah tuhmuhk ah.

Petsac
Muhtwacwacyacn orekma luhn misineri
Petsac
Orekma tuhtahflah luhn misineri

Sramsram mahtuh luhn sucu oacyacpac yohk srihpac nuh sel, ac el ahksahfye fihl oalkosr luhn mwet mahtuh lasr. Nuh ke pacl se inge, fahko ke eklac luhn sucu lasr, muhtwacwacack ke mukul wiyuck suc yac 14, kapwack ke ohiyac pucspucs ac tiac yurin mwet moul muhkwena tuhsruhktuh yurin mwet misac pac. Muhsaheack nuh ke orekma luhn pahpah tuhmuhk ac mwet sahyac, family tree lasr uh som nuh ke fihl 32, ac ingena kuht ahkfalye orekma luhn tempuhl ke lah puhkantwen. Mihsenge nga lut ac puhla engan yohk infulwacn mwet mahtuh lasr ac fihl fahsruh lasr uh.

Petsac
Ma mahtuh luhn sucu tahfweyucklac

Prestuhn Gordon B. Hinckley el suhmuhslah ma sikyak oacna ke Columbus Ohio Tempuhl ah:

“Ke nga motko ke moul luhn [pahpah nuhtin pahpah mahtuh, pahpah mahtuh, ac pahpah tuhmuhk] ke nga muhta ke tempuhl, nga ngwetwacng nuh sin muhtwacn nuhtihk, ac tuhlihk muhtwacn nahtuhl, … ac ke tuhlihk nahtuhl, tuhlihk nuhtin nuhtin tuhlihk nuhtihk. Nga sa in akihlen lah nga muhta infulwacn fihl itkohsr—tolu met likiyuc ac tolu tukuk.

“Ke lohm muhtahl ac sacohk se ingacn oasr ma kunac yohk som ahluhkwelah nuhnak luhk in tahfwelah ma nuh kwewa nga eis sin mwet mahtuh luhk nuh sin mwet luhk ke fihl fahsruh puhs suc ingena fah tuhkuh tukuk.”2

Petsac
Ke infulwen fihl lasr uh

Kuht nuh kwewa oasr infulwacn sucu ma pahtpaht uh. Ma kunacsr uh kuh in sie pacl eklac yohk ke eklac yohk srihpac uh kuh in sikyak ke inkacnek wo kuh koluk. Prestuhn Hinckley el kalweni, “Tiac lwelah kom in sifacna ahol ip muhnahs ke sein ke fihl lom an.”3 Luhlahlfongi lom ke wosasuc uh fah ahkkweye sucu lom an. Kuht kuh in ip fokoko ke sucu ma pahtpaht lasr uh fuhkah?

Sie lwen, tukun mahlwem ekahsr ke pacptais luhk ah, nga long kuhtuh mempucr lwesrihki sie sin sie ke alu ah. Nga ahsorkihn na upac. Nga fohlohk nuh lohm ah ac fahk nuh sin pahpah tuhmuhk ah lah sahp nga enenuh in tilac som nuh ke alu ah. Arulacna upac in liye mempucr uh lwesrihki mwet sahyac oacna ingacn. Tukun el lohng, pahpah tuhmuhk ah lutiyuc lah wosasuc ma fohlohkihnyuckyak uh pa suwohswohs tuhsruhktuh mempucr uh soenna, finne el ac nga. El kuh in fahk, “Tiac lwelah luhlahlfongi lom in tuhlac ke srihpen mwet rauni komlac uh, tuhsruhktuh muhsahi kuhpahsr kuh yurin Jisus Kraist. Nimet ngwetngwet suk, Ngwetwack!”

Ngwetack nuh sin Jisus Kraist—mwe luti lahlmwetmwet luhn pahpah tuhmuhk—ahkfokokoye luhlahlfongi luhk kais sie pacl nga sun ma upac ke moul uh. El lutiyuc ohiyac in orekmakihn mwe luti luhn Kraist, ke kahs Lal inge tuh kuht enenuh in ngwetwack nuh Sel ke nuhnak nuh kwewa ke wacngihn tahfuh luo kuh sahngweng.4

Petsac
Misineri ke Seattle Washington Tempuhl

Ke nga karihngihn Washington Seattle Mission ah, oasr af lwen pucspucs ke yac sac. Srwackna, misineri lasr uh suhpweyuck in som ac forfor luti ye af uh. Nga kwacna fahk nuh selos, “Som nuh ye af uh, ngwetwack nuh inkuhsrao, ikacslah inwaclum, ac nihm kac! Ke kom ngwetwack, kom ac ahkfokokoyeyuck in ikacslah inwaclum nuh sin mwet nuh kwewa ac wacngihnlac mwe sahngweng.” Pa mwe luti ke akucl nuh selos in ngwetwack ke elos sun ma upac finne tukun misin lalos. Nuhnak muhnahs tiac srihke ma inge ke acn fohkfohk.

Ke nga srwackna oasr ke misin Seattle ah, nga eis pahng se sin mukul mahtuh se emet nuhtihk, Sunbeam, suc sritacl piano. El fahk lah el insewowo in sritacl ke Carnegie Hall ke acn New York ke srihpen el itto ke sie international competition. Kuht engan ac rahrah na pwacye kacl. Tuhsruhktuh, ke ekuh se ingacn, ke pruhe luhn sruikihn, muhtwacn kiyuck ah akihlen lah kuht tiac kuh in som wi sritacl lal an ac fahk ma oacna inge nuh sin Pahpah Lucng: “Pahpah Lucng, nga sruikihn mwe insewowo Kom sang nuh sel Sunbeam. Oacyacpac, nga sislah koluk tuh nga tiac kuh in som nuh we. Nga kuh in som Kom fin use mwe insewowo se inge met liki kuh tukun misin se inge. Nga tiac tohrkahskahs, tuhsruhk nga puhla ahsor kuhtuh.”

Ke el ahksahfye pruhe se inge, el lohng puhsra suwohs se: “Ke srihpen kom tiac kuh in som, mukul nuhtum ituckyang nuh se mwe insewowo se inge. Yac kom ke ayaol?”

Muhtwacn kiyuck ah ahklutyeyuck. El etuh lah tuhlihk uh ahkinsewowoyeyuck ke srihpen orekma luhlahlfongi luhn pahpah ac ninac kiyaclos ke tohkohsrahi luhn Leum, tuhsruhk pa inge pacl se emet elan kahlwem ke kunohkohn lal ke ohiyac suwohs. El sa in topuk nuh Sel: “Moh, moh, WONA sihk in tiac som. Lwelah el in eis mwe ahkfuhlwactye sacn.”

Tamuhlwel ac tahmtahel sacohk, tiac fihsrwacsr nuh sesr in akihlen luhngse luhn Pahpah Lucng ke kuht ngwetngwet suk ke muhtahsr mweyen kuht liye ma upac, tuhlac, toasr, kuh sifacnalac met. Ke ohiyac sahyac, kuht kuh in liye mwe insewowo yohk ke kuht ngwetwack. Leum El ahkkahlwemye ke kuht eis kuhtwena mwe insewowo sin God, kuht eis ke srihpen kuht ahkos masap ma use kain mwe insewowo se ingacn.5 Nuh sin kuhtwena mwet suc muhtwacwacack ke kuhtwena kuhlwacnsap luhn God, etuh lah kom pa mwe oracni kuh ke mwe insewowo kuh nuh sin elos met liki kom ac fihl tukum uh.

Mihsenge nga sruikihn in liye lah oasr mempucr pucspucs ke sucu lasr uh suc luhlahlfongi ke inkacnek wuhlweacng tuhsruhk nga ahsorkihn in nuhnkuh kuhtwena selos suc tiac wi kuht. Elder M. Russell Ballard el fahk: “Kom fin sulaclah in tilac wi Alu luhn Jisus Kraist luhn Mwet Luhlahlfongi ke Lwen-sahflah, kom ac som nuh oyac? Meac kom ac oruh? Sulaclah se in ‘tiac sifil wi’ yurin mempucr luhn Alu ac mwet kol suleyucklac sin Leum fah ekuhllah ma yohk tuh tiac kuh in kahlwem nohfohn ingena.”6 Prestuhn Thomas S. Monson el kaifwe kuht, “Lwelah kuht in sulaclah acn suwohs upac liki na acn koluk fihsrwacsr.”7

Tiacna pahtlac in ngwetwack nuh sin Jisus Kraist. Pahol ikack pacl nuh kwewa nuh suwos. Oasr fihl pucspucs met liki kuht ac tohkohsr ma luhlahlfongi kuht in ukwe Kraist kuht in muh sie sucu ma pahtpaht luhn God.

Ke nga fihlfihllac liki pahng luhk ke prestuhn luhn stek, tuhlihk mukul nuhtihk ah rahrah in eis pacl yohk yuruk. Wik tolu somlah ac nga pahngonyuck nuh ke Mwet Itngucul. Met nga muh elos ac suhpwacrlac, tuhsruhktuh tuhlihk mukul fuhsr se emet nuhtihk ah topuk, “Pahpah, wacngihn elyah. Kuht pa sie sucu ma pahtpaht.” Fahk na fihsrwacsr ac pwacye se pa ingacn! Nga sensen kuhtuh ke srihpen nga ngwetngwet liye ke moul se inge met, tuhsruhktuh wen nuhtihk el engan ke srihpen el tiac ngwetngwet tuhsruhktuh ngwetwack ke muhtahl nuh ke ma pahtpaht ac srihpac luhn Leum.

Tiac fihsrwacsr pacl nuh kwewa in ngwetwack ke pahpah kuh ninac kiyom lain ma ke wosasuc, ke kom mempucr ke u srihsrihk se ke Alu uh, ke mukul kuh muhtwacn kiyom an tiac mempucr, ke kom srwackna lolacp finne kom sang kuh lom in pahyuck, ke tuhlihk se tuhlac, ke kom sifacna tuhfahlah tuhlihk, ke kom muhnahs ke ma luhn ikoac kuh nuhnak, ke kom oasr ke mwe ongaiyac, ac kuhtuh pac. Sruokyacna luhlahlfongi lowos ke pacl upac. Ngwetwack nuh sin Kraist ke kuh, oaru, ac onwe. Ke kuh luhn Iwaclah luhn Jisus Kraist, ma nuh kwewa fah sikyak in kahsrwe kowos.8

Nga fackwack mwe loh ke Jisus Kraist, tuh El pa Mwet Lahngo ac Mwet in Molwelah lasr. Ke kuht ukwe mwet pahluh moul lasr, Prestuhn Thomas S. Monson, kuht ngwetwack nuh sin Jisus Kraist. Ke kuht pruhe ac lutlut ke ma suhmuhslah lwen nuh kwewa, ac ipeis kuhfa luhn Leum ke ohiyac pwacye kais sie wik, kuht eis kuh in ngwetwack pacl nuh kwewa nuh Sel. Nga engan in wi mempucr ke Alu se inge ac wi sie ip ke sucu ma pahtpaht. Nga luhngse akacsruhi wosasuc wolacna se inge yurin mwet sahyac uh. In suli mwet sahyac in tuhkuh nuh sin Kraist pa ma kunacsr, ac kuht kuh in ahkfalye srihpac se inge ke kuht ngwetwack nuh sin Jisus Kraist. Nga fahkwack ma inge ke ohiyac puhsisacl ke inen Jisus Kraist, amen.