Lak Mombes el Meliuekl, Momes er Bab!
Mongemedaol er a rebebil el mo er a Kristo a mokted, e kid a sebeched rulii tiang sel domes el bedul a Jesus Kristo.
A moktek a “mengemedaol er a rebebil mel bo er a Kristo.”1 Tiang a dirrek el moktel a rechad er a ikelesia el dirrek. Kid a sebeched el rulii tial tekoi sel domes el bedul a Jesus Kristo.
Ak miltecholb er a osisiu el taem lobengkel a demak ma delak sera leteruich ma elolem [16] a rekik. A ochellek er a , Kyung-Hwan el mle teruich ma eua [14] rekil, a mlo chad er a Ikelesia lokiu er a okdemelek el, Young, Jik Lee, e milngemedaol er kemam el mo er a ikelesia er ngii. Teruich el chad er a telungalek er ngak a chad er a kakerous el ikelesia, meng kmal mlo ungil a rengmam sera kibetik er a klemerang e somam el louchais er a deureng el kibiltik er a ebangkelio er a Jesus Kristo er a uriur er a ki metecholb.
A demak ngkel kot el mle ungil a rengul er kemam el mo mesuub e ouchais er a klemerang. Ng mle blechoel lomekokl el mekiis sel tutau e menguiu er a chedaol llechukl el betok er a erul sikang ra bek el sils. Sel bol merek loureor eng ngulbengterir a re missionari el mo oldingel er a telungalek er kemam, sechelimam, ma tonari er kemam ra bek el sils. Uriur er a euid el buil er a ki metecholb, lluich me a keldei[23] el chedal a telungalek er kemam a mlo chad er a Ikelesia. Tiang a uriur sel ongasireng el lulmes er a dart ma okedei[130] el chad el miltecholb er sel rak eleng demak el milruul a urelel a missionari.
A reksi er a telungalek a kmal mle klou a belkul el mo er ngii, en gii a mlo merek el meruul a urelel a eiai el telcheroll. Seikid el taem, sera telungalek er kemam lulebult a rengrir, el lulemuchel er a teruich me a eua [14] rekil el ochellek, el diak el di ureor el mo er a re kiei ng dirrek el mo er tirkel mla mad. Olngeseu er tial urelel a demak ma rebebil, e sel family tree er kemam a mla mo subechii a okedei ma eru [32] el telcheroll, e kemam a mochu merek el meruul a ureor er a templo mo er a betok el tirkel uchelel a telungalek er kemam.
A President Gordon B. Hinckley a miluches er a osisu el okesiu sera lengar chelsel sel Columbus Ohio Templo:
“Melatk er a klengar er a [demal a demak el rubak, demak el rubak, me a demak] serak dengchokl er a chelsel a templo, eak kulmes er a ngelekek el redil, me a ngelekel a ngelekel el redil, … me a rengelkel, el rengekel a rengelkel a rengelkel a ngelekek. Ak mlo omtab el kmo ngak a ngara belngel tial euid el telcheroll—keldei el ngar medak ma keldei lokiuelek.
“Chelsel tial chedaol el blai eng mlera uldesuek el ngii a kmal ngerchelek el kirek el nguu el mesterir tirkal rengelkek el mlara uchelel telungalek er ngak el mo er tirkal telcheroll el loiak kulek.”2
Kid er rokui a tebechedel tial diak a ulebengellel klengar. A ngercheled a mochul ea klou a ututlel el tekoi el mo mengodech a sebechel mengodech el mo ungil malechub eng mekngit. A President Hinckley a milemolm, “Lak bechikaumebom mechitechut el lomech er sel telcheroll er kau.”3 A klaumerang er kau er a ebangkelio a mo smisichii a telungalek er kau. Kede mekerang e mo medengei el kmo kede mo mesisiich el uak er a diak a ulebengellel klengar?
Tara klebesei, sesei el buil, uriur er ak metecholb, eak rirngesterir a rebebil er a rechad er ikelesia el kakelais er a chelsel a ikelesia. Ng kmal mlo mekngit a renguk. Ak mlo remei e subedii a demak el kmo nglocha bai diak luut el mo er a ikelesia. Ng kmal mle meringel sera kisterir tirkal chad er a ikelesia el kakedais. Uriur er a lorenges er ngak, ea demak a ulisechakl er ngak el kmo a ebangkelio a liluut el mei er a beluulechad e cherungel engdi a rechad er ikelesia a diak, mengii me ngak el dirrek. Ng mlo mesisiich el melekoi el uasei, “Lak bol mechitechut a klaumerang er kau eleng te rechad el meliuek er kau, bai bo molisiich er a deluill er kau lobengkel a Jesus Kristo. Lak momes el meliuek er kau, momes er bab!”
Momes el mo er a Jesus Kristo—sel mellomes el osisecheklel a demak a silsichii a klaumerang er ngak sel bok chelbangel a meringel er a klengar er ngak. Ngii a ulisechakl er ngak el kmo mekerang a kusbech aikal osisecheklel a Kristo, er a chelsel aikal tekoi: Momes er ngak er a bek el luldasu; elak medakt.4
Sera kungerachel er sel Washington Seattle Mission, eng kmal mle betok el sils el blar ngii a chull er sel rak. Engdi, a re missionari a ledilu er tir mel bo loldingel el lolisechak el ngara chull. Ak mle blechoel kmu er tir, Bo mtobed el mo er a chull, momes el mo er a babeluades, bekengii a ngerem, e molim er ngii! Sel momes er bab, eng mo ngar ngii a klisichem el mekengii a ngerem el mo ra rokui el chad e diak ko medakt.” A mle belkul tial omesuub el tir omes er bab sel bolchau a meringel el tekoi er a mission er tir. A kulengit melak moruul er tial sel om ngar aikel polluted el basio.
Me sera dirk mesiou er a Seattle Mission, eak okedong mler ngak el mla er a ngkel klou ngelekam el sechal, el Sunbeam, el ngii a pianist. Ngdilu el kmo ngar ngii a techellel el mo ousekool a piano er a Carnegie hall el ngara New York eleng mlo kats er sel klaisichai. Ki meral mlo ungil a rengmam el kirel. Maluaisei, e sel kesus, ki moluluuch loureng a saul, ea bechik a mlo omtab el kmo ng mo diak el sebechemam el omes er ngii lousekool meng dilu er Chedam er a Babeluades el uasei: “Chedam er a Babeluades, ak mereng a saul kirel a klengaltengat el Kau ngilai el mesang a Sunbeam. Engdi, ngmekngit a renguk el diak el sebechek el mong. Ng locha mlo sebechek el mong ulekum Kau milsa tial klengaltengat er uchei malechub nguriur er a mission. Ngak a diak kumondai, engdi ak kora ouuchel a renguk.”
Me sera lebol merek el meluluuch, eng rirengesii a bleketakl el ngor el uasei: “Eleng kau el ngara mission er kau meng diak el sebechem el mong, a ngelekem a mla nguu tial techall. Ng soam Ak luut el nguu tial techall el blak besang a ngelekem mebol sebechem el mo obengkel?”
A bechik a mlo mechas a rengul. Ng mle medengei el kmo a rengalek a mo mekngeltengat eleng sel klaumerang er a rechad er a blirir el meruul a ureor er a rengedel a Rubak, engdi dirrek el uai al kot el taem el ngii a mlo medengelii tial ngerchelel el mle bleketakl. Ngdi mle mereched el longer er a Chedam: “Ng diak, diak, Ng kmal di UNGIL er ngak a lak bong. Becherei mengii el nguu tial klengaltengat.”
Rodam me a rodos, ng diak el beot er kid a metebengii a beltkil a rengul a Chedam er Babeluades sel domes el meliuekl er kid loba mad er a tech, eleng aikel kot el deues a ongesang, riid, beraod, malechub eng sabisi. Ea kuk ngodech er tiang, kid a sebeched el mo medengei aikel klengaltengat el mla merkid sel domes el bedul a Dios. A Rubak a uluchais el kmo sel dengai a klengaltengat el mla er a Dios, eleng kid lulturiakl er a llach el sel klengaltengat a kirel. 5Mo er tirkel mocha meruul a ngidillurelel a Dios, bo modengei el kmo kau a mochul a meklou el klengaltengat el mo er tirkel mle kiei lucher kau ma tirkel telcheroll loiak kuriul er kau.
Chelchal sils eak oureng a saul el mesterir a betok el rechad er telungalek er ngak el blak a rengrir e ngar sel chedaol telbiil el rael engdi ngak a mo mekngit a renguk sel kumedasu el rechad er a telungalek er ngak sel bolak kimdak el ngar sel chedaol el telbiil el rael. A Elder M. Russel Ballard a dilung: Alsekum meke tibir el mo diak ko bera ikelesia malechub ke morcheroid er tial oltel a Ikelesia er a Jesus Krisot er Uriur-klebesei el Santo, e ke mo er ker? Ke mo mekerang? Sel mtibir el mo ‘dikea lluut lobengkel’ a Ikelesia ma rechad er a Ikelesia ea tirkel meredel el Dios a mililt er tir a mor ngii sel relii diak blechoel mo medengelii er a chelechang. 6 A President Thomas S. Monson a outkeu er kid, “Mei me dolilt er a melemalt el rael, altang lebebil er a taem eng meringel rabai molilt er a mengkit el rael, eleng beot.”7
Ngdiak el sebeched el duob el mo omes el bedul a Jesus Kristo. Ngii a blechoel loldars a chimal lomekedong er kau. Ngar ngii a telcheroll er a uchei er kid ma okiueled el lultuil er kid el mo oltirakl er a Kristo mebol sebeched el mo diak a ulebengellel telungalek er a Dios.
Meserak bok merek er a okedong er a Ikelesia el stake president, ea rengelkek el sechal a kmal mlo ungil a rengrir ele mo sebecham el klou a temam el dmak. Uriur er a edei el sandei eak mlo kedong el mo er a Rokeuid. A mle kot el mera uldesuek a uasei telocha mo mekngit a rengrir, engdi ngkel kekerei ngelekek el sechal a dilu, “Chedam, lak kom bekikl. Kid a diak a ulebengelel telungalek.” Ng meral mle beot e bleketakl el klemerang tiang! Ak mle telkib el bekikl eleng ngak ulmes er tial klengar er a tech el kot, engdi a ngelekek el sechal a mle ungil a rengul eleng dimlak lomes el meliuek ngbai ulmes el bedul diak a ulebengelel klengar ma telbilel a Rubak.
Ng diak el blechoel beot sel domes bedul a Rubak sel rechad er a blid lometok er a ebangkelio, sel bora Ikelesia el diak el klou, sel bechim a diak el chad er a ikelesia, sel kedirk mesobil engdi ke milasm el mo bechiil, sel ngalek a mla mo diak lorenges, sel mesobil loungalek, sel ngar ngii a secherem er a tech malechub eng reng, ke mlo chemau a kerior, ma lemuut el bebil. Moreked er a klaumerang er kau raikel meringel el taem. Mobult el mo er a Kristo el kirel a klisiich, tabesul, ma omekungil. Ngokiu a klisichel a Tngakireng er Jesus Kristo, ea rokui el tekoi a ngar ngii a bol relii el mo er kau.8
Ak sioning er a Jesus Kristo, el kmo Ngii a Osobeled . Sel doltirakl er a kiei el profet er kid, el President Thomas S. Monson, e kid a omes el mo er a Jesus Kristo. Mesel doluluuch e donguiu a chedaol llechukl er a bek el sils e ngar ngii a rengud el melai r a chedaol belsoil er a bek el sandei, eng mo ngar ngii a klisiched el blechoellomes el mo er Ngii. Ng dmeu a renguk el chedal tial Ikelesia e mo chedal a diak a ulebengellel telungalek. Ng soak louchais er tial ebangkelio el mo er a rebebil. Mengemedaol er a rebebil el mo er a Kristo a moktek er kid, e kid a sebeched rulii tial ngerachel sel domes el mo er a Jesus Kristo. Ak kuba ngariou el reng e ouchais aikal tekoi loba ngklel a Jesus Kristo, amen.