Kedehr Kileng Seli, Kilengda Powe!
Lukehiong mehteikan en kohdo rehn Krais wia atail pwukoah, oh kitail kak kapwaiada pwukoah wet sang ni atail pahn kilengdahla rehn Sises Krais.
Ahi pwukoah iei en “luke mehteikan en kohdo rehn Krais.”1 Met pil wia amwail pwukoah. Kitail kak kapwaiadapwukoah wet sang ni atail pahn kilenglahng Sises Krais.
Ngehi oh ahi pahpa nohno pepdaisla ni ahi sounpar [eisek weneu]16. Ansou me riei pwutak tikitik Kyun Hwan, sounpar 14, se iahngla mwomwodiso wet sang rehn emen rien ahi nohno ohl, Young Jik Lee, oh ahpw lukei kiht en iang sarawi. Tohn aht peneineio koaros meh [ehk]10 oh emente kin iang ehu mwomwohdiso, Eri se udahn pereniki aht kak diarada dahme mehlel oh kin pereniki ehukiong mehteikan duen rongamwahu en Sises Krais mwurin aht pepdaislahu.
Ahi pahpahu me kin keieu pereniki esehla oh ehukihong mehtei kan duen mehlelo. E kin pirida mwadang nimenseng koaros pwehn onopiki pwuhk sarawi kan erein awa riau samwa. Kerenieng rahn koaros e pahn kin nek doadoahk ih kin iangih misineri kan oh pwarek aht peneinei kan, kempoakepaht kan, oh mehn impat kan. Sounpwong isuh mwurin aht pepdaisla, meh [riehk silimen]23 sang nan ahi peneinei oh aht peneinei teikan iangala mwomwohdisoht. Mwurin pahro se kilang diren manamahn sahngni aht kilang aramas 130[epwiki siliakan] me pepdaisla pwehki sang ni doadoahk en misineri me ahi pahpahu kin wia.
Poadepen peneinei pil kin kesemwpwalohng ih, oh e kanekehla dih waleu en aht peneinei. Sang ansouo kohla, wahn aht weliakapw, tepda sang rehn riei pwutak sounpar-14-[eisek pahieuo], oh lalaudla nan soangen ahl tohto kaidehnte ohng kiht me momour kan ahpw pil ohng me melahr kan. Sang ni doadoahk en ahi pahpahu oh mehtei kan, aht peneinei wiadahr dih 32[silihsek riau] en aht peneinei, oh met se songosong en kanekehla nan pali koaros. Rahnwet udahng I ahneki popohl pwehki ahi kak kadokepene ahi peneinein mahs akan.
Presiden Gordon B. Hinckley kasalehda soangen irairohte nan Tehnpas Sarawi en Columbus Ohio:
Ni ahi medemedewe duen mour en [ahi pahpa kahlap ah pahpa, ahi pahpa kahlap, oh ahi pahpahu] ansou me I mwomwohd nan Tehnpas Sarawi, I kilengdieng nei serepeino, nah serepeino. … oh nein nei seri, nah seri kan. I diarada me I mihmi nan werengen dih ihsuh—meh siluh mwohi oh meh siluh mwuri.
“Nan ihmw sarawi oh meleileio I ahnekihdi madamadau oh pepehm en pwukoah laud me I ahneki pwe ien kihong soahng koaros me I alehdi sang rehn ahi peneinei en mahs oko ohng ahi peneinei kan mwuri.” 2
Kitail koaros mihmi nan werehngen mour soutik atil pwukoa kan kin kak wekidkitaila ohng ni mwekid kesempwal kei me mwahu de pil sakanakan. Presiden Hinckley doula oh kosoia, “kedeh mweidehng pein kowe en wia kaluet ohng kadahudokehmw kan.” 3 Ahmw kin nantiheng nan rogamwahu wet pahn kakehlailiada ahmw peneinei. Ia mwomwen atail pahn kak ese me kitail wia aramas kehlail men nan atail peneinei soutik?
Ehu rahno, sounpwong kei mwurin ahi pepdaisla, I rongada tohn mwomwohdisoht kei me kaukauwe ekei. I pwurala nihmwo ngehi indahng ahi papahu me mwein mwahu ma I sto pwurala sarawi. Udahn apwalohngie ni ei kilang tohn mwomwohdisoht arail kaukauwe mehteikan. Ansou me ahi pahpahu rongehr mepwukat, e padahkihongie me rongamwahu wet kupwupwurdohr ni unsek ahpw kaidehn towe kan, pil iangahki kiht koaros. E indahngie ni mehlel, “kedehr kesehla ahmw pwoson pwehki mehteikan, ahpw nantihiong ken kalaudehla ahmw ehuong Sises Krais. Kedehr kileng seli, kilengda powe!”
Kilenglahng Sises Krais—Kaweid marain en ahi pahpahu— kin kakehlailih ahi pwoson ansou koaros mei kin lelohng kahpwal nan ei mour. E padahkihong ie mwomwen ahi pahn doadoahngki padahk kan en Krais, duehte mahsen pwukat: “Kilengdo rehi nan madamadau koaros, dehr peikasal, o dehr masopwehk.” 4
Erein ansou me I kakaun Washington Seattle Misin, kerenieng rahn koaros nan pahro kin kotou ahpw, I kin kaweidki nei misineri kan en kohla oh kalohk. I kin indahng irail, “Kumwail kohla pahn kotouo, kilehngdahlahng nan lehng, kihpeseng owemwail kan, oh nimpil! Ansou me kumwail pahn kilengda powe, kumwail pahn alehda kehlail en kihpeseng owemwail kan oh padahkohng koaros ni soh masopwehk.”E wia mehn krasaras oh kasukuhl ohng irail pwe ren kak kilengda powe ansou me irail pahn lel apwal pil iangahki mwurin arail misin. Menlau kumwail dehpa song wia soahng wet nan wasa me saminlahr kan.
Pil erein ei mihmi nan Seattle Misin, I alehdi delepwohn ehu sang nei pwutak keieu laud, Sunbeam, me wia soun kesengk en piano men. E inda me e ahnkidier ansou mwahu pwehn kasale mwomwen ah keseng nan Carnegie Hall nan New York pwehki ihme kana nan pilipil ohng kohla liki. Se inenen perehnikihda ahpw, ni soutiko, ansou me se wie kapakap en kapingahi pwoudo diarada me se sohte pahn kak iang towehda kasansal me e pahn wiahu oh ahpw inda nan ah kapakapo: “Sahm Nanleng, I kapingki kapai me pein Ihr ketkihiongehr Sunbeam. Ahpw I pil insensuediki ahi sohte kak iang kohla. I pahn kak iang kohla ma kapai wet kohdohte mwohn misin de pil mwuri. I sohte akiakpwung, ahpw I ekis ahneki pepehm en nsensued.”
Mwurinte ah nek kapakap, e rongada ngihl ehu me sansal me nda: “pwehki Ke sohte kak kohla pwe ke wihwia ahmw misin, noumw pwutako aledier ansou mwahu wet. Ke men kaweliali?”
Ahi pwoudo pwuriamweikihla. E esehla me serihkan pahn alehda kapaida sang ni wiewia mwahu en arail pahpa nohno kan nan wein Koht, ahpw ehdin ah wehwehkihla mwahu ah pwukoah. E mwadangete sapeng Kauno. “Soh, soh, mwahu ma I sohte kohla. Mweidohng en ahneki ansou mwahu wet.”
Riei ohl oh lih oko, E kin udahn apwal kitail en kehn limpoak en Sahm Nanleng ansou me kitail kin kilengki seli mesetail kan pwehki ihme kitail kin tepin kilang iei dahme sohte kesemwpwal, mehla, kahpwal, de insensued.Ahpw , kitail kak kilang kapai kan ansou me kitail kin kilengda powe. Kauno kasalehdar, “Ansou me kitail kin alehdi kapai sang Koht, e kin kohsang ni atail kin peikiong kosonedo me kahrehda soangen kapaio.” 5 Ohng koaros me kin mihla nan arail papah kauno, kumwail en ese me kumwail pahn wia elen kapai manaman ohng irail akan me melahr oh pil dih kan mwurimwail.
Rahnwet, I inenen kapingki ahi kak kilang me tohtohn ahi peneinei me iang towe mwomwohdisoht oh pil loaloapwoat ohng arail inou kan ahpw Ipil ahneki pahtou pwehki pil tohto me sohte iang kiht. Elder M. Russel Ballard kosoia: “Ma ke pahn pilada ken luetala de pwurasang nan Mwomwohdiso en Sises Krais en Souleng en Imwin Rahn Akan me kopwurpwurdohr, iawasa ke pahn kohla ie? Dahme ke pahn wia? Pilipil en sohla iang tohn mwomwohdiso wet iangahki irail kaun pilipilda kan pahn kahrehda kahpwal ansou werei me apwal en kilang met.” 6 Presiden Thomas S. Monson kangoangoahkin kitail en, “Pilada me pwung menda ma e apwal ah kaidehn dahme sapwung me kin mengei.”7
E saikinte pwand kitail en kilenglahng Sises Krais. E ketikihpesengehr Lime kan pwehn ketiki kumwail. Dih tohto mie mwohtail oh pahn pil mie mwuritail ma kitail idawehn Krais pwe kitail en kak wia peneinei soutik en Koht ehu.
Ansou mei komoaldihsang ahi pwukoahn Stake Presiden, Nei pwutak ko perenkihda arail pahn kak ahneki ansou laud ohngie. Wihk siluh mwuri, I wiahla emen Isiakan. I wiahki me irail pahn insensuedki, ahpw nei kisin pwutak keieu tikitik sapengki ni karakarahk, “Ipa, kedeh pwunod. Kitail wia peneinei soutik ehu.” Ia uwen mengei oh mehlel en pasapengo! I ahneki pwunod ansouo pwehki I tepte kilang nan mour wet, ahpw nei pwutako peren pwehki e sohte kilkilengseli ahpw e kilengdahla powe oh medewe mour soutik oh kupwuren Kauno.
E sohte kin mengei en kilengdahla powe ansou koaros me pahpa oh nohno sohte kin momourki rongamwahuo, Ansou me ke wia tohn mwomwohdisoht nan wasa tikitik kan, ansou me ahmw pwoud sohte wia tohn mwomwohdisoht, ansou me ke saik pwopwoud mendahte ma ke songehr ken pwopwoud, ansou me seri men kin salongala, ansou me ke wia pahpa de nohno men ahpw sohte pwopwoud, Ansou me ke lelohng kasongosong ni pali ngehn oh paliwar, ma ke wia emen me ohla nan kahpwal laud ehu, oh soahng tohto.” Kolokol ahmw pwoson nan ansou pwukat. Ale kehl sang Krais, pahrek, oh kamwahula. Sang ni tompen Sises Krais, “soahng koaros pahn mwahula oh wia kamwahupom.” 8
I kadehdehki Sises Krais, me E wia atail sounkomour oh soundoar. Ansou me kitail kin idawehn atail soukohp Thomas S. Monson, kitail kin kilengdahla powe rehn Sises Krais. Ansou me kitail kin kapakap oh onopki pwuhk sarawi kan rahn koaros, oh ale kamadipw sarawi ni mehlel wihk koaros, kitail kin alehdi kehl en kin ansou koaros kilenglahng Ih. I pereniki ahi kak wia tohn mwomwohdisoht oh wia kisehn peneinei soutik ehu. I pereniki ehukihong meteikan rongamwahu wet. Atail pwukoah iei en lukehiong mehteikan en kohdo rehn Krais, oh kitail kak kapwaiada pwukoah wet sang ni atail pahn kilengdahla powe reh Sises Krais. I kadehdehki mehpwukat ni karakarahk oh ni mwaren Sises Krais, amen.