Vagoleya Mai na Mana nei Jisu Karisito ki na Noda Bula

Kemuni na taciqu kei na ganequ, eda bula donumaka na itabagauna dredre duadua. E vakavolivoliti keda na bolebole, na duidui, kei na veiveisau. Na veigauna dredre oqo e a raica na iVakabula. E a vakasalataki keda o Koya ni na vakavuna na cudru e yalodra na tamata na iVakabula ka kauti ira tani.¹ Ia a sega vakadua ni nakita na Tamada Vakalomalagi me da na sotava taudua na vereverea ni leqa vakatamata yadua kei na bula veimaliwai.

Sa rui lomani keda na Kalou ka tala mai kina na Luvena e Duabau Ga² me vukei keda.³ Ka solia na Nona bula na Luvena o Jisu Karisito ena vukuda. Na veika kece oqo me rawa kina ni da rawata na mana vakalou—na mana e rauta me da colata rawa kina na icolacola, na itatarabe, kei na veitemaki ni noda gauna.⁴ Nikua au vinakata meu vosa ena ivakarau ena rawa kina vei keda me da dreta mai ki na noda bula na mana ni noda Turaga ka iVakavuvuli, o Jisu Karisito.

Eda tekivu ena noda vulica na veika e baleti Koya.⁵ “Sa ka dredre me [da]vakabulai na tamata ena no[da] lecaika.”⁶ Na levu ni ka eda kila baleta na nona veiqaravi vakalotu kei na nona itavi na iVakabula⁷—na levu ni noda kila na Nona ivunau⁸ kei na veika e vakayacora o Koya ena vukuda—na levu ni noda kila ni rawa Vua me vakarautaka na mana eda gadreva me baleta na noda bula.

Ena itekivu ni yabaki oqo, au kerei ira na itabagone qase cake ena Lotu me ra solia e dua na iwase ni nodra gauna e veimacawa me ra vulica na veika kece a tukuna ka cakava ko Jisu me vaka e volai ena ivolayavu ni Lotu.⁹ Au a sureti ira me ra vakayacora me nodra lewe ni vuli yadua na ivakamacala vakaivolanikalou kei Jisu Karisito ena Topical Guide.¹⁰

Au vakayacora na bolebole oqori baleta niu sa ciqoma oti o au. Au wilika ka lainitaka na tikina yadua e vakamacalataka baleti Jisu Karisito, me vaka e tuvai ena 57 na ivakadewa ena Topical Guide.¹¹ Niu sa vakacavara na cakacaka taleitaki oya, e taroga na watiqu se vakaevei na kena yaga vei au. Au tukuna vua, “Au sa duatani mai na tamata!”

Au vakila e dua na yalodina vakavoui Vua niu wilika tale ena iVola i Momani na nona vosa na iVakabula me baleta na Nona itavi ena bula oqo. E kaya kina:

“Au sa lako mai ki vuravura meu kitaka na lomai Tamaqu, ni sa talai au mai ko Koya.

Ka sa talai au mai ko Tamaqu me’u na mai laveti cake ena kauveilatai.”¹²

Ni da Yalododonu Edaidai, eda tukuna na Nona itavi me Veisorovaki i Jisu Karisito, ka rawa kina na tucaketale vei keda kece ka vakarautaka na bula tawamudu vei ira era veivutunitaka na nodra ivalavala ca ka ciqoma ka maroroya na cakacaka vakalotu kei na kena veiyalayalati.

E sega ni taucoko vakaivunau me da tukuna na isoro ni veivakaduavatataki ni Turaga ena vosa vakalekalekataki, me vaka “na Veisorovaki,” se “na mana veivakaukauwataki ni Veisorovaki,” se “vakayagataki ni Veisorovaki,” se “vaqaqacotaki mai na Veisorovaki.” Na ivakamacala oqo e rerevaki toka ni rawa ni vakacala na vakabauta ni ka e yaco oqo e ka bula ka tu na kena kaukauwa vakataki koya ka sega ni semati vei Tamada Vakalomalagi kei Jisu Karisito.

Ena ruku ni nona ituvatuva tawamudu na Tamada, sai koya na iVakabula a vakararawataki. Na iVakabula sai koya a sereka na ivau ni mate. Na iVakabula a sauma na isau ni noda ivalavala ca kei na talaidredre ka bokoca laivi kevaka eda veivutuni. Na iVakabula sai koya e sereki keda mai na mate vakayago kei na mate vakayalo.

E sega ni dua na kabula sega ni vakaibulibuli e vakatokai “na Veisorovaki” ka da rawa ni kere veivuke, veivakabulai, veivosoti, se mana. O Jisu Karisito na ivurevure. Na veivosa tabu me vaka na Veisorovaki kei na Tucaketale e vakamacalataka na ka e cakava na iVakabula, me vaka na ituvatuva nei Tamada, me rawa ni da bula ena vakanuinui ena bula oqo ka rawata na bula tawamudu ena vuravura sa bera mai. Na nona isoro ni veivakaduavatataki na iVakabula—na uto ni veika e caka ena itukutuku ni tamata—ena kilai vakavinaka duadua ka marautaki ni da semata vakamatata vei Koya.

A tukuna na Parofita o Josefa Simici na bibi ni nona itavi na iVakabula, ena nona kaya, “Na yavu ni ivakavuvuli ni noda Lotu o ya na nodra ivakadinadina na iApositolo kei na Parofita me baleti Jisu Karisito, ni a mate, bulu, ka tucaketale ena ikatolu ni siga ka lako cake ki lomalagi; kei na veika kece tale eso e salavata kei na noda Lotu era sa tokona talega.”¹³

Sai koya sara ga na itukutuku oqo ni Parofita a vakauqeta na nodratou vola ka sainitaka na 15 na parofita, daurairai, ka dauvakatakila na nodratou ivakadinadina me ivakananumi ni ka 2000 na yabaki ni nona sucu na Turaga. Na ivakadinadina vakairogorogo oqori e yacana “Se Bula Tiko Na Karisito.”¹⁴ E vuqa na lewenilotu era sa cavuqaqataka na kena dina. Eso tale era se bera ni kila ni tiko. Ni o segata mo vulica eso tale na ka baleti Jisu Karisito, au vakauqeti kemuni mo ni vulica “Se Bula Tiko Na Karisito.”

Ni da solia na gauna me da vulica me baleta na iVakabula kei na Nona isoro ni veivakaduavatataki, eda sa vagolei me da vakaitavi ena dua tale na tikina bibi ena kena rawati na Nona mana: eda digitaka me da vakabauti Koya ka muri Koya.

O ira na tisaipeli dina i Jisu Karisito era sa tuvakarau me ra kilai tani, tukuna na lomadra, ka duatani mai vei ira na tamata e vuravura. Era sega ni yalolailai, era yalodina, ka yaloqaqa. Au a vulica me baleta na mataqali tisaipeli vakaoya ena dua na ilesilesi wale tokaga oqo ki Mexico, kau sota kina kei ira na vakailesilesi vakamatanitu vakakina o ira na iliuliu ni veimatalotu tale eso. Era a vakavinavinaka yadua vei au ena nodra sasaga qaqa ka rawata vinaka na noda lewenilotu me ra maroroya ka taqomaka na bula vakawati kei na matavuvale qaqaco ena nodra matanitu.

E sega ni rawarawa se yaco vakataki koya na bula vakatisaipeli mana vakaoya. Sa dodonu me vakoti tu na noda rai vua na iVakabula kei na Nona kosipeli. E cakacaka bibi toka vakavakasama ni da segata me da raici Koya tiko ena noda vakasama kecega.¹⁵ Ia ni da vakayacora vakakina, ena dro na noda vakatitiqa kei na rere.¹⁶

Ena dua na gauna wale toka ga oqo au a kila e dua na iSakisaki sega ni rere. A sureti o koya me matataka nona koronivuli ena dua na veisisivi ni yasana raraba ena yakavi vata sa yalataka tu me vakaitavi kina ena dua na soqoni ni iSoqosoqo ni Veivukei ni nona iteki. Ena gauna qai kila kina na sota ni gauna oya ka vakamacalataka vei ira na vakailesilesi ni veisisivi ni na gadreva me suka totolo mai na veisisivi me rawa ni tiko ena dua na soqoni bibi, qai tukuni vua ni sa na boko na yacana mai na veisisivi.

Na cava a qai cakava na iSakisaki ni gauna oqo? E vakayacora o koya na nona yalayala me vakaitavi ena soqoni ni Soqosoqo ni Veivukei. Me vakaga a tukuni vua, e a sega ni vakatarai me vakaitavi ena veisisivi raraba oya. Ni tarogi vua baleta nona lewa, a sauma ga vakatotolo, “Io, e bibi cake na Lotu, se sega beka?”

Na vakabauti Karisito ena tosoi keda me da cakava na veika eda sega ni dau cakava. Na vakabauta e dau uqeti keda ki na cakacaka eda na rawata kina vakalevu na Nona mana.

Eda na vakalevutaka cake talega na mana ni iVakabula ena noda bula ni da cakava na veiyalayalati tabu ka maroroya vakamatailalai na veiyalayalati oqori. Na noda veiyalayalati e vauci keda Vua ka solia vei keda na mana vakalou. Ni da tisaipeli yalodina, eda veivutuni ka muri Koya ki na wai ni veipapitaisotaki. Eda na lakova na salatu ni veiyalayalati me da ciqoma na veicakacaka vakalotu gadrevi tale eso.¹⁷ Ena vakavinavinaka, sa vakarautaki ena ituvatuva ni Kalou me soli talega na veivakalougatataki oqori vei ira na tubuda era sa mate ka sega ni bau dua nodra madigi me ra rawata ena nodra bula tiko eke.¹⁸

Era dau segata na turaga kei na marama dau rokova nodra veiyalayalati na veisala eso me ra savasava tiko kina mai vuravura me kua ni dua na ka e vakataotaka nodra rawata na mana ni iVakabula. A vola vakaoqo ena dua na gauna wale toka ga oqo e dua na marama radinivale ka tina: “Oqo na gauna leqaleqa ka dredre. Eda sa vakalougatataki dina ni sa vakalevutaki noda kila na ituvatuva ni veivakabulai kei na veituberi uqeti mai vei ira na parofita, iapositolo, kei na iliuliu me vukei keda me da sokota ena galala na wasawasa voravora oqo. Keirau sa muduka neirau itovotudei ni vakarogo retio e veimataka. Ia, keirau sa dau vakarogoca e dua na vosa ni koniferedi raraba ena neirau talevoni veikauyaki e veimataka me keirau vakarautaki keirau kina ki na dua na siga vou.”

E dua na ivakarau me da vagoleya mai kina na mana ni iVakabula ki na noda bula sai koya me da dolele cake yani Vua ena vakabauta. Na dolele vakaoqori e gadrevi kina na sasaga gugumatua.

iVakatakilakila

Na marama e tara na nona isulu na iVakabula.

O nanuma tiko beka na italanoa vakaivolatabu baleta na marama ka sotava tu ena 12 na yabaki e dua na leqa veivakamalumalumutaki ka vakavumadua?¹⁹ A vakaraitaka na kaukauwa ni nona vakabauta na iVakabula, ka kailavaka kina, “Kevaka kau na tara ga na nona isulu au na vakabulai.”²⁰

A gadreva na marama yalodina dei nona vakanamata oqo me dolele ena kena yawa e rawata me yacova kina Nona kaukauwa mana. Na nona dolele vakayago e ivakatakarakara ni nona dolele vakayalo.

E levu vei keda sa dau kailavaka mai na boto ni yalona na ivakadewa duidui eso ni malanivosa a cavuta na marama oya: “Kevaka e rawa niu dolele yani vakayalo vakavinaka meu vagoleya mai na nona mana na iVakabula ki na noqu bula, au na kila na ivakarau meu sotava kina na kequ ituvaki lomaocaoca. Au na kila na ka meu cakava. Ka na tu vei au na kaukauwa meu cakava kina.”

Ni o dolele cake kina mana ni Turaga ena nomu bula ena kaukauwa vata e dau solia e dua ni luvu e wai ni vaqara cagi me cegu, ena nomu na mana mai vei Jisu Karisito. Ni kila na iVakabula ni o vinakata dina mo dolele cake yani Vua—ni rawa Vua me vakila ni gagadre levu duadua ni yalomu mo vagoleya mai na Nona mana ki na nomu bula—ena liutaki iko na Yalo Tabu mo kila vakavinaka na ka e gadrevi mo cakava.²¹

Ni o dolele vakayalo sivia na veika kecega o a cakava i liu, ena qai drodro mai vei iko na Nona mana.²² O na qai kila na ibalebale titobu ni qaqa ni serenilotu eda dau lagata “Na Yalo ni Noda Kalou”:

Na kosipeli nei Jisu Karisito e vakasinaiti tu ena Nona mana, ka sa vakarau tu vei ira kece na luvena yalewa se tagane na Kalou era vakasaqara vagumatua. Sa noqu ivakadinadina ni gauna eda vagoleya mai kina na Nona mana ki na noda bula, eda na marau vata o Koya kei keda.²⁴

Me vaka niu dua na nona ivakadinadina bula, Au kaya ni bula na Kalou! Sai Jisu na Karisito! Sa vakalesui mai ki vuravura na Nona Lotu! Na parofita ni Kalou e vuravura nikua o Peresitedi Thomas S. Monson, kau tokoni koya mai vuniyaloqu. Au vakadinadinataka, kau vakaraitaka na noqu loloma kei na veivakalougatataki baleti kemuni yadua, ena yaca tabu i Jisu Karisito, emeni.