Ang pagkuha sang Gahum ni JesuCristo Pasulod sa Aton Mga Kabuhi

Palangga nga mga kautoran, nagapangabuhi kita sa pinakalabing mabudlay nga dispensasyon. Sari-sari nga mga problema ang ara sa palibot naton. Ining mabudlay nga mga panahon gintagna sang Manluluwas. Sia nagpaandam sa aton nga ang kaaway sa aton panahon magapaakig sa katawhan kag magpatalang sa ila.¹ Apang ang Langitnon nga Amay wala nagtuyo nga atubangon naton ining mga problema kag mga isyu nga wala sing tabang.

Ang Dios nagpalangga gid sa kalibutan nga Sia nagpadala sang Bugtong Niya nga Anak² agud buligan kita.³ Kag ang Iya Anak, si JesuCristo, naghalad sang Iya kabuhi para sa aton. Ini tanan agud makuha naton ang diosnon nga gahum—gahum nga nagakaigo sa pagdaug sang mga palas-anon, mga sablag, kag mga pagsulay sa aton panahon.⁴ Karon nga adlaw luyag ko magpamulong parte sa kon paano naton makuha pasulod sa aton mga kabuhi ang gahum sang aton Ginuo kag Agalon, si JesuCristo.

Magsugod kita paagi sa pagtuon parte sa Iya.⁵ “Imposible para sa [aton] ang maluwas nga wala sing nabal-an.”⁶ Kon mas madamo kita sing nabal-an parte sa pagpangalagad kag misyon sang Manluluwas⁷—mas lubos naton mahangpan ang Iya doktrina⁸ kag kon ano ang iya ginhimo para sa aton—mas nabal-an naton nga Sia makahatag sang gahum nga kinahanglan naton sa aton mga kabuhi.

Bag-o lang sining tuig, ginpangabay ko ang batan-on nga mga hamtong sang Simbahan sa paghatag sang tion nila kada simana agud magtuon sang tanan nga ginhambal kag ginhimo ni Jesus halin sa balaan nga mga kasulatan.⁹ Gin-agda ko sila nga gamiton ang mga ginsulat parte kay JesuCristo sa Topical Guide bilang sentro sang ila pagtuon.¹⁰

Ginhatag ko ining panghangkat bangud ako naghimo na sini. Ginbasa ko kag ginlinyahan ang kada bersikulo nga naghambal parte kay JesuCristo, nga nalista sa naunang titulo kag sa 57 ka mga ikaduhang mga titulo sa Topical Guide.¹¹ Sang natapos ko inang makakulunyag nga buluhaton, ang asawa ko nagpamangkot sa akon kon ano ang nahimo sini sa akon. Siling ko sa iya, “Nagbag-o ako nga tawo!”

Nabatyagan ko ang pagdugang sang akon debosyon sa Iya samtang ako nagbasa liwat sa Libro ni Mormon parte sa kaugalingon nga pahayag sang Manluluwas parte sa Iya misyon sa mortalidad. Sia nagpahayag:

“Nagkari ako sa kalibutan agud magtuman sa pagbuot sang akon Amay, bangud ang Amay ang nagpadala sa akon.

“Kag ang akon Amay nagpadala sa akon agud nga matib-ong ako sa krus.”¹²

Bilang LDS, kita nagahambal sa Iya misyon bilang ang Pagpasag-uli ni JesuCristo, nga naghimo sa katumanan sang pagkabanhaw para sa tanan kag kabuhing walay katapusan nga posible sa yadtong maghinulsol sang ila mga sala kag magbaton kag magtuman sang kinahanglanon nga mga ordinansa kag mga kasugtanan.

Pangdoktrina nga di-lubos ang maghambal parte sa nagapasag-uli nga sakripisyo sang Ginuo paagi sa pinalip-ut nga mga pulong, subong sang “ang Pagpasag-uli,” ukon “ang nagapakasarang nga gahum sang Pagpasag-uli,” ukon “pagpadapat sang Pagpasag-uli,” ukon “ginapabakod paagi sa Pagpasag-uli.” Ining mga pulong may ara sing tunay nga risgo sa paghatag sang lain nga direksyon sa pagtuo paagi sa pagkabig sa hitabo nga daw ini may kaugalingon nga pagtuhaw kag mga ikasarang nga wala sang kaangtanan sa Langitnon nga Amay kag sa Iya Anak, si JesuCristo.

Sa idalum sang dakung plano sang Amay, ang Manluluwas ang nag-antus. Ang Manluluwas ang nag-utod sa mga higot sang kamatayon. Ang Manluluwas ang nagtubos sang aton mga sala kag mga kalapasan kag nagdula sa mga ini paagi sa kondisyon sang paghinulsol. Ang Manluluwas ang naghilway sa aton halin sa lawasnon kag espirituhanon nga kamatayon.

Wala sang di-mailaragway nga tinuga nga gintawag “ang Pagpasag-uli” nga sarang naton pangamuyoan para sa tabang, pag-ayo, kapatawaran, ukon gahum. Si JesuCristo amo ang kuluhaan. Ang sagradong mga termino subong sang Pagpasag-uli kag Pagkabanhaw nagalaragway sang ginhimo sang Manluluwas, suno sa plano sang Amay, agud nga kita may paglaum sa sining kabuhi kag mag-angkon sang kabuhing walay katapusan sa maabot nga kalibutan. Ang nagapasag-uli nga sakripisyo sang Manluluwas—amo ang sentro nga buhat sa tanan nga kasaysayan sang katawhan—pinakalabing maayo nga mahangpan kag mapasalamatan kon ginahambal kag maathag naton nga ginaangot ini sa Iya.

Ang importansya sang misyon sang Manluluwas ginpatalupangod sang Propetang si Joseph Smith, nga nagpahayag sang mabaskog nga “ang naunang mga prinsipyo sang aton relihiyon amo ang pagpamatuod sang mga Apostoles kag mga Propeta, nahanungod kay JesuCristo, nga Sia napatay, ginlubong, kag nabanhaw sa ikatatlo nga adlaw, kag nagkayab sa langit; kag ang iban pa nga mga butang nga ara sa aton relihiyon mga dugang lamang sa sini.”¹³

Ini gid ang pahayag sang Propeta nga naghatag sang insentibo sa 15 ka mga propeta, mananan-aw, kag manugbugna nga mag-isyu kag magpirma sa ila pagpamatuod agud saulogon ang ika-dos mil nga anibersaryo sang pagkabun-ag sang Ginuo. Inang makasaysayan nga pagpamatuod gintig-ulohan nga “Ang Nagakabuhi nga Cristo.”¹⁴ Madamo nga mga miyembro ang nagsaulo sa mga kamatuoran sini. Ang iban diutay lang nga nakabalo parte sini. Samtang kamo nagatinguha nga magtuon sing dugang parte kay JesuCristo, ginaduso ko kamo nga tun-an “Ang Nagakabuhi nga Cristo.”

Samtang nagahatag kita sang panahon sa pagtuon parte sa Manluluwas kag sa Iya nagapasag-uli nga sakripisyo, ginaganyat kita nga magpartisipar sa isa pa ka yabi nga elemento sa pag-angkon sang Iya gahum: nagapili kita nga magtuo kag magsunod sa Iya.

Ang matuod nga mga sumulunod ni JesuCristo luyag nga magsaksi, kag mangin tuhay sangsa katawhan sang kalibutan. Wala sila mahadlok, debotado, kag maisog. Nabal-an ko ang amo nga mga sumulunod sang bag-o lang ako nagbisita sa Mexico, kon diin nakilala ko ang mga opisyales sang gobyerno kag mga lider sang iban nga mga simbahan. Ang kada isa nagpasalamat sa akon bangud sang daku kag madinalag-on nga mga pagtinguha sang aton mga miyembro nga amligan kag ipabilin ang mabakod nga mga pag-asawahay kag mga pamilya sa ila pungsod.

Wala sang mahapos ukon kinaandan parte sa pagmangin amo ka gamhanan nga mga sumulunod. Ang aton pagtamod dapat nagasentro sa Manluluwas kag sa Iya ebanghelyo. Ini mabudlay sa kaisipan ang magtinguha nga maglantaw sa Iya sa kada panghunahuna.¹⁵ Apang kon buhaton naton, ang aton pagduhaduha kag mga kahadlok madula.¹⁶

Bag-o lang nakilala ko ang walay kahadlok nga batan-on nga Laurel. Sia gin-agda nga magpartisipar sa isa ka pang-estado nga paindis-indis para sa Iya high school sa amo man nga gab-i nga ang Stake Relief Society ginhiwat. Sang nabal-an niya ang problema kag nagpaathag sia sa mga opisyales sang paindis-indis nga kinahanglan niya ang maghalin sang temprano agud magtambong sang importanteng miting, ginhambalan sia nga kon himuon niya ini, siya indi makaupod sa paindis-indis.

Ano ang ginhimo sining LDS nga Laurel? Gintuman niya ang iya panaad nga magtambong sa miting sang Relief Society. Subong sa ginpromisa, sia wala gin-upod sa pang-estado nga paindis-indis. Sang sia ginpamangkot parte sa iya desisyon, simple sia nga nagsabat, “Ti, ang Simbahan mas importante, indi bala?”

Ang pagtuo kay JesuCristo nagahimo sa aton nga magbuhat sang mga butang nga sa kinaandan indi naton pagbuhaton. Ang pagtuo nga nagapahulag sa aton nagahatag sang dugang nga pagkuha sang Iya gahum.

Ginadugangan man naton ang gahum sang Manluluwas sa aton mga kabuhi kon kita nagahimo sang sagradong mga kasugtanan kag ginatuman yadtong mga kasugtanan sing husto. Ang aton mga kasugtanan nagatabid sa aton sa Iya kag nagahatag sang diosnon nga gahum. Bilang, himpit nga mga sumulunod, nagahinulsol kita kag nagasunod sa Iya paagi sa bunyag. Nagasunod kita sa banas sang kasugtanan agud makabaton sang iban pa nga kinahanglanon nga mga ordinansa.¹⁷ Kag nagapasalamat, ang plano sang Dios nagahatag sa yadtong mga bugay nga sarang mabaton sang mga katigulangan nga nagtaliwan nga wala sang oportunidad sa pag-angkon sang mga ini sa panahon sang ila mortal nga mga kabuhi.¹⁸

Ang mga lalaki kag mga babayi nga nagatuman sa kasugtanan nagapangita sang mga paagi agud ipabilin ang ila mga kaugalingon nga matinlo sa kalibutan agud nga wala sang nagapugong sa ila pagkuha sang gahum sang Manluluwas. Isa ka himpit nga asawa kag iloy ang bag-o lang nagsulat sini: “Ining mga tion magamo kag makatalagam. Daw ano kita ka bulahan nga makaangkon sang dugang nga ihibalo parte sa plano sang kaluwasan kag sa inspiradong paggiya sang mapilanggaon nga mga propeta, apostoles, kag mga lider nga nagabulig sa aton nga magpanakayon sang luwas sa sining mabagyohon nga mga dagat. Wala na kami nagapamati sa radyo kon aga. Sa luyo sini, karon nagapamati kami sa isa ka pamulong sa kabilogan nga konperensya sa amon mga mobile phone kada aga samtang nagahanda kami sang amon mga kaugalingon para sa adlaw nga ina.

Ang isa pa ka elemento sa pagkuha sang gahum sang Manluluwas pasulod sa aton mga kabuhi amo ang magdab-ut paibabaw sa Iya sa pagtuo. Ang amo nga pagdab-ut nagakinahanglan sang maukod, kag nagatumod nga pagtinguha.

Litrato

Ang Babayi nga nagtandog sa sidsid sang panapton sang Manluluwas

Madumdoman bala ninyo ang istorya sang babayi sa Biblia nga nag-antus sa dose anyos sang isa ka balatian nga nagapaluya?¹⁹ Sia nagpakita sang dakung pagtuo sa Manluluwas, nagsiling, “Kon matandog ko bisan ang panapton lamang niya, magaayo ako.”²⁰

Ining himpit, kag determinadong babayi kinahanglan nga magdab-ut sa lubos niya nga masarangan agud maangkon ang gahum sang Manluluwas. Ang iya pagdab-ut simbolo sang iya espirituhanon nga pagdab-ut.

Madamo sa aton ang nagapangayo sing tabang halin sa kaidadalman sang aton mga tagipusuon nga kasubong sa mga pulong sining babayi: “Kon ako espirituhanon nga magdab-ut sang bastante agud makakuha sang gahum sang Manluluwas pasulod sa akon kabuhi, mabal-an ko ang magsolbar sang akon tuman ka masakit nga sitwasyon. Mabal-an ko ang akon himuon. Kag ako may gahum sa paghimo sini.”

Kon kamo magdab-ut para sa gahum sang Ginuo sa inyo kabuhi nga may kasubong nga determinasyon sa tawo nga halos malumos kag luyag nga makaginhawa, ang gahum ni JesuCristo mangin inyo. Kon nabal-an sang Manluluwas nga kamo matuod nga nagadab-ut sa Iya—kon mabatyagan Niya nga ang pinakadakung handum sang inyo tagipusuon amo ang magkuha sang gahum Niya pasulod sa inyo kabuhi—pagatuytoyan kamo sang Balaan nga Espiritu nga mabal-an sang husto kon ano ang dapat ninyo buhaton.²¹

Kon kamo espirituhanon nga nagadab-ut sa kapin sangsa inyo nahimo pa sa nagligad, ang Iya gahum dayon magailig padulong sa inyo.²² Kag dayon mahangpan ninyo ang madalum nga kahulogan sang mga tinaga nga ginaamba naton sa himno “Ang Espiritu sang Dios”:

Ang ebanghelyo ni JesuCristo napuno sang Iya gahum, nga sarang maangkon sang tanan nga nagapangita sing hugot sa tagipusuon nga anak sang Dios. Ini pagpamatuod ko nga kon kita magkuha sang Iya gahum pasulod sa aton mga kabuhi, angay nga Sia kag kita ang magkinalipay.²⁴

Bilang isa sa Iya pinasahing mga saksi, ginapahayag ko nga ang Dios nagakabuhi! Si Jesus amo ang Cristo! Ang Simbahan Niya ginpanumbalik sa duta! Ang propeta sang Dios diri sa duta karon nga adlaw amo si Presidente Thomas S. Monson, nga ginasakdag ko sa bug-os ko nga tagipusuon. Nagasaksi gid ako, upod ang pagpalangga kag bugay para sa kada isa sa inyo, sa sagradong ngalan ni JesuCristo, amen.