2010–2019
Eis Kuh luhn Jisus Kraist nuh ke Moul Lasr uh
Eprel 2017


Eis Kuh luhn Jisus Kraist nuh ke Moul Lasr uh

Wosasuc luhn Jisus Kraist sesseslah ke kuh Lal, ma oasr nuh sin tuhlihk mukul ac muhtwacn oaru in suk nuhtin God.

Tamuhlwel ac tahmtahel sacohk wiyuck, kuht moul ke sie fihl in pacl na upac emet. Ma upac, tiac insese, akuhkuhin uh raunikuhtlac. Pacl fohs inge tuh palyeyuck Sin Mwet Lahngo. El sensenkackihn nuh sesr lah ke lwen lasr uh mwet lain sac fah pihrakwack insiyacn mwet uh in kasrkuhsrak ac kohlohlos in tuhllac.1Tuhsruhk Pahpah tuhmasr Inkuhsrao El ac tiacna lwelah tuh kuht in sifacna mukwikwi ke fohs luhn elyah lasr sifacna kuh elyah luhn mwet uh.

Tuh God El luhngse facluh ohinge El use Wen sefanna Nahtuhl2 in kahsrwe kuht.3 Ac Wen Nahtuhl, Jisus Kraist, El sang moul Lal kacsr. Kuht in muh kuh in eis kain kuh luhn God—kuh fal in mukwikwi ke ma toasr, upac, ac mwe sruhf sik in pacl lasr inge.4 Mihsenge nga ke sramsram ke ohiyac kuht kuh in eis nuh ke moul lasr kuh luhn Leum lasr ac Mwet Kol, Jisus Kraist.

Kuht muhtwacwacack ke lutlut Kacl.5 Tiacna kuh nuh sesr in moullac ke tiac etuh.6 Ke yohk etuh lasr ke luti ac misin luhn Mwet Lahngo7—kuht ac kahlwem yohk ke mwe luti Lal8 ac ma El oruh kacsr uh—ac yohk etuh lasr lah El kuh in sang kuh ma kuht enenuh ke moul lasr uh.

Ke muhtuhn yac se inge, nga siyuck sin mwet fuhsr mahtuhyak ke Alu uh in kihsaclah kihtin ip ke pacl lalos kais sie wik in lutlutkihn ma nuh kwewa Jisus El fahk ac oruh ma sihmlac ke ma suhmuhslah uh.9Nga solwaclos in lwelah ma sihmlac ke ma suhmuhslah kacn Jisus Kraist ke Topical Guide uh pa mwe lutlut yohk srihpac emet lalos.10

Nga sang mwe srihke sacn ke srihpen nga tuh sifacna oruh tari. Nga riti ac lainiyac fuhs nuh kwewa sihmlac kacn Jisus Kraist, ma tahkihnyucklac ye sifac luhlahp sacn ac ma sihmlac 57 ke Topical Guide an,11 Ke nga ahksahfyelah mukwikwi na pwacr sacn, muhtwacn kiyuck ah siyuck sihk lah meac ma ingacn oruh nuh sihk. Nga fahk nuh sel, “Nga sie mwet eklac!”

Nga puhla sie oaru ahksasucyeyuck nuh Sel ke nga sifil riti ke Puk luhn Mormon kahs luhn Mwet Lahngo sifacna ke misin Lal facluh ah. El fahkwack:

“Nga tuhkuh nuh facluh in oruh kena luhn Pahpah tuhmuhk, ke srihpen Pahpah tuhmuhk El suhpweyucme.

“Ac Pahpah tuhmuhk El suhpweyucme tuh Nga in kuh in srihpsrihpyak fin sahksin soko.”12

In Mwet Luhlahlfongi ke Lwen-sahflah uh, kuht fahkkihn misin Lal oacna Iwaclah luhn Jisus Kraist, ma oraclah sifil moulyak in sie ma pwacye nuh sin mwet nuh kwewa ac oruh moul ma pahtpaht in kuh nuh selos suc auliyak ke ma koluk lalos ac eis ac liyacacng akwuck ac olwelah enenweyuck uh.

Tiacna fal nuh ke mwe luti uh in sramsram ke kihsac in iwaclah luhn Leum ke ahkfototoye pohloh kahs, ma oacna “Iwaclah sac” kuh “kuh fokoko ke Iwaclah uh” kuh “kapsra Iwaclah uh” kuh “in ahkfokokoyeyuck ke Iwaclah.” Orekmakihn kain pohloh kahs inge kuh in kuhfaslah luhlahlfongi lasr uh ke oruh ma sikyak ingacn oacna sie ma oasr moul la ac oasr kuh la sifacna nuh sin Pahpah tuhmasr Inkuhsrao ac Wen Nahtuhl, Jisus Kraist.

Ye plwacn wolacna ac ma pahtpaht sac, Mwet Lahngo pa kweok kac ah. Mwet Lahngo pa suc tuhlahlah mwe kapihr luhn misac. Mwet Lahngo pa molwelah molin ma koluk ac tahfonglac lasr ac iyucklac muhkwena ke auliyak lasr. Mwet Lahngo pa eiskuhtlac liki misac ke mahno ac nguhn.

Wacngihn na pwacye atacn mwet se pahngpahng “Iwaclah sac” ma kuht kuh in pahngon nuh ke kahsruh, unwelah, nuhnak muhnahs, kuh kuh. Jisus Kraist pa mwe kahsruh sac. Ohiyac muhtahl ma oacna Iwaclah ac Sifil Moulyak ahkuhtweyac ma Mwet Lahngo El oruh, fal nuh ke plwacn luhn Pahpah, kuht in muh kuh in moulkihn finsrak ke moul se inge ac eis moul ma pahtpaht ke facl se tok uh. Kihsac ke iwaclah luhn Mwet Lahngo—mukwikwi infulwacn ma mahtuh nuh kwewa luhn mwet uh—etweyuck ac luhngkihnyuck emet ke kuht ahkkahlwemye ac kapsrweyac wo nuh Sel uh.

Yohk srihpaciyacn misin luhn Mwet Lahngo ahkyohkyeyuck sel Mwet Pahluh Joseph Smith, suc fahkwack arlac kahlwem lah ip yohk srihpac ke alu lasr uh pa fahkwack luhlahlfongi ke Mwet Sap ac Mwet Pahluh uh, ke Jisus Kraist, lah El misac, puckpucki, ac sifil otyak ke lwen ahktolu ah, ac sowack nuh inkuhsrao; ac ma nuh kwewa sahyac ma kuhpahsr nuh ke alu lasr uh pa ma weacng muhkwena kac uh.”13

Pohloh kahs suwohswohs luhn Mwet Pahluh inge ma sang moklweyuck nuh sin mwet pahluh, liyactwen, ac fahkwackelihk 15 in sang ac sainiyac fahkwack testimoni lalos in mahkiyac anniversary ahk 2,000 ke isuslac luhn Leum. Testimoni yohk srihpac se ingacn pahngpahng “Kraist Suc Leum.”14 Puhs mempucr esamyac ma pwacye kac uh. Kuhtuh etuhna kuhtuh ke oasr la uh. Ke kom suk in lotwelah yohk ke Jisus Kraist uh, nga kwacfe kom in lutlutkihn “Kraist Suc Moul.”

Ke kuht sang pacl in lutlut ke Mwet Lahngo ac kihsac in iwaclah Lal uh, kuht ac kena in wi ke ma sahyac ma fal in kuh in eis kuh Lal: kuht sulwaclah in luhlahlfongi Kacl ac Ukwacl.

Mwet tuhma lutlut pwacye luhn Jisus Kraist ac kena in akihlenyuck, kuh in sramsram, ac siena liki mwet facluh uh. Elos ac tiac sahngweng, oaru, ac puhlaik. Nga lotwelah ke kain ip yohk inge ke puhlan sie ma kunac fin acn Mexico, ma nga ohsun nuh sin mwet luhn government ac oacyacpac mwet kol ke alu sahyac uh. Kais sie selos kulohkihn puhlaikiyacn mempucr lasr uh ac kuhiyen oraclah wowo in karihngihn ac sruokyacna pahyuck ac sucu uh fokoko ke muhtuhnfacl lalos uh.

Wacngihn ma fihsrwacsr kuh ana sikyak ke in eklac kain mwet tuhma lutlut fokoko. Lohacng lasr enenuh in som yohk ke Mwet Lahngo ac wosasuc Lal. Enenuh kuhiyac fokoko in kwacfweacng in ngwet nuh Sel ke nuhnak nuh kwewa.15 Ke kuht oruh uh, tahfuhluo ac sahngweng lasr uh ac wacngihnlac.16

Nga tuhfahna etwacack ke sie Laurel fuhsr tiac sahngweng. El suliyuck in wi ke sie competition ke state nuh kwewa ke high school lal ah ke ekuh sepacna el olwelah in wi ke sie miting luhn stek Rilif Sosaiti. Ke el akihlen akihsrucngi sacn ac ahkuhtweyac nuh sin mwet oruh competition an lah el enenuh in sa som liki in wi sie miting na yohk srihpac, fwackyuck nuh sel lah el fah itucklac fin el som.

Na mac Laurel ke lwen sahflah se inge oruh uh? El liyacacng olwelah lal in wi miting luhn Rilif Sosaiti an. Ke olwelah ah, el itucklac liki competition luhn state nuh kwewa sacn. Ke siyuckyuck sel sulwaclah lal an, el fihsrwacsr in topuk, “Ac, Alu uh yohk srihpac liki, yac tiac?”

Luhlahlfongi ke Jisus Kraist uh mokle kuht in oruh ma kuht ac tiac oruh uh. Luhlahlfongi ma mokle kuht in mukwikwi uh use nuh sesr yohk in eis kuh Lal.

Kuht oacyacpac ahkyohkye kuh luhn Mwet Lahngo ke moul lasr uh ke kuht oraclah olwelah muhtahl uh ac liyacacng olwelah ingacn ke suwohs. Olwelah lasr uh orekuhtweni nuh Sel ac use nuh sesr kuh luhn God. In mwet tuhma lutlut fokoko, kuht auliyak ac Ukwacl nuh ke kof in pacptais uh. Kuht fahsr ke inkacnek in olwelah uh in eis akwuck yohk srihpac sahyac uh.17 Ac ke srui, plwacn luhn God sang mwe insewowo ingacn in tuhtahflah nuh sin mwet somlah suc misac ma wacngihn pacl wo la in eis ke moul in mahno lalos ah.18

Mukul ac muhtwacn liyacacng olwelah uh suk inkacnek in liyaclosyang sifacna in tiac fohkfohklah liki facluh tuh in wacngihn ma kosrwacloslac nuh ke kuh luhn Mwet Lahngo. Sie muhtwacn kiyac ac ninac luhlahlfongi tuhfahna suhmuhslah ma inge: “Pacl inge pa pacl koluk ac ongaiyac. Kuht ahkinsewowoyeyuck in ahkyohkye etwacack ke plwacn in molwelah sac ac eis kolyuck sin mwet pahluh, mwet sap, ac mwet kol uh in kahsrwe kuht kuhtanglah ohiyac sensen inge. Kuht tulokihnyac pahlah lasr ke urohklah retio ke lututacng uh. Sahyacna, kuht ingena lohng sramsram ke toeni luhlahp uh ke phone nahtuhsr uh lututacng nuh kwewa ke kuht ahkoekuhtlac sifacna nuh ke siepac lwen.”

Siepac ohiyac in eis kuh luhn Mwet Lahngo nuh ke moul lasr uh pa in siyuck kahsruh Sel ke luhlahlfongi. Kain kahsruh se ingacn enenuh kuh ke oaru, ac lohacng.

Petsac
Muhtwacn sac kahlyac puhluhn nuknuk luhn Mwet Lahngo

Yac kom esam sramsram soko ke Pwacpuhl uh ke sie muhtwacn suc kweok ke yac 12 ke sie elyah muhnahs?19 El ahkyohkye luhlahlfongi fokoko ke Mwet Lahngo, ahkkahlwemye, “Nga fin kahlye na nuknuk lal uh, nga ac kwela.”20

Muhtwacn yohk luhlahlfongi, ac lohacng se inge enenuh in ahsrwelah ke kuhiyacl elan kuh in eis kuh Lal. Ahsrwelah ke mahno lal uh pa akucl ke ahsrwelah ke ma luhn nguhn lal uh.

Puhs sesr tuhng ke nuhnak loal luhn insiyacsr sie ma siena ke kahs luhn muhtwacn se inge: “Fin nga kuh in ahsrwelah fal ke ma luhn nguhn in eis kuh luhn Mwet Lahngo nuh ke moul luhk, nga fah etuh ohiyac in lain ohiyac upac luhk uh. Nga fah etuh ma in oruh. Ac nga fah eis kuh in oruh.”

Ke kom saplakyak nuh ke kuh luhn Leum ke moul lom ke luhpah sepacna ma sie mwet walomlah oruh ke momong ac suk mohngoh, kuh luhn Jisus Kraist fah ma lom. Ke Mwet Lahngo El etuh lah kom ke saplakyang na pwacye nuh Sel uh—ke El kuh in puhla kena yohk emet luhn insiyom pa in eis kuh Lal nuh ke moul lom—kom fah kolyuck sin Nguhn Muhtahl in etuh na pwacye ma kom enenuh in oruh uh.21

Ke kom ahsrwelah kuhtwena ma ahluhkwelah ma kom oruh met ah, na kuh Lal fah nwekkomlac.22 Ac na kom fah kahlwem ke loaliyacn kalmeyacn kahs kuht onkihn ke puk in on an “The Spirit of God”:

Leum El ahkyohkye etuh luhn Mwet Luhlahlfongi. …

Etwacack ac kuh luhn God yohkwelihk;

Lihsrlihsr se fin facluh ah muhtwacwacack in fokwelihk.23

Wosasuc luhn Jisus Kraist sesseslah ke kuh Lal, ma oasr nuh sin tuhlihk mukul ac muhtwacn oaru in suk tuhlihk muhtwacn nuhtin God. Pa inge mwe fahkwack luhk lah ke kuht eis kuh Lal nuh ke moul lasr uh, kwewana El ac kuht fah engan.24

In sie mwet lohoh yohk srihpac Lal, nga fahkwack lah God El moul! Jisus pa Kraist! Alu Lal fohlohkihnyuckyak nuh facluh! Mwet pahluh luhn God fin facluh mihsenge pa Prestuhn Thomas S. Monson, suc nga ahkkweye ke insiyuck nohfohn. Nga fahkwack ma inge, ke ahkkahlwemye luhn luhngse ac mwe insewowo nuh suwos kais sie, ke ine muhtahl luhn Jisus Kraist, amen.

Mwe kahsruh

  1. Liye 2 Nephi 28:19–30.

  2. Liye John 3:16.

  3. Jisus pa Mwet Akmuhsralah sac—akmuhsralah sin Pahpah Lucng in mwet ahol Lal sifacna ke ma nuh kwewa orek ke molwelah luhn mwet uh. Jisus El akmuhsralah in Mwet Lahngo ac Molwelah lasr. Met liki facluh oreklac ah, Jisus El akmuhsralah in liye ahkwoyac lah tuhlihk nuhtin God uh fah eis moul kawihl ac oruh in kuh nuh selos in eis moul ma pahtpaht (liye John 17:24; Sie Peter 1:20). Pwacyena, Jisus El orekmakihn sifac: elMessiah (Hebrew) ac elKraist (Greek)—suc kalmac pa “akmuhsralah.” (Liye Bible Dictionary, “Anointed One.”)

  4. Kuht kuh in karihngihn kuht sifacna ke etuh ac moulkihn kahs luhn God (liye Ephesus 6:17–18; Doctrine and Covenants 27:18).

  5. Ye kolyuck luhn Pahpah Tuhmwacl, Jisus pa Mwet Oraclah facluh uh (liye John 1:2–3) ac facluh koflah wekyucklac sahyac uh (liye Moses 1:33). Met likina isuslac in mahno Lal ah, Jisus pa Jehovah kuhlwacna—God ke Wuhlweacng Mahtuh. Pa Jehovah se ma sramsram nuh sel Moses ke Finohl Sinai. Pa Jehovah se suc oraclah sie olwelah yohrohl Abraham lah muhtuhnfacl nuh kwewa fin facluh fah ahkinsewowoyeyuck ke sruf lal Abraham. Ac Jehovah pa oraclah olwelah yurin sucu luhn mwet Israel. Jisus pa Immanuel uliyuckme sac, ma palyeyuck sel Isaiah ah (liye Isaiah 7:14).

  6. Liye Doctrine and Covenants 131:6.

  7. Liye Doctrine and Covenants 76:40–41.

  8. Liye 2 Nephi 31:2–21.

  9. Pwacpuhl Muhtahl, Puk luhn Mormon, Doctrine and Covenants, ac Pearl of Great Price.

  10. Liye Topical Guide, “Jesus Christ.” In weacng sihm ye sifac luhlahp sacn, oasr kahs 57 Kacl. Ke ip ma tiac kahs English ke ma suhmuhslah an, orekmakihn Guide nuh ke Ma Suhmuhslah an.

  11. Puhs liki ma tahklac 2,200 sihmlac ke sra puk 18 ke Topical Guide an.

  12. 3 Nephi 27:13–14.

  13. Teachings of Presidents of the Church: Joseph Smith (2007), 49.

  14. Liye “The Living Christ: The Testimony of the Apostles,” Liahona, Eprel 2000, 2–3.

  15. Liye Helaman 8:15.

  16. Liye Doctrine and Covenants 6:36.

  17. Jisus Kraist El luti kuht yohk srihpaciyacn akwuck muhtahl uh, ma oacna pacptais (liye John 3:5), kuhfa luhn Leum (liye Doctrine and Covenants 59:9), ac mwe sang sacohk ac akwuck ke sil in tempuhl (liye Doctrine and Covenants 124:39–42).

  18. Liye Doctrine and Covenants 124:29–32.

  19. Liye Luke 8:43–44.

  20. Mark 5:28.

  21. Liye Doctrine and Covenants 88:63.

  22. Ke muhtwacn yohk luhlahlfongi la sac kahlyac nuknuk luhn Mwet Lahngo ah, El sana topuk, “Nga pula muh oasr ku luk [ke kahs Greek dunamis, kalmeyac “kuh”] som likiyu” (Luke 8:46; ahkuhtweyac wo weacng).

  23. “The Spirit of God,” Hymns, no. 2.

  24. Liye 3 Nephi 17:20.