Bōktok Kajoor eo an Jisōs Kraist ilo Mour ko Ad

Ro jeiū im jatū, jej mour ilo juon epepen elukkuun pen. Apan̄ ko, aitwerōk ko, im pok ko rej waļo̧k ipeļaakid. Iien poktak kein Rilo̧mo̧o̧r eo ekar loi m̧okta. Ekar kakkōl kōj bwe ilo raan ko ad rikapo eo enaaj aujeke illu ibūruwōn armej im kōjebwābweik er.¹ N̄an kiiō, Jemedwōj Ilan̄ ekar jab kōtmāne bwe jenaaj kar jelm̧ae tarpok in inepata kein im inepata ko ilo jukjukin pād ko ad make.

Bwe kōn an Anij iakwe laļ Ekar jilkintok Juon Wōt Nejin Emake Wōt² n̄an jipan̄ kōj.³ Im Nejin, Jisōs Kraist, ekar leļo̧k mour eo An kōn kōj. Bwe aolep ren maron̄ bōk kajoor an anij—kajoor eo ebwe n̄an aer jelm̧ae eddodo ko, menin bōbrae ko, im kapo ko an rainin.⁴ Rainin, ikōņaan kōnono kōn ewi wāween ad maron̄ bōktok n̄an mour ko ad kajoor eo an ad Irooj im Maajta, Jisōs Kraist.

Jej jino menin ilo ad ekkatak kōn E⁵ “[Kōj] jej jab maron̄ bōk lo̧mo̧o̧r ilo ad jab jeļā kōn men ko an Anij.”⁶ An ļapļo̧k ad jeļā kōn kwaļo̧k im mijen eo an Rilo̧mo̧o̧r⁷—ej ļapļo̧k ad meļeļe kōn katak ko An⁸ im ta eo Ekar kōm̧m̧ane n̄an kōj—an ļapļo̧k ad jeļā menin Emaron̄ letok kajoor in jej aikuji n̄an mour ko ad.

Ilo kar jinoin iiō in, ikar kajjitōk ippān rūm̧m̧an ded ro ilo Kabun̄ in n̄an kōjenolo̧k juon iien jān iien ko aer kajjojo wiik n̄an katak men otemjej Jisōs ekar ba im ekar kōm̧m̧ani āinwōt aer kar jeje ilo jeje ko Rekwojarjar an Kabun̄ in.⁹ Ikar kajjitōk ippāer bwe ren kōm̧m̧an bwe meļeļe ko ilo eoon ko kōn Jisōs Kraist ilo Topical Guide eo ren erom laajrak in kein katak ko aer kōn gospel eo.¹⁰

Ikar leļo̧k idajon̄jon̄ in kōnke n̄a make ikar errā kake. Ij riiti im kōkkaļļeiki aolep eoon ko rej kwaļo̧k kōn Jisōs Kraist, āinwōt an ellaajrak ium̧win heading eo 57 subtitile ko ilo Topical Guide.¹¹ Ke ikar kam̧ōj ekkatak in ekalimomo, kōrā eo pāleeō ekar kajjitōk ippa kōn ta oktak eo ij en̄jake. Ikar jiron̄ ļo̧k e, “N̄aij juon armej eoktak!”

Ij en̄jake juon wujlepļo̧k ekāāl n̄an E ilo aō bar riit ilo Bok in Mormon eo naan ko make an Rilo̧mo̧o̧r eo kōn mijen eo An ilo mour in. Eaar kean̄:

“Bwe Iaar itok n̄an laļ in n̄an kōm̧m̧an ankilaan Jema, kōnke Jema eaar jilkintok Eō.

“Im Jema eaar jilkintok Eō bwe In maron̄ toto ioon debwāāl.”¹²

Āinwōt Armej ro Rekwojarjar ilo Raan-ko Āliktata, jej kōnono kōn mijen eo An āinwōt Pinmuur eo an Jisōs Kraist, eo ekar kōm̧m̧an bwe jerkakpeje eo ej juon men em̧ool n̄an aolep im kōmaron̄ mour indeeo n̄an ro otemjej rej ukweļo̧k jān jerawiwi ko aer im bōk im kōjparok kain̄i ko raorōk im bujen ko.

Ej juon katak ejipikpik n̄e jej kōnono kake pinmuur eo an Irooj ilo tukaduin in naan in “Pinmuur eo” ak “kajoor eo ej kōmaron̄ Pinmuur eo” ak “mour kōn Pinmuur eo” ak “bōk kajoor jān Pinmuur eo.” Kōjerbal naan kein ejjab em̧m̧an n̄e ej bōd ad kōjerbal tōmak ko ad ilo ad watōke bwe kajoor im maron̄ in pinmuur eo ekar pedped wot ioon Jemedwōj Ilan̄ im Nejin, Jisōs Kraist.

Ium̧win karōk indeeo eļap an Jemed, Rilo̧mo̧o̧r ekar en̄taan. Rilo̧mo̧o̧r ekar rupi to ko an mej. Rilo̧mo̧o̧r eo ekar kōļļaik wōņāān eo an jerawiwi ko im bōd ko ad im julo̧ki pedped wōt ioon ad errā n̄an ukweļo̧k. Rilo̧mo̧o̧r eo ej bōkļo̧k kōj jān mej an kanniōk im jetōb.

Ejjeļo̧k jon̄ak n̄an armej ņae etan “Pinmuur eo” eo me jemaron̄ kūr n̄ane kōn jipan̄, kōmour, jeorļo̧k bōd, ak kajoor. Jisōs Kraist ej rijipan̄ eo. Naan kein rekwojarjar āinwōt Pinmuur eo im Jerkakpeje eo rej kōmeļeļeik ta eo Rilo̧mo̧o̧r eo ekar kōm̧m̧ane, ekkar n̄an karōk eo Jemed, bwe jen maron̄ mour kōn kōjatdikdik ilo mour in im bōk mour indeeo ilo laļ eo ej itok. Katok in pinmuur eo an Rilo̧mo̧o̧r—m̧akūtkūt eo eaorōktata ilo aolep bwebwenato in armej—eļap ad meļeļe kake im kam̧m̧oolol e n̄e jej kwaļo̧k im kallikar ad ekkejelļo̧k Ippān.

Āinwōt an kar Rikanaan Josep Smith kar kōmejajaik aorōk in mijen eo an Rilo̧mo̧o̧r eo, eo ekar kwaļo̧k bwe “katak ko dilepen kabun̄ in ad rej kam̧ool ko an Rijilōk ro im Rikanaan ro, kōn Jisōs Kraist, bwe E eaar mij, kar kalbwine, im bar jerkak raan eo kein kajilu, im walōn̄ļo̧k n̄an lan̄; im aolep men ko jet ko toļļo̧kin kabun̄ in ad rej koba tok ippāan naan in kam̧ool ko an Rijilōk ro im Rikanaan ro.”¹³

Kar ennaan in an Rikanaan eo ekar kōketak rikanaan ro, rilolo ro, im rikwaļo̧k revelesōn ro bwe ren kadiwōjļo̧k im jaini naan in kam̧ool ko aer n̄an kakemeemej 2,000 iiō ļo̧tak eo an Irooj. Naan in kam̧ool in kar likūt etan ej “Kraist Eo Emour.”¹⁴ Elōn̄ membōr ro rekar kakkilōklōk m̧ool ko ie. Ro jet rej kab jeļā bwe ewōr ad. Ilo am̧ pukot n̄an ekkatak eļapļo̧k kōn Jisōs Kraist, ij rōjan̄ kom n̄an katak kōn “Kraist eo Emour.”

Ilo ad kōm̧m̧an ad iien ekkatak kōn Rilo̧mo̧o̧r im katok in pinmuur eo An, jej kepaakļo̧k kōj n̄an bōk kuņaad ilo bar juon men emenin aikuj n̄an bōk kajoor eo An: jej kālet n̄an tōmak E im ļoor E.

Rikaļoor ro rem̧ool an Jisōs Kraist rej m̧ōņōņō in jenolo̧k jān ro jet, kōnono, im oktak jān armej ro an laļ in. Rej jab mijak, rewujlepļo̧k, im peran. Ikar ekkatak kōn rikaļoor rein ilo juon aō ijjitōn̄ ilo Mexico, ijin ikar kweilo̧k ippān ritōl ro ilo kien barāinwōt ritōl ro an kabun̄ ko jet. Er kajjojo rekar kam̧m̧oolol eō kōn kijejeto ko reperan im em̧m̧an an membōr ro ad n̄an kōjparok im dāpij m̧are ko rekajoor im baam̧le ko ilo laļ eo aer.

Ejjeļo̧k juon men epidodo ak enej make kōm̧m̧an n̄an erom kain rikaļoor rōt in ekajoor. Ad ejekiiik rej aikuj dim ilo Rilo̧mo̧o̧r im gospel eo An. Menin ej aikuj kijejeto ko ad kōļmenļo̧kjeņ n̄an reilo̧k n̄an E ilo aolep ļōmņak.¹⁵ Ak n̄e jej kōm̧m̧ane menin, pere ko ad im mijak ko ad rej jako.¹⁶

Ij kab jeļā kōn juon jiron̄ eperan ej Laurel. Kar kajjitōk ippān bwen bōk koņaan ilo juon iien jiāe ilo aolepān amedka n̄an high school eo an ilo ejja joteen eo ekar kallim̧ur bwen bōk koņaan ilo juon kweilo̧k an Doulul eo an Kōrā ro. Ke ekar kile an idaabtōk im kar kōmeļeļeik rijerbal ro an iien jiāe eo bwe enej aikuj in mōkaj an em̧m̧akūt jān jiāe eo bwen maron̄ pād ilo juon kweilo̧k eaorōk, rekar ba n̄an e bwe enej tūm̧ eļan̄n̄e enej etal.

Ta eo Laurel in ekwojarjar ekar kōm̧m̧ane? Ekar kōjparok kallim̧ur eo an n̄an bōk koņaan ilo juon kweilo̧k an Doulul eo an Doulul eo an Kōrā ro. Āinwōt kar kallim̧uri, ekar tum̧ jān iien jiāe eo an aolep laļ en. Ke rekar kajjitōk kōn kālet eo an, ekar uwaak, “Em̧m̧an, Kabun̄ in eļapļo̧k an aorōk, ejimwe ke?”

Tōmak ilo Jisōs Kraist ej kōmakūt kōj m̧aanļo̧k n̄an kōm̧m̧ani men ko jeban kar kōm̧m̧ani. Tōmak ej kōperanļo̧k kōj n̄an jerbal eo epidodo ad bōk An kajoor.

Jej barāinwōt kōļapļo̧k kajoor eo an Rilo̧mo̧o̧r ilo mour ko ad n̄e jej kōm̧m̧ani bujen ko rekwojarjar im kōjparok bujen ko ilo jejjet. Bujen ko ad rej liape kōj Ippān im letok n̄an kōj kajoor an Anij. Āinwōt rijilōk ro retiljek, jej ukwelo̧k im ļoor E ilo ad tuļo̧k ilo dān in peptaij. Jej etetal ilo iaļen bujen eo n̄an bōk kain̄i ko jet rekwojarjar.¹⁷ Im kam̧m̧oolol, karōk eo an Anij eo ej letok kōjeraam̧m̧an kein bwe jen lim̧aanļo̧k n̄an ro jibūd im jim̧aad ro rekar mej ilo an ejjeļo̧k aer iien n̄an būki ilo mour ko aer.¹⁸

Em̧m̧aan im kōrā ro rej kōjparok bujen ko rej pukot wāween ko n̄an kōjparok er jān libijinjin ko an laļ in bwen ejjeļo̧k men ej kabōjrak aer deļo̧n̄e kajoor eo an Rilo̧mo̧o̧r eo. Juon kōrā etiljek im m̧am̧a ekar jeje: “Tōre kein renana im rekauwōtata. Ewi jon̄an ad jeraam̧m̧an bwe ewōr ad iien n̄an kōļapļo̧k jeļāļo̧kjeņ kōn karōk in lo̧mo̧o̧r eo im tōl ko rem̧m̧an jān rikanaan ro remour, rijilōk ro, im ritōl ro n̄an jipan̄ kōj jerakrōk ilo lom̧aļo kein renana ilo ad pād ilo kōjparok. Jej kabōjrak imminene eo ad jān kōjo̧ retio eo ilo jibbon̄. Ijjelo̧kin, jej ron̄jake juon kōnono jān kweilo̧k eo eļap ilo taļboon ko nejid aolep jibbon̄ ilo ad kōpooj kōj make n̄an bar juon raan.

Bar juon wāween ilo ad bōktok kajoor eo an Rilo̧mo̧o̧r ilo mour ko ad ej n̄an kōtak kōj lōn̄ļo̧k n̄an E ilo tōmak. Kain kotak kōj lōn̄ļo̧k in eaikuji tiljek, kijejeto e dim.

Pija

Kōrā eo ekar un̄ūr nuknuk eo an Rilo̧mo̧o̧r eo.

Kom̧ij ke keememej bwebwenato eo ilo baibōļ kōn kōrā eo ekar en̄taan ium̧win 12 iiō ko kōn juon nan̄inmej ej kamōjņo̧iki?¹⁹ Liin ekar kōjerbal tōmak eo an eļap ilo Rilo̧mo̧o̧r, ej kōmeļeļeiki, “Eļan̄n̄e I naaj un̄n̄ūr wōt jidik nuknuk ko an, I naaj mour.”²⁰

Kōrā in etiljek, e dim ekar aikuj in maļ m̧aanļo̧k jon̄an wōt an maron̄ n̄an tōpar kajoor eo An. An maron̄ malm̧aanļo̧k ekar kōkkaļļein an kijejeto ilo jetōb.

Elōn̄ iaad rekar lamōj jān m̧wilaļ in būruwōd juon naan em̧m̧an peļļo̧kin jān naan ko an kōrā in: “Eļan̄n̄e emaron̄ bwe aō malm̧aanļo̧k ilo jetōb n̄an jibwetok kajoor eo an Rilo̧mo̧o̧r eo ilo mour eo aō, inaaj jeļā ewi wāween aō jelm̧ae jekjek ko renana me ij iooni. Inaaj jeļa ta eo n̄an kōm̧m̧ane. Im enaaj wōr kajoor ippa n̄an kōm̧m̧ane.”

N̄e kwōj kotak lōn̄ļo̧k eok n̄an kajoor eo an Irooj ilo mour eo am̧ kōn ejja kain maron̄ in me juon armej emaļon̄ ej kappok kōto n̄an bōk kitwōn, kajoor jān Jisōs Kraist enaaj am̧. Ke Rilo̧mo̧o̧r eo ejeļā ke kwōj m̧ool kwokōņaan tōpar E—n̄e Emaron̄ en̄jake bwe ej ikdeelel eo ņe eļap an būruwōm̧ ej bōktok kajoor eo An n̄an mour eo am̧—kwonaaj bōk tōl jān Jetōb Kwojarjar eo n̄an jeļā lukkuun ta eo kwōj aikuj in kōm̧m̧ane.²¹

N̄e komaron̄ malm̧aanļo̧k eļapļo̧k jān jabdewōt men kwaar maron̄ kōm̧m̧ane m̧okta, innām kajoor eo An enaaj ibeb waj n̄an kwe.²² Innām kwonaaj meļeļe m̧wilaļ in naan ko jej al kaki ilo al in “Jitob An Anij Ej Einwōt Kijeek”:

Gospel eo an Jisōs Kraist ej obrak kōn kajoor eo An, eo ej pojak n̄an aolep ajri ro nejin Anij ro rej pukot e ilo m̧ool. En̄in naan in kam̧ool eo aō bwe n̄e jenej bōktok kajoor eo An n̄an mour ko ad, jim̧or E im kōj jenaaj m̧ōņōņō.²⁴

Āinwōt juon iaan rikam̧ool ro An rejenolo̧k, ij kwaļo̧k bwe Anij ej mour! Jisōs ej RiKraist eo! Kabun̄ eo An em̧ōj an jepļaaktok n̄an laļ in! Rikanaan eo an Anij ioon laļ in rainin ej Būreejtōn Thomas S. Monson, eo ij rejtake kōn aolepān būruwō. Ij kam̧ool, kōn naan in iakwe im kōjeraam̧m̧an n̄an kom̧ kajjojo, ilo et eo ekwojarjar etan Jisōs Kraist, amen.