2010–2019
Wadohng nan Atail Mour kan Manaman en Sises Krais
Epreil 2017


Wadohng nan Atail Mour kan Manaman en Sises Krais

Rongamwahu en SisesKrais direkihla Sapwellime manaman, me kin wie langalang ong koaros seri en Koht me kin rapahki ni mehlel.

Kempoakepei ko kitail wie momour nan mwehi ehu me keieu apwal. Kasongsong kan, uhpene kan, oh liseliping kan kapel kitail pene. Ansou apwal pwukat kokohpdahr sang Sounkomouro. E ketin kaparkin kitailehr me nan rahn pwukat sehdan pahn kamwakidada mohngiong en aramas en lingeringer oh kahluwa irail lahng mehla.1 Ahpw Samatail Nanleng sohte ketin kupwuriki kitail en pein apwalih atail kahpwal kan oh kahpwal teikan.

Koht ketin poakehng kitail kahrehda E ketikihda Sapwellime Ieros2 pwehn sewese kitail.3 Oh Sapwellime Ieros, Sises Krais, ketikidahr Sapwellime ieias pwehki kitail. Mepwukat wiawi pwe kitail an kak doadoahngki manaman sarawi—me itarehng apwalih katoutou kan, meninkau kan, oh kasongsong kan en rahn pwukat.4 Rahn wet I pahn koasoia mwoamwen atail kak wadohng nan atail mour kan manaman en atail Kaun oh Wasalapalahpie, Sises Krais.

Kitail tepda ni atail sukuhlki duwen Ih.5 “E apwalehng [kitail] en komourla ni atail sehse Koht.”6 Uwen laud en atail ese duwen en Sounkomouro rongamwahu oh misin7—iei uwen laud en atail wehwehki Sapwellime padahk8 oh dahme E ketin wiahiengehr kitail—iei uwen laud en atail ese me E kak ketikihda manaman me kitail anahne ong atail mour kan.

Mwowe ekis nan pahr wet, I peki rehn me pwulepwul iei ysa kan en Mwomwohdisou en katohrehla ekis kisehn arail ansou nan wihk koaros pwehn sukuhlki mehkoaros me Sises ketin mahsani oh wiahier me ntingdier nan pwuhk sarawi kan.9 I luke irail en ale oralap kan me pid Sises Krais nan Topical Guide en wia audepen arail kasukuhlo.10

I patohwenda luhk wet pwe pein Ngehi wiahier oh pwungkihla. I wadekehr oh kilellehdier iretikitik koaros me pid Sises Krais, me pato pahn oralap [limeisek isuh] 57 nan Topical Guide.11 Ni ei kanekehla doadoahk kepereno, ahi pwoudo idek ma mie lipwen doadoahko ong ie, I ndahieng me, “I wekilahr!”

I kehn me ahi pwongi ni ei kin pwurehng wadek nan Pwuken Mormon duwen me Sounkomouro mahsanihki Sapwellime ketdo nan mour wet. E ketin mahsani:

I kodohng sampah pwe I en kapwaiahda kupwuen Semeio, pwehki Semeio me ketin poaroaneiehdohr.

Oh Semeio ketin poaroaneiehdohr pwe I en langadahng nin lohpwuo.”12

Kitail souleng en Imwin Rahn-akan, kin kose me Sapwellime ketdou iei Tomw en Sises Krais, me kahrehda iasadaho wia mehkoat mehlel ong koaros oh kahrehda mour soutuk eh kak mie ong irail me koluhkihla diparail kan oh ale oh kolokol tiahk sarawi oh inou kesempwal kan.

Padahko sohte unsek me kitail kin kamwoatehla atail koasoia sapwellimen Kauno tohnmetei en tomwo ni soangen mwoahmw pwukat “Tomwo” de “manaman en Tomwo” de “doadoahngki Tomwo” de “kehlailkihda Tomwo.” Lepin pwuloi pwukat kin kasalehda ehu irair keper en kawehwe sapwungi pwoson ni atail kin wiahki memwekidwetpein momourki oh tungoaleniki manaman likin Sahm Nanleng oh Sapwellime Ieros, Sises Krais.

Nin duwen en Sahmo pilahn soutuko, iei Sounkomouoro me ale kalokolok. Iei Sounkomouro me powehdi mehla. Iei Sounkomouro me ketin pwaindahr dipatail kan oh atail sapwung kan oh kasohrala mepwukat ma kitail koluhla. Iei Sounkomouro me komourala paliwaratail oh palingenatail.

Sohte mehkoat sohte mwomwe ehu me adaneki “Tomw” me kitail kak eker pwehn patohwenda sawas, kakehlail, mahk, de manaman. Pwe Sises Krais te. Lepin mahsan sarawi kan me duwehte Tomw oh Iasada kin kawehwe dahme Sounkomouro ketin wiadahr, nin duwen pilahn en Sahmo, pwe kitail en kak momourki koapworopwor nan mour wet oh ale mour soutuk nan mour kohkohdo. En Sounkomouro tohmetei en tomwo—me wia mwekid keieu laud nan poadopod en aramas—kin keieu wehwe mwahu oh sansal ni atail kin kawehwe oh ni mehlel kadokehiong Ih.

Uwen kesempwal en sapwellimen Sounkomouro doadoahk wiawihsang rehn Soukohp Joseph Smith ni eh kawehwe me pahson en padahk en atail mwomwohdisou iei kadehde kan en Wahnparon kan oh Soukohp kan me pid Sises Krais, me E ketin pwoula, seridi, oh iasada ni kesiluhn rahno, oh poukdahla nanleng; oh mehkoaros me pid atail mwomwohdisou wiahte kisehn padahko.”13

Iei ih sakarada wet te en Soukohpo me kamwakidada soukohp, ohl sarawi, oh sounkihda kaudial [ehk limmen] 15 en ketikihda oh saine sapwellimarail kadehde pwehn kauwawih ketemen en pahr [riekid] 2,000 en Kauno ah ipwidi. Kadehde kesempwalo adaneki “Krais Ieias.”14 Towe tohtoh kei me wadlikialahr kadehde wet. Ekei towehkan esehte me kadehdeo wiawi. Ni amwail kin rapahki oh kasukuhlki duwen Sises Krais, I kangoagnge kin kumwail en esehla “Krais Ieias.”

Ni atail kin katohrehla ansou pwehn kasukuhlki duwen Sounkomouro oh Sapwellime tohnmeteio, kitail pil kin iang wia pil ehu kih en alehdi Sapwellime manaman: ni atail kin pilada en pwoson Ih oh idawehn Ih.

Tohnpadahk mehlel kan en Sises Krais kin men sansal, eimah ni koasoi oh weksang aramas akan en sampa. Irail sohte kin masak, re kin poadidi oh eimah. I kilang duwen karsepen tohnpadahk pwukat ni ei patohla Mexico, oh tuhong lapalap akan en kopwerment oh pil lapalap akan en pali en lamalam akan. Irail koaros wia arail kaping kalahngan ong ie pwehki en tohn mwomwodiso kan arail eimah oh pweidahn arail doadoahk ni arail kin padahngki duwen kesempwal en pwopwoud oh peneinei nan arail wehio.

E sohte mwadang oh mengei wiahla soangen tohnpadahk kehlail duwehte met. Atail madmadau anahne uhlahngete Sounkomouro oh Sapwellime rongamwahuo. Kitail anahne ahneki madmadau teng pwe kitail en kak kilekilanglahng Ih nan atail madamdaukoaros.15 Oh ni atail kin wia met, atail peikasal oh per kan kin sohrala.16

Me keren ei eseda duwen serpein pwulepwul eimah men me kin iang Laurel. Serepeino luklahng en iang siaiki ah sukuhlo nan siai lap ehu nan ah wehio nisoutik ohte me e inoukidahr me e pahn iahng towehdi mihting en Pwihn en Sawas en Lih akan . Ni eh diarada peiaida wet oh kawehweiong soun apwapwalih kan me e anahne mwesel sang ni siaio mwadang pwe en kak iang mihting kesempwal ehu, irail sapengki me e solahr pahn iang towehda siaio ma serepeino wia mwo.

Dahme serepein Laurelo wia? Serepeino kolokol ah inouo oh iang mihting en Pwihn en Sawas en Lih oh, nin duwen me sansalehr mwowe, solahr iang towehda siai lapo. Ni arail idek reh duwen ah koasondio, serepeino sapeng, “Pwe kaidehn ihme keieu kesempwal Mwomwohdiso, kaidehn?”

Pwoson Sises Krais kin kahrehda atail wia mehkan me kitail sohte kin wia. Pwoson me kamwakid kitail en mwekid kin kalaudehla atail doadoahngki Sapwellime manaman.

Kitail pil kin kalaudehla manaman en Sounkomouro nan atail mour kan ni atail kin wiahda inou sarawi kan oh kolokol inou kan. Atail inou kan kin katengehdi kitail Reh oh kieng kitail manaman sarawi kan. Ni atail wia tohnpadahk pwoson kei kitail kin koluhla oh idawehnla Ih nan pilen pepdaiso. Kitail kin weweid nan elen inou pwehn ale tiahk sarawi teikan.17 Oh paiamwahu pwe pilahn en Koht pil patohwenda kapai kan ong atail pahpa/nohno kan me melahr me sohte ahneki ansou mwahu en ale kapai kan ni ansou me irail momour.18

Ohl oh lih akan me kin kolokol arail inouko kin raprapahki elen arail en dehr saminkihla dipen sampah wet pwe sohte mehkoat pahn kak irehdi sang irail manaman en Sounkomouro. Emen lih pwopwoud, nohno pwoson men ahpw ntingiedi: “Met wia ansou apwal oh keper kei. Kitail kapaikidahr atail wehwehkihla laud duwen pilahn en komour oh kaweid marain kan sang soukohp limpoak kan, wahnparon kan oh sounkaweid kan me kin sewese kitail nan seilok illokin wet. Kitail solahr kin kalap rong redio ni menseng kan. Ahpw kitail kin rong padahk kan en kapokon lap nan neitail mobile kan ni menseng koaros ni atail kin onohnop kitail da ong rahno.”

Pil ehu wiepen wadohng atail mour kan manaman en Sounkomouro iei en pengdahla Reh ni pwoson. Soahng wet kin anahne poadidi ngidingid.

Kilel
Lih me dohke imwin en Sounkomouro likou ko

Kumwail tamataman soai en nan pwuhk sarawi en lih emen me kowahki soumwahu suwed oh kanameneko ki erein sounpar [eisek riau] 12.19 Liho doadoahngki ah pwoson laud Sounkomouro, koasoia, “Ma ihte sapwellime likou me I pahn doahke, I uhdahn pahn kehlailda.”20

Lih pwoson, inen menet anahne en wia uwen ah kak engala karos pwehn ale Sapwellime manaman. Uwen en liho engalahngo me kasalehda uwen eh engalahng ni pali ngehn..

Me tohto nan pwungatail me likiwer sangehr nan wasa loal en atail mohngiong kan oh doadoahngki soangen koasoi me liho wia: “Ma I kak englahng ki pali ngeni pwehn wadohng nan ahi mour manaman en Sounkomouro, I pahn ese ia mwoamwen ei pahn apwali ahi kahpwal wet. I pahn ese dahme I pahn wia. Oh I pahn ahneki manaman pwehn wia.”

Ni amwail kin pengdalahng Kauno pwehn ale manaman ong nan amwail mour soangen kehl ohte me aramas me pahn kihrlao kin wia ni eh kin nannantiong en esingek, manaman en Sises Krais pahn wiahla amwail. Ni en Sounkomouro mwahngi me kumwail men pwongi Ih—ni Eh ketin mwahngi me ihme kumwail keieu anahne nan amwail mohngiong en wadohng nan amwail mour Sapwellime manamano—Ngehn Sarawio pahn kamarainihkin kumwail dahme kumwail anahne wia.21

Ni en ngenomwail kan kin pengalah dauli mehkoaros me kumwail wiahier, Sapwellime manamano pahn pwildohng nan loalamwail.22 Oh kumwail eri pahn esehla wehwe loal en koasoi kan me kitail kin koulki nan koul “The Spirit of God”:

Kauno ketin kalaudehla en Souleng kan arail wehwe. …

Marain oh manaman en Koht wie lalaudla;

Kehl me kapeledi sampa tepier mwerpeseng.23

Rongamwahu en Sises Krais audaudkihda Sapwellime manaman, me kin langehng koaros sapwellimen Koht kan me kin rapahki Ih ni mehlel. Iei ahi kadehde me ni atail wadohng nan atail mour kan Sapwellime manaman, Ih oh kitail koaros pahn perenda.24

Ni ei wia emen Sapwellime sounkadehde kan, I kalohkihda me Koht ieias! Sises iei Krais! Sapwellime Mwomwohdisou kapwurupwurdohngehr sampa! Soukohp en Koht pohn sampa iei Thomas  S. Monson, me I utungadahki ahi mohngiong unsek. I kadehdeki ahi limpoak oh kapai ong emen emen kumwail, ni mware sarawi en Sises Krais, amen.

Iren kaweid kan

  1. Tehk 2 Nephi 28:19–30.

  2. Tehk Sohn 3:16.

  3. Sises me Keidiero—keidi sang Sahm Nanleng pwehn wia Sapwellime weliepe nan mehkoaros me pid komourlahn aramas. Sises ketin keidier pwehn wia atail Sounkomour oh Soundor. Mwohn sampa wet eh kepikpikda, Sises ketin keidier pwehn kasalehda me mour mwurin mour wet mie oh mour soutuk kak wiawi ong sapwellimen Koht seri koaros. (tehk Sohn 17:24; 1 Piter 1:20). Eri, Sises mwarenki lengileng riau: Mesaia(Ipru)oh Krais (Krihk)—koaros wehwehki “keidi.” (Tehk Bible Dictionary, ““Anointed One.”)

  4. Kitail kak apwalih kitail ni atail kin wehwehki oh momourki mahsen en Koht (tehk Episos 6:17–18; Doctrine and Covenants 27:18).

  5. Sang ni kaweid en Semeo, Sises me kapikada sampa (tehk Sohn 1:2–3) oh sampa teikan me kitail sohte kak wadek (tehk Moses 1:33). Mwohn Ah ketin ipwidi pohn sampa, Sises me ketin wia Siohwa lapalap—Koht en Kadehde Mering. Iei ih Siohwa me ketin pwarehng Moses pohn Nahna Sainai. Iei ih Siohwa me inoukihong Abraham me wehin sampa koaros pahn ale kapai pwehki arail wia kedeudoken keinek en Abraham. Oh iei ih Siohwa me wiahda inou kan ong kedeudoken peneinei en Israel. Sises me pil wia Immanuel me inoupe mie oh kokohpadahr sang Aiseia (tehk Aiseia 7:14).

  6. Doctrine and Covenants 131:6.

  7. Tehk Doctrine and Covenants 76:40–41.

  8. Tehk2 Nephi 31:2–21.

  9. Pwuhk Sarawi, Pwuken Mormon, Doctrine and Covenants, oh Pearl of Great Price.

  10. Tehk Topical Guide, “Jesus Christ.” In addition to text under that major heading, there are 57 subtitles about Him. For non-English editions of the scriptures, use Guide to the Scriptures.

  11. More than 2,200 listings are cited in those 18 pages of the Topical Guide.

  12. 3 Nephi 27:13–14.

  13. Teachings of Presidents of the Church: Joseph Smith (2007), 49.

  14. Tehk “The Living Christ: The Testimony of the Apostles,” Liahona, Epreil 2000, 2–3.

  15. TehkHelaman 8:15.

  16. Tehk Doctrine and Covenants 6:36.

  17. Sises Krais ketin padahkiheng kitail kesempwal en tiahk sarawi kan, me duwehte pepdais (tehk Sohn 3:5), kamadipw sarawi (tehk Doctrine and Covenants 59:9), oh endahumen oh katengtengpene tiahk sarawi kan en nan tehnpas sarawi (tehk Doctrine and Covenants 124:39–42).

  18. Tehk Doctrine and Covenants 124:29–32.

  19. Tehk Luhk 8:43–44.

  20. Mark 5:28.

  21. Tehk Doctrine and Covenants 88:63.

  22. Ni en lih pwosono doahke en Sounkomouro likouo, E ketin mahsani, “I pehm me ahi manaman [sang Krihkdunamis, wehwehki “manaman”] solahr mih rehi” (Luhk 8:46; lipw tohrohr kapatehng).

  23. “The Spirit of God,” Hymns, no. 2.

  24. Tehk 3 Nephi 17:20.