O Faavae o le Faatuatua

O se konafesi aoao ofoofogia lenei. Ua faagaeetia moni lava i tatou. Afai e i ai se faamoemoega silisili o le konafesi aoao, o le fausiaina lea o le faatuatua i le Atua le Tama ma lo tatou Faaola, le Alii o Iesu Keriso.

O la’u tautalaga o le a talanoaina ai faavae o lena faatuatua.

O faavae faaletagata lava ia, e pei o le tele o sailiga taua, e masani lava ona atiae malie—tasi le fola, tasi le aafiaga, tasi le luitau, tasi le faafitauli, ma tasi le faamanuiaina i le taimi e tasi. O se aafiaga faaletino aupito sili ona faamemelo i ai, o uluai laa a se pepe. E ofoofogia le vaai atu i ai. O se vaaiga faapelepele i ona foliga—o se tuufaatasiga o le naunautaiga, olioli, faateia, ma le ausiaga—o se mea taua moni ua tupu.

I lo matou aiga, e i ai se mea e talitutusa faapena lona natura e tumatilatila lava. Ina ua fa tausaga le matua o le ma atalii uii, sa ia sau ai i totonu o le fale ma faasilasila fiafia mai ma le mitamita tele i le aiga: “Ua mafai nei ona ou faia mea uma. Ua ou mafai ona nonoa, ua ou mafai ona tietie, ma ou mafai ona sipi.” Na matou malamalama o loo ia tau mai ia i matou ua mafai ona ia nonoaina ona seevae, ua mafai ona ia tietie i lana Uila Lapoa pa’utolu, ma ua mafai ona ia sipiina lona ofu. Sa matou toē uma ae na iloa o ni ausiaga sili ia mo ia. Sa ia manatu ua matua moni lava o ia.

O le atinaega faaletino, faalemafaufau, ma faaleagaga e tele lava mea e tutusa ai. O le atinaega faaletino e faigofie lava ona vaaia. Tatou te amata i laa a se pepe ma agai i luma i lea aso ma lea aso, lea tausaga ma lea tausaga, tuputupu ae ma atiae ia maua lo tatou fuaitino sili faaletino. O le atiaeina e ese mo tagata taitoatasi.

A tatou matamata i se faatinoga sili o afeleti po o musika, e tele ina tatou faapea e talenia tele le tagata, lea e moni lava. Ae o faatinoga e fua i tausaga o tapenaga ma faataitaiga. O se tasi o tusitala lauiloa, o Malcolm Gladwell, na ia ta’ua lenei mea o le tulafono 10,000 itula. Sa tonu i tagata sailiili o lenei aofaiga o faatinoga e talafeagai i afeleti, faatinoga faamusika, atamai faaleaoaoga, tomai faapitoa faalegaluega, tomai faafomai pe faaloia, ma isi. Sa taua e se tasi o nei tagata atamamai mo sailiiliga “o na itula e sefulu afe o faataitaiga e manaomiaina e ausia ai le tulaga silisili lea e maua e tagata sili ona atamamai i le lalolagi—i soo se mea.”¹

E toatele tagata e iloaina ina ia maua le tulaga silisili o se faatinoga faaletino ma faalemafaufau, o tapenaga ma faataitaiga faapena e taua tele.

O le mea e leaga ai, i se lalolagi ua faateteleina le faalelalolagi, ua faaitiitia ai le faamamafa e tuu i le tele o le aofaiga o le tuputupu ae faaleagaga e manaomia ina ia avea atili ai e faapei o Keriso, ma faamautu ai faavae ia e taitai atu i le faatuatua tumau. Ua tele ina tatou faamamafa ia taimi o malamalamaaga faaleagaga musuia. O taimi taua ia pe a tatou iloaina ua molimau mai e le Agaga Paia ni malamalamaaga faapitoa faaleagaga i o tatou loto ma mafaufau. Tatou te olioli i nei mea pe a tutupu; e le tatau ona faaitiitia i soo se auala. Ae mo le faatuatua tumau ma le mauaina o le mafutaga faifai pea a le Agaga, e leai se mea e suitulaga i le matauga faalelotu a le tagata lava ia e faatusatusa i le atinaega faaletino ma faalemafaufau. E tatau ona tatou atiae i luga o nei aafiaga, lea i nisi taimi e tai foliga mai o uluai laa a se pepe. Tatou te faia lenei mea e ala i le tuuto atu ma le faapaiaina i sauniga faamanatuga paia, suesuega o tusitusiga paia, tatalo, ma le auauna atu e pei ona valaauina ai. I se faamamaluga talu ai nei o le maliu o se tama e toa 13 le fanau, sa ta’ua ai o lona “tuuto atu i tatalo i aso uma ma le suesueina o tusitusiga paia na matua uunaia loloto ai lana fanau, ma latou maua ai se faavae lemafaagaeetia o le faatuatua i le Alii o Iesu Keriso.”²

I se aafiaga na ou maua ina ua 15 ou tausaga, sa matua taua mo au. Sa taumafai ma le lototoa si ou tina faamaoni e fesoasoani ia te au ia faamautu ia faavae o le faatuatua i lo’u olaga. Sa ou auai i sauniga faamanatuga, Peraimeri, ona sosoo lea ma Alii Talavou ma le seminare. Sa ou faitauina le Tusi a Mamona ma sa tatalo au ia e le aunoa. I lena taimi sa tupu ai se mea taua i lo matou aiga ina ua mafaufau lo’u uso pele e matua atu i se valaauga faaolioli o se misiona. Sa manao si o’u tama lelei sa le toaga i le Lotu, ia faaauau lana a’oga ae aua nei auauna atu i se misiona. Sa oo ina avea lenei mea ma se mataupu o finauga.

I se talanoaga matagofie ma lo’u uso, lea sa lima tausaga e matua ai ia te au na taitaia le talanoaga, na matou faaiuina ai e faapea, o lana faaiuga pe alu i se misiona sa faalagolago lea i ni mataupu se tolu: (1) E paia ea Iesu Keriso? (2) E moni ea le Tusi a Mamona? (3) O Iosefa Samita ea o le perofeta o le Toefuataiga?

A o ou tatalo faamaoni i lena po, sa faamautu mai e le Agaga ia te au le moni o fesili uma e tolu. Sa oo foi ina ou malamalama e toetoe lava o faaiuga uma o le a ou faia mo lo’u olaga atoa o le a fua lea i tali i na fesili e tolu. Sa ou iloaina patino lava o le faatuatua i le Alii o Iesu Keriso sa taua tele. I le tepa ai i tua, ua ou iloaina ai, o le autu lava ona o lo’u tina, sa taatitia lelei ai faavae mo au e maua ai faamautinoaga faaleagaga i lena afiafi. Sa faia e lo’u uso, lea ua leva ona i ai sana molimau, le faaiuga e auauna atu i se misiona ma mulimuli ane ai lagolagoina e lo matou tama.

E mauaina le taitaiga faaleagaga pe a manaomia, i le taimi a le Alii ma e tusa ma Lona finagalo.³ O Le Tusi a Mamona: O Se Tasi Molimau ia Iesu Keriso o se faataitaiga lelei tele lea. Talu ai sa ou iloiloina ai se uluai lomiga muamua o le Tusi a Mamona. Sa faamaeaina e Iosefa Samita le faaliliuga ina ua 23 ona tausaga. Ua tatou iloa se mea e uiga i le faagasologa ma meafaigaluega na ia faaaogaina i lena faaliliuga. I lena uluai lomiga i le 1830, sa faaaofia ai e Iosefa se faatomuaga puupuu ma tautino mai ai ma le faigofie ma le manino sa faaliliuina “e ala i le meaalofa ma le mana o le Atua.”⁴ Ae a fesoasoaniga i le faaliliuga—le Urima ma le Tumema, o maa a tagata vaai? Pe na taua ea, pe na pei i latou o ni uili faaopoopo o se uila vilivae seia oo ina mafai e Iosefa ona faaaoga le faatuatua talafeagai e maua ai nisi faaaliga tuusao?⁵

E pei lava o taumafaiga faifai soo ma le tumau e manaomia ina ia maua ai le malosi faaletino pe faalemafaufau, e faapena foi lona moni i mataupu faaleagaga. Manatua le Perofeta o Iosefa na faafa ona asiasi i ai le tagata lava e tasi, o Moronae, faatasi ma le savali lava e tasi i tapenaga mo le mauaina o papatusi. Ou te talitonu o le auai i vaiaso taitasi i sauniga faamanatuga paia o loo i ai ni aafiaga faaleagaga tatou te le malamalama atoatoa i ai. O le mafaufau loloto i tusitusiga paia e le aunoa—nai lo le faitauina i nisi taimi—e mafai ai e se faaleleiga musuia o lo tatou faatuatua e suia ai le olaga ona aveesea se malamalama papa’u.

O le faatuatua o se mataupu faavae o le mana. Sei ou faamanino atua: A o avea ma se faifeautalai talavou, sa faailoa mai ai e se peresitene maoae o le misiona⁶ ia te au i se auala loloto le tala faatusi paia o loo maua i le Luka 8 e uiga i le fafine na maua i le puna toto mo le 12 tausaga ma sa faaaluina mea uma na ia te ia i fomai sa ono mafai ona faamalolo ia te ia. Ua tumau pea e oo mai i lenei aso o se tasi o mau ou te fiafia lava i ai.

E te manatuaina na ia te ia le faatuatua afai e mafai ona ia pa’i atu tau lava o le tuupao o le ofu o le Faaola, o le a faamaloloina o ia. Ina ua ia faia lea mea, sa faamaloloina o ia i le taimi lava lea. Na fetalai atu le Faaola sa savavali faatasi ma Ona soo, “O ai ea na pa’i mai ia te a’u?”

O le tali a Peteru o i latou uma, sa savavali faatasi, na fetaomi atu ia te Ia.

“Ona fetalai ane lea o Iesu, Na pa’i mai lava se tasi ia te a’u: aua ua ou iloa ua alu atu le mana nai ia te a’u.”

O le upu autu mo le virtue e mafai ona faauigaina faigofie o le “mana.” I le Faa-Sipaniolo ma le Faa-Potukale, ua faaliliuina o le “mana.” Ae e ui i lea, sa lei silafia e le Faaola o ia; ae sa lei taulai atu o Ia i lona manaoga. Ae o lona faatuatua sa mauaa lea na o le pa’i atu i le tuupao o le ofu na maua mai ai le mana faamalolo o le Alo o le Atua.

E pei ona fetalai atu le Faaola ia te ia, “Afafine, ina faalototeleina ia oe: ua e ola i lou faatuatua; ina alu ia oe ma le manuia.”⁷

Ua ou mafaufau i lenei tala i lo’u olaga matua atoa. Ua ou iloa o a tatou tatalo faaletagata lava ia ma aioiga i se Tama o i le Lagi alofa i le suafa o Iesu Keriso e mafai ona aumaia faamanuiaga i o tatou olaga e sili atu ma lo tatou tomai e malamalama ai. O faavae o le faatuatua, le ituaiga o faatuatua lea na faaalia e lenei fafine, e tatau ona avea ma manaoga sili o o tatou loto.

Peitai, o uluai faavae o le faatuatua, e oo lava i faamautinoaga faaleagaga, e le faapea ai o le a tatou le fetaiai ma luitau. O le liuaina i le talalelei e le faapea o le a foia uma ai o tatou faafitauli.

O le talafaasolopito i le popofou o le Ekalesia ma faaaliga o loo faamaumauina i le Mataupu Faavae ma Feagaiga o loo i ai ni faataitaiga sili o le faamautuina o faavae o le faatuatua ma le taulimaina o suiga ma luitai e lei mafaufauina o loo feagai ma tagata uma.

O le faamaeaina o le Malumalu o Katelani sa matua taua mo le Ekalesia atoa. Sa o mai faatasi ma anoano o mea faaleagaga, faaaliga o aoaoga faavae, ma le toefuataiga o ki taua mo le faamautuina faifai pea o le Ekalesia. E pei o Aposetolo anamua i le aso o le Penetikoso, sa toatele tagata o le ekalesia na oo i aafiaga ofoofogia faaleagaga e fesootai ma le faapaiaga o le Malumalu o Katelani.⁸ Ae, e pei ona i ai i o tatou lava olaga, sa lei faapea ai la o le a latou le toe fetaiai ma ni luitau po o faigata i le agai i luma. Sa lilo i manatu o nei uluai tagata o le ekalesia o le a latou fetaiai ma se mala tautupe i le Iunaite Setete—le popolevale o le 1837—lea na tofotofoina ai o latou agaga.⁹

O se tasi o luitau e fesootai ma lenei faaletonu tautupe sa oo i ai Elder Parley P. Pratt, o se tasi o taitai maoae o le Toefuataiga. O ia o se tasi o uluai sui o le Korama a Aposetolo e Toasefululua. I le amataga o le 1837, sa maliu ai lona faletua pele, o Thankful i le maea ai ona fanauina o le la pepe muamua. Sa faaipoipo Parley ma Thankful mo le toetoe 10 tausaga, ma sa matua lofituina o ia i le maliu [o lona faletua].

I ni nai masina mulimuli ane, sa oo ai Elder Pratt i se tasi o taimi sili ona faigata na oo i ai le Ekalesia. I le lotolotoi o lea faaletonu faalemalo, o faafitauli tau tamaoaiga i le lotoifale—e aofia ai fefaatauaiga o fanua mo se faasiliga atoa ma tauiviga ma se faalapotopotoga tautupe sa faavaeina e Iosefa Samita ma isi tagata o le Ekalesia—na mafua ai ni feeseesea’iga ma ni finauga i Katelani. Sa lei faia pea e taitai o le Ekalesia i taimi uma ni faaiuga atamai faaletino i o latou lava olaga. Sa mafatia Parley i ni tupe gau iloga ma mo se taimi na oo ai ina le fiafia i le Perofeta o Iosefa.¹⁰ Sa ia tusia se faitioga ogaoga ia Iosefa ma saunoa ai e tetee ia te ia mai le pulelaa. Ae i le taimi lava e tasi, sa fai mai ai Parley sa faaauau pea ona talitonu i le Tusi a Mamona ma le Mataupu Faavae ma Feagaiga.¹¹

Ua leai se faletua o Elder Pratt, leai sona fanua, leai ma sona fale. Sa malaga ese atu Parley i Misuri e aunoa ma le tauina atu ia Iosefa. A o agai atu i le auala iina, sa faafuasei ona fetaui ai ma ona uso a Aposetolo o Thomas B. Marsh ma David Pattern ua toefoi atu i Katelani. Sa la lagonaina se manaoga tele ia toefuatai le lotogatasi i le Korama ma tauanau Parley latou te toe foi atu ma i laua. Sa ia iloaina ai e leai ma se tasi ua sili atu ni mea ua ma’umauina nai lo Iosefa Samita ma lona aiga.

Sa saili e Parley le Perofeta, tagi, ma tautino atu ua ia faia se mea sese. I ni masina talu ona maliu lona faletua, o Thankful, sa “ufitia ai [Parley] i se ao pogisa” ma sa faatoilaloina e le fefe ma le le fiafia.¹² I le iloaina ai o lagona o le tauivi ma le fili ma faaosoosoga, sa “faamagalo fua” ai e Iosefa ia Parley, ma tatalo mo ia ma faamanuia o ia.¹³ O Parley faatasi ma isi na tumau ma le faamaoni sa faamanuiaina mai luitau o Katelani. Sa faateleina lo latou atamai ma avea ma ni tagata sili ona mamalu ma mama. O le aafiaga sa oo ina avea ma vaega o o latou faavae o le faatuatua.

E le tatau ona tatou vaai i faigata o se le fiafia o le Alii po o se aveesega o Ana faamanuiaga. O le faafeagai o mea uma o se vaega o le afi faamama e sauniaina i tatou mo se taunuuga e faavavau i selesitila.¹⁴ A o i ai le Perofeta o Iosefa i le Falepuipui i Liperate, o le fetalaiga a le Alii ia te ia na faamatala uma ai uiga o luitau—e aofia ai faafitauli, tuuaiga sese—ma faaiu ai e faapea:

“Afai e tatala faamaga lautele mai e auvae lava o seoli le gutu ia te oe, ia e iloa, loʼu atalii e, o nei mea uma e te maua ai le poto masani, ma o le a avea mo ou lelei.

“Na afio ifo le Atalii o le Tagata i lalo o na mea uma. Pe sili ea oe i lo ia?”¹⁵

I lenei lava faatonuga ia Iosefa Samita, sa faamanino atu ai e le Alii e faapea ua iloa ona aso ma e le faitauina itiiti.Sa faaiu atu le Alii e faapea, “Aua le mataʼu i mea e mafai ona fai e tagata, aua o le a faatasi le Atua ma oe e faavavau ma faavavau lava.”¹⁶

O a la ia faamanuiaga o le faatuatua? O le a le mea e ausia e le faatuatua? E toetoe lava a le muta le lisi:

E mafai ona faamagaloina a tatou agasala ona o lo tatou faatuatua ia Keriso.¹⁷

Po o ai lava e faatuatua o le a maua le mafutaga ma le Agaga Paia.¹⁸

O le faaolataga e oo mai e ala i le faatuatua i le suafa o Keriso.¹⁹

Tatou te mauaina le malosi e tusa ma lo tatou faatuatua ia Keriso.²⁰

E leai ma se tasi e ulu atu i le malologa o le Alii vagana ua faamamaina o latou ofu i le toto o Keriso ona o lo latou faatuatua.²¹

E taliina tatalo e tusa ma le faatuatua.²²

A leai se faatuatua i tagata, e le mafai e le Atua ona faia se vavega ia i latou.²³

I le faaiuga, o lo tatou faatuatua ia Iesu Keriso o le faavae taua lea mo lo tatou faaolataga e faavavau ma le faaeaga. E pei ona aoaoina e Helamana ona atalii, “Ia manatua, ia manatua o luga lava o le papa o lo tatou Togiola, o Keriso lea, le Alo o le Atua, e ao ina oulua atinae ai lo oulua faavae … , o se faavae lea afai e atiae ai tagata e le mafai lava ona pauu i latou.”²⁴

Ou te faafetai mo le faamalosiga o faavae o le faatuatua ua maua mai i lenei konafesi. O la’u augani ia tatou faia ni taulaga ma maua le lotomaualalo talafeagai e faamalosia ai faavae o lo tatou faatuatua i le Alii o Iesu Keriso. Ona o Ia ou te tuu atu ai se molimau mautinoa, i le suafa o Iesu Keriso, amene.