Vakasoqoni Vata na Matavuvale ni Kalou

Kemuni na taciqu kei na ganequ lomani, au rekitaka na madigi meu tiko vata kei kemuni ena tekivu ni soqoni oqo ni koniferedi raraba. Au kidavaki kemuni ena yalo veidokai.

Na koniferedi raraba e sa dau dua tu ga na gauna ni nodra vakasoqoni vata na Yalododonu Edaidai. Sa tubu vakalevu na Lotu mai na gauna sara eliu me ra vakasoqoni vata kina vakayago ena dua na vanua, ia sa vakarautaka na Turaga na sala e so me yaco yani kina vei kemuni na veivakalougatataki ni koniferedi raraba se vei ga na vanua o ni tiko kina. Me vaka ni sa vakasakiti na nomuni vakasoqoni vata na Yalododonu ena Vale ni Koniferedi oqo, keimami dau raitayaloyalotaka na duri ena itutu ni vunau oqo na milioni vakacaca na tamata era vakasoqoni vata kei keimami e vuravura taucoko me ra sarasara ka vakarorogo ki na koniferedi. Vuqa vei kemuni sa vakasoqoni vata kei na nomuni matavuvale; e so era rairai vakasoqoni vata vakaitokani se ilawalawa lewe ni Lotu.

Ena vanua cava ga o tiko kina, kei na iwalewale ni nomuni rogoca voli na domoqu, ni dina ga o ni sega ni tiko vata kei keitou vakatamata, keitou vakila ni ko ni sa tiko vata kei keitou vakayalo. Keitou nuitaka ni ko ni na duavata taucoko kei keitou—ni ko na vakila na kaukauwa vakayalo e basika mai ena gauna cava ga e vakasoqoni vata kina e dua na ilawalawa vakabauta ena yaca i Jisu Karisito.

Au sa vakauqeti meu vosa vei kemuni edaidai ena dua tale na mataqali vakasoqoni vata. Na kena mataqali oqo e sega ni yaco walega ena vei vula ono, me vaka na koniferedi raraba. Ia, e sa tomani voli mai ena veigauna makawa ni Vakalesuimai ni Lotu, ka sa vakusakusataki voli ena veiyabaki oqo. Na vakasoqoni vata au tukuna tiko sai koya na vakasoqoni vata ni matavuvale ni Kalou.

Me vakamacalataki na vakasoqoni vata oqo, ena rairai vinaka meu tekivu ni bera na noda sucu, ni bera na ka e vakatoka na iVola Tabu “na itekitekivu” (Nai Vakatekivu 1:1). Ena gauna oya, eda a bula kei na Tamada Vakalomalagi ka da Luvena vakayalo. Sa dina oqo ki na tamata taucoko e sa mai bula e vuravura.

Vakasamataka, na yaca na “taciqu” kei na “ganequ” era sega walega ni vosa veikidavaki vakaitokani se veivakademeni kivei keda. Era sa ivakaraitaki ni dua na dina tawamudu: na Kalou sa Tamadra vakaidina na kawatamata taucoko; eda sa tiki yadua ni Nona matavuvale tawamudu. Baleta ni lomani keda ena loloma vaka Tama taucoko sara, sa vinakati keda o Koya meda rawaka ka toso ki liu ka vakataki Koya. A yavutaka o Koya e dua na ituvatuva meda lako rawa mai kina ki vuravura, vakamatavuvale, ka mai sotava na veika ena rawa ni vakavakarautaki keda meda lesu tale ki Vua ka bula vata kaya kei Koya.

Na usutu levu ni tuvatuva oqo oya na yalayala ni na mai soli Koya o Jisu Karisito me imadrali, me vueti keda mai na ivalavala ca kei na mate. Sa noda itavi ena ituvatuva o ya meda vakadonuya na imadrali ni iVakabula ena talairawarawa ki na lawa kei na cakacaka vakalotu ni kosipeli. O iko kei au a vakadonuya na ituvatuva oqo. Na dina, daru a vakacaucautaka, dina ga ni sa na biu mai na itikotiko ni Tamada ka guilecavi vakakina na veika eda a sotava voli ekea vata kei Koya.

Ia eda a sega ni vakau mai eke vakataucoko ena butobuto. A soli vei keda yadua e dua na tiki ni rarama ni Kalou, vakatokai na “Rarama i Karisito,” me vukei keda me veidutaitaka na vinaka kei na ca, na dodonu kei na cala. Oqo na vuna o ira mada ga na bula voli ena kilaka lailai se sega me baleta na ituvatuva ni Tamada se na rawa tikoga ni vakila, e lomadra, ni so na ka sa dodonu ka vakainaki ka sega na veika tale e so.

Na noda vakila na donu kei na cala sa vaka me dei sara ni da susugi ira voli na luveda. E levu sara na itubutubu sa tiko vei ira na gagadre me ra vakatavulici ira na luvedra ena veitovo kilikili. Oqo sa tiki ni cakamana ni tuvatuva ni Tamada Vakalomalagi. Sa vinakati ira na Luvena o Koya me ra lako mai vakamatavuvale ki vuravura, salamuria voli na ituvatuva tawamudu ni matavuvale era tiko taumada mai lomalagi. Na matavuvale sa ra yavu ni isoqosoqo maucokona ena itikotiko vakalomalagi, ka sa nakita vei ira o Koya me ra sa yavu maucokona talega e vuravura. Dina ga era sa sega ni vinaka sara na matavuvale e vuravura, era solia kivei ira na luve ni Kalou na gauna vinaka duadua me ra kidavaki kina e vuravura mai na loloma duadua ga e vuravura e volekata sara na ka eda a vakila mai lomalagi—na loloma vakaitubutubu. Na matavuvale sa sala vinaka duadua talega me ra maroroi ka vakadewataki kina na itovo kilikili kei na ivakavuvuli dina e so ka na rawa ni muataki keda lesu tale ki na itikotiko ni Kalou.

E dua wale sara na iwase lailai ni luve ni Kalou era ciqoma, donuya na bula oqo, na kila matata taucoko me baleta na ituvatuva ni Kalou, vata kaya na veivakadonui ki na cakacaka vakalotu ni matabete kei na veiyalayalati ka vakavuna na kaukauwa ni veisorovaki ni iVakabula me cakacaka vakataucoko ena noda bula. O ira mada ga ka vinaka vakaoti na nodra itubutubu sa rawa ni bula voli ena yalodina mai na rarama e tiko vei ira ka sega ni rogoca na veika e baleti Jisu Karisito se sureti me mai papitaisotaki ena Yacana. Oqo e sa dina tu ki na milioni vakaoba na tacida kei na ganeda ena itukutuku raraba kei vuravura.

E so ena rairai navuca vakatani oqo. Era na rairai nanuma sara me ivakadinadina ni sa sega na ituvatuva, sega na ka e gadrevi vakatabakidua me baleta na veivakabulai—ni nanumi e dua na Kalou dodonu, dauloloma ena sega ni vakavurea e dua na ituvatuva ka sa tiko ki na dua na iwase lailai ni Luvena. E so ena rairai vakabauta ni sa navuca taumada na Kalou o cei soti na Luvena ena vakabula o Koya ka vakarautaka vei ira na kosipeli, ka ra sega saraga ni “digitaki” o ira ka sega ni rogoca na kosipeli.

Ia sa kila o iko kei au, ena vakalesui mai ni dina vua na Parofita o Josefa Simici, ni tuvatuva ni Kalou e sa daulomani ka dodonu vakalevu sara mai na kena oya. Sa vakarau tu na Tamada Vakalomalagi me vakasokomuna ka vakalougatataka taucoko na Nona matavuvale. Ni kila tu o Koya ni ra na sega ni digitaka taucoko me ra vakasoqoni vata, na Nona ituvatuva sa solia yadua kivei ira na Luvena na madigi me ra vakadonuya se vakanadakuya na Nona veisureti. Ka ra sa uto ni tuvatuva oqo na matavuvale.

Ena veisenituri sa oti, a kaya na parofita o Malakai ni dua na gauna mai muri, ena talai Ilaija na Kalou me “vagolea na lomadra na qase vei ira na gone, kei na lomadra na gone vei ira na nodra qase”.(Malakai 4:6).

Sa rui bibi sara na parofisai oqo, a cavuta kina na iVakabula ena Nona veisiko ki Amerika ni oti Nona Tucaketale (raica na 3 Nifai 25:5–6). Ni gauna a sikovi Parofita Josefa Simici kina na agilosi o Moronai, a cavuta talega o koya na parofisai baleti Ilaija kei na lomadra, na qase, kei na gone (raica na Josefa Simici—Ai Tukutuku 1:36–39).

Edai na ika 1 ni Epereli. Rua na siga mai oqo, na ika 3 ni Epereli, sa toqai kina na ika 181 ni yabaki mai na siga a vakataucokotaki kina na parofisai nei Malakai. Ena siga oya, a lako mai kina o Ilaija, ka solia vei Josefa Simici na kaukauwa ni matabete me vauca tawamudu na matavuvale (raica na V&V 110:13–16).

Mai na siga oya yacova mai oqo, na maleleti ni sasagataki tuva kawa e sa tubu vakaiyanaqa. Ena kena toso cake tikoga, sa ra vagolei vakalevu talega na tamata ki na nodra ivola ni kawa mai na kena dau vakawaleni tu. Sa ra basika e vuravura raraba na vale ni vola ni kawa, soqosoqo, kei na tekinoloji e so me ra tokona na sasaga oqo. Na kaukauwa ni initaneti me tosoya cake na veitaratara e sa vakavuna mera cakacaka vata kina na matavuvale ena vakadidike ni tuva kawa ena kena totolo kei na maqosa e sega tu ni rawa eliu.

Cava na vuna e yaco taucoko tiko kina na ka oqo? Na ka vinaka duadua ga eda kila meda vakatoka kina na “yalo i Ilaija.” Sa rawa ni da vakatoka talega na “vakataucokotaki ni parofisai.” Au vakadinadinataka ni a lako mai o Ilaija. Na lomadra na gone—o iko kei au—e sa vagolei vei ira na noda qase, o ira na tubuda. Na nomu kauwaitaki ira na tubumu e sa tiki ni kena vakataucokotaki na parofisai oya. E sa yavutaki vakabibi ena nomu vakilai iko taumada. Ia e sa levu cake mai na ivakamacala eda kunekunetaka mai vei ira na tubuda.

Me ivakaraitaki, ni ko muria na veivakauqeti mo vulica na nomu tuva kawa, o na rairai raica ni wasea e so na irairai ni matamu e dua na wekamu vakayawa se na nomu kauwai ena ivola e so se na nomu taledi ena lagasere. Oqo e rawa sara ni veimaleleti ka vakaibalebale talega. Ia ke sa cegu ekea na nomu cakacaka, o na vakila ni dua na ka e sega tiko. Oqo na vuna, ni gadrevi me vakumuni ka vakaduavatataka na matavuvale ni Kalou e sega wale ga ni veika me vakilai. E sa gadreva na veiyalayalati tabu e veisemati ki na cakacaka vakalotu ni matabete.e so.

Vuqa vei ira na tubumuni a sega ni ciqoma na veicakacaka vakalotu oya. Ia sa vakarautaka na Kalou e dua na sala mo rawata kina. Ka sa kila na Kalou ni ko na vagolei ena loloma kivei ira na tubumu ka sa na tiko na tekinoloji e veiganiti kaya mo kilai ira kina. Sa kila talega o Koya ni ko na bula ena dua na gauna ni kena curumi na valetabu, ka rawa ni vakayacori kina na cakacaka vakalotu e so, sa na levu cake sara mai na itukutuku ni veigauna. Ka kila o Koya ni rawa ni nuitaki iko mo vakacavara na cakacaka oqo ena vukudra na tubumu.

E dina sara, sa vuqa na noda itavi drakidrakita ka bibi e gadreva na noda gauna kei na igu vakataucoko. Eda sotava taucoko na veika e namaka vei keda na Turaga meda cakava ka da nanuma eda na sega ni rawa ni vakayacora. Vinaka ga, sa vakarautaka na Turaga e dua na sala kivei keda yadua meda nuidei ka yalovakacegu kina ena noda veiqaravi taucoko, vakakina na veiqaravi ni tuva kawa. Eda rawa kaukauwa ni vakayacora na ka E kerea ena noda vakabauta ni sega ni dau soli ivakaro na Turaga “vakavo kevaka e sa vakarautaka rawa mada na sala [meda] rawata kina na ka sa vakarota vei [keda] ko koya”.(1 Nifai 3:7).

Au kila ni dina oqo mai na ka e sotavi. Vuqa na yabaki sa oti, niu vuli voli ena univeseti, au a sotava e dua na turaga ka cakacaka tiko ena dua na kabani levu ni kompiuta e vuravura. Oqo ena itekitekivu ni gauna ni kompiuta, ka mani mai yaco me talai koya na nona kabani me laki volitaki kompiuta ki na Lotu i Jisu Karisito ni Yalododonu Edaidai.

Mai na veika au vakila me baleti koya, na dauvolivolitaki oqo a sega ni tamata lotu. Ia a kaya ena kurabui kei na nuiqawaqawa, “Ena lotu oqo era a cakava tiko na ka era vakatoka na vakasaqarai ni ‘vola ni kawa,’ me baleta na yacadra na tamata sa mate, kena tovolei me vakatakilai na tubudra. Era a maqusa voli na tamata ena kovate ni faile, ni qarai tiko na itukutuku ena kadi lalai e so. Keu nanuma donu, a kaya o koya era daramaka tiko na marama na ivava ni tenisi me rawa ni ra cici vakatotolo. Niu raica tu na cecere ni veika era saga voli, au a vakila niu sa mai dikeva rawa na inaki ni kena buli na kompiuta.”

Ia, a donu vakatikina o koya. Sa na dua na tiki bibi ni ituvaki ni cakacaka ni tuva kawa na kompiuta—ia sega ni kompiuta e so a volitaka voli o koya. A digitaka e dua na iliuliu vakauqeti ni Lotu me kakua ni volia na nona kompiuta. Me na waraka toka na Lotu na tekinoloji ka se sega taumada ni vakasamataki ena gauna oya. Ia au sa vulica mai na vuqa na yabaki oya ni tekinoloji vinaka duadua sara mada ga ena sega ni rawa ni sosomitaka na ivakatakila mai lomalagi, me vakataka e dau ciqoma na iliuliu ni Lotu. Oqo sa dua na cakacaka vakayalo, ka sa dusimaka na Turaga ena Nona Yalo Tabu.

Ena vica ga na macawa sa oti, au a qarava voli na noqu tuva kawa ni tikivi au toka e dua na kenadau kei na dua tale na dauveivuke ena talevoni. A toka ena sikirini ni kompiuta e dua na leqa ka sega ni rawa saraga vei au meu walia rawa. Au raica e rua na yaca, a vakau mai vei au ena vakasakiti ni tekinoloji, ni tamata e so ka rairai waraka voli na cakacaka vakalotu ni valetabu. Rau a duidui na yaca, ia sa rawa ni vakadinadinataki ni sa baleta e dua ga na tamata. Sa noqu itavi meu vakatakila na kena dina.

Au taroga vei kenadau me tukuna vei au. E rau kaya mai vei au, “Sega, mo ni digia mai.” Ka rau sa yalodei niu na kila mai na dina. Na kompiuta, ena kena kaukauwa taucoko kei na itukutuku, e sa vakalougatataki au ena wanonovi ni veiyaca oya ena sikirini, na cakacakataki ni itukutuku sa tiko rawa, na qarai ni vakadidike tale e so, na masu lo voli, kei na kunei ni ka sa dina. Niu masu tu, au sa kila deivaki na ka me caka—me vaka ga ena so tale na ituvaki niu gadreva tu meu vakararavi ki na veivuke vakalomalagi me walia na leqa.

Eda sega ni kila na veibulibuli vakasakiti ena vakauqeti ira kina na tamata na Kalou mera cakava me veivuke ena Nona cakacaka ni kena vakasoqoni vata na Nona matavuvale. Ia se cava ga na veibulibuli vakasakiti ena basika mai, na kedra vakayagataki ena gadreva na Yalo e cakacaka voli ki na tamata vakataki iko kei au. Oqo e sega ni dodonu me vakurabuitaki keda. Me itini, sai ira oqo na luvena tagane kei na yalewa lomani na Kalou. Ena vakauta o Koya na veivakauqeti cava ga e gadrevi me solia vei ira na madigi me ra lesu tale Vua.

Ena veiyabaki ga oqo, era sa sausaumi mai na itabagone ena Lotu ki na yalo i Ilaija ena sala e veivakauqeti dina. Vuqa era sa taura tu oqo na nodra ivolatara vakaiyalayala ni valetabu ka vakayagataka wasoma. Sa qai osooso ga na tobu ni veipapitaisotaki ena valetabu, sa ra tuvatuvaka tale kina e so na valetabu me qarava na tosocake ni iwiliwili ni itabagone era tiko ena valetabu.

A sega ni dau vaka tu kina eliu ka sega ni tarovi me ra kauta mai na itabagone na yaca ni tubudra ki na valetabu. Oqo sa ivalavala tudei, ka sai ira na itabagone vakataki ira ka dau kunea wasoma na tubudra oya.

Me ikuri, sa ra raica na itabagone ni sa vakatitobutaka na nodra ivakadinadina ni yavu ni veivakabulai na soli ni nodra gauna me ra cakava na vakadidike ni tuva kawa kei na cakacaka ni valetabu. E sa vakalevutaka na veivakauqeti ni Yalo ena nodra bula ka vakalailaitaka na veivakauqeti ni vunica. E sa vukei ira ni toro voleka sara ki na nodra matavuvale ka voleka sara vua na Turaga. Era sa vulica ni cakacaka oqo e sega ni vakabulai ira ga na mate; e vakabulai keda taucoko (raica na V&V 128:18).

Sa ra ciqoma vakamareqeti na raivotu na itabagone; sa dodonu me cakava vakakina oqo na nodra itubutubu. Sa vuqa sara na tamata nikua era sa vakadonuya na papitaiso ena vuravura ni yalo, baleta na nodra cakacaka na itabagone, ka ra sa waraka voli na cakacaka vakalotu tale e so ka rawa duadua ga ni ra vakayacora na qase ena valetabu. Na cakaca ni nodra vakasoqoni vata na matavuvale ni Tamada Vakalomalagi e sega ni baleti ira ga na tamata gone, ka sega ni baleti ira ga na tubudra. E sa baleti keda kece. Eda sa daunivakavakasoqoni vata taucoko.

Oqo na cakacaka ni noda itabagauna, ka vakatoka na iApositolo o Paula “na oti kecega ni gauna sa lokuci,” me na “soqona vata na ka kecega vei Karisito, na veika mai lomalagi, kei na veika e vuravura” na Kalou.(Efeso 1:10 Oqo sa rawa duadua ga ena cakacaka ni veisorovaki ni Luveni Kalou Daulomani, o Jisu Karisito. Ena Vukuna, na lewe ni noda matavuvale, “ka yawa eliu dou sa qai voleka mai ena vuku ni dra i Karisito. Ni sai koya na vu ni noda veivinakati tale, o koya sa qisia na rua me dua bau, a sa basuka na bai sa ia kina na tawasei”.(Efeso 2:13–14). Ko sa vakila oqo, me vakataki au, ena nomu sotakaya na loloma levu ni ko raica na itaba ni dua na tubumu. Ko a vakila ena valetabu ni vaka me a bibi sara na yaca i koya ka toka ena kadi, ka sega ni tarovi iko rawa ni vakila ni sa kilai iko na tamata oqo ka vakila na nomu loloma.

Au vakadinadinataka na Kalou na Tamada e vinakati ira na Luvena me lesu tale yani ki vale, vakamatavuvale ena lagilagi. E bula tiko na iVakabula. Sa vakatulewataka o Koya na cakacaka oqo, ka sa wanonovi keda ka tuberi keda. Sa vakavinavinakataki kemuni o Koya ena nomuni veiqaravi yalodina ni vakasoqoni ira vata na matavuvale nei Tamana, kau sa yalataka vei kemuni na veivuke veivakauqeti ko ni vakasaqara ka gadreva. Ena yacai Jisu Karisito, emeni.