Ikotakin ana Utu te Atua

Tariu ao mwaaneu aika tangiraki, I kimwareirei n au tai n raoni ngkami ni moan te tetere ni maungatabu ni kabuta aei. I butimwaai ngkami ma te tangira.

Te maungatabu ni kabuta e riki n taainako bwa te tai n ikotaki ibukiia Aomata aika Itiaki ni Boong aika Kaitira. N taai aika nako e rikirake ni korakora ana ikoikotaki te Ekaretia n te tabo te teuana, ma te Uea e katauraoi kawai ibukin kakabwaia n te maungatabu ni kabuta nakoimi n tabo ake kam mena iai. Ngkai e kakukurei n noorakin ikoikotakiia Aomata aika Itiaki n te Tienta ni Maungatabu ae bubura aei, ngaira ake ti tei n te tabo n taetae aei ti aki toki n iangoiia mirion aomata ake a ikotaki ma ngaira ni kabuta te aonaaba ni mataku ao n ongora nakon te maungatabu. Angiina ibuakomi ngkami ma ami utu; tabeman a ikotaki ma raoraoia ke raoia aika kaain te Ekaretia.

N te tabo are ko mena iai, ao e ngae n anne ao kam kona n ongo bwanaau, taiaoka ataia bwa e ngae ngke ko aki mena ibuakora, ti namakinna bwa kam raoniira n tamneimi. Ara kantaninga ngkami ni kabane kam namakina katiteuanaakira—bwa kam na namakina te korakora n tamnei are e roko ngkana rabwataia taan kakoaua a ikotaki n aran Iesu Kristo.

I namakina kairau iroun te Tamnei n taetae nakoimi n te bong aei n taekan teuana te ikoikotaki. Te aekaki aei e aki riki ni katoa onoua namwakaina, n aron are e karaoaki n te maungatabu ni kabuta. N oneamwiina, e a tia n reitinako man boong ake ngkoa ni Kaokan te Ekaretia, ao e a tia ni kawaekoaki n ririki aika a nako. I nanona bon ikoikotakiia ana utu te Atua.

Ni kabwarabwara te ikoikotaki aei, e na tamaroa waakinana imwaain bungiakira, imwaain are e aranna te Baibara “ngke a tuai ni karikaki b’ai” (Karikani B’ai 1:1). N te tai anne, ti maeka ma te Tama are i Karawa bwa natina n tamnei. E koaua aei nakoia aomata ni kabane ake a maeka iaon te aba.

Kam ataia, bwa te taeka ae, “tariu” ao “mwaaneu” tiaki tii te kamauri n iraorao ke taeka n itangitangiri imarenara. Bon kabwarabwaraan te koaua ae akea tokina. Te Atua bon Tamaia aomata ni kabane; ngaira mwakoron Ana utu ae akea tokina. Ibukin E tangiriira ma ana tangira te Tama ae kororaoi, E tangiriira bwa ti na rikirake ao ni keerake ao n riki n Ai arona. E karaoa ana babaire are ti na kona n roko iai nako aon te aba, inanon utu, ao n rinanon bwaai aika bati are e na katauraoira bwa ti na oki Nakoina ao ni maiu n te kawai are E maiu iai.

Oin te babaire aei bon te berita bwa Iesu Kristo e na anga Ngaia bwa te karea, ni kamaiuira man te bure ao te mate. Tabera n te babaire anne bwa ti na butimwaea ana angakarea te Tia Kamaiu n ara ongotaeka nakon tua ao ana otenanti te euangkerio. Ngai ma ngkami ti butimwaea te babaire anne. Ni koauana, ti kimwareirei iai, e ngae ngke e nanonaki bwa ti na kitana mweengan Tama are i Karawa ao ni mwaninga baike ti a tia n rinanona ikekei ma Ngaia.

Ma ti aki kanakoaki nako ikai n akea te oota ae ti anganaki. Ngaira ni kabane ti anganaki mwakoron ootan te Atua, ae aranaki bwa “Ootan Kristo,” ni buokiira n ataa kaokoro imarenan te raoiroi ao te buakaka, te eti ao te kairua. Aei bukina ngke naake a maiu ma uarereken ke akea aia atatai n ana babaire te Tama a kona n teimatoa n namakinna, inanoia, bwa mwakuri aika koaua a raoiroi ao n tamaroa ao tabeua a aki.

Ara namakin n te bwai ae eti ao ae kairua e taraa n rang ni korakora ngke ti kaikawaiarake natira. E kuri n iai irouia kaaro ni kabane aia iango n reireiniia natiia aroaro aika tamaroa. Aei mwakoron te kakai n ana babaire te Tama are i Karawa. E tangiriia natina bwa a na roko n te aonaaba, n rimwiakin bannan te utu ae akea tokina i karawa. Te Utu bon aan te babaire i karawa, ao ngaia are E baireia naba bwa aan te babaire iaon te aba. E ngae ngke utu aki tau, a angan natin te Atua aia tai ae tamaroa ni butimwaeaki nakon te aonaaba ma te tangira iaon te aba are ti namakinna i karawa—aia tangira kaaro. Te utu bon te kawai naba ae tamaroa ni kawakin ao n anga aroaro aika tamaroa ao reirei aika koaua are a taraa ni kona ni kairiira n oki nakon mweengan te Atua.

Ni karakon uarereken mwaitiia natin te Atua are a karekea, n te maiu aei, te atatai ae bwanin n ana babaire te Atua, n raonaki ma te konaa ni kamanenai ana otenanti ao ana berita aika tabu te nakoanibonga are e kabwanina ni kamwakura mwaakan ana mwakuri ni kamaiu te Tia Kamaiu inanon maiura. Aomata naba ake a nakoraoi aia karo a maiu ma te kakaonimaki ni kaineti ma te oota are a karekea, ma a tuai n ongo taekan Iesu Kristo ke ni kaoaki bwa a na bwabetitoaki inanon Arana. Aei e koaua te mwaiti ae te mirion ibuakoia tarira ma mwaanera rinanon rongorongon te aonaaba.

Tabeman a taku bwa e katanginano. A na bae naba n ataia ni kakoaua bwa akea te babaire, akea baika a kainnanoaki ibukin te kamaiuaki—n te namakin are te Atua ae raoiroi ao n tangira e na aki karaoa te babaire are e na tauraoi nakon mwakoroia natin te Atua. Tabeman a bae ni kakoaua bwa e riai te Atua ni kaman moantaai ni baireia antai ibuakoia Natina ake E na kamaiuia ao ni katauraoa te euangkerio nakoia, iai tabeman ake a tuai n ongo te euangkerio tao boni ngaiia ake a na aki “rineaki”

Ma Ngai ao ngkami ti ataia, ibukin koaua ake a kaokaki rinanon te Burabeti Iotebwa Timiti, bwa ana babaire te Atua e tatangira bwa tina tamaroa riki nakon anne. Tamara are i Karawa e ingainga n ikoikotiia ao ni kakabwaiaiia Ana utu ni kabane. Ngkai e ataia bwa tiaki ni kabane ae a na rineia n kan ikotaki, Ana babaire e anganiia natina ni kabane aia tai ni butimwaea ke n totokoa Ana kakao. Ao te utu bon boton raoi ana babaire.

Tabeua tebubua te ririki n nako, te burabeti ae Maraki e taku bwa n te bong ae e nang roko, te Atua e na kanakoa Eria bwa “Ao e na rairi nanoia tama nakoia nati, ao nanoia nati nakoia tama” (Maraki 4:6).

Te taetae ni burabeti aei e bon kakawaki, e taekinna te Tia Kamaiu ngke E kawara Amerika imwiin Utina (taraa 3 Nephi 25:5–6). Ao te Anera Moronaai ngke e kawara te Burabeti Iotebwa Timiti, e taekina naba te taetae ni burabeti ibukin Eria ao nanoia, kaaro ao natiia (taraa Joseph Smith—History 1:36–39).

Te bong aei bon Eberi 1. Uoua te bong mangkai, Eberi 3, e kanikinaean te ka 181 n ririki man te bong are ngke e kakoroaki iai bukin ana taetae ni burabeti Maraki. N te bong anne, e bon roko Eria, ao e angan Iotebwa Timiti te mwaaka n nakoanibonga ibukin kabaeakiia utu n aki toki (taraa D&C 110:13–16).

Man te bong aei ni karokoa ngkai, te nano ni kan kakaei ibukin kateirikian te utu e rikirake ni mwaiti. N te mwaiti ae tabe ni keerake, aomata a taraa ni katikaki riki nanoia nakoia aia bakatibu nakon riki kan ongoraaia n taabo n tangoboki ibukin te kateiriki, bootaki, ao rabakau aika boou a kaoti ni katobibia te aonaaba ni boutoka te tabeaianga aei. Korakoran te intanete ni katamaroa te reitaki e anganiia utu te konaa ni kaai ni mwakuri ni karaoa aia kakae ibukin rikiia aia utu n ae waekoa ae tuai karaoaki n aron aei mai imwaaina.

Bukin tera a bane n riki bwaai aikai? Te bwai ae tamaroa ae ti aranna “tamnein Eria.” Ti aranna naba bwa kakoroan bukin te taetae ni burabeti. I kaota au koaua bwa e a tia n roko Eria. Nanoia naati—natimi ao natiu—a rairaki nakoia ara karo ke ara bakatibu. Te tangira are kam namakinna ibukiia ami bakatibu bon mwakoron kakoroan bukin te taetae ni burabeti. E boboto iaon am namakin are antai ngkoe. Ma e na iai riki ae na karaoaki nakon tii are ko karekea man RIKIM.

N aron te katooto, ngkai kam iriiri ana wirikiriki te Tamnei n reiakin rongorongon rikiia ami utu, kam na kunea bwa ami koraki ae raroa nako e tibwai aron taraakin moamoami ke nanomi ibukin booki ke ami taarena n anene. E kona ni kakukurei aio ao ni ka niniwana. Ma ngkana e toki am mwakuri ikekei, kam na namakinna bwa iai te bwai ae bua. Aio bukina bwa ikoikotakiia ao katiteuanaakiia ana utu te Atua e korakora riki ae na karaoaki nakon ae tii namakinan te tangira. E kainnanoi berita aika tabu ake a karaoaki n reitaki ma otenanti n te nakoanibonga.

Angiina ami bakatibu a tuai karekei otenanti akanne. Ma te Atua e a tia ni katauraoi kawai ake kam na karekei iai otenanti akanne. Ao e ataia te Atua ae kam na kaaniiaki riki ma ami bakatibu inanon te tangira ao kam na karekea te rabakau ae boou ae kainnanoaki ni kinaiia. E ataia naba bwa kam na maeka inanon te tai ngkana e angaraoi nakon tembora aika tabu, ike a karaoaki iai otenanti n te tembora, e na korakora riki nakon rongorongona mai imwaaina. Ao E ataia naba bwa E na onimakini ngkami ni kakoroa bukin te mwakuri n tei ibukiia ami bakatibu.

Ni koauana, ngaira ni kabane iai mwiokoara aika mwaiti aika kataweaki ake a kainnanoi nanora ao ara tai. Ngaira ni kabane ti kunei itera ake e a tia ni kantaningaira iai te Uea bwa ti na karaoi ake a riaon ara konabwai. N te tekeraoi, te Uea e katauraoa te kawai ibukira ni kabane ni karekea te onimaki ao te kukurei inanon ara ibuobuoki ni kabane, n raonaki ma te ibuobuoki ni kateirikian te utu. Ti karekea te korakora ni karaoa are E butiira iai rinanon ara onimaki bwa e aki anga te kaetieti te Uea “ma ti ngkana e a tia ni katauraoa te kawai [ibukia] are [a] na kona iai ni kakoroa bukin te bwai are e tua nakoia bwa a na karaoia” (1 Nibwaai 3:7).

I kakoaua aei n te bwai are I rinanona. Ririki aika mwaiti n nako, ngke ataein te Iuniwetiri, I kaitibo ma te mwaane are e makuri ibukin teuana te kambwana ae bubura ibukin kaombiuta. Aio ni boong ake ngkoa n tain te kaombiuta, ao te tai ae manennanti ana kambwana e kamwananga bwa e na kabooinakoi taian kaombiuta nakon ana Ekaretia Iesu Kristo ibukiia aika Itiaki ni Boong aika Kaitira.

Ni motikan au namakin ibukina, te tia kaboobwai aei akea a na onimaki. Irarikina e taku bwa te kamiimi n akean ana koaua, “N te ekaretia aei a karaoa te bwai are a aranna bwa te “kateiriki” ni kakaei araia aomata ake a tia ni mate, ni kataia ni kinaia aia bakatibu. Aomata, angina aine, a tarai nanon taian kaebineti ake a mena iai beeba, n ukebwaia kanoan beeba aika uarereke ma rongorongoia. Ngkana e eti au ururing, e taku bwa aine a kabonganai taian kau n teeneti bwa a aonga ni birimwaaka riki. E reitia te mwane, “Ngkai I taraa buburan mwaitin te bwai ae a kataia ni karaoia, I noora bonganan karaoan taian kaombiuta.”

Eng, e bon koaua. Tenaan kaombiuta bon te mwakoro ae kakawaki ni mwakuri ibukin kateirikian te utu n taai aika a na roko—tiaki tii tenaan kaombiuta ake e kaboonakoi. Te tia kairiiri man te Ekaretia e rineia bwa e na aki kabooa ana kaombiuta. Te Ekaretia e tataninga te rabakau ae boou bwa n te tai anne e bon tuai kaman iangoaki. Ma I reiakinaki n ririki aika mwaiti bwa e ngae ngke te kabane n tamaroa ni karaobwai n te rabakau ae boou e aki kona n oneakimwiina ma te kaotioti mairoun te Atua, n aron are a karekea taan kairiiri n te Ekaretia. Aio te mwakuri n tamnei, ao te Uea e kairia rinanon Tamneina ae Tabu.

Tabeua te wiiki n nako, I mwakuri iaon rikiia au utu ma au tabonibai irarikiu ao are temanna iaon te tareboon. Iaon te kaombiuta imatau iai te kaangaanga ae riaon korakorau n aomata ni kona n taobaraia. I noori uoua aara, e kanakoaki nakoiu man kamiimin rabakau aika boou, ibukiia aomata ake a bae n tataninga ibukin aia otenanti n te tembora. A kaokoro taian ara, ma iai bukin kakoauana bwa a bae n ae tii temanna aomatana. Tabeu bon baireana bwa tera te koaua iai.

I titirakiniia au taan rabakau bwa a na tuangai. A taku, “Ti aki ko riai n rineia.” Ao a kakoaua raoi bwa N na kunea te koaua. Te kaombiuta, ma korakorana ni kabane ao ana rongorongo, a anganai te kakabwaia n tarai aara akanne iaon te tikuurin, ni ukebwai rongorongo aika tauraoi, ukora aia kakae aomata, n tataro ni karaurau, ao ni kunea te bwai ae koaua. Ngkai I tataro, I ataia ma te koaua tera ae riai ni karaoaki—n aron ae I karekei ni bwaai tabeua ngke I bon riai ni katan iaon te ibuobuoki mai i karawa ni kaotinakoa te reke.

Ti aki ataia karaobwai are e na anai nanoia iai aomata te Atua bwa a na karaoi ni buoka Ana mwakuri ni ikoikotiia Ana utu. Ma baikara kukune aika kamiimi aika a na roko, kamanenakiia a kainnanoa te Tamnei ni mwakuri inanoia aomata n aromi ao ngai. E na aki riki aei bwa te kamiimi nakoira. Ni katurua te koaua, aikai bon natin te Atua mwaane ao aine. E na anga kairiiri ni baike a kainnanoaki n anganiia aia tai bwa a na manga okiria.

Ririki aika nako, kairake n te Ekaretia a tia ni kaeka n tamnein Eria ni kawai aika kaunganano. Angiina ngkai a tia ni karekei aia beeba ni kariaiakaki nakon te Tembora ae tianaki taina ao ni kamanena n taainako. Te bwabetito n te tembora e katabetabe riki nakon are mai imwaaina; tabeua tembora a kataia ni kangaraoia ma aia tai ni buoka rikiraken mwaitiia kairake ake a roroko n tembora.

E burenibwai mai imwaina ma ti butimwaeakiia kairake ni uooti araia aia bakatibu nakon te tembora e onoti. Ngkai bon te bwai ae riiriki, ao n angin te tai bon tii kairake i bon irouia ake a kuneiia aia bakatibu akanne.

N raonaki ma aei, angiina kairake a kunea bwa kamanenaan oin aia tai ni karaoa aia kakae ibukin rikin te utu ao te mwakuri n te tembora e a tia ni kakorakorai aia koaua ibukin te babaire ni kamaiu. E a tia ni karikirakea namakinan te Tamnei inanon maiuia ao ni kauarerekea namakinan ana waaki teuare buakaka. E a tia ni buokiia ni kaniiaki riki ma aia utu ao ni kaniiaki ma te Uea. A tia n reiakinaki bwa te mwakuri aio e aki tii kamaiuiia maate, e kamaiuiira ni kabane. (taraa D&C 128:18).

A tia kairake ni karekea aia taratara ae riai; ngkai aia karo a riai ni karaoa naba nne. Iai ngkai aomata aika mwaiti ake a tia ni butimwaea te bwabetito n te aonaaba n tamnei, ibukin te mwakuri are e a tia ni katiaaki irouia kairake, ao a tataninga ibukin tabeua otenanti ake tii ikawai ake a kona ni karaoi inanon te tembora. Te mwakuri n ikotakiia ana utu te Atua tiaki tii ibukiia kairake, ao tiaki tii ibukiia tibuia. Bon ibukiia aomata ni kabane. Ngaira ni kabane taan bobotiia aomata.

Aio te mwakuri ibukiia ara roro, te bwai are e aranna te Abotoro are Bauro “ngkana a koro raoi bongina,” ngke te Atua E na “boti b’ai ni kabane, aika b’aini karawa ma b’ain aonaba; i nanoni Kristo” (I-Ebeto 1:10). E kona ni karaoaki aei rinanon ana mwakuri ni kamaiu Natin te Atua ae Tangiraki, Iesu Kristo. Ibukina, kaain ara utu, “ngkami aika kam mena i kiraroa ngkoa, Kam riki ni kan i nanon rarani Kristo. Ba ara raoi Teuarei, are karaoi uoua ba teuana, ao E urua te roki ni kakokoro are i nuka” (I-Ebeto 2:13–14). Kam a tia n namakina aio, ngkai I a tia, ngke kam a tia n rinanon rikiraken ami tangira ngkai kam taraa tamneia ami bakatibu. Kam a tia n namakinna n te tembora, ngke e taraaki te ara are iaon te beeba bwa e riaon riki ae tii te ara, ao e aki toki namakinana iroumi ae te aomata anne e ataiko ao e namakina am tangira.

I kakoaua bwa te Atua te Tama e tangiriia natina bwa a na manga okiria, inanon aia utu ao n te mimitong. E maiu te Tia Kamaiu. E kaira ao e kakabwaia te mwakuri aei, ao E tararuaira ao ni kawakiniira. E karabwai ngkami ibukin ami ibuobuoki ae kakaonimaki n ikotakiia Ana utu Tamana, ao I berita nakoimi ni buokami are kam ukoukoria ao ni kainnanoia. N aran Iesu Kristo, amen.