Ang Pagtipon sa Pamilya sang Dios

Palangga nga mga kautoran, ginakalipay ko gid nga makaupod kamo sa sining sesyon sang kabilogan nga konperensya. Ginaabi-abi ko gid kamo sing maayo.

Ang kabilogan nga konperensya permi gid nga tion sang pagtililipon para sa mga Santos sa Ulihing Mga Adlaw. Nalampuwasan na naton ang magtililipon sa isa lamang ka lugar, apang ang Ginuo nagahatag sang mga paagi nga ang mga bugay sang kabilogan nga konperensya makalab-ut sa inyo bisan diin man kamo. Samtang dalayawon gid nga makit-an ang pagtililipon sang mga Santos sa sining daku nga Conference Center, kami nga ari diri sa pulpito dalayon nga nagalantaw sa amon kaisipan sang minilyon nga katawhan nga nagtililipon upod sa aton sa palibot sang kalibutan agud maglantaw kag magpamati sa konperensya. Madamo sa inyo ang nagtililipon nga kaupod ang inyo mga pamilya; ang pila siguro kaupod ang mga abyan ukon mga miyembro sang Simbahan.

Bisan diin man kamo kag bisan paano ninyo mabatian ang akon tingog, palihug hibaloi nga bisan wala kamo sa amon atubang, nabatyagan namon nga kaupod namon kamo sa espiritu. Ginalauman namon nga kamo tanan nagabatyag nga upod namon—nga mabatyagan ninyo ang espirituhanon nga gahum nga nagaabot kon san-o ang hubon sang mga tumuluo nagatililipon sa ngalan ni JesuCristo.

Ginpabatyag ako nga magpamulong karon nga adlaw sa inyo parte sa iban nga sahi sang pagtililipon. Ini nga sahi wala nagakatabo kada anum ka bulan lamang, subong sang kabilogan nga konperensya. Sa luyo sini, ini padayon nga nagakatabo halin sa unang mga adlaw sang Pagpanumbalik sang Simbahan, kag ini nagdasig pa gid sa bag-ong nagligad nga mga tinuig. Ginatumod amo ang pagtililipon sang pamilya sang Dios.

Agud ilaragway ining pagtipon, mas labing maayo kon kita magsugod antes kita ginbun-ag, sa panahon nga ginatawag sa Biblia “ang sinugoran” (Genesis 1:1). Sinang tion, nangabuhi kita nga upod ang aton Langitnon nga Amay bilang mga anak Niya sa espiritu. Ini matuod sa kada tawo nga nabuhi gid sa kalibutan.

Ti, ang mga ngalan nga “brother” ukon “sister” indi lamang mainabyanon nga mga panamyaw ukon malolo nga pagtawag sa kada isa sa aton. Ang mga ini pahayag sang walay katapusan nga kamatuoran: ang Dios matuod nga Amay sang tanan nga katawhan; kita tanan kabahin sang Iya walay katapusan nga pamilya. Bangud palangga Niya kita sa pagpalangga sang isa ka perpekto nga Amay, luyag Niya nga kita mag-uswag kag mag-abanse kag mangin kasubong Niya. Naghimo Sia sang isa ka plano kon diin kita makadto sa duta, sa mga pamilya, kag mag-angkon sang mga inagihan nga magahanda sa aton nga magbalik sa Iya kag mangabuhi subong sa Iya.

Ang sentro nga elemento sining plano amo ang promisa nga si JesuCristo magahalad sang Iya kaugalingon bilang sakripisyo, agud luwason kita halin sa sala kag kamatayon. Ang buluhaton naton sa plano nga ina amo ang magbaton sa sakripisyo sang Manluluwas paagi sa pagtuman sang mga layi kag mga ordinansa sang ebanghelyo. Kamo kag ako nagbaton sining plano. Matuod, kita nagkinalipay bangud sini, bisan nga ini nagakahulogan nga biyaan naton ang presensya sang aton Amay kag malimtan ang naagyan naton didto upod sa Iya.

Apang wala kita nag-abot diri sa lubos nga kadulom. Ang kada isa sa aton ginhatagan sang isa ka bahin sang kapawa sang Dios, gintawag nga “Kapawa ni Cristo,” agud magtabang sa aton nga makabalo sang maayo kag malaut, husto kag sayup. Bangud sini bisan yadtong nangabuhi nga may diutay ukon wala sang nabal-an parte sa plano sang Amay sarang sa gihapon makabatyag, sa ila mga tagipusuon, nga ang pila ka mga buhat matarong kag moral samtang ang iban indi.

Ang aton ihibalo parte sa husto kag sala daw pinasahi nga labing maayo kon kita nagapadaku sang aton mga anak. Kinaandan sa halos tanan nga mga ginikanan ang maghandum nga tudloan ang ila mga anak sang moral nga mga birtud. Ini bahin sang milagro sang plano sang Langitnon nga Amay. Luyag Niya nga ang Iya mga anak magkadto sa duta sa mga pamilya, suno sa sulundan nga walay katapusan sang mga pamilya sa langit. Ang mga pamilya amo ang naunang bahin sang mga organisasyon sang walay katubtoban, gani gintuyo Niya nga ang mga ini amo man ang naunang bahin diri sa duta. Bisan nga ang dutan-on nga mga pamilya indi perpekto, ang mga ini nagahatag sa mga anak sang Dios sang pinakalabing maayo nga tsansa agud abiabihon sa kalibutan sa pagpalangga nga amo lamang ka pareho sa aton nabatyagan sa langit—pagpalangga sang ginikanan. Ang mga pamilya amo man ang pinakalabing maayo nga paagi agud mapabilin kag mapadayon ang moral nga mga birtud kag matuod nga mga prinsipyo nga sa kalabanan magagiya sa aton balik sa atubang sang Dios.

Labing diutay lamang sa mga anak sang Dios ang makaangkon, diri sa sining kabuhi, sang lubos nga paghangop parte sa plano sang Dios, kaupod ang pagbaton sang mga ordinansa sang priesthood kag mga kasugtanan nga makahimo sa nagapasag-uli nga gahum sang Manluluwas sing lubos nga nagabuhat sa aton mga kabuhi. Bisan yadtong may pinakalabing maayo nga mga ginikanan sarang magtuman sing himpit suno sa kapawa nga ila ginaangkon apang wala makabati parte sa kay JesuCristo kag sa Pagpasag-uli Niya ukon maagda nga bunyagan sa Iya ngalan. Ini nangin matuod sa di-maisip nga minilyon nga kautoran naton sa bug-os nga kasaysayan sang kalibutan.

Ang pila sarang magkabig nga ini di-makatarongan. Sarang nila kabigon ini nga ebidensya nga wala sing plano, nga wala sang gintalana nga mga kinahanglanon para sa kaluwasan—nagabatyag nga ang isa ka matarong, mapinalanggaon nga Dios indi maghimo sang plano nga ara lamang sa labing diutay nga bahin sang Iya mga anak. Ang iban siguro magpamat-ud nga ang Dios nagbuot sang una pa kon sin-o sa Iya mga anak ang Iya luwason kag hatagan sang ebanghelyo, samtang yadtong mga wala makabati sa ebanghelyo simple nga wala “ginpili”.

Apang kamo kag ako nakabalo, bangud sa mga kamatuoran nga ginpanumbalik paagi sa kay Propetang si Joseph Smith, nga ang plano sang Dios mas mapinalanggaon sangsa amo sina. Ang Langitnon nga Amay naton luyag gid magtipon kag magbugay sa tanan sang Iya pamilya. Samtang nabal-an Niya nga indi tanan sa ila ang magpili nga tiponon, ang plano Niya nagahatag sa kada isa sang Iya mga anak sang oportunidad nga magbaton ukon magsikway sang Iya pangagda. Kag ang mga pamilya amo ang sentro sining plano.

Ginatos ka tuig nga nagligad, ang propeta nga si Malachi nagsiling nga sa maabot nga adlaw, ang Dios magasugo kay Elijah sa “pagpaulikid sang tagipusuon sang mga amay sa mga anak, kag sa tagipusuon sang mga anak sa ila mga amay” (Malachi 4:6).

Ining panagna labi ka importante, nga ang Manluluwas nagsambit sini sang Sia nagbisita sa Americas pagkatapos sang Iya Pagkabanhaw (see 3 Nephi 25:5–6). Kag sang ang anghel nga si Moroni nagbisita kay Propetang si Joseph Smith, sia man nagsambit sang panagna parte kay Elijah kag mga tagipusuon, mga amay, kag mga anak (see Joseph Smith—History 1:36–39).

Karon nga adlaw Abril 1. Duha ka adlaw sugod karon, Abril  3, magmarka sang ika-siento-otsentay-uno ka tuig halin sa adlaw nga ang panagna ni Malachi natuman. Sa sinang adlaw, si Elijah nag-abot, kag sia naghatag kay Joseph Smith sang gahum sang priesthood agud maghugpong sang mga pamilya sa walay katubtoban (see D&C 110:13–16).

Halin sinang adlaw tubtob karon, ang huyog sa pagtukib parte sa kasaysayan sang pamilya naglambo sing tuman kadaku. Sa wala pa makit-an nga paglambo, ang katawhan daw sa nagpalapit sa ila katigulangan labaw sangsa kinaandan lamang nga kuryosidad. Ang mga genealogical library, mga asosasyon, kag mga teknolohiya nagtuhaw sa palibot sang kalibutan agud magsuporta sining huyog. Ang gahum sang internet nga magpanami sang mga komunikasyon nagpakasarang sa mga pamilya nga ululupod nga magbuhat sang family history research sa kadasig kag pagkapulido nga sang una di-posible.

Ngaa ini tanan nagkalatabo? Bangud kay wala sing husto nga tinaga, ginatawag naton ini nga “espiritu ni Elijah.” Angay man naton tawgon ini nga “katumanan sang panagna.” Nagasaksi ako nga si Elijah nag-abot. Ang mga tagipusuon sang mga anak—ninyo kag akon—nag-ulikid sa aton mga amay, kag aton mga katigulangan. Ang pagpalangga nga inyo nabatyagan para sa inyo mga katigulangan bahin sang katumanan sinang panagna. Tudok ini sa inyo nabal-an kon sin-o kamo. Apang ini may kahilabtanan labaw sangsa ginpanubli ninyo nga DNA.

Halimbawa, samtang ginasunod ninyo ang mga pagpabatyag sa pagtuon parte sa kasaysayan sang inyo pamilya, basi matukiban ninyo nga ang isa ka malayo nga paryente nagaambit sang pila ka mga kinaiya sang inyo guya ukon sang inyo huyog sa mga libro ukon sa talento sang pag-amba. Ini sarang nga mangin labing makawiwili ukon makahulogan. Apang kon ang inyo buluhaton nag-untat dira, mabatyagan ninyo nga may isa ka butang nga kulang. Ini bangud nga ang pagtipon kag pagpahiliugyon sang pamilya sang Dios nagakinahanglan sang mas kapin sangsa maayo nga mga balatyagon. Ini nagakinahanglan sang sagradong mga kasugtanan nga ginhimo nga may kaangtanan sa mga ordinansa sang priesthood.

Madamo sa inyo mga katigulangan ang wala makabaton sadtong mga ordinansa. Apang sa kaalwan sang Dios, kamo nakabaton sini. Kag nabal-an sang Dios nga kamo makabatyag sang pagkamalapit sa inyo mga katigulangan sa pagpalangga kag kamo makaangkon sang teknolohiya nga kinahanglanon agud makilala sila. Nabal-an man Niya nga kamo mangabuhi sa tion nga ang pagkadto sa balaan nga mga templo, kon diin ang mga ordinansa sarang buhaton, mas madali gid sangsa nagligad nga panahon. Kag nabal-an Niya nga Sia makasalig sa inyo nga buhaton ining buluhaton para sa inyo mga katigulangan.

Huo, kita tanan may madamo nga nagapamilit kag importanteng mga responsibilidad nga nagakinahanglan sang aton atensyon kag tion. Tanan kita makatukib nga may mga bahin sa mga ginalauman sang Ginuo nga buhaton naton nga labaw sangsa aton mga abilidad. Maayo lang, ang Ginuo naghatag sang paagi para sa kada isa sa aton nga makaangkon sang kumpiyansa kag kalipay sa tanan naton nga pag-alagad, kalakip na ang pag-alagad sa family history. Makaangkon kita sang kabakod nga magbuhat sang ginapangayo Niya paagi sa aton pagtuo nga ang Manluluwas wala nagahatag sang sugo “luwas nga magahanda sia sang paagi para sa [aton] nga [kita] sarang maghimo sang butang nga iya ginsugo” (1 Nephi 3:7).

Nabal-an ko nga matuod ini halin sa akon inagihan. Madamo na nga tuig ang nagligad, bilang estudyante sa unibersidad, nasugata ko ang isa ka lalaki nga nag-obra sa isa sa pinakadaku nga mga computer company sa kalibutan. Ini sa naunang panahon sang computer, kag natabo lamang nga sia ginpadala sang iya kompania agud magbaligya sang mga computer sa Ang Simbahan ni JesuCristo sang Mga Santos sa Ulihing Mga Adlaw.

Sa pagkabalo ko, ining manugbaligya wala sang relihiyon. Apang sia nagsiling nga may pagkatingala kag pag-irita, “Sa sining Simbahan sila nagabuhat sang ginatawag nila nga ‘genealogy,’ nagapangita sang mga ngalan sang mga tawo nga nagtaliwan, nagatinguha sa pagkilala sang ila mga katigulangan. Nagaparikparik ang mga tawo, kalabanan mga babayi, palibot sa mga filing cabinet, nagapangita paagi sa diutay nga mga tarheta sang mga impormasyon.” Kon husto ang pagdumdum ko, nagsiling sia nga ang mga babayi nagasuksok sang tennis agud makaduludalagan sing mas madasig. Ang tawo nagpadayon, “Samtang nakita ko ang kadakuon sang ila ginatinguhaan nga buhaton, nadiparahan ko nga akon natukiban ang rason kon ngaa naimbento ang mga computer.”

Ti, husto sia apang di-lubos. Ang mga computer mangin isa ka importanteng bahin sang palaaboton sang buluhaton family history—apang indi lamang ang mga computer nga ginabaligya niya. Ang isa ka lider sang Simbahan nga may inspirasyon ang nagpili nga indi pagbaklon ang mga computer niya. Ang Simbahan naghulat sang teknolohiya nga sadto nga tion wala pa gid mahunahunaan. Apang natun-an ko sa madamo nga mga tinuig sugod sadto nga bisan ang pinakalabing maayo nga teknolohiya indi sarang magbaylo sa bugna halin sa langit, subong sa sahi nga ginbaton sinang lider sang Simbahan. Ini espirituhanon nga buluhaton, kag ang Ginuo nagadirekta sini paagi sa Iya Balaan nga Espiritu.

Sang pila ka simana nga nagligad, nagabuhat ako sa akon family history upod ang isa ka consultant sa akon tupad kag isa ka manugbulig sa telepono. Sa computer screen sa akon atubang may isa ka problema nga mas kapin sangsa akon mortal nga ikasarang para solbahon. Nakit-an ko ang duha ka ngalan, ginpadala sa akon paagi sa mga katingalahan sang teknolohiya, sang mga tawo nga basi nagahulat sa isa ka ordinansa sang templo. Apang ang problema amo nga ang mga ngalan magkatuhay, apang may isa ka rason nga basi ang mga ini pareho nga tawo. Ang akon buluhaton amo ang magpamat-ud kon ano ang husto.

Ginpamangkot ko ang mga consultant nga hambalan ako. Siling nila, “Indi, ikaw ang dapat magpamat-ud.” Kag sila lubos nga sigurado nga matukiban ko ang kamatuoran. Ang computer, upod ang tanan nga gahum sini kag impormasyon, nagbugay sa akon nga ako magtulok sing madugay sa screen, magtulotimbang sa ara nga impormasyon, magpangusisa sa iban pa nga pagsiyasat, magpangamuyo sang mahipos, kag magtukib kon ano ang matuod. Samtang nagpangamuyo ako, nabal-an ko sing pat-ud kon ano ang akon buhaton—subong sa iban pa nga mga sitwasyon nga naagyan ko kon kinahanglan ko ang langitnon nga bulig agud solbahon ang isa ka problema.

Wala naton mabal-an kon ano nga mga katingalahan ang mabuhat sang katawhan paagi sa inspirasyon sang Dios agud makabulig sa Iya buluhaton sa pagtipon sang Iya pamilya. Apang bisan ano nga makatilingala nga mga imbensyon ang sarang mag-abot, ang paggamit sa mga ini nagakinahanglan sang Espiritu nga nagabuhat sa inyo kag sa akon. Labi sa tanan, ang mga ini pinalangga nga mga anak nga lalaki kag babayi sang Dios. Sia magapadala sang kon ano man nga inspirasyon nga kinahanglanon agud hatagan sila sang oportunidad nga makabalik sa Iya.

Sa bag-o lang nga mga tinuig, ang batan-on sang Simbahan nagresponde sa espiritu ni Elijah sa paagi nga makahatag sang inspirasyon. Ang madamo sa ila karon may ara sang limitado nga temple recommend kag ginagamit ini sing masami. Ang mga bulunyagan sang templo mas labing masako gid sangsa nagligad; ang pila gani ka mga templo nagbag-o sang ila mga schedule agud mabaton ang nagdugang nga mga numero sang batan-on nga katawhan nga nagatambong sa templo.

Sang una talagsahon apang ginakalipay nga di-kinaandan ang batan-on nga magdala sang mga ngalan sang ila kaugalingon nga mga katigulangan sa templo. Karon ini amo ang naandan, kag mas masami sila mismo, ang mga batan-on, ang nakasapo sining mga katigulangan.

Dugang pa, madamo sa batan-on nga nakatukib nga ang maghatag sang ila panahon sa pagbuhat sang family history research kag buluhaton sa templo nagapadalum sang ila pagpamatuod parte sa plano sang kaluwasan. Ini nagadugang sang impluwensya sang Balaan nga Espiritu sa ila mga kabuhi kag nagabuhin sang impluwensya sang kaaway. Ini nagbulig sa ila nga mas nagapalangga sa ila mga pamilya kag mas malapit sa kay Ginuong JesuCristo. Natun-an nila nga ining buluhaton nagaluwas sa indi lamang nagtaliwan; ini nagaluwas sa aton tanan (see D&C 128:18).

Ang batan-on dalayawon nga nakakuha sining palanan-awon; karon ang mga ginikanan nila ang kinahanglan nga maglagas. May ara karon sing madamo nga katawhan nga nagbaton sang bunyag sa kalibutan sang espiritu, bangud sa buluhaton nga nahimo sang batan-on, kag sila nagahulat sa iban pa nga mga ordinansa nga ang mga hamtong lamang ang sarang maghimo sa mga templo sa kalibutan. Ang buluhaton sang pagtipon sang pamilya sang Langitnon nga Amay indi lamang para sa mga batan-on, kag indi ini para lamang sa mga lolo kag lola. Ini para sa tanan. Kita tanan mga manugtipon.

Ini buluhaton sang aton henerasyon, amo nga gintawag ni Apostol Paul “ang dispensasyon sang kabug-osan sang mga panahon,” sang sia nagsiling kon san-o ang Dios luyag “pagaisahon ang tanan nga mga butang kay Cristo, sa langit kag sa duta; kag ipasakop sa iya pagdumala” (Ephesians 1:10). Sarang mahimo ini paagi sa nagapasag-uli nga buluhaton sang Pinalangga nga Anak sang Dios, si JesuCristo. Bangud sa Iya, ang mga miyembro sang aton pamilya, “nga sang kaisa malayo karon malapit na paagi sa dugo ni Cristo. Bangud sia ang aton paghidaet, nga nag-isa sa aton, kag nagguba sang pader nga nagapatunga sa aton” (Ephesians 2:13–14). Nabatyagan ninyo ini, subong ko, sang nabatyagan ninyo ang pagdugang sang pagpalangga samtang ginalantaw ninyo ang litrato sang isa ka katigulangan. Nabatyagan ninyo ini sa templo sang ang ngalan sa tarheta daw sa nangin mas kapin sangsa ngalan, kag indi ninyo malikawan nga mabatyagan nga ining tawo nakabalo sa inyo kag nakabatyag sang inyo pagpalangga.

Nagasaksi ako nga ang Dios nga Amay luyag ang Iya mga anak nga makapauli liwat, sa mga pamilya kag sa himaya. Ang Manluluwas nagakabuhi. Sia ang nagadirekta kag nagabugay sa sining buluhaton, kag Sia nagabantay kag nagagiya sa aton. Nagapasalamat Sia sa himpit ninyo nga pag-alagad sa pagtipon sa pamilya sang Iya Amay, kag ginapromisa ko ang tabang nga may inspirasyon nga ginapangita kag kinahanglan ninyo. Sa ngalan ni JesuCristo, amen.