Coj Vajtswv Tsev Neeg Los Sib Sau Ua Ke

Kuv cov kwv tij thiab cov muam, kuv zoo siab uas kuv muaj lub cib fim nrog nej nyob thaum lub sij hawm uas lub tuam rooj sab laj yuav pib. Kuv zoo siab txais tos nej sawv daws.

Lub sij hawm muaj lub tuam rooj sab laj yeej los yog ib lub sij hawm uas Tsoom Haiv Neeg Ntseeg hauv Hnub Nyoog Kawg sib sau ua ke. Ntev los lawm peb coob heev ces sib sau ua ke nyob ntawm ib qho chaw tsis tau, tiam sis tus Tswv tau npaj kev rau peb tau txoj koob hmoov koom tau lub tuam rooj sab laj txawm tias peb nyob qhov twg los xij. Txawm hais tias yeej yog ib qho xav tsis thoob li uas pom Tsoom Haiv Neeg Ntseeg coob hauv lub Tsev rau Rooj Sab Laj no los, peb cov uas sawv ntawm lub sam thiaj no yeej los xav txog ib txhiab vam leej neeg uas nrog peb sib koom ua ke thoob plaws lub ntiaj teb los saib thiab mloog rau lub tuam rooj sab laj no. Nej feem coob yog sib sau ua ke nrog nej tej tsev neeg; ho nej ib txhia sib sau ua ke nrog nej cov phooj ywg los yog lwm tus mej zeej hauv lub Koom Txoos.

Txawm tias nej nyob qhov twg, txawm tias nej hnov kuv lub suab li cas, txawm tias nej tsis nrog peb nyob ntawm no kiag los, thov kom nej paub hais tias peb xam tias nej nyob no tiag. Peb cia siab hais tias nej txhua tus yuav nrog peb koom siab—thiab yuav hnov tau lub hwj chim ntawm sab ntsuj plig uas los tau rau cov ntseeg uas sib sau ua tuav Yexus Khetos lub npe.

Hnub no tus ntsuj plig hais kom kuv hais lus rau nej txog lwm txoj kev sib sau ua ke. Txoj kev sib sau ua ke no tsis muaj tsuas yog thaum txhua rau lub hli xwb, ib yam li lub tuam rooj sab laj no. Txoj kev sib sau ua ke no tau muaj txij thaum lub Koom Txoos Txum Tim Rov Qab Los, thiab tau ob peb xyoos no txoj kev sib sau no tau khiav ceev zog. Txoj kev sib sau uas kuv hais txog no yog txoj kev sau Vajtswv tsev neeg ua ke.

Hais txog txoj kev sib sau ua ke no, tej zaum yuav zoo yog tias peb pib tham txog lub sij hawm ua ntej peb yug los, ua ntej lub sij hawm uas Phau Vaj Lug Kub Npaiv Npaum hu ua lub sij hawm “chiv keeb” (Genesis 1:1). Thaum lub sij hawm ntawd, peb nrog Leej Txiv Saum Ntuj Ceeb Tsheej nyob ua Nws cov me nyuam ntsuj plig. Nov muaj tseeb hais txog txhua tus neeg uas ua neej nyob hauv lub ntiaj teb no.

Tej zaum nej to taub hais tias cov npe “kwv” los yog “tij laug” los yog “muam” tsis yog lam tau lam hu li ntawd. Cov lus no qhia ib qho tseeb hais tias: Vajtswv yog Leej Txiv ntawm noob neej ntiaj teb; peb txhua tus koom Nws tsev neeg nyob mus ib txhis li. Vim peb Leej Txiv hlub peb yam zoo tag nrho li, Nws xav kom peb ua neeg zoo zuj zus tuaj thiab rais los mus ua neeg zoo li Nws. Nws tau npaj ib txoj hau kev uas yuav cia peb los nyob hauv lub ntiaj teb no, ua tsev neeg, thiab ua tej yam uas yuav npaj peb rov qab mus ntsib Nws thiab ua neej nyob ib yam li Nws.

Lub hauv paus tseem ceeb ntawm txoj hau kev no yog qhov uas cog tseg hais tias Yexus Khetos yuav tuag theej peb lub txhoj. Peb lub luag hauj lwm yog kom txais yuav tus Cawm Seej txoj kev txi thaum peb ua raws li tej kev cai thiab tej kab ke ntawm txoj moo zoo. Nej thiab kuv tau txais yuav txoj hau kev no. Txawm hais tias peb yuav tsum ncaim tawm ntawm peb Leej Txiv thiab tsis nco qab txog tej yam uas muaj los thaum peb nrog Nws nyob los, tiag tiag, peb zoo siab heev txog txoj hau kev no.

Tiam sis Leej Txiv tsis tau muab peb xa rau hauv no es tsis muaj kev pab. Peb txhua tus muaj ib feem ntawm Vajtswv qhov kaj, uas hu ua txoj “Kev Kaj ntawm Khetos,” kom thiaj pab peb txiav txim siab saib qhov twg yog qhov zoo thiab qhov phem. Yog vim li no cov neeg uas tsis tshua paub txog Leej Txiv txoj hau kev tseem hnov tau hauv lawv lub nruab siab hais tias muaj tej yam uas yog ncaj ncees thiab tej yam uas tsis ncaj.

Qhov uas peb paub qhov yog tawm ntawm qhov tsis yog yeej zoo heev thaum peb cob qhia peb cov me nyuam. Yuav luag txhua leej niam leej txiav muaj lub siab xav qhia lawv cov me nyuam coj ncaj ncees. Nov yog ib feem ntawm Leej Txiv Saum Ntuj Ceeb Tsheej txoj hau kev zoo. Nws xav kom Nws cov me nyuam nqis los nyob hauv lub ntiaj teb no ua tej tsev neeg, es muaj raws li tus qauv uas muaj saum ntuj ceeb tsheej. Tej tsev neeg yog pawg neeg tseem ceeb tshaj plaws hauv lub ntuj nyob mus ib txhis li, thiab yog vim li ntawd Vajtswv thiaj xav kom muaj tsev neeg nyob hauv ntiaj teb no thiab. Txawm hais tias tej tsev neeg nyob ntiaj teb no tsis zoo tag nrho hlo li, qhov uas muaj tsev neeg muab lub cib fim zoo tshaj plaws rau Vajtswv cov me nyuam kom muaj niam muaj txiv hauv lub ntiaj teb no ib yam li lawv muaj saum ntuj ceeb tsheej. Qhov uas muaj tsev neeg yog qhov zoo tshaj kom thiaj ceev cia thiab qhia txog tej kev tsim txiaj thiab tej ntsiab cai tseeb uas feem ntau yuav coj peb rov qab mus cuag Vajtswv.

Tsuas yog ib feem tsawg tsawg ntawm Vajtswv cov me nyuam thiaj to taub zoo txog Vajtswv txoj hau kev hauv lub neej no, ua ke nrog kev txais tej kab ke ntawm lub pov thawj hwj thiab tej kev khi lus uas coj lub hwj chim ntawm tus Cawm Seej txoj kev theej txhoj los rau hauv lawv lub neej. Twb yog lawv cov uas muaj niam txiv zoo heev tej zaum lawv yuav ua tau neeg zoo raws li qhov kaj uas lawv muaj tiam sis lawv yuav tsis hnov txog Yexus Khetos los yog raug caw los ua kev cai raus dej tuav Nws lub npe. Nov muaj tseeb rau ib txhiab vam vam leej neeg thoob plaws keeb kwm ntiaj teb.

Tej zaum ib txhia neeg yuav xav hais tias qhov uas hais no tsis ncaj. Tej zaum lawv yuav saib qhov no ua puav pheej hais tias tsis muaj ib txoj hau kev, tsis muaj tej yam uas lawv yuav tsum ua kom thiaj tau kev cawm dim—tej zaum lawv xav tias ib tug Vajtswv uas ncaj yuav tsis tsim ib txoj hau kev uas muaj rau ib feem ntawm Nws cov me nyuam xwb. Ho tej zaum lwm tus neeg yuav hais tias Vajtswv twb txiav txim siab lawm ua ntej saib Nws yuav cawm tus twg ntawm Nws cov me nyuam thiab tau muab txoj moo zoo rau lawv, ho lawv cov uas tsis tau hnov txog txoj moo zoo yog cov uas tsis tau “xaiv.”

Tiam sis nej thiab kuv paub, vim yog tej qhov tseeb uas tus Yaj Saub Yauxej Xamiv txum tim rov qab los, paub hais tias Vajtswv txoj hau kev yeej txawj hlub thiab yeej ncaj dua ntawd. Peb Leej Txiv Saum Ntuj Ceeb Tsheej yeej muaj lub siab xav sau ua ke thiab foom koob hmoov rau tag nrho Nws tsev neeg. Txawm tias Vajtswv paub hais tias lawv feem coob yuav xaiv kom tsis los cuag Nws, los Nws muab cib fim rau Nws cov me nyuam txhua tus kom txais los yog xyeej Nws cov lus caw. Thiab tsev neeg yog lub ntsiab ntawm txoj hau kev no.

Ntau tiam dhau los, tus yaj saub Malakhis hais tias yuav muaj ib hnub uas Vajtswv yuav xa Eliyas kom “tig cov yawg koob lub siab mus xav txog cov me nyuam, thiab cov me nyuam tej siab mus rau lawv cov yawg koob” (Malakis 4:6).

Qhov uas yuav muaj los yav tom ntej no tseem ceeb heev npaum li tus Cawm Seej hais txog thaum Nws nqis los xyuas teb chaws Amelikas tom qab Nws sawv hauv qhov tuag rov qab los (saib 3 Nifais 25:5–6). Thiab thaum tus tim tswv Maulaunais tshwm sim rau tus Yaj Saub Yauxej Xamiv pom, nws kuj hais txog qhov uas yuav muaj los yav tom ntej no hais txog Eliyas thiab tej yawg koob thiab tej me nyuam kev sib nrhiav (saib Joseph Smith—History 1:36–39).

Hnub no yog lub Plaub Hlis Ntuj hnub tim 1. Ob hnub saum no, lub Plaub Hlis Ntuj hnub tim 3, yog 181 xyoos txij ntawm hnub uas qhov uas yuav muaj los yav tom ntej hais txog Malakhis raug muaj los. Hnub ntawd, Eliyas tau tshwm sim los, thiab nws muab lub hwj chim ntawm pov thawj hwj rau Yauxej Xamiv uas yuav tsum muaj kom thiaj muab tsev neeg sib khi ua ke mus ib txhis li (saib Q&K 110:13–16).

Txij thaum hnub ntawd los rau niaj hnub nim no, qhov uas tib neeg nrhiav keeb kwm txog lawv cov poj koob yawm txwv tau loj hlob tuaj ntau tsis ntau li. Niaj hnub no, tib neeg coob heev xav nrhiav kom tau saib lawv cov poj koob yawm txwv yog leej twg. Tej koom haum pab nrhiav caj ceg thiab tej tshuab hlwb hlau uas pab tib neeg nrhiav tau muaj los thoob plaws lub ntiaj teb no kom thiab txhawb nqa cov neeg uas xav nrhiav. Qhov uas Internet muaj hwj chim pab kom tib neeg sib txuas lus tau yam zoo heev li tau pab tej tsev neeg ua hauj lwm ua ke kom nrhiav keeb kwm tsev neeg sai heev, es ua ntej no ua tsis tau li ntawd.

Yog vim li cas thiaj muaj li no? Peb hu qhov no ua “lub txiaj ntsim ntawm Eliyas.” Peb kuj hais tau hais tias yog ib qho uas yuav muaj los yav tom ntej uas muaj los lawm. Kuv ua tim khawv hais tias Eliyas tau tshwm sim los tiag. Peb tej siab tej ntsws tau tig los mus rau peb tej yawg koob, peb tej poj koob yawm txwv tiag. Qhov uas nej muaj lub siab xav nrhiav kom tau nej tej caj ceg yog qhov uas yuav muaj los yav tom ntej ntawd muaj los tiav tas lawm. Yog ib yam uas nyob tob tob hauv nej lub siab lub ntsws. Tiam sis yeej yog ib yam uas hais txog ntau tshaj yus lub keeb xwb.

Piv txwv hais tias, thaum nej ua raws li tej kev tshoov siab thiab kawm txog nej tsev neeg tej keeb kwm, tej zaum nej yuav nrhiav pom tias ib tug neeg uas txheeb nej lub ntsej muag zoo ib yam li nej li los yog nws nyiam nyeem ntawv ib yam li nej los yog nws txawj hu nkauj ib yam li nej. Tej no yeej ntxim paub txog thiab tiag. Tiam sis yog tias nej tso tseg li ntawd, nej yuav xav hais tias tseem tshuav ib qho uas tsis tau ua. Nov yog vim rau qhov uas txoj kev coj Vajtswv tsev neeg los sib sau ua ke yuav tsum muaj ntau tshaj qhov uas sov siab so xwb. Yuav tsum muaj tej kev khi lus uas khi ua ke nrog tej kab ke pov thawj hwj.

Nej cov poj koob yawm txwv feem coob tsis tau txais tej kab ke ntawd. Tiam sis vim yog tau koob hmoov ntawm Vajtswv, nej tau txais lawm. Thiab Vajtswv paub hais tias nej yuav muaj lub siab xav kawm paub txog nej tej poj koob yawm txwv thiab hais tias nej yuav muaj tej tshuab thev nab las ntsis uas yuav tsum muaj kom thiaj nrhiav tau lawv. Vajtswv kuj paub hais tias nej yuav ua neej nyob hauv ib lub sij hawm uas mus xyuas lub tuam tsev tau yooj yim heev, es nyob ntawd nej yuav ua tau tej kab ke, ntau dua lwm tiam neeg. Thiab Vajtswv paub hais tias Nws yuav ntseeg tau nej kom ua tej hauj lwm no tam nej tej poj koob yawm txwv.

Peb ham tsis muaj hauj lwm ntau thiab tej yam uas peb siv sij hawm ua. Qee zaum peb txhua tus xav hais tias muaj tej qhov uas tus Tswv xav kom peb ua yog tej yam uas peb tsis txawj ua. Zoo heev uas tus Tswv npaj ib txoj kev rau peb txhua tus muaj siab loj thiab txaus siab rau tag nrho peb tej kev ua hauj lwm pab, suav qhov uas pab nrhiav caj ceg. Peb tau dag zog kom ua tau tej yam uas Nws hais kom peb ua dhau ntawm peb txoj kev ntseeg hais tias tus Tswv yeej tsis muab tej lus txib rau tib neeg ua ib yam dab tsi li, “tsuas yog nws yuav npaj ib txoj hau kev rau [peb] xwv kom [peb] yuav ua tau yam uas nws tau txib [peb] ua lawm xwb” (1 Nifais 3:7).

Kuv paub tias qhov no muaj tseeb tiag los ntawm tej yam uas tau muaj los rau kuv. Ntau xyoo dhau los, thaum kuv tseem ua ib tug tub kawm ntawv, kuv tau ntsib ib tug neeg uas ua hauj lwm rau lub lag luam koos pis tawj loj tshaj hauv lub ntiaj teb no. Nov yog thaum nyuam qhuav tsim tau koos pis tawj xwb, thiab tus neeg no lub lag luam tau txib kom nws tuaj muab koospistawj muag rau Yexus Khetos Lub Koom Txoos ntawm Tsoom Haiv Neeg Ntseeg hauv Hnub Nyoog Kawg.

Raws li kuv pom tau, tus neeg muag khoom no tsis muaj siab ntseeg dab tsi. Txawm yog li ntawd los, nws hais yam xav tsis thoob li hais tias, “Hauv lub koom txoos no lawv ua tej yam uas lawv hu ua ‘nrhiav caj ces,’ nrhiav kom tau cov npe ntawm cov neeg uas tas sim neej lawm, sim nrhiav kom tau lawv tej poj koob yawm txwv. Cov neeg no, feem coob yog poj niam, ib sij khiav mus rau ib lub tub ntawv ho rov qab los rau lwm lub tub ntawv, nrhiav rau hauv tej daim khoj me me kom tau ntaub ntawv xov xwm.” Yog tias kuv nco qab yog lawm, ces nws hais tias cov poj niam no rau khau ntaub kom lawv thiaj khiav tau ceev zog. Ces tus neeg no hais txuas ntxiv hais tias, “Thaum kuv pom hais tias lawv sim ua ib txoj hauj lwm loj kawg nkaus, kuv txawm paub hais tias yog vim li cas thiaj tsim muaj koospistawj.”

Tej zaum nws hais qhov tseeb ntawm ib qho. Tej koospistawj yeej yuav tseem ceeb rau tej hauj lwm nrhiav keeb kwm tsev neeg—tsuas yog tsis yog tej koos pis tawj uas tus yawm no muab muag. Lub Koom Txoos ib tug thawj coj uas raug tshoov siab xaiv kom tsis txhob yuav tus yawm no tej koospistawj. Lub Koom Txoos tos kom tau tej technology uas thaum lub sij hawm ntawd tsis tau tsim. Tiam sis kuv tau kawm hais tias tej tshuab khoom zoo tshaj plaws pauv tsis tau qhov kev tshwm sim uas los saum ntuj los, ib yam li qhov tshwm sim uas tus thawj coj ntawm lub Koom Txoos ntawd tau txais. Nov yog ib txoj hauj lwm ntawm sab ntsuj plig, thiab tus Tswv coj Nws tej hauj lwm no dhau ntawm Nws tus Ntsuj Plig Dawb Huv.

Ob peb lis piam tas los no, kuv nrog ib tug kws pab nrhiav tsev neeg zaj keeb kwm ua hauj lwm nrhiav kuv tsev neeg caj ces, thiab muaj dua ib tug pab kuv nrog kuv tham xov tooj. Nyob ntawm lub koospistawj ntawm kuv hauv ntej yog ib qho teeb meem uas kuv tsis muaj hwj chim kho tau. Kuv pom ob lub npe uas yog npe ntawm ob tug neeg uas tej zaum tos ntsoov leej twg ua tej kab ke tuam tsev rau nkawd. Tiam sis qhov teeb meem yog qhov uas nkawd ob lub npe sib txawv, tiam sis peb yeej xav hais tias tej zaum ob tug neeg ntawd yog tib tug neeg xwb. Kuv txoj hauj lwm yog txiav txim siab saib qhov twg yog qhov tseeb.

Kuv hais kom ob tug pab kuv qhia kuv. Nkawd hais tias, “Tsis tau, koj yuav tsum yog tus xaiv.” Thiab nkawd ob leeg xav hais tias kuv yuav nrhiav tau qhov tseeb. Txawm tias lub koospistawj muaj hwj chim thiab xov xwm ntau los, kuv tseem tau koob hmoov ntsia ntsoov ob lub npe ntawd, ntsuam xyuas tej xov xwm uas kuv muaj, nrhiav lwm yam xov xwm, thov txog Vajtswv, thiab nrhiav kawm saib qhov twg yog qhov tseeb. Thaum kuv thov Vajtswv, kuv paub tseeb tias kuv yuav tsum ua li cas—ib yam li kuv paub tseeb thaum lwm lub sij hawm uas kuv vam khom lub ntuj ceeb tsheej paub kuv kho teeb meem.

Peb tsis paub saib Vajtswv yuav tshoov tib neeg lub siab kom tsim dab tsi kom pab khiav Nws tej hauj lwm coj Nws tsev neeg los sib sau ua ke. Tiam sis txawm hais tias muaj tej tshuab khoom dab tsi uas tshwm sim los, thaum twg peb siv peb tseem yuav tsum muaj tus Ntsuj Plig ua hauj lwm pab tshoov peb lub siab lub ntsws tiag. Qhov no tsis tas ua rau peb xav tsis thoob. Cov neeg uas peb nrhiav no yog Vajtswv cov tub thiab cov ntxhais ntsuj plig. Nws yuav tshoov peb tej siab kom thiaj muab tau cib fim rau cov neeg uas peb nrhiav no rov qab mus cuag Vajtswv tau.

Tau ob peb xyoos no, lub Koom Txoos cov hluas tau txais tus ntsuj plig ntawm Eliyas. Cov hluas feem coob muaj ntawv tso cai nkag lub tuam tsev thiab lawv mus xyuas ntau zaus. Tej qhov chaw ua kev cai raus dej hauv tej tuam tsev yeej muaj cov hluas coob heev tuaj pab; ib txhia tuam tsev yuav tsum kho lawv tej caij teem kom thiaj txais tau cov hluas uas tuaj ua hauj lwm pab hauv lub tuam tsev.

Yav tas los cov hluas tsis tshua nqa npe ntawm lawv cov poj koob yawm txwv tuaj rau lub tuam tsev. Tiam sis niaj hnub nim no, lawv nqa tuaj feem ntau, thiab feem ntau yog cov hluas no uas tau nrhiav tau lawv cov poj koob yawm txwv.

Tsis tas li ntawd xwb, cov hluas feem coob tau pom tias thaum lawv siv sij hawm nrhiav keeb kwm tsev neeg thiab ua tej kab ke hauv lub tuam tsev ces lawv haj yam muaj lus tim khawv hais txog txoj kev cawm seej. Lawv muaj tus Ntsuj Plig ntau dua hauv lawv lub neej thiab tus Yeeb Ncuab tsis tshua muaj zog kov yeej tau lawv. Ua li no tau pab lawv nyob ze dua lawv tej tsev neeg thiab nyob ze dua tus Tswv. Lawv tau kawm hais tias tej hauj lwm no tsis yog cawm cov neeg uas tas sim neej lawm; tej hauj lwm no cawm peb txhua tus (saib Q&K 128:18).

Cov hluas yeej ua tau zoo kawg; nim no lawv tej niam tej txiv yuav tsum soj qab ua tej hauj lwm no thiab. Nim no muaj neeg coob heev uas tau txais txoj kab ke ua kev cai raus dej hauv lub ntuj ntsuj plig, vim yog tej hauj lwm uas cov hluas ua, thiab lawv cov no tos ntsoov cov neeg laus ua tej kab ke uas tsuas yog cov neeg laus thiaj ua tau hauv lub tuam tsev. Tej hauj lwm sau Leej Txiv Saum Ntuj Ceeb Tsheej tsev neeg ua ke tsis yog rau cov hluas xwb, thiab tsis yog rau lawv niam tais yawm txiv pog thiab yawg xwb. Yog rau tib neeg txhua tus. Peb txhua tus yog cov uas sau.

Tej hauj lwm no yog tej hauj lwm ntawm peb tiam neeg, tiam neeg uas tus Thwj Tim Pov Lauj tau hu ua “lub caij nyoog uas puv txhua lub caij,” thaum Vajtswv yuav “coj ib puas tsav yam uas Vajtswv tau tsim los lawm, tsis hais tej uas nyob saum nruab ntug thiab tej uas nyob hauv ntiaj teb los nyob ua ke, thiab Vajtswv yuav tsa Yexus Khetos ua ib puas tsav yam ntawd tus thawj” (Efexus 1:10). Nov muaj vim yog Vajtswv Tib Leeg Tub, Yexus Khetos, txoj kev theej txhoj. Vim yog tus Khetos, peb cov neeg txheeb ze, “uas yav tas los nyob nrug deb, nej twb los nrog Yexus Khetos koom ib txoj sia lawm. Rau qhov Yexus Khetos twb los ua rau cov ... neeg ua tau ib pab lawm, peb thiaj nyob tau ua ke. Sab phab ntsa uas kem nruab nrab kom ob tog ua yeeb ncuab, Yexus Khetos twb los muab rhuav lawm” (Efexus 2:13–14). Nej tau hnov tej no hauv nruab siab, ib yam li kuv, thaum nej lub siab muaj kev hlub puv npo rau nej ib tug neeg txheeb ze uas nej saib hauv ib daim duab. Nej tau xav li no hauv lub tuam tsev, thaum lub npe ntawm daim khoj yeej tseem ceeb rau nej, thiab nej xav hais tias tus neeg ntawd paub txog nej thiab hnov tau nej txoj kev hlub rau nws.

Kuv ua tim khawv hais tias Vajtswv Leej Txiv xav kom Nws cov me nyuam rov qab los tsev, ua tsev neeg thiab muaj yeeb koob. Tus Cawm Seej muaj txoj sia nyob. Nws coj tej hauj lwm no, thiab Nws saib xyuas thiab coj peb kev. Tus Tswv ua nej tsaug rau nej tej hauj lwm pab Nws sau Nws Leej Txiv tsev neeg, thiab kuv cog lus hais tias nej yuav yuav tej kev pab uas nej nrhiav thiab xav tau. Los ntawm Yexus Khetos lub npe, amees.