2010–2019
Kakobaik Baam̧le eo an Anij
Eprōļ 2017


Kakobaik Baam̧le eo an Anij

Anij Jemād ekōņaan bwe ajri ro Nejin ren bar rool n̄an kapijuknen eo aer, āinwōt juon baam̧le im ilo aiboojoj.

Ro jeiū im jatū, ij m̧ōņōņō kōn iien in em̧m̧an bwe imaron̄ pād ippāmi ilo jinoin m̧wen̄an eo an kweilo̧k in eļap. Ij karuwaineneik kom̧ kōn juon karuwainene emāņeen tata.

Kweilo̧k eo eļap aolep iien ej kakobaik tok Armej ro Rekwojarjar ilo Raan ko Āliktata. Jem̧aan ļo̧k ke kabun̄ in eaar lōn̄ļo̧k uwaan raar koba ippān doon ilo juon jikin, ak Irooj eaar kōpooj wāween ko n̄an kōjeraam̧m̧an ko an kweilo̧k eo eļap n̄an tōpar aolep jekdoon ia ko rej pād ie. Men̄e ekabwilōn̄lōn̄ ilo kalimjōkļo̧k ro Rekwojarjar ilo jikin Kweilo̧k in Eļap, rikōnono ro me rej jutak ilo lokatok in aolep iien rej antooneļo̧k an milien armej ro rej koba ippān doon ipeļaakin laļ in n̄an alooje im ron̄jake kweilo̧k in. Elōn̄ iaami rej koba ippān baam̧le ko aer; jet remaron̄ kobaļo̧k ippān ro mōttaer ak ro jet uwaan Kabun̄ in.

Jekdoon ia kwōj pād ie im men̄e kwōj ron̄jake ainikiō, jouj im jeļā bwe jekdoon kwōj jab pād ijin, jej en̄jake bwe kwōj pād ijin ippam̧ ilo jetōb. Jej kōjatdikdik bwe kom̧ij en̄jake bwe jej juon wōt—bwe kom̧ naaj en̄jake kajoor ilo jetōb eo me ej itok jabdewōt iien n̄e ānbwinin ro ritōmak rej ippān doon ilo etan Jisōs Kraist.

Kar im̧we eō kōn jetōb bwe in kōnono n̄an kom̧ rainin kōn bar juon kain ippān doon rōt in. Kain ippān doon rōt in ejjab bōk jikin aolep jiljino allōn̄, āinwōt kweilo̧k eo eļap. Ijjeļo̧kin, elakar wōnm̧aanļo̧k wōt jān raan ko etto ilo jepļaaktok eo an Kabun̄ in, im ellakar mōkajļo̧k ilo iiō ko rej jem̧ļo̧kļo̧k. Ij watōke ej juon ippān doon eo an baam̧le eo an Anij.

N̄an kōmeļeļeiki ippān doon in, emaron̄ em̧m̧an bwe jen jino kōn m̧okta jān ad kar lotak, m̧okta jān an kar Baibōl kōjerbal naan in “ilo jinoin” (Jenesis 1:1). Ilo tōre eo, jaar mour ippān Jemādwōj Ilan̄ āinwōt jetōb ro Nejin. Menin em̧ool n̄an aolep armej ro raar mour ioon laļ in.

Meļeļe bwe naan kein “būratōr” im “sister” rejjab jet naan in karuwainene wōt ak naan in jouj n̄an kōj. Rej kwaļo̧k meļeļein m̧ool indeeo: Anij ej ilo m̧ool jemān aolep armej; kōj kajjojo jej mōttan baam̧le eo an n̄an indeeo. Kōnke Ej iakwe kōj kōn iakwe eo an juon Jemād Ewanōk, ekōņaan bwe jen eddōkļo̧k im tōprak im erom āinwōt E. Eaar kōm̧m̧ane karōk in bwe jen maron̄ itok n̄an laļ in, ilowaan baam̧le ko, im idajon̄jon̄e mour in eo enaaj kōpooj kōj n̄an jepļaak n̄an E im mour āinwōt an mour.

Mōttan eo ioļap ilo karōk in eaar juon kalim̧m̧ur bwe Jisōs Kraist enkar aje mour eo an āinwōt juon katok, n̄an lo̧mo̧o̧ren kōj jān jerawiwi im mej. Jerbal eo ad ilo karōk eo ej n̄an tōmak pinmuur eo an Rilo̧mo̧o̧r ilo ad pokake kien ko im kain̄i ko an gospel. Kwe im n̄a jaar errā kōn karōk in. Ilo m̧ool, jaar m̧ōņōņō kake, men̄e jej aikuj kar em̧akūt jān im̧aan mejān Jemādwōj Ilan̄ im meļo̧kļo̧k ta eo jaar en̄jake ke jaar pād Ippān.

Ak jaar jab itok n̄an laļ in ilo an ejjeļo̧k ad meļeļe. Kajjojo iaad em̧ōj kar letok mōttan meram eo an Anij, ņa etan “Meran in Kraist,” n̄an jipan̄ kōj jeļā em̧m̧an im nana, jim̧we im bōd. En̄in ej unin an ro me jidik wōt jeļāļo̧kjeņ ippāer ak ro ejjeļo̧k n̄an jidik aer jeļāļo̧kjeņ kōn karōk eo an Jemād remaron̄ en̄jake im jeļā, ilo būruweer, bwe jet kālōt retiljek im rem̧m̧an ak ko jet renana.

En̄jake in jim̧we im bōd ilo kalimjōkļo̧k eļapļo̧k an kajoor n̄e jej kōkaajriri ro Nejid. Eiten aolep jinen im jemān ajri ro ewōr aer ikdeleel n̄an katakin ro nejier mour em̧m̧an. En̄in ej mōttan eo ekabwilōn̄lōn̄ ilo karōk eo an Jemādwōj Ilan̄. Ekōņaan bwe ro Nejin ren itok n̄an laļ in, ļoor jon̄ak indeeo an baam̧le ko me raar baj ejaak wōt ilo lan̄. Baam̧le ko jet rej mōttan ko raorōk ilo karōk eo n̄an indeeo, innām E ej kōm̧m̧an karōk n̄an er barāinwōt n̄an mōttan ko jet raorōk ilo laļ in. Men̄e baam̧le ko ilo laļ in rejjab wānōk, rej karuwaineneik ajri ro nejin Anij n̄an laļ in kōn iakwe eo me ej āinwōt iakwe eo jaar en̄jake ilo lan̄—iakwe an ro jined im jemād. Baam̧le ko rej barāinwōt wāween eo em̧m̧an n̄an kōjparok im katakin ro jet mour em̧m̧an im katak ko rem̧ool me rej jipan̄ kōj jepļaak n̄an im̧aan mejān Anij.

Jet wōt iaan ajri ro nejin Anij rej bōk ilo mour in juon jeļāļo̧kjeņ eo ealikkar kōn karōk eo an Anij, ippān tok kain̄i ko an priesthood im bujen ko me rej kōm̧m̧an bwe kajoor in pinmuur eo an Rilo̧mo̧o̧r ren jerbal ilo mour ko ad. Bar ro jet me ro jineer im jemāer rem̧m̧an remaron̄ kar mour em̧m̧an ekkar n̄an meram eo epād ippāer ak rejjan̄in kar ron̄ kōn Jisōs Kraist in Pinmuur eo An ak bolen kar kūr er n̄an peptaij ilo Etan. Menin em̧ool n̄an milien ro jeid im jatid ilo aolepān bwebwenatoon laļ in.

Jet remaron̄ likūt menin ekalijōkļo̧k. Remaron̄ likūt āinwōt juon kam̧ool ke ejjeļo̧k karōk, ejjeļo̧k men jej aikuj kōm̧m̧ane n̄an bōk lo̧mo̧o̧r—en̄jake bwe Anij eo em̧m̧an im eļap an iakwe eban kar ejaake karōk eo me epojak n̄an jet wōt iaan ajri ro Nejin. Ro jet remaron̄ bōk ļōmņak in ke Anij ekar baj kālet wōt m̧okta wōn ro Nejin enaaj kar lo̧mo̧o̧ren er im leļo̧k n̄an er gospel eo, ak ro jet me rejjan̄in ron̄ kōn gospel eo ej kōnke rekar jab “kālet” er.

Ak kwe im n̄a jejeļā, kōn m̧ool ko em̧ōj kōjepļaaki tok jān Rikanaan Josep Smith, bwe karōk eo an Anij eļap an em̧m̧an im etūriamo̧ jān jon̄an en jej ļōmņake. Jemedwōj Ilan̄ ej ikdeleel n̄an kobaik im kōjeraam̧m̧an aolepān baam̧le eo An. Men̄e Ejeļā ke ejjeļo̧k iaer renaaj kālet bwe ren ippān doon, karōk eo An ej leļo̧k n̄an kajjojo ro Nejin iien em̧m̧an n̄an aer kālet n̄e rej errā ak jum̧ae kūr eo An. Im baam̧le ko rej pād ioļapļap ilo karōk in.

Epepen ko m̧okta ļo̧k, rikanaan Malakai eaar ba bwe ilo raan ko rej itok, Anij enaaj jilkintok Elijah n̄an “ukōt būruon jemaer n̄an ro nejier, im būruon nejier n̄an ro jemaer” (Malakai 4:6).

Kanaan in eaar lukkuun ļap tokjān Rilo̧mo̧o̧r eaar kouti Kanaan in ke Eaar loļo̧k ri Amedka ro ālkin Jerkakpeje eo An (lale 3 Nipai 25:5–6). Im ke enjeļ Moronai eaar loļo̧k Rikanaan Josep Smith, eaar bar kouti kanaan eo kōn Elijah im būruon, jemāer, im ro nejier (lale Josep Smith—Bwebwenato 1:36–39).

Rainin ej Eprōļ 1. Ruo raan jān kiiō, Eprōļ 3, ejejjet 181 iiō jān raan eo ke Kanaan eo an Malakai eaar kūrm̧ool. Ilo raan ņe, Ilaija eaar itok im eaar leļo̧k n̄an Josep Smith kajoor in priesthood n̄an liabe baam̧le ko n̄an indeeo (lale K&B 110:13–16).

Jān raan eo n̄an rainin, itok limo ilo kappukot menmenbwij ko an baam̧le em̧ōj an ļapļo̧k. Ilo jon̄an ļapļo̧kin, eļapļo̧k kiiō an armej itok limoer kōn jibūer im jim̧m̧aer etto jān kar jinoin aer kōņaan kar jeļā. Ļaibrāre in menmenbwij ko, baamle ko, im kein jerbal ko raan kein repedjake aolepān laļ in n̄an jipan̄ ilo kōņaan im itok limo in. Kajoor in intōrnōt n̄an kōkm̧anm̧anļo̧k iaļan kōnono ekōm̧m̧an bwe baam̧le ko ren jerbal ippān doon n̄an kōm̧m̧ane jerbal in kappukot ak etale kōn wāween eo em̧ōkaj im etiljek eo me ekar ejjeļo̧k m̧okta.

Etke aolep men kein rej bōk jikier? Men eo em̧m̧an tata jej ņa etan “jetōbōn Ilaija.” Jemaron̄ kar bar ņa etan kūrm̧ool in kannaan. Ij kwaļo̧k aō naan in kam̧ool bwe Ilaija eaar itok. Būruon ro nejier—kwe im n̄a—n̄an ro jemād, ro jibūd im jim̧m̧ad etto. Iakwe eo kwōj en̄jake kōn ro jibūm im jim̧m̧am etto ej mōttan ļo̧k kūrm̧ool in kannaan in. Ej pād ijo em̧wilaļ ilo en̄jake ko am̧ kōn wōn kwe. Ak eļapļo̧k ad kōm̧m̧ane ejjab n̄an ro wōt nukud.

N̄an waanjon̄ak, ilo am̧ ļoor im̧we n̄an katak kōn menmenbwij an baam̧le eo am̧, kwomaron̄ lo bwe jemjerā ko rettoļo̧k rej kwaļo̧k jet iaan itok limo ko ilo bo̧k ak taļen eo am̧ ilo al. Menin emaron̄ lukkuun kaitoktoklimo im aaet eļap meļeļein. Ak eļan̄n̄e jerbal eo am ebōjrak ijeņ, kwonaaj en̄jake bwe ewōr juon men ejako ilo mour eo am. Unin menin ej kōnke n̄an kobaik im kūrtok baam̧le eo an Anij emenin aikuj eļapļo̧k jān en̄jake wōt kōn iakwe. Ej aikuj bujen ko rekwojarjar n̄an kōm̧m̧an bwe en ekkeijel ium̧win kain̄i ko an priesthood.

Elōn̄ ro jibūmi im jim̧aami raar jab bōk kain̄i kein. Ak ilo mālōtlōt an Anij, kwaar kōm̧m̧ani. Im Anij ejeļā bwe kwōj en̄jake am̧ epaake ro jibūm im jim̧aam̧ ilo iakwe im bwe emaron̄ wōr am kein jerbal ko an raan kein n̄an jeļā kajjier. Eaar barāinwōt jeļā bwe komaron̄ kar mour ilo juon tōre ewōr tampeļ ie, ijo kain̄i ko remaron̄ kōm̧m̧an, remaron̄ kar eļļap ilo bwebwenato. Im eaar jeļā bwe emaron̄ kar lōke eok n̄an tōpar jerbal in ilo etan ro jibūm im jim̧aam.

Aaet, aolep kōj ewōr ad eddo ko remenin kakaiirir im reaorōk me rej aikuj ad wūjlepļo̧k ad im iien ko ad. Jej eddoik men ko Irooj ekōņaan bwe jen kōm̧m̧ani me jej ļōmņak jeban maron̄ kōm̧m̧ani. Men eo em̧m̧an, Irooj ej kōpooj juon iaļ n̄an kōj kajjojo bwe en wōr ippād lōke im bun̄ būruōd kōn aolep jerbal ko ad, ekitbuuj jerbal in menmenbwij ko an baam̧le. Jej bōk kajoor n̄an kōm̧m̧ani ta eo Ej kajjitōk bwe jen kōm̧m̧ane kōn tōmak eo ad bwe Rilo̧mo̧o̧r ejjab letok kien “eļan̄n̄e Ejjab kōpooj juon iaļ n̄an aer kōtōpar men eo Ej kean̄ er” (1 Nipai 3:7).

Ijeļā bwe menin em̧ool itok jān iminene. Elōn̄ iiō ko rem̧ootļo̧k, ke iaar juon rijikuul in university, iaar ioone juon em̧m̧aan eo eaar jerbal n̄an juon iaan kambani in kōm̧m̧an kamputōr reļļap ilo laļ in. Ilo raan ko jinoin aer kar kōjerbal kamputōr, im ilo jide kombani eo an ekar jilkinļo̧k e bwe en wia kake kamputōr ko n̄an Kabun̄ eo an Jisōs Kraist im Armej ro Rekwojarjar ilo raan ko Āliktata.

Jān baj jeļā e aō make, riwia kake in ekar ejjeļo̧k an kabun̄ ak tōmak. Aaet ekar ba ilo an ļo̧kjenan im jab tōmak, “Ilo kabun̄ in rekar kōm̧m̧an ta eo rej ņa etan ‘menmenbwij,’ kappukot etan armej ro raar mej, kajeon̄ jeļā kajjien ro jibūier im jimaaer etto. Armej, elaptata kōrā ro, raar kappok meļeļe ilo kōbat in peba ko, kappok meļeļe ilo kaat jidik ko.” Eļan̄n̄e ejim̧we aō kemeemej ļo̧k, eaar ba kōrā ro raar ekanōk juuj in ikkure ko bwe ren maron̄ makajļo̧k jidik aer ettōr. Em̧m̧aan in eaar wōnmaanļo̧k wōt, “Ke ij lo em̧m̧an in ta ko rej kajjieon̄ kōm̧m̧ane, iaar kile bwe ekar wōr unin bwe ren kar kōm̧m̧an kamputōr.”

Aaet, ekar jim̧we an ba. Kamputōr ko renaaj kar jet mōttan ko raorōk ilju im jekļaj ilo jerbal in menmenbwij an baam̧le—ak ejjab kamputōr ko me ej wia kaki. Juon ritōl an Kabun̄ in eo eaar im̧we kōn jetōb eaar kālet bwe en jab wiaik kamputōr ko an. Kabun̄ in eaar aikuj kōttar n̄an kein jerbal ko raan kein ko me ilo tōre ko ejjan̄in kar wōr. Ak iaar ekkatak ilo elōn̄ iiō ko bwe jekdoon kein jerbal ko rem̧m̧an raan kein rejamin penej jenkwan revelesōn ko jān Anij, āinwōt an ritōl an Kabun̄ in ebbōk revelesōn. En̄in ej juon jerbal ilo mour in jetōb, im Irooj ej tōl e kōn Jetōb Kwojarjar.

Jet wiik ko rem̧ootļo̧k, iaar kōm̧m̧ane menmenbwij an baam̧le eo aō ippān juon rijipan̄ iturū im bar juon ilo taļboon eo. Ilo kamputōr eo imaaō ekar wōr juon būrabōlem eļap jon̄an ejjeļo̧k aō maron̄ n̄an namejļan. Iaar lo ruo et ko, rekar waļo̧k ilo kein jerbal kein rekabwilōn̄lōn̄, etan armej ro me rej kōttar aer kōm̧m̧ani kain̄i ko aer ilo tampeļ. Ak būrabōlem eo ej bwe et ko raar oktak, ak ekar wōr juon un bwe jen tōmak ke emaron̄ kar juon wōt armej. Jerbal eo aō ej n̄an pukot ta eo em̧ool.

Iaar kajjitōk ippān rijipan̄ ro bwe ren ba nan eō. Raar ba, “Ejjeļo̧k, kwoj aikuj kālet.” Im raar lukkuun jeļā bwe inaaj kar lo m̧ool eo. Kamputōr eo, kōn aolepān an kajoor im meļeļe ko repād ie, ekar kōjeraam̧m̧an eō ilo an kwaļo̧k et ko, etale meļeļe ko repād ie, kappukot meļeļe ko jet, jar ilo ittino, im lo ta eo me kar watōke bwe em̧ool. Ke ij jar, iaar jeļā ilo alikkar kōn ta eo ij kōm̧m̧ane—āinwōt an wōr ippa ilo jekjek ko jet n̄e ij aikuji pedped ioon jipan̄ ko jān lan̄ n̄an ņamejļan juon būrabōlōm.

Jejjab jeļā ta kabwilōn̄lōn̄ ko me Anij enaaj im̧we armej ro an n̄an ejaake iaļan jipan̄ ilo jerbal in An n̄an kakobaik baam̧le eo An. Ak jabdewōt kabwilōn̄lōn̄ in kein jerbal ko rej ejaaki, tokjen jerbal ko aer renaaj aikuj Jetōb n̄an im̧we ippān armej āinwōt kwe im n̄a. Menin eban kāāl n̄an kōj. Ālkin aolep men otemjej, rein rej ro nejin Anij rejitōn bōro. Enaaj jilkinļo̧k jabdewōt men ko me renaaj im̧we er kōn jetōb bwe en kwaļo̧k iaļaer n̄an aer jepļaak n̄an Ippān.

Ilo iiō ko ļo̧k, jodikdik ro ilo Kabun̄ in raar kam̧ool jetōbōn Ilaija ilo elōn̄ wāween ko jetōb ej im̧we. Elōn̄ jodikdik kiiō ro me eaar jeja aer kōjerbal mālim eo n̄an deļo̧n̄e tampeļ im rej kiiō kōjerbale aolep iien. Peptaij n̄an ro remej eļapļo̧k an boub ilo tampeļ; jet tampeļ rej aikuj kōm̧m̧an jikejuul n̄an lale bwe en jab obrak ilo juon wōt iien n̄an oran jodikdik ro rej pād ilo tampōļ.

Ekar jeja ak jab karuwaineneik jodikdik ro n̄an boktok etan ro jibūier im jim̧m̧aer n̄an tampeļ. Kiiō aolep iien rej kōm̧m̧ane, im ekkā an jodikdik ro lo etan ro jibūier im jim̧m̧aer.

N̄an kōļapļo̧k, elōn̄ jodikdik ro rej lo bwe ilo aer wūjeļepļo̧k iien ko aer n̄an kōm̧m̧ane jerbal in kappok menmenbwij im jerbal ko an tampeļ ekōm̧m̧an bwe en kajoorļo̧k naan in kam̧ool ko aer kōn karōk in lo̧mo̧o̧r. Eļapļo̧k im̧we an jetōb ilo mour ko aer im dikļo̧k kareel ko an eo enana. Ekar jipan̄ er epaakeļo̧k baam̧le ko aer im epaakeļo̧k Irooj Jisōs Kraist. Em̧ōj aer ekkatak bwe jerbal in ej lo̧mo̧o̧ren ejjab ro wōt remej; ak ej lo̧mo̧o̧ren kōj aolep. (lale K&B 128:18).

Jodikdik ro emōj aer lukkuun kam̧m̧olool kōn visōn in, kiiō ro jineer im jemāer rej aikuj āinwōt er. Elōn̄ kiiō armej ilo laļ eo an jetōb ro me rej m̧ōņōņō kōn aer kar peptaij kōn er kōnke jodikdik ro raar kōm̧m̧ane jerbal ko aer, im re kōttar kain̄i ko jet me rūtto wōt remaron̄ kōm̧m̧ani jerbal ko ilo tampōļ ko ilo laļ in. Jerbal in n̄an kakobaik baam̧le eo an Jemādwōj Ilan̄ ejjab n̄an rūm̧m̧an ded ro wōt, im ejjab wōt n̄an ro jibūer im jim̧m̧aer. Ej n̄an aolep. Kōj aolep jej rikakobaitok.

En̄in ej jerbal eo an epepen kein ad, ta eo Rijilōk Paul ej ba “iien ko re jejjet,” ke ej ba Anij en kar “kobaik men ko otemjej ilo Kraist, men ko i lan̄, im men ko i laļ” (Epesōs 1:10). Menin eaar maron̄ kūrm̧ool itok jān pinmuur eo an Nejin Anij Ejitōn bōro, Jisōs Kraist. Kōn E, ro uwaan baam̧le ko ad, “kom̧ ro re kein ettoļo̧k em̧ōj kepaake kom̧ ilo bōtōktōkin Kraist. Bwe E aenōm̧m̧an eo ad, Eo ear kōm̧m̧an erro bwe ren juon, im Ear rupe worwor in kōjepel kōtaerro” (Epesōs 2:13–14). Kwar en̄jake menin, āinwōt iaar en̄jake, ilo am kar en̄jake eļapļo̧k iakwe ilo am lale pija in an ro jibūm im jim̧m̧am. Kwar en̄jake menin ilo tampeļ ke et eo ilo kaat eo ilo kalimjokļo̧k āinwōt eļapļo̧k jān et wōt, im kojjab maron̄ pād kake ilo am en̄jake ke armej in ejeļā ta eo kwoj kōm̧m̧ane im en̄jake am iakwe e.

Ij kam̧ool bwe Anij Jemād ekōņaan bwe ajri ro Nejin ren bar rool n̄an kapijuknen eo aer, āinwōt juon baam̧le im ilo aiboojoj. Rilo̧mo̧o̧r ej mour. Ej tōl im kōjeram̧m̧an jerbal in, im Ej lale kōj im tōl kōj. Ej kam̧m̧olool eok kōn am tiljek ilo jerbal n̄an kakobaik baam̧le eo an Jemān, im ij kalim̧m̧ur kom̧ kōn jipan̄ eo me enaaj im̧we eok me kwoj pukote im kwoj aikuji. Ilo etan Jisōs Kraist, amen.