Mengidb er a Telungalek er a Dios

Kemiu el rodam me a rodos er ngak, ng dmeu a renguk er a techall el kubengkemiu er a uchelel tia el klou el ongdibel. A kmal mengemedaol er kemiu.

A klou el ongdibel a dimla taem er a ongdbel er a Ruriul-klebesei el Santo. A irechar e a Ikelesia a kmal beteknga rechedal me ng dikea el sebeched el kldibel er a chimo el basio, e ng di a Rubak a chudechuul a teletael me a klengeltengat er a klou el ongdibel a sebechel le ko er kemiu er a ngii di el basio. Ng uaisei el mechas a rengud er a iidisir a Resanto el kldibel er tial klou el Conference Center, e ng di kemam el dechor tiei ruchei a blechoel melbedebek er tirkel million el chad el kldibel e teloi er kid er a kakerous el beluu er a beluulechad e omes e orrenges er tial ongdibel. Betok er kemiu a kldibel el teloi er a telungalek er kemiu; e a rebebil a kldibel el teloi er a resechelei malechb e kom teloi er a rebebil er a rechedal a Ikelesia.

Ngii di el ker el om ngarngii, me a ngii di el teletael el morrenges er ngak, e a kulengit me bo modengei el kmo ng uaisei el diak mteloi er kemam, e ng di a ki omelchesiu er kemiu el teloi er kemam lokiu a reng. Aki oureng me kemiu el rokui a mo tang el teloi er kemam— e mo omelchesiu er a chedaol klisiich el mei sel sekum e a roumerang a mo kldibel el ngara ngklel a Jesus Kristo.

Ak mla omelchesiu el mo mengedecheduch er kemiu er chelechal sils el kirel a kuk tara bedengel a kldibel. Tia diak el di el dubech er a chelsel a bek el elolem el buil, el uaia klou el ongdibel. Ng bai, mla melemolem er a uchelel a Olutel a Ikelesia, e mla omerk er a chelsel aika el mereko el rak. A kldibel el kusaod er ngii a kldibel er a telungalek er a Dios.

A dosaod er tia el kldibel, e ng locha ungil a domuchel er sel klengar ruchei er a cheroll, sel ngii a Biblia omekedong er ngii el kmo “ng uchelel” (Genesis 1:1). Seikid el taem, e kede kiliei lobengkel a Chedam er a Babeluades el Ngelekel er a reng. Tia klemerang el mo er a rokui el chad el tir a mla kiei er tia el beluulechad.

Bo modengei el kmo, a tekoi el “odam” me a “odos” a diak di el ko er a ungil tekoi er a ounged malechub el ko er a di olchotel a beltik el reng er kid. Aika tekoi el melutk el kirel a diak a ulebengelel klemrang: a Dios a meral Chedam er a rokui el chad; e kid a tebedechel a diak a ulebengelel telungalek er Ngii. Ng beltkil a rengul kired el meral beltkil a rengul a cherrungel el Chedam a uchul, e Ngii a soal kid a dorael mo uai Ngii. Me Ngii a kildmeklii a uldasou el kid a mei er a beluulechad, el ngara chelsel a telungalek, e mo chemau a rokui el tekoi el kid a kudmeklid el muut el el mo er Ngii e mo kiei el uai Ngii.

Sel kot el klou a belkul er tia el uldasou a sel yaksok el kmo a Jesus Kristo a mo odersii a klengar Ngii el kired, el mo sobecheklid er a klengit me a kodall. A ngercheled a kongei er a tngakireng er a Osobel lokiu otirekled er a llach me a chedaol ruoll er a ebangkelio. Kau me a ngak a kilengei er tia el uldasou. E klemerang, el kid a uleldiu er a deureng el kirel, el mle medengei el kmo kede mo cheroid er a rengedel a Demad e dirrek el obes aikel el durruul lobengkel risei.

E ng di dimlak de modurokl el mei el di ngara iilkolk. A dersta er kid a ngiluu a telkib er a llemesel a Dios, el okedongall el kmo “Llomes er a Kristo,” el mo ngosukid el mtebengar a ungil me a mekngit, llemalt me a chelbirukl. Tiaikid a uchul e tirkel kiei el kekerei malechub e ng kmal diak a klemedengei er tir er a uldesuel a Chedam a melemolem el sebechir, lultuil er a rengrir, el medengei el kmo a bebil er a omeruul a ungil e a bebil a diak.

A klemedengei er kid er a ungil me a mekngit a kmal mo mesisiich sel domekeroul er a rengeleked. Oumesingd el bek loungalek el chad a ngarngii er a rengrir a olisechakl er a rengelekir a ungil blekeradel. Tiang a telengtengil sel mengasireng el uldesuel a Chedam er a Babeluades. Ngii a soal a rengelekel a lemei er a beluulechad el ngara chelsel a telungalek, loltirakl er sel diak a ulebengelel teletael er a telungalek el dilubech er a babeluades. A telungalek a kot el ngaruchei el telengtengil a babeluades, me a leuaisei e Ngii a dirrek el soal a bo le telengtengil a klengar er a beluulechad. Ng uaisei el telungalek er a beluulechad a kmal diak el cherrungel, e ng di te msa techall a rengelekel a Dios el mei er a beluulechad el di oba sel beltik el reng er a beluulechad el ngii a kmeed el mo uai sel beltik el reng er a babeluades el— beltik el reng er a chedam me a chedil. A telungalek a dirrek el kot el bedochel rael er a omengeluolou me a oidel a ungil blekeradel me a mera el osisechakl el ngii a sebechel uchul e ngoikid el muut el mo er a rengedel a Dios.

Ng di kmal kekerei er a iildois er a rengelekel a Dios a nguu er tial klengar sel mui el klemedengei er a uldesuel a Dios, lobengkel a techall er a chedaol ruoll er a priesthood me a telbiil el rullii a tngakireng er a Osobel el mo mesisiich e ngarngii a rellii er a klengar kid. Tia uldimukl er tirkel mukeroul er a re kmal ungil oungalek el chad el sebechir el kiei loltirakl er a llomes lobang e diak a ta me rengesii a chisel a Jesus Kristo malechub e le nguu a siotai el mo metecholb loba Ngklel. Tia kmal klemerang el mo er a diak el mochur el million el rodam me a rodos er a chelsel a reksi er a beluulechad.

A rebebil omes er ngii el ua lak el tabesul teletael. Te dirrek lousbech er ngii olchotel a kmo ng diak a moktek, diak a ulterekokl el kedmekill el tekoi el kirel a mo suobel— lomelchesiu el kmo a melemalt, e oubeltik el reng el Dios a diak el kedmeklii a moktek el kuk di mo er a kesai el chad er a Rengelekel el rokui. A kuk rebebil a locha mo oumera el kmo a Dios a di mle uchei e ng melilt er tirkel Ngelekel el Ngii a mo olsobel er tir e kildmeklii a ebangkelio el kirir, e tirkel dirkak a ta me rengesii ebangkelio a locha dimlak el “mengilt” el mo suobel.

E ng di kemiu me ngak a medengei, lokiu a mla moluut el klemerang lokiu a Profet Joseph Smith, el kmo a moktek er a Dios a lmuut el ngaruchei el beltik el reng me a llemalt. A Demad er a Babeluades a semeriar el mengdibel e omekngeltengat er a rokui el telungalek er Ngii. Ng uaisei el Ngii a medengei el kmo ng diak el tir rokui a melilt el mo kldibel, e ng di a moktek er Ngii a msa dersta me a dersta el Ngelekel a techall el mo kongei malechub e te kotouar er a Ongtil. E a telungalek a kmal ngara rengul tia el moktek.

Betok el rak er a memong, e a profet Malakai a millekoi el kmo a ngar medad el sils, e a Dios a mo odureklii a Elijah el mo “mult a rengrir a rechedam el mo er a rengelekir, me a rengrir a rengelekir a mo obult el mo er a redemerir” (Malachi 4:6).

Tial ulaoch a kmal mle klou a belkul, me a Osobel a dillii er a le mei loldingel er a Beluu er a Merikel ruriul er a Okisel er a Kodall (mesa 3 Nephi 25:5–6). E a anghel Moroni er a be loldingel er a Profet Joseph Smith, e ngii me ng dirrek el dillii tia el ulaoch el kirel a Elijah me a rengir, a rechedam, me a rengelekir (mesa Joseph Smith—History 1:36–39).

Chelechal sils e ng kot el kebesengil Ongeua el buil. Eru el klebesei er chelechang, el edei el kebesengil Ongeua el buil, e ng mo ng me ng dart me a okai me a ta el rak er sel sils el ulochel a Malakai a mlo tmaut. Seikid el sils, e a Elijah a mlei, e milsang a Joseph Smith a klisiich er a priesthood lomak a telungalek el mo er a ulebongel (mesa D&C 110:13–16).

Seikid el taem el mei er a chelechang, e a klemeriar reng el kirel a reksi er a telungalek a kmal mla mo chachisois. E di merael meleketek, a iidisir a rechad el tir osiik a ngklir a rebebeldekir el diak di le semeriar el mo medengelterir. A rua library er a reksi er a telungalek, me a bebil er a chelechad, me a technology a mla mekerokl er a beluulechad el rokir el kirel tia el ureor. A klisichel a cheldecheduch er a internet a mla mo uchul e a telungalek a mo dmak el oureor el kiel a reksi er a telungalek el kmal mereched el diak el uaia ngara mong.

Ngera uchul me a ikal teletael a ngarngii? A ungil el omesodel a kmo, ng sel “reng er a Elijah.” Ng dirrek el sebeched el kmo ng kedmeklel a ulaoch. A kuchais el kmo a Elijah a meral mlei. A rengrir a rengalek— el kau me a ngak— a mla obult el mo er a redemerir, el tir a rebeldeked. Sel beltik el reng el momelchesiu er ngii el kirir a rebeldekem a telengtengil tia el ulaoch. Ng kmal ultuil er sel rengum el kmo ke techang. E ng di ngelmuut el ngaruchei er a momedengelii a DNA er kid.

Okesiul tiang, sel moltirakl er a odbechel a reng el mo mesuub er a reksi er a telungalek er kau, e ke locha mo medengei el kmo a cheroid el chedam el chad a ngarngii a klaisisiu er a medemiu malechub a klemeriar reng er a omengiuel a hong malechub a duch er a omengitakl. Tia sebechel kmal mengasireng e dirrek el llomes. E ng di alsekum a urerem a di mo risei e merekong, e ke mo omelchesiu el ngarngii a dibus. Le tia ultuil er a mengideb e oldak er a telungalek er a Dios ng diak di le soad tir el merekong. Ng ultuil er a chedaol telbiil el mekedmokl lobengkel a chedaol ruoll er a priesthood.

Betok el beldekiu a dimlak el ngai aika el chedaol ruoll. E ng di a Dios a mla kudmeklii a rael me kau a mla ngmai. E a Dios a mle medengei el soam el mo teloi er a rebeldekem loeak a beltik el reng e dirrek el mo ousbech a dongu el mo osiik er tir. Ng dirrek el mle medengei el kmo ke mo kiei er a taem el sebechem el mo er a templo, el chedaol ruoll a sebechel mekedmokl, el chachisois er a chelsel a reksi. E dirrek el Ngii a mle medengei el kmo ng sebechel loumera er kau el mo kudmeklii tia el ureor el kirir a rebeldekem.

Ng uaisei, el kid el rokui a ngarngii orechudel el urered me a ngercheled lousbech a klou el temed. E kid el rokui el mo chelbangel a tekoi el Rubak a mengerchir kid el mo meruul el kid omdasou el kmo ng diak el sebeched. Kede ngeltengat, el Rubak a kudmeklii a rael el sebechel a dersta er kid el mo ansing e chemat aike el omesiou el doruul, luldimukl er a kedmeklel a reksi er a telungalek. Kede ngmai olisiich el mo meruul aikel Ngii olengit er kid lultuil er a klaumerang el kmo a Rubak a diak el beskid a llach a “lak el kedmeklii a rael el [kired] el uchul e [kid] a mo sebeched el kudmokl aikel tekoi el du er kid” (1 Nephi 3:7).

Tia kudengelii el kmal klemrang. Betok el rak er a memong, er a kngara skuul er a daingak, e ak mlo medengelii a tal chad loureor er a klou el kombalii er a computer. Tia sel taem er a uchelel a computer e tial kombalii er ngii a ulterau a computer el mo er a Ikelesia er a Jesus Kristo er a Uriul-klebesei el Santo.

A ultebengek er ngii, e ngika el chad a dimlak a klechelid er ngii. E ng di ng mle mechas a rengul e melekoi el kmo, “Chelsel tial ikelesia e te miruul a ikel lomekedong el kmo ng ‘reksi,’ losiik a ngklir a rechad el mla mad, el melasm losiik er a rebeldekir. A rechad a mle katotaod er a delongelel a skidas, lomes a mekekerei el kard a tekoi el kirir a rebeldekir. Sera kumes er a klungel a ureor el tir a milasm el meruul er ngii, e ak mlo mtebengar a moktek er a uchul e ngarngii a computer.”

Ng, meral tekoi a lullekoi. A computer a klou a belkul telengtengil a urerel a reksi er a telungalek er medad el taem— el diak di li ke el computer el ngii a ulterau. A mle ulekrael el mengeteklel a Ikelesia a dimlak el soal lomechar a computer er ngika el chad. A Ikelesia a milngiil er a mesil el seikid el taem e ng dirkak a rehad lomdasou el kirel. E ng di chelsel aika el betok el rak e ak mla mo medengei el kmo a ikel kmal ungil mesil a diak el sebehcel mtechir a ocholt el mengai er a babeluades, el ua ikel roungerachel er a Ikelesia a ngmai. Tiang a chedaol ureor e a Rubak omekrael er ngii lokiu Chedaol Reng er Ngii.

Sesei el sandei er a memong, e ak ulureor er a reksi er a telungalek er ngak lobengkel a chad lolngeseu el ngara bita er ngak e a kuk tara chad a ngara dengua. A computer el mla er medak a mlarngii a mondai el dimlak el sebechek el di ngak e sumecheklii. Ak miles a eru el ngakl, el mla er tia el computer, el ngklir a rechad el locha mengiil chedaol ruoll er a templo el kirir. Aika el ngakl a mle ngodech, e ng di ng mlarngii a uchul e a kulumerang el kmo ng locha di osisiu el chad. A ngerchelek a mo medengelii a klemrang.

A kulengit er a rolgneseu er ngak el mo ngosukak. Te dilu el kmo, “Ng diak, ng kirem el melilt.” Te mle mui el medengei el kmo ak mo metik er a klemerang. A computer, lolab a rokui el klisichel me a tekoi er a chelsel, a mla meskak a klengeltengat lomuchel er a ikel ngakl el kulemes, el merritel a tekoi el mlar ngii, e lmuut losiik a bebil er a rolel, e ngara nglunguuch, el osiik el kmo ngera mle klemerang. Sera kululuuch, e ak mlo medengei el kmo ng kirek el mekerang— el di uaia ikel bebil er a teletael el ngak a mla ngara chelsel el kirek el mo ultuil er a ngesou er a babeluades el mo sumecheklii a mondai.

Ng diak dodengei a mengasireng el teletael el Dios a rulterir a rechad el mo meruul el olngeseu er a Urerel el mengideb er a telungalek er Ngii. E ng di ngii di el mengasireng el teletael el mei, e a usbechellel a mo ultuil er a Chedaol Reng loureor lobengterir a rechad el uai kau me a ngak. Tia diak el kirel mechas a rengud er ngii. Le tirkang, a sechal me a redil el Dios a betik a rengul er tir. Ngii a modurokl a ngii di el teletael el usbechall el mo mesterir a techall me ng mo sebechir el muut el mo er Ngii.

A ika el mereko el tela el rak, e a rengeasek er a Ikelesia a mlo oureor loltirakl er sel ulochel a Elijah er a mengasireng el teletael. Betok er tire r chelechang olab a babilengir er a mo soiseb er a templo e blechoel lousbech er ngii. A techolbechelid er a templo a kmal betekngang el diak el uaia ngara mong; el bebil er a templo a mla mo mesmechokl a iioter er tir el mo sebechir ngoiteterir a betok el iildois el ngeasek el mo er a templo.

Ng ko er a dimlak el blechoel rengeasek olab a ngklir a rebeldekir el mo er a templo. E chelechang e ng mla mo bleketakl lomeruul e blechoel tirkaikid el ngeasek a metik a ngklir a rebeldekir.

Osisiu, betok el ngeasek a mla metik el kmo a lechoit a temir el mengedmokl a reksi er a telungalek me a ureor er a templo a mla smisichii a klaumera er tir el kirel a uldasou er a mo suobel. Ng mla choisisii a urerel Chedaol Reng er a klengar tir e ngosengesii a ongetikaik er a cherarou. Ng mla ngosuterir el kmal mo kmeed er a telungalek er tir e kmeed er a Rubak. Tem la mo medengei el kmo tia el ureor a diak di lolsobel er a re mla mad; ng olsobel er kid el rokui (mesa D&C 128:18).

A rengeasek a mla mtebengar tia el teletael, me chelecha e a rechedam me a rechedil a kirir el mo meruul osisiu. Chelecha e te kmal betok el chad el ngara belurir a redeleb a mla kongei er a techolbechelid el kirir, lokiu a ureor el mla mekedmokl er a rengeasek, e sola mengiil aikel bebil er a chedaol ruoll el di remeklou el chad a sebechir el remuul el kirir er a chelsel a templo. A ureor el mengideb er a telungalek er a Dios a diak di urerir a rengeasek el chad, e diak di lureor el kirir a rechad er a blirir. Ng ureor el kirir a rokui el chad. Kid el rokui el kired el mengideb.

Tiaikid a urerel chelechal telcheroll er kid, el Apostol Paulus a ulemekedong er ngii el kmo ng “taem er a cherrengelel a rokui el tekoi,” el Dios a mo “mengideb el mo tang a rokui el tekoi el ngara Kristo, a rokui el ngar babeluades, me a ngara chutem; lobengkel” (Efesus 1:10). Tia mekedmokl lultuil er a tngakireng er a Chimo el Ngelekel, el Jesus Kristo. Ngokiu Ngii, e a rechedal a telungalek er kid, “el tir a uaia le cheroid a me kmeed lokiu a rsechel a Kristo. Le ngii a budech er kid, el mla rullid el mo tang, e mla choridii a orars er a delongeled” (Efesus 2:13–14). Ko mla melchesuar tiang, el uai ngak, el kid a mla melchesuar a dmolech el beltik el reng sel momes er a siasing er a beldekem. Ko mla melchesuar er a chelsel a templo, el ngakl el ngara kard a diak di le ngakl el llechukl, e ke mlo melchesuar el kmo ngika el chad a mle medengelkau e milchesuar a beltkil a rengum el kirel.

A kuchais el kmo a Dios el Chedam a soal a Rengelekel a luut el mo remei, el ngara chelsel a telungalek me a klebkall. A Osobel a ngar. Ngii omekrael er tia el ureor, e Ngii omes e omekrael er kid. Ngii oureng a suliu er a blak el reng lomesiungiu el mengideb er a telungalek er a Demal, e ngak a yaksok er kemiu a ulekrael ngesou el mosiik e ousbech. El ngara ngklel a Jesus Kristo, amen.