Kapokonepene Peneinei en Koht

Riei ohl oh lih akan, I pereniki ansou mwau me I ahniki ien patehng kumwail ni tepin tiepene en kapokon lap wet. I ahniki peren oh kasamwo kumwail.

Kapokon lap wet kin kalapw wia ehu ansou me Souleng en Imwin-rahn akan kin pokonkipene. Kitail wie tohtohla oh wasahn kapokon solahr kak wiawi wasa ehute, ahpw Kauno ketin kaunopadahr ahl en kapai akan me songen kapokon wet en kak lelewei rehmwail sohte lipilipil wasa kumwail mihmi ie. Itarete eh kaperen en kilang pokon en Souleng kan nan lapalahn Wasahn Kapokon lap wet, kiht kan me kesihnenda wasa kiset kin kalapw medewehwei aramas nen kan nan sampah me iang kiht pokonpene kilkilang oh rongorong audepen kapokon wet. Me tohto kumwail me pokonpene rehn amwail peneinei kan; ekei mweihn rehn kempoakepahrail kan de rehn towehkan en Mwomwodisoht.

Sohte lipilipil wasa ke mih ie, oh mwomwen ahmw rongorong ngileiet, menlau ese me itarete ahmw sohte iang mih wasa se mihmi ie, se kehn me ke mihmi reht ni pali ngehn. Se koapwoaroapwoarki me kumwail koaros pahn kehn atail ehupene—me kumwail pahn kehn manaman en ngehno ni ansou me ehupenehn irail kan me kin kamehlele kin pokonpene ni eden Sises Krais.

I ahniki ineng en koasoiahieng kumwail rahnwet duwen ehu songen kapokon. Soahng wet sohte kin wiawihte nan sounpwong wenou koaros, me duehte kapokon lap wet. Ahpw e kin wie wihwiawihier sang ni ansou me Kopwurpwurdohn Mwomwohdiso oh wie kekeihrdahr nan pahr akan. Ihme I pahn koasoiahn kapokon en peneinei en Koht.

Ien kaweweh songen kapokon wet, e mweihn pahn konehng ien tepsang mwohn atail ipwidi, mwohn dahme Paipel kin kahdaniki “ni tapio” ( Senesis 1:1). Ni ansouo, kitail kin mihmi rehn Samatail Nanleng ni atail mih ni mwohmw en Sapwellime seri ngehn kei. Met me mehlel ong koaros me mihmi pohn sampah wet.

Kitail en wewehki me lepin lokaia “riei pwutak” oh “riei serepein” sohte wiahte mehn kapehse de lepin lokaia me pahn kasalehdahte atail wahu ong emen emen. Irail wia lepin lokaia kei me kasalehda mehlel soutik: Koht iei Pahpahn mehkoaros; kitail koaros wia kisehn Sapwellime peneinei soutik. Pwehki Eh poakoahng kitail nin duwen limpoak unsek en Pahpa men, E kupwurki kitail en pweida oh nantihieng oh duwehla Ih. E kamanahlahr koasondi ehu sang ni atail pahn kohdo pohn sampah, ni peneinei, oh ahniki ansou kan en kak kaunop kitailda en pwurala Reh oh kousonla Reh duwehte Ih.

Poahson pen koasondi wet wia inou ehu me Sises Krais inoukihdi en tohnmeteikihla peihn Ih pwehn lapwaihkitail sang nan dihp oh mehla. Atail pwukoah nan pilahno iei kitail en alehda sapwellimen Sounkomouro tohnmetei sang ni atail pahn kapwaiada kosoned akan oh tiahk sarawih kan en rongamwahu wet. Kumwail oh ngehi aledahr koasondi wet. Ni mehlel, kitail perenkidahr, itarete atail pahn mwesel sang ni limen Sahmo oh manokehla dahme kitail kin wihwia Reh.

Ahpw kitail sohte pekederdo ni atail sohte wewehki douluhl mehkot. Koht ketkihong emen emen kitail ekis maraihno me kin kahdaniki “Maraihn en Krais,” pwehn sewesei kitail en ese wekpeseng en me mwahu oh me suwed, me pwung oh me sapwung. Iei met me karehda irail kan me kin momourikihte ekei padahk de sohte douluhl ese duwen koasondi en Sahmo kin kak kehn nan arail mongiong kan me ekei mwekid e mwahu oh pwung ah ekei soh.

Atail pepehm en me pwung oh sapwung kin ni mehlel kehlail ni ansou me kitail kin kakaihrada neitail serih kan. Kerenieng nohno pahpa koaros ahnikihte ehu ineng en kaskuhlihki neirail serih kan duwen mour me mwakelekel. Iei met me wia kisehn manaman en pilahn en Samatail Nanleng. E kupwurki Sapwellime serih kan en kohdo sampah wet, oh idawehnte duwen koasoandi en peneinei kan me mihier nanleng. Peneinei kan wia pwihn ehu me inenen kesempwal nan wehin nanleng, oh E pil koasonehdier me irail pil pahn wia pwihn kesempwal ehu pohn sampah. Itarete peneinei en sampah sohte nohn unsek ahpw irail kasalehda wen arail kak koaros en kasamwohdo sapwellimen Koht serih kan pohn sampah ki limpoak me karanih dahme kitail kehnehr nanleng—limpoak en nohno oh pahpa. Peneinei kan iei pil ehu ahl me keieu mwahu en apwalih oh kiheng mehteikan mour mwakelekel oh padahk mehlel me pahn kak kahluwaikitail en pwurala rehn Koht.

Me malaulau sapwellimen Koht serih kan me kolokol, nan mour wet, wehwe unsek en sapwellimen Koht koasondi, me pil iangahki tiahk sarawih kan oh inou kan en prihsduhd me karehda tomw pen Soukomouro doadoahk laud nan atail mour. Pil irail kan me ahniki nohno pahpa insenamwau kan mweihn kin momuorkihte pwoson me irail peihn wewehki ahpw saikinte iang rong duwen Sises Krais oh Sapwellimen Tomwpen Dihp de luhkohng en pepdais ni Mware. Met iei me mehlel ohng ni tohtohn nen kei en riatail ohl oh lih akan nan poadoapoaden sampah.

Ekei pahn inda me e sohte pahrek. Irail pahn kakete inda me e wia mehn kadehde me sohte wia koasondi ehu, me e sohte mie anahn pisetik en komourla— pepehm ehu me Koht limpoak sohte pahn wiahda koasondi ehu me pahn mie onhgete wen irail Sapwellime serih kan. Ekei mweihn kamehlele me Koht piladahr mwohwe isingeh kan Sapwellime serih kan me E pahn kamourla oh kaunopada rongamwahuo ong irail, a irail kan me sohte douluhl ese de rongehr rongamwahu wet sohte iang “pilipilda.”

Ahpw komwi oh ngei ese, pwehki mehlelo me kopwurpwurdohr sang Soukohp Joseph Smith, me Sapwellimen Koht koasondi iei me diren limpoak oh mehlel sang dahme sansalehr. Samatail Nanleng ahniki ineng en kapokonepene oh kapaiada Sapwellime peneinei. Pwehki E ese me kaidehn irail koaros pahn pilada en iang pokonpene, Sapwellime koasondi kiengehr en emen emen Sapwellime serih kan ansou en alehda de soihkala Sapwellime luhk. Oh peneinei iei me wia ehu dake me keieu kesempwal nan pilahn wet.

Pahr kei samwalahro, soukohp Malakai mahsanih me nan rahn me pahn kohkohdo kan, Koht pahn ketkihdo Elaisa en “kapwurepene mongiong en sahm akan ong nahi akan” (Malakai 4:6).

Kokohp wet inenen kesempwal, Sounkomouro mahsanih met ni ansou me E ketla America mwurin Ah Iasada (kilang3 Nephi 25:5–6 ). Oh ni ansou me tohnleng Moroni pwarehng Soukohp Joseph Smith, eh pil mahsaniada kokohpohte me Elaisa oh mongiong kan, pahpa kan, oh serih kan (kilang Poadepen—Joseph Smith 1:36–39).

Rahn wet Epreil  1. Rahn riau mwurin rahnwet, Epreil  3, wia pahr 181 sang ni rahn me kokohp en Malakai pweidahr. Nan rahno, Elaisa ketdo, oh ketkieng Joseph Smith manaman en prihsduhd en katengepene peneinei kan kokohlahte (kilang D&C 110:13–16).

Sang rahno kohdo lel rahnwet, ineng en rapahki ehu ehu keinek de kadaudok en peneinei lalaudla. Sang ni totohlahn ropirop wet, aramas perenikier rapahki kadaudekerail kan kaidehnte sang ni arail men esehla. Nan laibreri kan, nan ehu ehu pwihn akan, oh dipwisou en wai kan me miehier nan sampah me utungadahr ineng wet. Kakehlepen indernet me kamangaidahr wiepen wehwepene kan me sewesedahr peneinei kan en doadoahk pene oh wia arail ropirop en kadaudok en arail peneinei ni mengei oh mwadang sang dahme kin wiwiawi mahso.

Dahme karehda soang pwukat wiwiawiki? Dahme kitail keieu ese kitail en kadaniki iei “ngehn en Elaisa.” Kitail pil kak kadaniki “kokohp me pweidahro.” I kadehde me Elaisa ketdohr. Mongiong en serih kan—komwi oh ngei—pwurehngehr atail pahpa ko, kadaudoketail mehn mahsoko. Dahme ke kehn ong kadaudokomw kan iei me wia kisehn kokohp me pweidahro. Iei me wia poahsoan pen udahn ihs kowe. Ahpw e sohte kasalehdahte udahn isime ke pwilisang.

Karasepe, ni amwail pahn idawehn pepehm kan en esehla duwen kadaudok en amwail peneinei, kumwail pahn diarada me mie peneinei doh me masehng kumwail de kumwail kin pereniki wadek pwuhk de pereniki koul. Met pahn udahn kaperen oh wehwe mwahu. Ahpw ma amwail doadoahk pahn uhdi wasahu, kumwail pahn kehn me mie mehkot sapwung. Met pwehki sang ni kihpene oh kadokepene peneinei en Koht kin anahne en ahniki pepehm en inengieng rapahki ahpw kaidehn en ahnikihte pepehmo. E kin anahne inou sarawih kan me kin wiawi sang ni tiahk sarawih kan en prihsduhd.

Tohtohn kadaudekamwail kan sohte iang alehdi tiahk sarawi pwukat. Ahpw Koht ketin kaunopadahr ahl ehu pwe ken kak alehdi tiahk sarawi pwukat. Oh Koht ketin mwahngih me kumwail pahn karaniala kadaudekamwail kan ni limpoak oh me kumwail pahn doadoahngki dipisou en wai kan pwe kumwail en kak diar iraild. E pil mwahngih me kumwail pahn mihmi nan ansou ehu me kumwail pahn kak kohla nan tehnpas sarawi kan, wasa me tiahk sarawi pwukat kak wiawi ie, me pahn laudsang dahme kin wihwiawi. Oh E mwahngih me E kak koapwoaroapwoarkin kumwail en kapwaiada pwukoah doadoahk wet ong kadaudekamwail kan.

Mehlel me kitail koaros mie atail pwukoah karuaru oh kesempwal kei me anahne atail sawas oh ansou. Kitail koaros kin lelehng soahng kei me Kauno kin kasik kitail en wia me kitail leme kitail sohte kak wia. Kitail paiamwahu pwe Kauno ketin kaunopadahr ahl ehu ohng kitail en kalaudehla atail kamehlele oh pweidah kan nan atail pwukoahn papah me iangahki doadoahk en rapahki kadaudok en peneinei. Kitail kin ahnikihdi kehlail en wia dahme E ketin ketkihong kitail sang ni atail pwoson me Sounkomouro sohte kin ketkiong aramas kosoned akan “ma e sohte pahn ketin kaunopehng irail ahlo me irail en kak wiahda dahme e ketin poahngoki” (1Nephi 3:7).

I ese met sang ni dahme I lelehngehr. Sounpar kei samwalahro, ni ei wia tohn skuhl en unipersiti men, I tuhwong ohl emen me kin doadoahkehng ehu kompanihn kompiuter kan me keieu laud nan sampah. Met iei ansou ehu me kampiuter tepda doadoahk, oh iei ansouo me ah kompanio kadarala pwehn netkieng Mwomwohdiso en Sises Krais en Souleng en Imwin-rahn akan kompiuter kan.

Sang ni dahme I kak koasoia, sohn netnet menet sohte sarawi me e pwoson. E ahpw lingankihda oh pwuriamweikihla oh inda, “Nan mwomwohdiso wet irail kin wiwia doadoahk me irail kin kadaniki ‘rekohd en kadaudok en peneinei,’ raparapahki eden aramas akan me melahr, songosong en diarada arail keinek kan. Aramas akan, ahpw mehlel lih akan, kin raparapahki seli audepen ehu ehu keinek nan pwungen doaropwehkan, ropirop kin pil wiawi nan pwungen kisin kahs akan.”Ma I kak tamataman ni pwungih, e inda me lih akan kin suhtih suht en denis kan pwe irail en kak kin tang marahra. Ohlo ahpw doula oh koasoia, “Ni ansou me I kilahngehr wen doadoahk me irail nanantieng wia, I medewehda me I diaradahr ia karepen wiwiahdahn kampiuter kan.”

Ohlo pil ekis pwung. Kampiuter kan pahn wia dipwisou kesempwal ehu ong peneinei en mwuhr akan me pahn wia doadoahk en poadoapoad en peneinei—ahpw kaidehnte kampiuter me e netnetkihla kau. Emen kaun ngoang en Mwomwohdihso pilada en dehr pwain nah kampiuter kau. Mwomwodihso pahn awih dipwisou en doadoahk me nan ansouo saikinte me medewehda. Ahpw I esehier pahr kei samwalahro lel ansou me I tuhwongidi ohl menet me dipwisou en doadoahk kapw me keieu wad sohte pahn kak en weliandi kaudiahl kan sang nanleng, me duwehte dahme kaun en Mwomwohdisoht kin alehdi. Iei met me wia doadoahk sarawi oh Kauno kin kaweid sang ni Sapwellime Ngehn Sarawi.

Wihk kei samwalahro, I koadoakoadoahke poadoapoad en kadaudok en ai peneinei rehn emen soun sawas me mwomwohdte limwai oh pil emen me wie sewseweseie pohn delepwohn. Nan mesen kampiuter skrihn me mih mwoi mie kahpwal ehu me ih sohte kak apwaliala. I kilang ahd riau, pekederdohng ie sang ni loaloakoang en dipwisou en wai wet, aramas pwukat mweihn awiawihier tiahk sarawi en wiawi. Ahpw ih kahpwalo mwo me ahdoko wekpeseng ahpw mie kahrepen ai ahneki pepehm me ihte aramaso mwo. Ai pwukoah ien kak esehda mehnia me pwung.

I indahng nei sounsawaseko en indahng ie. Ira sapeng oh inda, “Soh, kowe me pahn pilada.” Oh ira kamehlele me I pahn diarada ni mehlelo. Kampiutero, sang ni kehlepe oh audepeh kan, e ahpw mweidehng iehier kapai en kilikilang ahdoko, tentenekih audepeh kan me mie, raparapahki nan wasahn ropirop tei kan, wie kapakap ni meleilei, oh dihdiarada dahme mehlel. Ansou me I kapakap, I esehda ni mehlel dahme I pahn wia—duwehte dahme I kin wia ni kahpwal teikan ni ansou me I kin anahne mweideng nanleng en seweseie apwaliala kahpwalo.

Kitail sohte ese sapwellimen Koht doadoahk kopwuriamwei kan me E pahn kamarainki aramas en wiahda pwehn sewese Sapwellime doadoahk en kapokonepene Sapwellime peneinei. Ahpw e sohte lipilipil dipwisou kopwuriamwei kan me pahn pwarada, wiepen doadoahngki pahn anahne sawas en Ngehno en doadoahk rehn aramas akan me duwehte komwi oh ngei. Met sohte pahn kopwuriamwei ohng kitail. Ahpw ni soahng koaros, iei irail wia Sapwellimen Koht pwutak oh serpein. E pahn ketin kadaredo kamarain kan koaros me anahnepe en kiheng irail ansou en kak pwurala Reh.

Nan pahr teiko, pwihn pwulopwul kan en Mwomwohdiso sapengehr ngehn en Elaisa ni ahl marain ehu. Me tohto kolokolehr neirail kisin likou en mweimwei en doadaohngki tehnpas sarawi oh kin doadoahngki ansou koaros. Pepdais en nan tehnpas sarawi wialahr ehu kediropw en doadoahk kerenieng ansou koaros; ekei tehnpas sarawi kin nantieng en apwali mwau ansou kan pwehn kak apwaliala wen irail totoh me pwulopwul kan me kin pwarala ni tehnpas sarawi kan.

E kin sohte nohn wiawi ahpw irail kin kasamwo me pwulopwul kan me kin wahdo eden peihn keinekarail kan nan tehnpas sarawi. Met e wialahr mwekid ehu me kin wihwiawi oh pali tohto irail me pwulopwul kan me kin diar keinek pwukat.

Pil patehng, me pwulopwul tohto diaradahr me ni arail kin peihn pwilikihdi arail ansou pwehn wia doadoahk en rapahki poadoapoad en peneinei oh doadoahk en nan tehnpas sarawi kalaudelahr arail kadehdepen pilahn en komouro. E pil kalaudelahr lipwen Ngehno nan arail mour oh katikala kasongosong kan. E sewesei irail en karaniala arail peneinei kan oh karaniala Kauno Sises Krais. Irail esehier me doadoahk wet sohte kin kapitalahte irail me melahr akan; ahpw kitail koaros (kilang D&C 128:18).

Irail me pwulopwul kan maraihnkilahr pwukoah doadoahk wet; met arail pahpa nohno anahne duwehte irail. Met me irail me tohto aledahr pepdais nan sapwen ngehn, pwehki sang ni doadoahk me irail me pwulopwul kan wiahier, oh irail awiawihier tiahk sarawi teikan me irail me laud kan te me kak wia nan tehnpas sarawi kan nan sampah. Doadoahk en kapokonepene sapwellimen Samatail Nanleng peneinei kaidehn ohngete me pwulopwul kan, oh kaiden ohngete pahpa oh nohno kahlap akan. E ohng koaruhsieh. Kitail koaros soun kapokonepene.

Iei met me wia pwukoah doadoahk en dihn ansou wet, dahme Wahnpoaroan Paul kadaniki “irair en unseklahn ansou,” ni ansou me e inda me Koht pahn “kapokonepene irail ni ehute rehn Krais, koaros me mihmi nanleng oh pohn sampah; pil angahki ih” (Episos 1:10). Iei met me pweidahr sang ni doadoahk en tomw en Sapwellimen Koht Ieroso, Sises Krais. Pwehki Ih, atail peneinei kan, “me kin ekei pak dohla oh pil pwurehng karaniala sang ni intahn Krais. Pwe ih me atail popohl, me wialahr ehu, oh me kamwerehdier kehl me ireikitail peseng” (Episos 2:13–14). Kumwail kehnehr met, duwehte ngei, ni ansou me kumwail kalaudelahr amwail limpoak sang ni irair kan me kumwail lelehgehr ni amwail kilangehr kilel en keinek ehu. Kumwail kehnehr nan tehnpas sarawi, ni ansou me ahd me mih pohn doaroapwe sohte kasalehda me ahdote me kesempwal, oh kumwail sohte leme ahpw kumwail kak kehn me aramas menet eseiuk oh kehnehr amwail limpoak.

I kadehdehki me Koht Sahm mwauki Sapwellime serih kan en pwurala kousonla reh, ni peneinei kan oh ni kilohri. E kin kaweid oh kapaiada doadoahk wet, oh E kin sinsile oh kahluwaikitail. E kapingki amwail pwoson en papah nan kapokon en Sapwellimen Sahmo peneinei, oh E inoukieng kumwail maraihn en sawas me kumwail pahn rapahki oh anahne. Ni mwaren Sises Krais, ahmen.