Faapotopotoina o le Aiga o le Atua

Ou uso e ma tuafafine pele, ua ou olioli lava i le avanoa e faatasi ai ma outou i le amataga o lenei sauniga o le konafesi aoao. E silisili ona faafeiloai atu ia te outou ma le fiafia.

O le konafesi aoao ua avea pea ma taimi e potopoto ai le Au Paia o Aso e Gata Ai. Ua faatupulaia tele le Ekalesia ma ua faigata ai ona potopoto faatasi i se nofoaga se tasi, ae ua saunia e le Alii ni auala mo faamanuiaga o le konafesi aoao e oo atu ai ia te outou po o fea lava o outou i ai. E ui e faagaeetia le vaaia o le potopoto ai o le Au Paia i lenei Maota Autu tele mo Konafesi, ae o i matou o loo tutu atu i lenei pulelaa e vaai atu pea faalemafaufau i le faitau miliona o tagata o loo faatasi ma i matou i le lalolagi atoa e maimoa ma faafofoga i le konafesi. E toatele outou o loo potopoto faatasi ma tou aiga; o nisi atonu o loo potopoto faatasi ma uo po o tagata lava o le Ekalesia.

Po o fea lava o outou i ai ma pe o le a foi le auala o outou faafofoga mai ai i lo’u leo, faamolemole ia iloa e ui lava tou te le o i ai patino iinei, ae matou te lagonaina lo outou faatasi mai i la le agaga. Matou te faamoemoe o le a outou lagonaina uma le tasi ai ma i matou—o le a outou lagonaina le mana faaleagaga lea e sau mai i soo se taimi e potopoto ai le tino tele e tasi o e talitonu i le suafa o Iesu Keriso.

Ua faagaeetia lava a’u e talanoa atu ia te outou i le asō e uiga i se isi ituaiga o potopotoga. O lenei ituaiga e le na o le ta’i ono masina e tupu ai, e pei o le konafesi aoao. Ae, ua leva ona faaauau pea talu mai uluai aso o le Toefuataiga o le Ekalesia, ma ua faanatinatiina lava i tausaga ua mavae atu nei. Ou te faasino i le faapotopotoina o le aiga o le Atua.

Ina ia faamatalaina lenei faapotopotoga, atonu e aupito sili ona amata mai le taimi ae tatou te lei fananau mai, ae lei ta’uaina e le Tusi Paia “o le amataga” (Kenese 1:1). I lena taimi, sa tatou mau faatasi ai ma le Tama Faalelagi o ni Ana fanau agaga. E moni lenei mea i tagata uma ua ola mai i lenei lalolagi.

Tou te silafia, o igoa “uso” ma le “tuafafine” ua le na o ni faafeiloaiga faaleuo po o ni faaupuga faapelepele mo i tatou. O ni faailoaga na o se upumoni e faavavau: O le Atua o le Tama moni lava o tagata uma; o i tatou uma o vaega taitasi o Lona aiga e faavavau. Ona e alofa o Ia ia i tatou i se alofa o se Tama atoatoa, ua finagalo ai o Ia ia i tatou ia alualu i luma ma siitia ia avea e pei o Ia. Sa Ia faauuina se fuafuaga lea o le a tatou o mai ai i le lalolagi, i aiga, ma maua aafiaga ia o le a saunia ai i tatou e toefoi atu ia te Ia ma ola e pei ona Ia soifua ai.

O le elemene tutotonu o lenei fuafuaga o le folafolaga e faapea o le a ofo mai e Iesu Keriso o Ia lava e fai ma taulaga, e laveai i tatou mai le agasala ma le oti. O la tatou galuega i lena fuafuag o le taliaina o le taulaga a le Faaola e ala i le usiusitai i tulafono ma sauniga o le talalelei. O oe ma a’u sa taliaina lenei fuafuaga. O le mea moni, na tatou olioli ai, e ui o le a tatou tuua ai le afioaga o lo tatou Tama ma galo ai mea na tatou lagonaina iina faatasi ma Ia.

Ae sa lei auina mai i tatou iinei i le pogisa atoatoa. Sa tofu i tatou ma se vaega o le malamalama o le Atua na tuuina mai i ai, ua ta’ua o le “Malamalama o Keriso,” e fesoasoani ia i tatou ia iloaina le eseesega i le va o le lelei ma le leaga, le sa’o ma le sese. O le mafuaaga lenei e oo lava ia i latou o e ola ma sina iloa po o le leai o se iloa e uiga i le fuafuaga a le Tama e mafai lava ona lagonaina, i o latou loto e i ai lava ni amioga amiotonu ma mama ae o isi e leai.

O lo tatou lagonaina o le sa’o ma le sese e foliga mai e malolosi faapitoa a o tatou tausi ae a tatou fanau.E toetoe lava o matua uma e i ai le manao natura e aoao lana fanau i amioga mama. O le vaega lenei o le vavega o le fuafuaga a le Tama Faalelagi. E finagalo i Lana fanau ia o mai i le lalolagi i ni aiga, ma mulimuli i le mamanu e faavavau o aiga o loo i ai i le lagi. O aiga o le iunite faavae faalefaalapotopotoga o malo e faavavau, ma o lea ua Ia faamoemoe ai mo i latou foi ia avea ma iunite faavae o le lalolagi. E ui o aiga faalelalolagi e matua mamao lava mai le atoatoa, ae latou te avatu i fanau a le Atua le avanoa silisili e talileleia ai i latou i le lalolagi i le alofa e tasi i le lalolagi lea e latalata atu i le mea na tatou lagonaina i le lagi—le alofa faamatua. O aiga o le auala sili foi lea e faasaoina ai ma tuufaasolo ai amioga mama ma mataupu faavae ia o le a sili ona taitai atu ai i tatou e toefoi atu i le afioaga o le Atua.

Ua nao sina vaega toalaiti lava o fanau a le Atua e mauaina, i lenei olaga, se malamalamaaga atoatoa e uiga i le fuafuaga a le Atua, faatasi ai ma le mauaina o sauniga ma feagaiga o le perisitua lea e faagaoioia atoatoa ai le mana togiola o le Faaola i o tatou olaga. E oo lava ia i latou e matua lelei lava matua atonu e ola faatuatua e tusa ma le malamalama ua latou maua ae e lei faalogo lava e uiga ia Iesu Keriso ma Lana Togiola pe valaauliaina foi ina ia papatisoina i Lona suafa. E moni lenei mea mo le fia miliona lemafaitaulia o o tatou uso ma tuafafine i le talafaasolopito atoa o le lalolagi.

E manatu nisi e le fea lenei mea. E mafai ona latou manatu o se faamaoniga lea e faapea e le o i ai se fuafuaga, leai ni mea patino e manaomia mo le faaolataga—ua lagonaina e le fatuina e se Atua amiotonu ma alofa se fuafuaga e avanoa i se vaega toalaiti o Lana fanau. O isi ua tamau e faapea atonu ua leva lava ona fuafua e le Atua po o ai Ana fanau o le a Ia laveaiina ma faia le talalelei ia avanoa ia i latou, ae o i latou e lei faalogo lava i le talalelei sa lei “filifilia” lava i latou.

Ae ua e iloaina ma ou iloaina, ona o upumoni na toefuataiina e ala mai i le Perofeta o Iosefa Samita, o le fuafuaga a le Atua e matua sili lava le alofa ma le amiotonu nai lo lena. O loo naunau lo tatou Tama Faalelagi ia faapotopoto ma faamanuia Lona aiga atoa. E ui Na te silafia e le o i latou uma o le a filifili ina ia potopoto, ae ua tuu atu e Lana fuafuaga i Ana fanau taitoatasi le avanoa e talia ai pe teena ai Lana valaaulia. Ma o aiga oloo i ai i le fatu o lenei fuafuaga.

I seneturi ua alu, sa ta’u mai ai e le perofeta o Malaki e faapea, i se aso a sau, o le a auina mai ai e le Atua ia Elia e “faaliliuina loto o tamā i fanau, ma loto o fanau i o latou tamā” (Malaki 4:6).

Sa taua tele lenei valoaga, na toe sii mai e le Faaola ina ua Ia asiasi atu i Amerika i le mavae ai o Lona Toetu (tagai 3 Nifae 25:5–6 Ma ina ua asiasi atu le agelu o Moronae i le Perofeta o Iosefa Samita, na ia sii maia foi le valoaga e uiga ia Elia ma loto, tama, ma fanau (tagai Iosefa Samita—Talafaasolopito 1:36–39).

O le asō o le aso 1 o Aperila. I le lua aso mai le asō, 3 o Aperila, e faailogaina ai le 181 tausaga mai le aso na faataunuuina ai le valoaga a Malaki. I lena aso, na oo mai ai Elia, ma ia tuu atu ai ia Iosefa Samita le mana o le perisitua e faamau ai aiga e faavavau (tagai MF&F 110:13–16).

Mai lena aso i le asō, ua matua faatupulaia ai lava le naunau o se tasi e sailiili talafaasolopito o aiga. I se saoasaoa matua faateleina, ua foliga mai tagata ua tosina atu i o latou tuaa e sili atu i le na o se fiailoa masani. O faletusi o mea tau gafa, faalapotopotoga, ma tekinolosi ua faatutu i le lalolagi atoa e lagolago ai lenei naunautaiga. O le malosiaga o le initoneti e faaleleia ai fesootaiga ua mafai ai e aiga ona galulue faatasi e fai sailiiliga o talafaasolopito o aiga i se saoasaoa ma le maeaea sa lei mafaia muamua.

Aisea ua tutupu ai nei mea uma? Ona o le leai o se isi faaupuga sili atu, ua tatou ta’ua ai o le “agaga o Elia.” E mafai foi ona tatou ta’ua i lea lava valaauga e tasi o le “faataunuuga o le valoaga. Ou te molimau atu na oo mai Elia. O loto o fanau—o oe ma a’u—ua liliu atu i o tatou tamā, i o tatou tuaa. O aafiaga e te lagonaina mo ou tuaa o se vaega lea o le faataunuuga o lena valoaga. E faalagolago tonu lava i lou lagona po o ai oe. Ae e faatatau i mea e sili atu nai lo nao DNA e tuufaasolo mai tuaa.

Mo se faataitaiga, a e mulimuli i uunaiga e aoao e uiga i lou talafaasolopito o le aiga, atonu e te iloaina ai o se tasi o lou aiga e mamao le piitaga e tali tutusa lava lua foliga po o le fiafia i ni tusifaitau po o au taleni mo le pese. E ono mata’ina tele lenei mea ma faagaeetiaina foi. Ae afai e gata iina lau galuega, o le a e lagonaina o loo i ai se mea o misi. E mafua lenei mea ona o le faapotopotoina ma le tuufaatasia o le aiga o le Atua e manaomia ai ni mea se tele atu nai lo na o ni lagona mafanafana. E manaomia ai ni feagaiga paia e faia e fesootai ma sauniga o le perisitua.

O le toatele o ou tuaa sa lei mauaina na sauniga. Ae i le sauniaina ai e le Atua, na e maua ai. Ma sa silafia e le Atua o le a e lagonaina le tosina atu i ou tuaa i le alofa ma o le a e mauaina le tekinolosi e talafeagai e faailoa ai i latou. Sa Ia silafia foi o le a e ola i se taimi o le mauaina o malumalu paia, ia e mafai ona faatinoina ai sauniga, ua sili atu i lo se isi lava taimi muamua i le talafaasolopito. Ma sa Ia silafia e mafai ona Ia faatuatuaina oe ia faataunuu lenei galuega e fai ma sui o ou tuaa.

Ioe, ua i ai ia i tatou uma ni tiutetauave faananati ma taua se tele e manaomia ai lo tatou taimi ma le gauai atu i ai. Ua maua e i tatou uma ni vaega o mea ua faamoemoeina i tatou e le Alii e fai, ia tatou te manatu tatou te le gafatiaina. O le mea e lelei ai, ua saunia e le Alii se auala mo i tatou taitoatasi e maua ai le to’afimalie ma le faamalieina i a tatou auaunaga uma, e aofia ai auaunaga mo talafaasolopito o aiga. Tatou te maua le malosi e fai ai mea ua Ia faatonu mai e ala i lo tatou faatuatua e faapea e le aumaia lava e le Faaola se poloaiga “vagana o le a saunia e ia se ala mo i [tatou] ina ia mafai ai ona [tatou] faataunuuina o le mea ua ia poloaiina” (1 Nifae 3:7).

Ou te iloa e moni lenei mea mai aafiaga. I le tele o tausaga ua mavae, a o avea ma se tamaitiiti aoga i se iunivesite, sa ou feiloai ai i se alii sa faigaluega mo se tasi o kamupani komepiuta sili ona tele i le lalolagi. O lenei mea sa tupu i aso popofou o komepiuta, ma i lena tulaga sa auina atu ai o ia e lana kamupani e faatau atu ia komepiuta i le Ekalesia a Iesu Keriso o le Au Paia o Aso e Gata Ai.

E tusa ma se mea e mafai ona ou iloaina, sa leai ma se faatuatua faalelotu o lenei tagata faatau oloa. Ae sa ia fai mai ma le maofa ma le faateia, “I lenei ekalesia o loo latou faia ai mea ua latou ta’ua o ‘gafa,’ sailiga mo igoa o tagata ua maliliu, i le taumafai ai e faailoa o latou tuaa. E saili solo e tagata, o le toatele lava o tamaitai, le tele o kapeneta o faila, saili i tamai kata laiti mo ni faamatalaga. Afai ou te manatuaina sa’o, sa ia fai mai sa faaaoga e tamaitai ni seevae tenisi ina ia mafai ona latou tamomoe saoasaoa teisi atu. Sa faaauau pea le alii, “Ina ua ou vaaia le tulaga lautele o mea o loo latou taumafai e fai, sa ou iloa ai ua ou mauaina le mafuaaga mo le fatufatua’iga o komepiuta.

Ia, sa sa’o o ia i se isi itu. O komepiuta o se vaega taua o le lumanai o le galuega o talafaasolopito o aiga—ae le o ituaiga o komepiuta na ia faatau atua. Sa filifili se taitai musuia o le Ekalesia e aua nei faatauina ana komepiuta. Sa ao ona faatalitali le Ekalesia mo tekinolosi lea sa lei ono mafaufauina i lena taimi. Ae ua ou aoaoina i le tele o tausaga talu mai lena mea e oo lava foi i ni tekinolosi silisili ona lelei, e le mafai lava ona suitulaga i faaaliga mai le lagi, e pei o le [faaaliga] lea na maua e lena taitai o le Ekalesia. O se galuega faaleagaga lenei, ma o loo taitaia e le Alii e ala mai i Lona Agaga Paia.

I ni nai vaiaso talu ai, sa ou galue ai i le talafaasolopito o lo’u aiga faatasi ma se faufautua i o’u talaane ma se isi na fesoasoani mai i luga o le telefoni. I le lau o le komepiuta na i o’u luma sa i ai se faafitauli na matua le mafai e lo’u malosi faaletino ona foiaina. Sa ou vaaia ni igoa se lua, na auina mai ia te au e le ofoofogia o tekinolosi, o ni tagata atonu o loo faatalitali mo se sauniga o le malumalu. Pei o le faafitauli sa i ai, o le eseese o igoa, ae sa i ai se mafuaaga na talitonu ai o i laua lava o le tagata e tasi. O la’u galuega la o le fuafua po o le fea le sa’o.

Sa ou fesili i o’u faufautua e tau mai ia te a’u. Sa la fai mai ia te a’u, “Leai, e tatau ona e filifili.” Ma sa laua mautinoa atoatoa o le a ou mauaina le mea moni. O le komepiuta, faatasi ma lona malosiaga atoa ma faamatalaga, na tuu maia ia te au le faamanuiaga o le sioa atu i na igoa i luga o le lau, iloiloina ia faamatalaga ua maua, sue isi sailiiliga, tatalo leleoa, ma ia maua le mea sa’o. A o ou tatalo, sa ou iloaina ma le mautinoa le mea e fai—e pei lava ona faia i isi foi tulaga pe a ou manaomiaina ona faalagolago i le fesoasoaniga faalelagi e foia ai se faafitauli.

Tatou te le iloa po o a fatufatua’iga ofoofogia o le a musuia e le Atua ia tagata e fatua’i e fesoasoani ai i Lana galuega o le faapotopotoina o Lona aiga. Ae po o a lava fatufatua’iga ofoofogia e ono oo mai, o lo latou faaaogaaga o le a manaomia ai le Agaga e galue i totonu o tagata e pei o oe ma a’u. E le tatau ona faateia ai i tatou i lenei mea. I mea uma lava, o i latou o atalii ma afafine faapelepele o le Atua. O le a Ia auina maia soo se musumusuga e manaomia latou te maua ai le avanoa e toefoi atu ai ia te Ia.

I ni tausaga talu ai nei, na tali mai ai le autalavou o le Ekalesia i le agaga o Elia i se auala musuia. E toatele ua umia nei a latou lava pepa faataga o le malumalu e tapulaa le faaaogaina ma ua faaaoga soo. Ua matua pisi atu lava ia vai papatiso o malumalu i lo se isi lava taimi muamua; o nisi malumalu ua fetuunaia a latou taimi faatulagaina ia taulimaina ai le faateleina o le aofai o talavou e auai i malumalu.

Sa masani lava o se mea e seasea tupu ae sa talileleia le tuusaunoaga mo talavou e aumai ia igoa o o latou lava tuaa i le malumalu. O le taimi nei ua fai ma mea masani, ma ua tele lava, o talavou lava ia ua mauaina na tuaa.

Ma le isi, ua toatele talavou ua iloaina o le foai atu o o latou taimi e faia ai sailiga o talafaasolopito o aiga ma galuega faalemalumalu ua faalolotoina ai la latou molimau o le fuafuaga o le faaolataga. Ua faateleina ai le uunaiga a le Agaga i o latou olaga ma faaitiitia ai faatosinaga a le fili. Ua fesoasoani ai ia i latou e lagona le latalatala atili i o latou aiga ma latalata atili ai i le Alii o Iesu Keriso. Ua latou aoaoina o lenei galuega e le na o tagata ua maliliu e faaolaina ai; e faaolaina ai foi i tatou uma (tagai MF&F 128:18).

Ua pueina e le autalavou le vaaiga mamao ma le faamemelo; ua manaomia nei e o latou matua ona pueina foi. Ua toatele nei tagata ua taliaina le papatisoga i le lalolagi o agaga, ona o le galuega o loo faia e le autalavou, ma o loo latou faatalitali mo isi sauniga e na o tagata matutua e mafai ona faatinoina i malumalu i le lalolagi. O le galuega o le faapotopotoina o le aiga o le Tama Faalelagi e le mo na o le autalavou, ma e le mo na o matua matutua foi. E mo tagata uma. O tatou uma e faapotopotoina i latou.

O le galuega lenei o la tatou augatupulaga, lea na ta’ua e le Aposetolo o Paulo “o le sauniga o le faaatoaga o tausaga,” lea na ia fai mai aio le a “[faapotopotoina ai e le Atua] ia Keriso, o i latou uma lava o i le lagi, atoa ma i latou o i le lalolagi” (Efeso 1:10 Ua mafai lenei mea e ala i le galuega togiola a Lona Alo Pele o le Atua, o Iesu Keriso. Ona o Ia, o o tatou aiga, “o [ē] sa vava mamao anamua ua faalatalataina mai ai i le toto o Keriso. Aua o ia tatou te lelei ai, ua na faia ia tasi e sa [toalua], ua na soloia foi le pa vaeloto sa vaeluaina ai [tatou]” (Efeso 2:13–14). Ua outou lagonaina lenei mea, e pei ona ou lagonaina, ina ua e lagonaina se faateleina o le alofa a o e tagai atu i le ata o se tuaa. Na e lagonaina i totonu o le malumalu, ina ua foliga mai le igoa i luga o se kata e sili atu i lo na o se igoa, ma lē mataofia le lagona e faapea o lenei tagata sa iloaina lava oe ma lagonaina lou alofa.

Ou te molimau atu o loo finagalo le Atua le Tama i Lana fanau ia toefoi atu i le aiga, i auaiga ma i le mamalu. O loo soifua le Faaola. O loo Ia taitaiina ma faamanuiaina lenei galuega, ma o loo Ia leoleoina ma taialaina i tatou. O loo Ia faafetai atu ia te oe mo lau auaunaga faamaoni i le faapotopotoina o le aiga o Lona Tama, ma ou te folafola atu ia te oe le fesoasoaniga musuia o loo e sailia ma manaomia. I le suafa, o Iesu Keriso, amene.