Han blong Hem we I Stap Givhan Evri Dei

Wan long gudfala tul blong Papa long Heven blong givhan long ol pikinini blong Hem i ol apu man mo apu woman we oli gat stret mo gud fasin. Mama blong papa blong mi i wan gudfala woman. Long wan samting we i bin hapen taem ia mi bin yang tumas blong tingbaot, papa blong mi i disiplinim mi. Lukluk long koreksen ia, apu woman blong mi i talem “Monte, mi biliv se yu stap korektem hem long wan had wei.”

Papa blong mi ansa, “Mama, bae mi korektem pikinini blong mi olsem mi wantem,”

Waes apu woman blong mi i talem slo nomo se, “Bae mi tu mi mekem semmak.”

Mi sua se papa blong mi i bin harem waes toktok ia long mama blong hem long dei ia.

Taem mi stap tingting long fasin blong givhan, yumi save tingbaot wan hym we yumi evriwan i save mo lavem—“Mi Pikinini Blong God.” Long kores yumi faenem ol toktok ia “Lidim mi, tekem mi, plis givhan long mi, mi wantem save rod.”¹

Afta, i no longtaem i pas, mi bin andastanem se kores ia i wan tabu daereksen long ol papa mo mama. Taem tingting hevi long ol toktok ia, mi luksave se oli no holem ol daereksen ia nomo, mining blong hem i moa bitim wanem we i stap. Wanwan, yumi stap askem evri dei se Papa long Heven bae i givhan long yumi, lidim yumi, mo wokbaot long saed blong yumi.

Presiden Dieter F. Uchtdorf i eksplenem: “Papa blong yumi long Heven i save ol nid blong ol pikinini blong Hem moa gud bitim eni narafala man. Hemia i wok mo glori blong hem blong helpem yumi oltaem, givim long yumi ol gudfala tul long saed blong bodi mo spirit blong helpem yumi long rod blong yumi blong gobak long Hem.”²

Lisin long ol toktok ia: Papa long Heven i save wanem we yu mo mi i nidim bitim eni narafala man. Olsem ansa, Hem i developem wan bokis blong kea we i stret long wanwan long yumi. I gat plante pat. I tekem tu Pikinini blong Hem mo Atonmen, Tabu Spirit, ol komanmen, ol skripja, prea, ol profet, ol aposol, ol papa mo mama, ol apu man mo apu woman, ol lokol Jos lida mo plante narafala moa—evriwan ia blong helpem yumi gobak blong laef wetem Hem sam dei.

Mi wantem serem tedei sam pat blong kea bokis ia we oli bin mekem mi luksave se wan Papa we i gat lav i stap lidim, i stap givhan, mo stap wokbaot long saed blong mi mo famli blong mi? Prea blong mi hem i we bae wanwan long yufala i luksave long ol eksperiens blong yufala se Papa long Heven i stap lidim, givhan mo wokbaot long saed blong yu mo wetem save ia, bae yu gohed wetem tras blong save se yu neva stap yuwan.

Ol komanmen blong Papa long Heven oli ki ia blong ol pat long kea bokis ia. Alma i talem se “…fasin nogud i neva bin mekem ol man i glad.”³ Akseptem ol nogud fasin mo no korektem wan wetem lav, i soem giaman fasin blong lav mo sore mo i putum tingting ia se fasin nogud i save mekem wan i hapi. Samuel, man blong Leman i no agri long tingting ia: “mo yufala i bin lukaotem blong stap hapi long taem we yufala i mekem ol nogud fasin, we samting ia i agensem fasin blong stret fasin we i stap insaed long Bigfala mo Lida blong yumi we I No Save Finis.”⁴

Tru long ol profet blong Hem, Papa long Heven i oltaem rimaenem yumi se stret mo gud fasin i fasin blong stap hapi. Eksampol, King Benjamin i bin tijim se Papa long Heven “i stap askem se yufala i mas mekem wanem we hem i bin askem yufala blong mekem, from samting ia sapos yufala i mekem, hem i stap blesem yufala semtaem.”⁵ Long wan nara hym i rimaenem yumi long semfala toktok:

Long fotin yia blong mi, mi lanem abaot sam long ol blesing ia. Mi luksave papa mo mama blong mi i defren smol. Tingting long wanem we mi bin luk, mi askem, “?Bae yumi go long wan misin?” Sapraes long fes blong mama blong mi i soem se mi tru. Afta, long wan famli kaonsel, mi mo ol brata mo sista blong mi i bin lanem se oli bin singaotem papa mo mama blong mifala blong prisaed long wan misin.

Mifala i bin stap long wan naesfala fam long Wyoming. Long lukluk blong mi, laef i bin stret gud evriwan. Mi save kam hom long skul, finisim ol wok blong mi mo go sutum pijin, fising o go wokbaot wetem dok blong mi.

Smol taem afta we mi lanem abaot koling ia, mi luksave se mi mas lego dog blong mi, Blu. Mi agensem tingting ia askem papa blong mi wanem bae mi mekem wetem Blu. Mi wantem mekem i klia long hem se i no fea nating long wanem we God i stap askem. Bae mi neva fogetem ansa blong hem. Hem i talem, “ Mi no sua. Hem i no save go wetem yumi, so i gud yu askem Papa long Heven.” Hemia i no bin ansa we mi wantem.

Mi stat blong ridim Buk blong Momon. Mi prea wetem wan tru tingting blong save sapos bae mi nid blong givimaot dog blong mi. Ansa blong mi i no bin kam kwiktaem be wan spesel tingting i stap kam long maen blong mi: “Yu no mekem i had long papa mo mama blong yu. No mekem i had. Mi bin singaotem papa mo mama blong yu.”

Mi bin save wanem Papa long Heven i askem. Save ia i no bin karemaot harem nogud ia blong givimaot dog blong mi. Be, tru long smol sakrifaes ia, hat blong mi i kam sopsop mo mi faenem pis taem mi stap lukaotem tingting blong Papa long Heven.

Mi talem tangkyu long Papa long Heven long ol blesing mo glad we mi faenem tru long ol skripja, prea, Tabu Spirit mo wan papa long wol ia we i klin inaf blong mekem wok blong hem olsem wan stamba gospel tija blong ol pikinini blong hem. Oli stap lidim mi, givhan long mi, mo wokbaot long saed blong mi blong helpem mi faenem rod—speseli taem mi nid blong mekem wan had samting.

Antap long kea bokis mo ol pat we mi bin talem, yumi wanwan i gat blesing ia blong gat wan prishud lida blong lidim mo givhan long yumi.

Presiden Boyd K. Packer i talem: “!Ol Bisop oli kasem insperesen!” Wanwan long yumi i gat raet blong jusum blong akseptem o sakemaot kaonsel we i kam long ol lida, be neva tanem bak long kaonsel blong Bisop blong yu nomata oli givim long wan pulpit o long yufala wanwan.”⁷

Ol man ia oli traehad blong ripresentem Lod. Nomata we yumi olfala o yangfala, taem Setan i wantem yumi blong tingting se evri samting i lus, ol bisop oli stap ia blong givhan long yumi. Taem mi toktok wetem ol bisop, mi faenemaot wan semmak tingting long saed blong konfes from fasin blong no stap obei o olgeta we oli no rong be oli stap safa long ol bigfala rong samting. Ol bisop oli wantem soem kwik lav blong Papa long Heven blong wanwan man mo wantem tumas blong wokbaot long saed blong wan we i stap lukaotem rod blong hem i go hom.

Ating bigfala pat blong kea bokis blong Papa long Heven oli tokbaot gud insaed long ol toktok ia: “God i lavem tumas ol man long wol nao hem i givim mi, mi stret pikinini blong hem i kam, mi wan nomo we Hem i gat.”⁸

Blong tijim yumi evri samting we yumi mas mekem, Jisas Kraes i lidim rod ia wetem wan eksampol we i stret gud evriwan blong yumi mas traem blong folem. Hem i askem yumi wetem ol han blong Hem i open blong kam folem Hem.⁹ Mo taem yumi foldaon, from yumi evriwan bae i foldaon, Hem i rimaenem yumi, “From luk, mi God, mi bin safa evri samting ia blong evriwan, blong oli no save safa sapos oli sakem sin.”¹⁰

!Hemia i wan naesfala presen! Fasin blong sakem sin i no wan panis, be i wan spesel janis. Hem i wan spesel janis we i lidim mo givhan long yumi. I no wan sapraes, ol skripja oli talemaot se yumi no mas prijim eni samting be hemia nomo fasin blong sakem sin.¹¹

Papa long Heven i gat plante tul, be plante taem Hem i yusum wan man blong helpem Hem. Evri dei Hem i givim long yumi ol janis blong lid, givhan mo wokbaot long saed blong wan we i gat nid. Yumi mas folem eksampol blong Sevya. Yumi tu i mas mekem wok blong Papa long Heven.

Olsem Yang Man Jeneral Presidensi, mifala i save se ol yut oli kasem blesing taem oli gat ol papa mo mama, mo ol lida we oli ripresentem Papa long Heven blong lidim, givhan mo wokbaot long saed blong olgeta. Tri prinsipol¹² we bae i helpem yumi kam pat long bokis blong kea blong Papa long Heven blong kea long ol narafala man oli:

Faswan, stap wetem ol yut. Presiden Henry B. Eyring i tokbaot poen ia: “I gat sam samting we yumi save mekem we oli moa impoten. Iven oli moa strong bitim we blong yusum ol toktok long ol tijing blong yumi long saed blong doktrin, bae hem i ol eksampol blong yumi long hao yumi laef folem ol doktrin.”¹³ Blong lidim ol yut i nidim blong stap wetem olgeta. Dediketem taem i wan saen blong lav we bae i letem yumi blong tij wetem ol toktok mo eksampol.

Nambatu, Blong givhan gud long ol yut, yumi mas konektem olgeta wetem heven. Taem ia bae i kam taem wanwan i mas stanap hemwan. Papa long Heven nomo i save stap blong givhan evri taem mo long evri ples. Ol yut blong yumi oli mas save olsem wanem blong lukaotem fasin blong givhan blong Papa long Heven.

Nambatri, Yumi mas letem ol yut blong yumi oli lid. Olsem wan papa mo mama wetem lav we i holem han blong wan smol pikinini we i stap lan blong wokbaot, yumi mas lego hem blong hem i save progres. Blong letem ol yut oli lid i nidim blong yumi gat fasin blong save wet longtaem mo gat lav. Hem i had mo i tekem moa taem bitim we yumi mekem yumiwan. Bae oli foldaon folfolem rod, be bae yumi wokbaot long saed blong olgeta.

Ol brata mo sista , bae i gat taem long laef blong yumi taem ol blesing blong givhan bae i luk olsem i longwe o i nogat. Long ol taem blong harem nogud ia, Elda D. Todd Chirstofferson i bin promes se: “letem ol kavenan blong yu oli stap antap evriwan, mo mekem yuwan yu obei long stret fasin. Afta, yu save askem wetem fet we i no muvmuv, folem nid blong yu, mo God bae i ansa. Bae Hem i sapotem yu taem yu stap wok mo lukaot. Long stret taem mo fasin blong Hem, bae Hem i sakem han blong Hem i kam long yu, mo talem, “Luk, mi stap ia.’”¹⁴

Long wan taem olsem, mi bin lukaotem kaonsel blong Papa long Heven tru long prea oltaem wetem hat, blong moa bitim wan yia blong faenem ansa long wan had situesen. Mi save se Papa long Heven i ansa long evri tru prea. Be yet i kam long wan dei mi wari tumas mekem se mi bin go long tempol wetem wan kwestin: “?Papa long Heven, Yu rili kea?”

Mi stap sidaon kolosap biaen long rum blong wet blong Logan Yuta Tempol taem long sapraes blong mi, tempol presiden Vaughn J. Featherstone i kam insaed long rum long dei ia, wan gudfala fren blong famli. Hem i stanap long fored blong kongregesen mo welkamem mifala evriwan. Taem hem i luk mi long medel blong ol narawan, hem i stop blong toktok, lukluk mi long ae blong hem mo afta talem, “Brata Brough, i gud blong luk yu insaed long tempol tedei.”

Bae mi neva fogetem filing blong simpol taem ia. I olsem se—long griting ia—Papa long Heven i stap givim han blong Hem i kam long fored mo stap talem, “Hemia mi.”

Papa long Heven i stap kea mo lisin mo ansa long evri prea blong ol pikinini.¹⁵ Olsem wan long ol pikinini blong Hem, mi save ansa long prea blong mi i bin kam long taem blong Lod. Mo tru long eksperiens ia, mi bin andastanem moa bitim eni nara taem se yumi ol pikinini blong God mo we Hem i bin sendem yumi i kam long ples ia blong mekem se yumi save filim Hem kolosap naoia mo gobak blong laef wetem Hem sam dei.

Mi testifae se Papa long Heven i stap lidim yumi, givhan long yumi mo wokbaot long saed blong yumi. Taem yumi folem Pikinini blong Hem mo lisin long ol wokman blong Hem, ol aposol mo profet, bae yumi faenem rod i go long laef we i no save finis. Long nem blong Jisas Kraes, amen.