?Olsem Wanem Tabu Spirit I Stap Helpem Yu?
Tabu Spirit i givim woning, Tabu Spirit i leftemap tingting, mo Tabu Spirit i stap testifae.
Long wan Mandei naet, i no longtaem i pas, waef blong mi, Lesa, mo mi i stop long haos blong wan yang famli kolosap long ples blong mifala. Taem mifala i bin stap ia, famli i invaetem mifala blong stap blong famli haos naet, i talem se naen yia boe blong tufala i rere long lesen. !Yes mifala i stap!
Afta long fas singsing, prea mo famli bisnis, naen yia boe ia i stat ridim wan kwestin long lesen we hem i raetemdaon: “?Olsem wanem Tabu Spirit i save helpem yu?” Kwestin ia i statem wan naes famli storian taem evriwan i serem ol aedia, mo tingting. Mi sek gud se tija ia i rere gud long lesen mo gudfala kwestin blong hem, we i tantanem mi bakegen mo bakegen.
Stat long tetaem ia, mi bin gohed blong askem miwan: “?Olsem wanem Tabu Spirit i stap helpem yu?”—wan kwestin we i stret long ol Praemeri pikinini we oli kasem eit yia mo stap rere long baptaes mo blong yufala, ol pikinini we oli jes baptaes mo oli kasem presen we i Tabu Spirit. Hem i stret tu long ol taosen blong ol niu konvet i nomata wanem yia—mo tu, long yumi ol narawan we i no niu konvet nating.
Mi invaetem wanwan long yumi, ol Praemeri pikinini blong tingting long “?Olsem wanem Tabu Spirit i stap helpem yu?” Taem mi tingting hevi long kwestin ia, kwiktaem mi tingtingbak long wan eksperiens blong yangfala taem blong mi. Hemia i stori we mi bin talem long Elda Robert D. Hales afta we mi kasem koling long Kworom blong Olgeta Twelef Aposol, mo hem i bin yusum long wan atikol blong Jos magasin we hem i bin raetem abaot laef blong mi.1 Sam long yufala i bin harem stori ia finis, be plante oli no harem yet.
Taem mi gat 11 yia, papa blong mi mo mi i go wokbaot long wan hot dei long ol hil kolosap long hom blong mifala. Taem Papa i stap wokbaot i go antap long stip smol rod, mi stap jiam long wan ston i go long nara ston, long saed blong smol rod ia. Mi tingting blong klaem long wan bigfala ston ia, nao mi stat blong klaem blong go from. Taem mi mekem olsem, mi sapraes se Papa blong mi i holem strap blong mi mo kwiktaem i putum mi daon, i talem: “No klaem long ston ia. Yu stap nomo long smol rod ia.”
Sam minit afta, taem mifala i stap antap long rod ia mo lukluk i godaon, mifala i sapraes blong luk wan bigfala posen snek i stap slip long hot san antap long stret ston ia we mi wantem klaem long hem.
Afta, taem mifala i stap draev i go hom, mi save se Papa i stap wet blong mi askem: “?Olsem wanem nao yu save se snek i stap ia?” Mekem se mi askem mo kwestin blong mi i go blong mitufala i tokbaot Tabu Spirit mo olsem wanem Tabu Spirit i save helpem yumi. Mi neva fogetem wanem mi bin lanem long dei ia.
?Yu save luk olsem wanem Tabu Spirit i bin helpem mi? Mi tangkyu tumas se papa blong mi i bin lisin long kwaet smol voes blong Tabu Spirit, from i sevem laef blong mi.
Wanem Yumi Save Abaot Tabu Spirit
Bifo yumi go lukluk moa long kwestin: “Olsem wanem Tabu Spirit i stap helpem yu,” bae yumi luklukbak long wanem Lod i talemaot abaot Tabu Spirit. I gat plante trutok we oli no save finis we yumi save lukluk long olgeta, be tedei bae mi tokbaot tri nomo.
Faswan, Tabu Spirit i nambatri memba blong Godhed. Yumi lanem trutok ia long fas toktok blong bilif: “Mifala i stap biliv long God, Papa we i no save finis, mo Pikinini blong Hem, Jisas Kraes mo long Tabu Spirit.”2
Sekenwan, Tabu Spirit i wan we i spirit, olsem we skripja blong naoia i talem: “Papa i gat wan bodi blong mit mo bun we oli save tajem, semmak olsem hemia blong man; Pikinini blong Hem tu; be Tabu Spirit, hem i no gat wan bodi blong mit mo bun, be hem i wan we i Spirit. Sapos i no olsem, bae Tabu Spirit i no save stap insaed long yumi.”3 Hemia i minim se Tabu Spirit i gat wan spirit bodi, i no semmak olsem God Papa mo Jisas Kraes, we Tufala i gat ol bodi blong mit mo bun. Trutok ia i kliarem ol nara nem we oli givim long Tabu Spirit we yumi save gud long olgeta, olsem Holi Spirit, Spirit blong God, Spirit blong Lod, Tabu Spirit blong Promes mo Spirit blong Givhan.4
Nambatri, presen we i Tabu Spirit i kam tru long fasin blong putum han antap long hed blong man. Odinens ia, afta long baptaes, i mekem se yumi save gat Tabu Spirit i kompanion blong yumi oltaem.5 Blong mekem odinens ia, olgeta we oli klin inaf mo kasem Melkesedek Prishud, oli putum han blong olgeta antap long hed blong wan,6 i singaotem nem blong hem, i talemaot prishud atoriti we oli gat, mo long nem blong Jisas Kraes, oli konfemem hem i kam wan memba blong Jos blong Jisas Kraes blong Ol Lata-dei Sent, mo oli talem toktok ia: “Kasem Tabu Spirit.”
?Olsem Wanem Tabu Spirit I Stap Helpem Yumi”
Taem yumi luklukbak nomo long ol trifala ki trutok abaot Tabu Spirit, yumi gobak long fas kwestin blong yumi: “?Olsem wanem Tabu Spirit i stap helpem yu?”
Tabu Spirit I Givim Woning
Olsem we mi tokbaot long eksperiens blong mi, Tabu Spirit i save helpem yu taem Hem i wonem yu fastaem long ol denja blong wol mo blong spirit. Mi lanem bakegen impoten rol blong Tabu Spirit taem mi bin stap long Eria Presidensi long Japan.
Long tetaem ia, mi wok kolosap wetem Presiden Rid Tateoka, presiden blong Japan Sendae Misin. Olsem pat blong nomol misin wok blong hem, Presiden Tateoka i putum plan blong wan misinari lida miting long Saot pat blong misin blong hem. Sam dei bifo long miting, Presiden Tateoka i gat filing, wan filing long hat blong hem, blong invaetem evri misinari long Son pat ia i kam long lidasip miting, be i no samfala elda mo sista lida nomo.
Taem hem i talemaot tingting blong hem, oli rimaenem hem se miting ia i no blong evri misinari, be olgeta misin lida nomo. Be, i putum nomol fasin blong wok i stap long saed blong save folem filing we hem i kasem, nao hem i invaetem evri misinari we oli stap long ol taon long saed solwota, wetem taon blong Fukusima, oli kam long miting. Long stret dei blong miting, 11 Maj 2011, ol misinari oli kam wanples long bigfala misin miting long taon blong Koriyana.
Long taem blong miting ia, wan 9 poen etkwek mo sunami i kilim pat ia blong Japan, long ples we Japan Sendae Misin i stap long hem. Sore tumas, ol taon kolosap long solwota—wetem hemia we ol misinari oli kam tugeta long hem—oli nogud evriwan mo plante laef i bin lus. Mo taon blong Fukusima i fesem problem blong nuklia.
Nomata we mitinghaos we ol misinari oli stap mit long hem long dei ia i brokbrok from etkwek, be tru long ol toktok blong Tabu Spirit, Presiden mo Sista Tateoka mo evri misinari oli sef long wan ples. Oli bin stap longwe long eni denja, longwe long ol bigfala trabol ples we sunami i kasem, mo nuklia problem.
Taem yu stap mekem folem ol toktok blong Tabu Spirit—ol filing ia oli kwaet mo oli stap—bae Hem i save tekemaot yu, we yu no save, long ol denja blong spirit mo blong wol.
Ol brata mo sista. Tabu Spirit bae i helpem yu taem Hem i wonem yu, olsem Hem i mekem long papa blong mi mo Presiden Tateoka.
Tabu Spirit I Leftemap Tingting
Blong gohed ansarem kwestin: “?Olsem wanem Tabu Spirit i stap helpem yu?” bae yumi lukluk long rol blong Hem olsem Spirit blong Givhan. Sam samting i hapen long laef we i mekem yumi no hapi, harem i soa, mo harem nogud. Yet, long medel blong ol tes ia, Tabu Spirit i stap mekem wan impoten rol blong Hem—I Givhan, we i wan nem blong Hem. Ol toktok ia blong pis mo i givhan long tingting we oli kam long Jisas Kraes, oli tokbaot tabu rol ia: “Nao bae mi askem papa blong mi, mo hem bambae i givim wan narafala Man blong Givhan long yufala blong hem i save stap oltaem wetem yufala.”7
Blong givim pikja long hemia moa, mi serem wan tru stori blong wan famli wetem faef boe we oli muvaot long Los Anjeles i go long wan smol komuniti plante yia i pas. Tufala bigfala boe oli stat blong plei spot long haeskul, gat ol fren, ol lida mo ol koj—plante long olgeta oli ol fetful memba blong Jos. Ol rilesensip ia oli helpem olgeta blong mekem Fernando, we i olfala moa, mo smol brata blong hem, blong tufala i baptaes.
Fernando i aot long hom samtaem afta, i go skul mo i plei futbol long skul. Hem i maredem haeskul switat blong hem, Beli, insaed long tempol. Taem Fernando mo Beli i finis skul, tufala i wet long fas pikinini blong tufala i bon—wan bebi gel. Be long rod ia blong ol famli oli helpem Fernando mo Beli blong kambak hom, Beli mo sista blong hem i kasem bigfala trak aksiden wetem plante trak. Beli mo bebi gel we i no bon yet i bin lusum laef blong tufala.
Harem nogud blong Fernando i bigwan, hemia blong papa mo mama mo brata mo sista blong Beli tu, be yet, bigfala dip pis mo givhan we i draon insaed long olgeta i bin kam kwiktaem nomo. Tabu Spirit long rol blong Hem olsem Spirit blong Givhan i sapotem Fernando tru long bigfala nogud taem ia. Spirit i toktok mo givim wan pis we i bin stap we i lidim Fernando blong fogivim mo lavem evriwan we i gat pat insaed long bigfala aksiden ia.
Papa mo mama blong Beli oli ringim brata blong hem we i stap long misin long taem blong aksiden ia. Afta, long wan leta, hem i tokbaot filing blong hem abaot rabis nius ia blong sista blong hem: “I bin gud tumas blong harem voes blong yufala i kwaet nomo i stap long medel blong strong win. Mi no bin save wanem blong talem. Mi stap tingting nomo se sista blong mi bae i no stap taem bae mi kambak hom. Mi bin harem gud tru long ol strong testemoni blong yufala abaot Sevya mo plan blong Hem. Semfala swit spirit ia nao i mekem mi kolosap mi krae taem mi stap stadi mo tij, mo i fulumap hat blong mi. Spirit i givhan long mi mo i mekem mi tingbaot evri samting we mi save.”8
Tabu Spirit bae i helpem yufala taem Hem i givhan long yufala, olsem i mekem long famli blong Fernando mo Beli.
Tabu Spirit I Testifae
Tabu Spirit i testifae tu, mo i talem witnes abaot Papa mo Pikinini mo evri trutok.9 Lod, taem i toktok long ol disaepol blong Hem, i talem: “Taem we Spirit blong Givhan i kam, hem bambae i save tokbaot mi long yufala.”10
Blong tokbaot bigfala rol blong Tabu Spirit olsem wan witnes, bae mi gohed long stori blong Fernando mo Beli. Sapos yufala i tingbaot, mi bin talem se Fernando mo brata blong hem oli bin baptaes, be papa mo mama mo ol trifala yangfala brata oli no baptaes. Mo nating we oli invaetem olgeta blong mit wetem ol misinari plante taem, be evri taem famli i no akseptem.
Taem Beli i ded wetem bebi gel blong hem, famli blong Fernando oli harem nogud tumas. Oli no harem gud, o gat pis. Oli no save andastanem olsem wanem, boe blong tufala, wetem famli blong Beli , oli save tekem hevi lus ia.
Long en, oli luksave se wanem we boe blong tufala i gat, mo oli no bin gat, i gospel ia blong Jisas Kraes we i bin kambak, mo hemia i mas wan ples blong pis mo harem gud. Taem tufala i luksave hemia, oli bin invaetem ol misinari blong tijim famli blong tufala long gospel. Long en, oli kasem witnes mo testemoni blong tufala abaot bigfala plan blong stap hapi, we i tekem olgeta blong kasem swit pis mo givhan we tufala i bin stap lukaotem.
Tu manis afta we Beli mo apugel i lus, papa mo mama blong Fernando mo tufala yangfala brata oli kasem baptaes, mo oli kasem presen we i Tabu Spirit. Yangfala brata blong Fernando, we i gat sikis yia, i wet from baptaes blong hem taem hem i kasem eit yia. Tufala wanwan i testifae se Spirit, Tabu Spirit, i witnesem se gospel i tru, i lidim olgeta blong wantem kasem baptaes mo blong kasem presen we i Tabu Spirit.
Ol brata mo sista. Tabu Spirit bae i helpem yu taem Hem i testifae long yu, semmak olsem Hem i bin mekem long famli blong Fernando.
Sot Toktok
Nao yumi talem evri samting ia i sot. Yumi poenemaot trifala trutok blong revelesen we i tekem yumi blong save Tabu Spirit. Oli we Tabu Spirit i nambatri memba blong Godhed, Tabu Spirit i wan we i spirit, mo presen we i Tabu Spirit i kam tru long fasin blong putum han antap long hed. Yumi luk tu ol trifala ansa long kwestin: “Olsem wanem Tabu Spirit i stap helpem yu?” Tabu Spirit i givim woning, Tabu Spirit i givhan long tingting, mo Tabu Spirit i testifae.
Fasin blong Stap Klin Inaf blong Save Kipim Spirit
Long yufala we yufala i stap rere blong kasem baptaes mo konfemesen, o olgeta we oli jes baptaes o bin baptaes longtaem finis, hem i impoten tumas blong yumi stap sef long bodi mo spirit blong yumi kipim presen we i Tabu Spirit. Yumi stat blong mekem hemia taem yumi stap obei long ol komanmen, gat prea wanwan mo wetem famli, stap ridim ol skripja, mo lukaotem blong gat lav mo fogivnes wetem ol famli mo ol narawan. Yumi mas kipim ol tingting, ol aksen, mo lanwis oli klin gud. Yumi mas wosipim Papa long Heven insaed long hom blong yumi, long Jos, mo taem i posibol, long tabu tempol. Stap kolosap long Spirit, mo Spirit bae i stap kolosap long yu.
Testemoni
Mi nao endem toktok blong mi wetem wan invitesen mo sua testemoni blong mi. Mi invaetem yufala blong laef moa fulwan long ol toktok we ol Praemeri pikinini oli stap singsing long hem oltaem, ol toktok we oli luksave gud: “Lisin, lisin. Tabu Spirit bae i talem kwaet. Lisin lisin long kwaet smol voes.”11
Ol dia brata mo sista, olfala mo yangfala. Mi givim witnes blong mi long ol tabu Hae man ia we oli stap long Godhed—God Papa, Jisas Kraes, mo Tabu Spirit. Mi talem testemoni blong mi se wan long ol spesel janis we yumi ol Lata-dei Sent i gat blong laef long taem we evri wok blong Kraes i kamtru, hem i presen we i Tabu Spirit. Mi save se Tabu Spirit i stap mo bae i helpem yu. Mi ademap tu spesel witnes blong mi abaot Jisas Kraes mo wok blong Hem olsem Sevya mo Ridima blong yumi, mo abaot God olsem Papa blong Yumi long Heven. Long nem blong Jisas Kraes, amen.