Ekōjkan an Jetōb Kwojarjar eo Maron̄ Jipan̄ Eok?
Jetōb Kwojarjar eo ej kakkōl, Jetōb Kwojarjar eo ej kaenōm̧m̧an, im Jetōb Kwojarjar eo ej kam̧ool.
Ilo juon joten in M̧ande ejjab etto, lio pāleō, Lesa, im n̄a kar bōjrakļo̧k ilo m̧weo im̧ōn juon baam̧le em̧m̧an ilo peļaak eo am. Ke kōm kar pād ijo, baam̧le eo ekar karuwaineneik kōm n̄an pād ilo nokon in jota an baam̧le, jiron̄ kōm̧ bwe ļaddik eo nejier ratimjuon iiō-dettan eaar kōpooj katak eo. Aaet, kōm kar pād!
Ālkin al in kōpeļļo̧k eo, jar, im ennaan in m̧akūtkū an baam̧le, eo ratimjuon iiō-dettan eaar ijjino kōn riiti juon kajjitōk jān katak eo an eaar je: “Ekōjkan an Jetōb Kwojarjar eo maron̄ jipan̄ eok?” Kajjitōk kajjitōk in eaar ijjino kōn juon ekōnono eaorōk an baam̧le ilo an aolep kwaļo̧k ļōmņak ko im meļeļe ko aer. Iaar ketak kōn m̧aanjap popo eo an katak eo an rūkaki eo am im kajjitōk eo an ekanooj em̧m̧an, eo eaar kōm̧m̧an bwe aō kōļmenļo̧kjeņ kake ālkin kar loļo̧k eo am.
Jān iien eo, iaar wōnm̧aanļo̧k wōt n̄an kajjitikin eō make, “Ekōjkan an Jetōb Kwojarjar eo maron̄ jipan̄ eok?”—juon kajjitōk eo ekkar n̄an eļap tata n̄an ajri ro ilo Būraimere rej tōpar ralitok im kōppopo n̄an peptaij im n̄an ajri ro me ejjab etto raar peptaij im bōk menin letok eo an Jetōb Kwojarjar. Ebarāinwōt ekkar n̄an taujin rioktak ro rej kab oktak.
Ij kūr kajjojo iaad, eļaptata ajri ro ilo Būraimere, n̄an ļōmņak kōn, “Ekōjkan an Jetōb Kwojarjar eo maron̄ jipan̄ eok?” Ke iaar jino kejōkļo̧kjeņ kōn kajjitōk in, em̧ōkaj an iiōn̄aktok aō kōn en̄jake eo jān aō kar jodikdik. En̄in ej juon bwebwenato iaar kwaļo̧k n̄an Elder Robert D. Hales ālkin wōt kar kūr eō n̄an Doulul eo an Jon̄oulruo Rijilōk ro im eo ekar kobaik ilo juon bwebwenato an mākjiin eo an Kabun̄ eo eaar je kōn mour eo aō.1 Jet iaami remaron̄ kar ron̄ bwebwenato in, bōtaab elōn̄ iaami remaron̄ kar jab.
Ke iaar bōlen 11 iiō detta, jema im n̄a kar etal in etetal aitok ilo juon raan ebwil ilo jōm̧m̧ār ilo toļ ko repaake im̧we im̧ōm. Ke jema eaar etetal lōn̄ļo̧k ilo iaļ eo eju, iaar keļo̧k jān juon dekā ekilep n̄an bar juon, ilo tōrere in iaļ eo. Kajieon̄ tallōn̄e dekā ko rekillep, iaar jino urōbbaj n̄an lōn̄ in dekā eo. Ke iaar kōm̧m̧ane, iaar ilbōk ke jema eaar dāpij eō kōn kan̄ūr eo im m̧ōkaj an kanōk laļļo̧k n̄a, ba, “Jab tallōn̄e dekā en. Jān etetal wōt ilo iaļ eo.”
Minit ko tokālik, ke kom̧ kar reilaļļok jān ijo euteij ilo iaļ eo, kōm kar bwilōn̄ ke kōmro kar lo juon rattle snake eļap ej babu ium̧win det ioon ejja dekā eo iaar kajieon̄ tallōn̄e.
Tokālik, ke kōmor kar ettōrļo̧k n̄an m̧weo, iar jeļā Jema eaar kōttar aō kajjitōk, “Ekōjkan am̧ kar jeļā snake eo eaar pād ijo?” Kōn menin iaar kajjitōk, im kajjitōk eo aō eaar tōļļo̧k n̄an juon ekōnono kōn Jetōb Kwojarjar im ekōjkan an Jetōb Kwojajar eo maron̄ jipan̄ kōj. Ijjan̄in kar meļo̧kļo̧k ta eo iaar katak raan jab eo.
Komaron̄ ke lo ekōjkan an Jetōb Kwojarjar eo kar jipan̄ n̄a? Ij indeeo kam̧m̧oolol bwe jema eaar ron̄jake ainikein eo elur, emera an Jetōb Kwojarjar eo, āinwōt an maron̄ kar dāpij mour eo aō.
Ta eo Jej Jeļā kōn Jetōb Kwojarjar eo
M̧okta jān ad kam̧wilaļļo̧k ad ļōmņak kōn kajjitōk eo “Ekōjkan an Jetōb Kwojarjar eo maron̄ jipan̄ eok?” Jān etale jet iaan ta ko Irooj eaar kwaļo̧k kōn Jetōb Kwojarjar. Elōn̄ m̧ool ko indeeo jemaron̄ lali, bōtaab rainin inaaj kalikkar wōt jilu.
Jetōb Kwojarjar ej membōr eo kein kajilu an Doulul in Anij eo. Jej katak m̧ool in ilo laajrak in tōmak ko eo kein kajuon: “Kōmij tōmak ilo Anij, eo Jemān Indeeo, im ilo Nejin, Jisōs Kraist, im ilo Jetōb Kwojarjar.”2
Kein karuo, Jetōb Kwojarjar eo ej juon āinbwinnin jetōb, āinwōt kōmeļeļeik ilo jeje ko rekwojarjar raan kein: “Jemān ewōr ānbwinnin kanniōk im di ko āinwōt maron̄ un̄ūr wōt ānbwinnin armej; Nejin barāinwōt; a Jetōb Kwōjarjar ejjeļo̧k ānbwinnin kanniōk im di, a ej juon ānbwinnin Jetōb. Eļan̄n̄e ekar jab āindein, Jetōb Kwōjarjar eban kar maron̄ jokwe ilo kōj.”3 Meļeļe in bwe Jetōb Kwojarjar eo ewōr ānbwinnin jetōb, ejjab āinwōt Anij Jemān im Jisōs Kraist, ro ewōr ānbwinnin kanniōk. M̧ool in ej kalikkar bar āt ko kar liļo̧k n̄an Jetōb Kwojarjar eo im ralikkar n̄an kōj, ekoba Jetōb Kwojarjar, Jetōb an Anij, Jetōb an Irooj, Jetōb Kwojarjar an Kallim̧ur, im Rikaenōm̧m̧an.4
Kein kajilu, menin letok eo an Jetōb Kwojarjar ej itok kōn likūt pā ko ioon bar. Kain̄i in, ālkin peptaij, ej kōkarbōk kōj n̄an jemjerā eo ejjab bōjrak an Jetōb Kwojarjar.5 N̄an kōm̧m̧ane kain̄i in, rikabwijer Melkisedek Priesthood ro rōrreeo rej likūt pāier ioon bōran kajjojo,6 kūr e kōn etan, ba mālim in priesthood eo aer, im ilo etan Jisōs Kraist, kapene āinwōt juon membōr an Kabun̄ eo an Jisōs Kraist im Armej ro Rekwojarjar ilo Raan-ko Āliktata, im kadipioik naan eo aorōk: “Bōk Jetōb Kwojarjar.”
Ekōjkan an Jetōb Kwojarjar eo Maron̄ Jipan̄ Eok?
Kōn etale jab in eļam waan an m̧ool ko raorōk jilu kōn Jetōb Kwojarjar, jej bar ro̧o̧l n̄an kajjitōk eo ad m̧oktata “Ekōjkan an Jetōb Kwojarjar eo maron̄ jipan̄ eok?”
Jetōb Kwojarjar Eo Ej Kakkōl
Āinwōt aō kar kōmeļeļeik ilo en̄jake eo aō ke iaar ajri, Jetōb Kwojarjar eo emaron̄ jipan̄ eok kōn kakkōl eok m̧oktaļo̧k kōn kauwōtata ko an kanniōk im jetōb. Juon alen iaar bar katak aorōk in jerbal in kakkōl eo an Jetōb Kwojarjar ke iaar jerbal ilo Eria Būreejtōnji eo ilo Japan.
Ilo tōre in, iaar jerbal epaake Reid Tateoka, būreejtōn eo an Japan Sendai Mijen eo. Āinwōt m̧ōttan jerbal ko an mijen ekka an kōm̧m̧ani, Būreejtōn Tateoka eaar karōk juon kweilo̧k n̄an ritōl ro an mijinede ro ilo m̧ōttan eo iturōk in mijen eo an. Jejjo raan m̧okta jān kweilo̧k eo, Būreejtōn Tateoka eaar wōr juon an im̧we, juon en̄jake ilo būruwōn, n̄an kūr aolep mijinede ro an zone eo an iturōk n̄an kweilo̧k eo an ritōl, ijello̧kin juon oran eo edik an elder im sister ritōl ro.
Ke eaar kwaļo̧k jibadbad eo an, ro jet raar kakeememej e bwe kweilo̧k jab in eaar jab ļōme n̄an aolep mijinede ro ak n̄an ritōl ro an mijen wōt. Mekarta, likut iturejet karōk ko jeļā kaki n̄an an ļoor im̧we eo eaar bōke, eaar kūr aolep mijinede ro rej jerbal ilo jikin kweilo̧k ko itōrerein lo̧jet, ekoba jikin kweilo̧k eo an Fukushima, n̄an kweilo̧k eo. Ilo raan eo kar karōk, M̧aaj 11, 2011, mijinede ro raar kuk ippān doon n̄an kweilo̧k eo an mijen n̄an aolep ilo ioļapļap in jikin kweilo̧k eo an Koriyama.
Ilo kweilo̧k in, juon m̧akūtkūt in laļ 9.0 kajooran im tsunami kar waļo̧k ilo eria eo an Japan ijo Japan Sendai Mijen ej pād ie. Ekabūrom̧ōjm̧ōj, elōn̄ jikin kweilo̧k ko itōrerein ļojet—ekoba jikin ko me mijinede ro raar koba tok jāni—kar jorrāān im en̄taan eļap kōn an lōn̄ mej. Ilo jikin kweilo̧k Fukushima eaar jorrāān jān jikin kakkoņ baijin eo.
Men̄e im̧ōn jar eo ijo mijinede ro raar kweilo̧k ie raan eo eaar jorrāān jān m̧akūtkūt in laļ eo, kōn ļoor im̧we ko an Jetōb Kwojarjar eo, Būreejtōn im Sister Tateoka im aolep mijinede ro raar ippān doon ilo ejjeļo̧k jorrāān. Raar ettoļo̧k jān jorrāān eo im m̧ail jān jorrāān eo an tsunami eo im jorrāān in baijin eo.
Ilo am̧ ron̄jake im̧we ko jān Jetōb Kwojarjar—im̧we ko emakijkij tata aer lur im mera—maron̄ kōm̧akūt eok, ilo am̧ jaje, jān kauwōtata ko an jetōb im kanniōk.
Ro jeiū im jatū, Jetōb Kwojarjar eo enaaj jipan̄ eok kōn kakkōl eok, ainwōt An kar kōm̧m̧ane n̄an jema im Būreejtōn Tateoka.
Jetōb Kwojarjar Eo Ej Kaenōm̧m̧an
N̄an uwaake kajjitōk eo “Ekōjkan an Jetōb Kwojarjar eo maron̄ jipan̄ eok?” Kiiō jān etale jerbal eo An āinwōt Rikaenōm̧m̧ān. M̧akūtkūt ko jab kōtmene ilo aolepān mour ko ad rej kwaļo̧k būrom̧ōj, metak, im inepata. Aaet, ioļapļap in mālijjon̄ ko, Jetōb Kwojarjar eo ej jerbal n̄an kōj ilo juon iaan jerbal ko raorōk An—Rikaenōm̧m̧an, eo ej lukkuun juon iaan āt ko Etan. Naan in kaenōm̧m̧an, naan in kōketak ko jān Jisōs Kraist rej kōmeļeļeik jerbal kwojarjar in, “I naaj jar im kajjitōk ippān Jema, im enaaj lewōj n̄an kom̧ bar juon Ri Kaaenōm̧m̧an, bwe en pād ippemi indeeo.”7
N̄an kōmeļeļeik menin eļapļo̧k, ij kwaļo̧k bwebwenato eo em̧ool kōn juon baam̧le ļalem nejier ļaddik raar em̧m̧akūt jān Mexico n̄an United States elōn̄ iiō remootļo̧k. Ļaddik ro ruo rōrūtto tata raar jino ikkure ikkure ko ilo high school im iaio̧ ippān ro m̧ōttaer, ritōl ro, im kooj ro—elōn̄ iaer raar membōr ro retiljek an Kabun̄ in. Jemjerā kein raar jipan̄ tōlļo̧k n̄an peptaij eo an Fernando, eo erūto tata, im ļaddik eo jatin edik tata.
Fernando tokālik kar em̧m̧ākūt ettoļo̧k jān m̧weo, ijo eaar kadedeļo̧k jeļāļo̧kjeņ eo an im ikkure football ilo college. Eaar m̧areik lio jeran jān high school, Bayley, ilo tampeļ. Ke Fernando im Bayley kar kadedeļo̧k aer jikuuļ, raar kijooror kōn ļotak eo an ajri eo nejier m̧oktata—juon nin̄nin̄ leddik. Bōtaab ilo tōre eo baam̧le ko aer kar jipan̄ Fernando im Bayley bar em̧m̧akūtļo̧k n̄an m̧weo, Bayley im lio jatin raar ettōr ilo freeway eo im kar pād ilo juon itaak in wa ekabūrom̧ōjm̧ōj ekoba elōn̄ wa ko. Bayley im leddik eo nejin ejjan̄in ļotak raar mej.
Aaet an m̧wilaļ metak eo kar an Fernando, āinwōt eo an ro jinen im jemen Bayley im ro jein im jatin, aenōm̧m̧an im kaenōm̧m̧an eo me raar en̄jake eaar kanooj m̧ōkaj ab bōk jikin āinwōt keidi n̄an metak eo. Jetōb Kwojarjar eo ilo jerbal eo An āinwōt Rikaenōm̧m̧an em̧ool kar rejtake Fernando ilo kaen̄taanan in ekanooj pen keidi. Jetōb eo eaar kobaik aenōm̧m̧ān eo me kar tōl Fernando n̄an m̧wil in jeorļo̧k bōd im iakwe n̄an aolep ro raar pād ilo itaak in wa eo ekabūrom̧ōjm̧ōj.
Ro jinen im jemen Bayley raar kūrļo̧k ļaddik eo jatūn eo eaar jerbal āinwōt juon mijinede ilo iien jorrāān eo. Tokālik ļaddik eo eaar kōmeļeļeik ilo juon leta n̄an baam̧ļe eo en̄jake ko an kōn an kar ron̄ ennaan eo epen kōn leddik eo jein ejitōnbōro: “Ekar kabwilōn̄lōn̄ n̄an ron̄ ainikiōmi rekanooj meļak ilo ioļap in juon kaen̄taanan. Ijjab jeļā ta in ba. … Men eo imaron̄ ļōmņak kake ej leddik eo jeiū emaron̄ jab pād ijo n̄e ij ro̧o̧l n̄an kapijuknen eo. … Kar kaenōm̧m̧an eō kōn naan in kam̧ool ko ami redim kōn Rilo̧mo̧o̧r eo im karōk eo An. Ejja jetōb eo wōt em̧m̧an me kar kōm̧m̧an bwe in jan̄ wōt jidik ke iaar ekkatak im katakin kar kobrak būruwō. Innām kar kaenōm̧m̧an eō im kakememej kōn men ko me ijeļā.”8
Jetōb Kwojarjar eo enaaj jipan̄ eok kōn kaenōm̧m̧an eok, āinwōt An kar kōm̧m̧ane n̄an baam̧le eo an Fernando im Bayley.
Jetōb Kwojarjar Eo Ej Kam̧ool
Jetōb Kwojarjar eo ej barāinwōt kam̧ool im kwaļo̧k kam̧ool kōn Jemān im Nejin im aolep m̧ool otemjeļo̧k.9 Irooj, ej kōnono n̄an rikaļoor ro An, kar ba: “A n̄e Ri Kaenōm̧m̧ān ej itok, eo I naaj jilkinwōj n̄an kom̧ jān Jema, … Enaaj kōnnaan kōn eō.”10
N̄an kōmeļeļeik aorōk in jerbal eo an Jetōb Kwojarjar āinwōt rikam̧ool im eo ej kam̧o̧ol, inaaj wōnm̧aanļo̧k kōn bwebwenato eo an Fernando im Bayley. Eļan̄n̄e kwōj kermemej, iaar kwaļo̧k bwe Fernando im ļeo jatin raar peptaij, ak ro jinen im jemen im ļaddik ro jilu jatin rekar jab. Im, jekdo̧o̧n bōk elōn kūr ko n̄an ioon mijinede ro ium̧win iiō ko, kajjojo iien baam̧le eo ej m̧akoko in būki.
Ilo iien eo ekōmettak kōn jako eo an Bayley im leddik eo jibwier eaorōk ejjan̄in kar ļotak, baam̧le eo an Fernando eaar liājļōļ. Ejjab āinwōt Fernando im ejjab āinwōt baam̧le eo an Bayley, raar lo ejjeļo̧k kaenōm̧m̧an im aenōm̧m̧an. Raar jab maron̄ meļeļe ekōjkan an ļaddik eo nejier, ippān baam̧le eo an Bayley, maron̄ kar ineek eddo eo aer eddo.
Āliktata raar meļeļe bwe ta eo ļeo nejier eaar bōke im eaar ejjeļo̧k ippāer eaar gospel eo kōjepļaaktok an Jisōs Kraist, im menin eaar aikuj in unin aenōm̧m̧ān im ineem̧m̧an eo an. Ke raar kile menin, raar kūrļo̧k mijinede ro n̄an katakin baam̧le eo aer gospel eo. Āinwōt juon tōprak, raar bōk kam̧ool im naan in kam̧ool eo aer kōn karōk in m̧ōņōņō eo eļap, eo eaar bōkļo̧k aenōm̧m̧an em̧m̧an im ineem̧m̧an elur raar lukkuun in pukōte.
Ruo allōn̄ tokālik ālkin jako eo an Bayley im leddik eo jibwier ejjan̄in kar ļotak, jinen im jemen im ļaddik ro ruo reddik jatin Fernando raar peptaij, kapen, im bōk menin letok eo an Jetōb Kwojarjar. Ļaddik eo edik tata jatin Fernando, kiiō jiljino, ej reim̧aanļo̧k n̄an peptaij eo an n̄e etōpar ralitok. Er kajjojo rej kam̧ool bwe Jetōb, Jetōb Kwojarjar, kar kam̧ool kōn m̧ool eo an gospel eo, tōl er n̄an juon ikdeelel n̄an peptaij im n̄an bōk menin letok eo an Jetōb Kwojarjar.
Ro jeiū im jatū, Jetōb Kwojarjar eo enaaj jipan̄ eok kōn kam̧ool n̄an eok āinwōt An kar kam̧ool n̄an baam̧le eo an Fernando.
Tukadu in
Jān kiiō etale ilo tukadu in. Jaar kwaļo̧k jilu m̧ool ko me rej letok n̄an kōj juon jeļā ko kōn Jetōb Kwojarjar eo. Menin kein rej bwe Jetōb Kwojarjar eo ej eo kein kajilu uwaan Doulul in Anij eo, Jetōb Kwojarjar ej juon nememe in anbwinnin jetōb, im menin letok eo an Jetōb Kwojarjar ej itok n̄an kōj jān likūt pā ko ioon bar. Jaar barāinwōt kwaļok jilu uwaak ko n̄an kajjitōk eo “Ekōjkan an Jetōb Kwojarjar eo maron̄ jipaņ eok?” Jetōb Kwojarjar eo ej kakkōl, Jetōb Kwojarjar eo ej kaenōm̧m̧an, im Jetōb Kwojarjar eo ej kam̧ool.
Erreo n̄an Dāpij Menin Letok eo
N̄an kom̧ ro me rej kōppopo n̄an peptaij im kapen ak ro me ej kab mōj aer ak raar ilo tōre ko etto, ej aorōk n̄an ineem̧m̧an eo ad ilo kanniōk im jetōb bwe jān dāpij menin letok eo an Jetōb Kwojarjar. Jej jino kōm̧m̧an āindein kōn kajjieon̄ kōjparok kien ko, kōm̧m̧ān jar an juon make ak baam̧le, riiti jeje ko rekwojarjar, im pukōt jemjerā ko rem̧m̧an im jeļā joļo̧k bōd ippān baam̧le im ro jitōn bōro. Jej aikuj kōjparok ļōmņak ko, m̧akūtkūt ko, im kōnono ko ad ilo erreo. Jej aikuj kabun̄-jar n̄an Jemed wōj Ilan̄ ilo im̧ōko im̧ōd, ilo m̧ōnjar eo, im, jabdewōt jikin emaron̄, ilo tampeļ kwojarjar eo. Pād epaake Jetōb eo, im Jetōb eo enaaj pād epaake eok.
Naan in kam̧ool
Ij kiiō kiil kōn juon kūr im naan in kam̧ool eo aō ekijn̄en̄e. Ij kūr kom̧ n̄an mour wujlepļo̧k n̄an naan ko ekanooj emakijkij al kake jān ajri ro nejid ilo Būraimere, naan ko ij tōmak rōkiili: “Ron̄jake, ron̄jake. Jetōb Kwojarjar eo enaaj unoojdikdik. Ron̄jake, ron̄jake n̄an ainikien eo elur im edik.”11
Ro jeiū im jatū jitōnbōro, rūtto im dik, ij lewaj kam̧ool eo kōn aiboojoj eo ekwojarjar an armej ro me rej ejaake Doulul in Anij eo—Anij Jemān, Jisōs Kraist, im Jetōb Kwojarjar. Ij kwaļo̧k naan in kam̧ool bwe juon iaan jim̧we ko me jej lemōņōņō kaki āinwōt Armej ro Rekwojarjar ilo Raan-ko Āliktata ej mour ilo tarlep in iien ko ej menin letok eo an Jetōb Kwojarjar. Ijeļā bwe Jetōb Kwojarjar eo emaron̄ im enaaj jipan̄ eok. Ij barāinwōt kobaik kam̧ool eo aō ejeno̧lo̧k kōn Jisōs Kraist im jerbal eo An āinwōt ad Rilo̧mo̧o̧r im Ripinmuur im kōn Anij āinwōt Jemed wōj Ilan̄. Ilo etan Jisōs Kraist, amen.