Mg Mekera Chedaol Reng a Lolngeseu er Kau?
A Chedaol Reng a omeklatk, a Chedaol Reng a mengelaod, a Chedaol Reng a omeketakl.
Ng mle kebesengei ra Kot el lureor ra mla memong, e a bechik ra Lesa me ngak a mloldingel ra blirir a re ngeasek el lobekel ra basio di kim ngarngii. Me sera kibong, e tial telungalk a mle siotai er kemam me kim kie el ngara ongdibel er a telungalek, te ouchais er kemam el kmo ngelekir el etiu a rekil a kiltmeklii a osisechakl. Me a ki kilie!
Ng uriul er a kot el chelitakl, nglunguuch, ma tekingel a blai, e ngikel etui a rekil a mocha menguiu er a tmolech el ker el ngar tial osisecheklel: “Ng mekera Chedaol Reng a le ngesukau?” Tial ker a milchelii a ungil cheldecheduch er tial telungalk le te bek el chad lolecholt a uldasu ma lodengei el tekoi. Ak mlo mechas a renguk ra osisecheklel a sensei er kemam el keltmokl e kmal lungil el keril, el di kumdasu er ngii.
Me er chelchal taem, e ak melmolm loker re ngak, “Ng mekera Chedaol Reng a le ngesekau?”—ng ker el tokuni el mora re ngalk ra Primary el mocha euid a rekrir e kltmokl el mora techolb chelid e mo er tirkel ngalk el direke miltecholb e ngiluu a sengk er a Chedaol Reng. Ng dirrek el lomtutk el kirir tirkel telael el beches el lulebult e dirrek el me ra rubdois er kid el meketeket ra dobult.
Ak siotai er kid lorenges, tokuni a rengalk er a Primary, me lomdasu er sel ker, “Ng mekera Chedaol Reng a le ngesukau?” Mesel kumtab er tial ker, e ak mereched el metebengii a blekeradel er ak kekerei. Tiang a cheldecheduch el kuluuchais er ngii el mora Elder Robert D. Hales ruriul er ak mokedong el mora chlechad er a re Teruich ma Terung el Apostol el ngii a lilea ra babier ra Ikelesia e luluches er ngii el kirel a klengar er ngak.1 A re bebil er kemiu a locha mla rongesii, engdi locha betok a direkak.
Se er ak teruich ma tang a rekik, e a demak me ngak a mlo merael ra mle mekeald el taem ra rois el kmeed er a blimam. Ma demak er a lorael bedul a kongesachel, e ak silchesokl ra ta el klou el bad elmo ra chimong el ngara bita er tial rael. Mak milasem e leko ak melemeakl ra tara klou el bad, ak mocha melemeakl el mo ra bebul. Mek bocha kulasem, e ak kilbetiekl ra demak er a lotemetii a bando er ngak e lorreched el kursak el moriou el dul kmo, “Ng diak molemeakl er tilechal bad. Me dolmolm el ngara rael.”
Kesai el bung ruriul, meki momes el bedul iou er bab er tial rael, e a ki mlo mechas a rengmam ra ki mesang a klou el bersoch el meseb ra sils el ngar bebul tial bad el mle soak el melemeakl er ngii.
A uriul me ki momekall el mo remei, e ak mle medengei el kmo demak a mengiil er ngak el mo loker, “Ke mekera e medengei el kmo ngkel bersoch a mla er sei?” Ma kuleker, e a kerik a ngiluu a cheldecheduch el mo mesaod er a Chedaol Reng e mekerang a Chedaol Reng a le ngosukid. Ng direkak kubes a tekoi el ksiluub er sel sils.
Ke mesa el kmo ng milkerang a Chedaol Reng ra le ngosukak? Ak blechoel tmeu a renguk el demak el ulurrenges er ngkel kekerei, mengululau el ngor ra Chedaol Reng, leng ngii a locha ulsebelii a klengar er ngak.
Ngera Kede Medengelii el kirel Chedaol Reng
Uchei ra dolemolm lomtab er sel ker “Ng mekera Chedaol Reng a le ngesekau?” e deluut el mes a bebil ra ikel Rubak a mla ocholt el kirel Chedaol Reng. Ng betok el diak a ulebengelel el klemerang el sebeched el mesaod, eng di chelechal sils e ak di mo smaod a keldei.
A kot, a Chedaol Reng a ongedei chedal sel chelchad ra Dios. Kede subii tial klemerang ersel kot el tebechelel a klaumerang: “ Aki oumerang ra Dios, el Diak a Ulebengelel el Chedam, ma Ngelekel ra, Jesus Kristo, ma Chedaol Reng.”2
Ongerung, a Chedaol Reng a ileakl el reng, e lulecholt ra beches el chedaol lechukl: “A Chedam a ngarngii a bedengel ra tech ma iuis eldi ua chad; ma Ngelekel meng uaisei; engdi Chedaol Reng a diak a bedengel ra tech ma iuis, engdi ngileakl el Reng. Le lak, e a Chedaol Reng a diak el be le kie ra rengud.”3 Tia belkul a kmo a Chedaol Reng a ngarngii a bedengel ra reng, engdi diak el ua Dios el Chedam ma Jesus Kristo, el ngarngii a bedengir ra tech. Tial klemerang a meketeklii a bebil ra ngakl el lomekedong ra Chedaol Reng el dodengei, el ua Chedaol Reng, Reng ra Dios, Reng ra Rubak, Chedaol Reng ra Telbiil, ma Olengeseu.4
Ongedei, a sengk er a Chedaol Reng a mei e lokiu sel domor a imad. Tial chedaol lureor, ruriul ra techolb chelid, a meskid el blechoel el keldemed el Chedaol Reng.5Sel longetmeklel tial chedaol lureor, e tirkel klikiid el loba Melchizedek Priesthood a locha imorir ra bebul a btelul a chad,6mekedongii a ngklel, oterkeklii a ngerachel ra priesthood e lobang, e okiu a ngklel a Jesus Kristo, e toterkeklii elmo chedal A Ikelesia ra Jesus Kristo ra Uriul-klebesei el Santo, e dulii sel kot el klou a belkul el tekoi: “Mnguu a Chedaol Reng.”
Ng Mekerang a Chedaol Reng a le Ngesukau?
Meng ngoeak tial beot losenged er aikal kledei el dodai ra klemerang el kirel a Chedaol Reng, e kede lmuut elmo mesaod er sel kot el ker: “Ng mekerang a Chedaol Reng a le ngesukau?”
A Chedaol Reng a Omeklatk
Mak silodii ra blekeradel ra ak kekerei, a Chedaol Reng a sebechel ngosukau el lomeklatk er kau ruchei ra ngidil telemall el mora bedenged ma reng. Ak liluut el subii el kirel a klou el ngerchelel lomeklatk a Chedaol Reng sera kusiou ra Area Presidency ra Siabal.
Tiakid el taem, e ak kulureor el lobengkel a President Reid Tateoka ra Japan Sendai Mission. Meng mle ngerchelel ra mission, e a President Tateoka a tilbir a miting el kirir a rungerachel ra re missionariis ersel longos ra mission er ngii. Kesai sils ruchei er tial miting, e a President Tateoka a mla rengii ra bedengel, el mlora rengul, el siotai ra rokui el missionari ersel basio el mo rsel miting, ra kuk di tirkel mekesai el elders ma re sisters.
Sera le louchais er a moktek, e tulmeklatk er ngii el kmo tial miting a diak el ruul elmo ra rokui el missionariis engdi mo er tirkel mengeteklir. Engdi, ngii a ngilai elmo medechel a ikel luldasu ra ureor me lotireklii sel blo lolchesuar er ngii, e mlo siotai ra rokui el missionariis el mesiou ra bebil ra mats el ngara bkul a daob, luldimukl ra beluu ra Fukushima, el mora miting. Mesel miltutk el sils ra March 11, 2011, e a re missionari a mlo kebtech e tmak el kirel sel klou el miting ra mission ra elsel a beluu ra Koriyama.
Me sera le ngarngii tial miting, e a klou el desiu ma tsunami a tireklii a telkib ra Siabal el sel ngarngii a Japan Sendai Mission. Ng kerior el betok beluu ra bkul a daob—luldimukl ra ikel le kie er ngii a re misisonariis— a miltemall e mlo chuarem ra klou kodelir a rechad. E a beluu ra Fukushima a mlo meringel el metemall ra mekngit el cheltel a dok.
Meng mla rengii a miltemall ersel basio ra miting el bla rengii a e misionariis ersel sils lulekiu er tial desiu, e ulekiu ersel lobtechel a Chedaol Reng, e a President ma Sister Tateoka ma rokui el missionariis a tmak el selbechakl. Ng dimlak el ngara medal a kereor el eroid ersel telemelel a tsunami ma dok el yolt.
Mesel motireklii a obtechel a Chedaol Reng—ke melechesuar el loumesind el chelelakl e kekerei—e ke merodel, e ka modengei, ra mo tomelau ra reng ma klechad.
Rodam ma rodos, a Chedaol Reng a mo ngosukau el lomeklatk er kau, eldi ua demak ma President Tateoka.
A Chedaol Reng a Mengelaod
Ma dolmolm el longer ersel ker “Ng mekerang a Chedaol Reng a le ngesukau?” e mei me domes er Ngii ersel ngerchelel Lolengeseu. A bkaischemrungel el tekoi ra bekl el klengar er kid a muchel a klengit el reng, ringel, ma ouchel el reng. Engdi, me kede seluk er a ikal longarem, e a Chedaol Reng a meskid a tara klou el ngerechelel—Olengeseu, e tiang a meral tara ngklel. A ikal budech, el melisiich el tekingel a Jesus Kristo a smodii tial chedaol ngerachel: “Ak mo meluluuch ra Demak, e ngii a mo meskau a tara Olengeseu, meng ngii a mo kie lobengkem elmo cherechar.”7
Ma de sodii tiang elmo bleketakl, e kuchais ra meral dilubech er a telungalk el teiim el sechal el milukl el mora Los Angeles, USA, elmo kie ra kekerei el basio ra kesai el rrak er a memong. Tirkel terung el meklou el sechal a ulsekool ra hai skuul e kaukledem tir ma re sechelirir, meredel, ma re mereder ra klekool—el betok er tir a mekedung el chedal a Ikelesia. A ikal deliongel a tilmetemii a rael meng mlo metecholb a Fernando, ngkel klou, meng ngkel longerung el sechal.
A Fernando ra uriul a milukl elmo eroid ra blil, meng milemolm ra skulel e ousekool ra daingak. Ng mlo bechil a redil el ble le kaudengei ra hai skuul, el Bayley ra templo. Ma Fernando ma Bayley ra bol merek er a skulir, e tem le semeriar el mengiil ra cherelel a kot el ngelekir—el redil. Engdi sel taem ra re chederir lolngeseu er tir melukl el lmuut elmo remei, e a Bayley ma merengel a ulemekall ra klou el rael e tiluu ra klou el aksident el mle betok. A Bayley ma le diol er ngii el ngalk a mlad.
Meng uaisei el lolchesuar ra ringel a Fernando, e dirrek el chad er a blil a Bayley ma re bebil er ngii, e ngosisiu el taem eng tmolech el budech ma ongelaod a mlo er tir el kmal mle mereched. A Chedaol Reng ersel Ngii a ngerchelel e Lolngeseu a meral ngilsuir a Fernando ra elsel tial klou el longarem. A Reng a uldersii a mesisiich el budech el milkrolii a Fernando meng mlo ousubes e betik a rengul el kirir tirkel chad luchul sel kereor.
A rechad er a blil a Bayley a ulemekedong er a ochedal el milesiou ersel tael el kirel tial aksident. Ng milsaod ra elsel a babilngel a lolechesiu ra bo lodengelii tial etiteuokel el chais el kirel a betik er a rengul lochedal: “Ng meral ngodech el tekoi sel dorenges er kemiu el kmal meklou a rengmiu el ngarngii tial klou el ringel. Ng diak a ngerang el bok dung. … Ak di melatk er a ochedak a locha mo diak el ngar tilechang sel kikong. … Ng mlo klou a renguk er a mesisiich el klaumerang er kemiu ra Osobel ma uldesuel. Sel losisiu el budech e medemdemk el blekerdelel a reng el loremlak meng soak el mol lemangel sel kusuub e olsisechakl a mei el smisichii a renguk. Mak mocha mechelaod e muklatk ra ikel tekoi el kudengei.”8
A Chedaol Reng a mo ngosukau e lolngeseu er kau, el ua Ngii el mora Fernando ma rechad ra blil a Bayley.
A Chedaol Reng a Omeketakl
A Chedaol Reng a dirrek el louchais e ochotii el sioning ra Demad ma Ngalk ma bekl el klemerang.9 A Rubak, ra lolekoi el mora mesiungel, a dilu el kmo, “ Engdi sel mei a Olengeseu, el ngak odureklii leko er kau el mlara Demak, … ngii a mouchais er ngak.”10
Ma bo dungil el smodii sel kesiokel el ngerechelel a Chedaol Reng el sioning, e ak mo melmolm ra cheldechedechal a Fernando ma Bayley. Alsekum me lotkii, e ak kuluchais el kmo a Fernando ma ongelel a miltecholb, engi rechad er a blil me tirkel mekekerei el lochelel a dimlak. Ma le ngilai a betok el longit elmo mes ra re missionariis ra ikel mlamo merek el rrak e a bekl el taem e toletngakl.
Ngokiu tial meringel el kodelel a Bayley ma ngelekel redil, a rechad er a blil a Fernando a mle meringel el mechelaod. E diak el ua Fernando ma rechad er a blil a Bayley, ng dimlak el betik er a ngeseu ma budech. Ng dimlak el lodengei el kmong mekerang a ngelekir, ma rechad er a blil a Bayley, a sebechir loltekau er tial kmal loberaod el ringel.
Ng dimlak el meketeket, e te mocha medengei el kmo a ngelekir ngoba ngerang e tir a dimlak a mla moluut el ebangkelio ra Jesus Kristo, e tiang e a uchul a klisichel ra budech e mechelaod. Sera bo lodengei, e te mle siotai ra re missionariis el molsisechakl ra telungalk er tir ra ebangkelio. Meng mlo, sebechir el nguu a sioning er tir ma klaumerang ersel klou luldasu er a deurreng, el milsterir a ungil budech e ungil ngeseu el sal lulsiik er ngii.
Eru el buil ruriul ra le mad a Bayley ma ngkel ngelekel a ngelekir, e a rechad er a blil a Fernando me tirkel terung el mekerei el lochelel a mlo metecholb, mloterkokl e ngiluu a sengk er a Chedaol Reng. Eng kel kot el kekerei lochelel a Fernando a olsingch elmo metecholb sel bol eiai a rekil. Te bekl el chad el louchais el kmo a Reng, el Chedaol Reng, a ouchais el sioning ra klemerang ra ebangkelio, lomekrael er tir el sorir elmo metecholb e nguu a sengk er a Chedaol Reng.
Rodam ma rodos, a Chedaol Reng a mo ngosukau el mouchais er kau eldi uai Ngii el mlora telungalk er a Fernando.
Ulebongel
Chelechang e a kedeb lomesodel a tekoi el blak dung. Ak mla lecholt a keldei el klemerang el ngoikid el morsel klemedengei ra Chedaol Reng. Aikang sel Chedaol Reng a ongedei el chedal sel chelchad er a Dios, e a Chedaol Reng a ileakl el reng, e a sengk er a Chedaol Reng a mei lokiu sel domor imad. Ak dirrek el mla lecholt a kledei el nger el mora ker “Ng mekerang a Chedaol Reng a le ngesukau?” A Chedaol Reng a omeklatk, a Chedaol Reng a olengeseu, a Chedaol Reng a ouchais.
Mo Klikiid el Oba tial Sengk
Me kemiu el mengetmokl el kirel a techolb chelid e moterkokl, tirkel direke mlo merek, malechub el molmuut er tirkel mlo merek er a mla memong, ng klou a ututelel el meral osebcheklel a bedenged ma reng el dongeluoleu a sengk er a Chedaol Reng. Kede omuchel el melasem loltirakl a llach, kede meluluuch kid ma telungalk er kid, menguiu a chedaol llechukl, e osiik a beltik el reng e kausubes ra delongeled el telungalk ma re kmeed er kid. Ng kired el mesemechokl a uldesued, omerelled, ma omelkinged meng klikiid. Ng kired el mengull ra Demad ra Babeluades ra keblid, ikelesia, mesel, sebechel, er a templo. Mkeed er a Reng, ma Reng dil keed er kau.
Klaumerang
Chelecha e ak mo mengesimer loba siotai e ouchais e ungil medengei. Ak siotai er kau elmo mui loltirakl aikel tekoi longitakl el blechoel a rengalk ra Primary, ng tekoi el kudengei el lodengei: “Morrenges, morrenges. A Chedaol Reng a mo mengululau. Morrenges, morrenges er sel mengululau el kekerei el ngor.”11
Betik er a renguk el rodam ma rodos, meklou ma re ngeasek, a kudersii a sioning er ngak er sel ngarngii el klebkall er a re chedaol el chad el cherrengelel a chelchad er a Dios: Dios el Chedam, Jesus Kristo, ma Chedaol Reng. A kuchais el kmo a tara llemelted el doldeu a rengud el Uriul-klebesei el Santo el kie luldak el rokui sel sengk er a Chedaol Reng. Ak medengei el kmo a Chedaol Reng a sebechel mo ngosukau. Ak dirrek lodekiar a tokubets el sioning er ngak er a Jesus Kristo ma ngerchelel el Losebeled e Okisel a koall el dirrek el Dios el ngerchelel el Demad ra Babeluades. Loba ngklel a Jesus Kristo, amen.