Kaen Fasin, Bigfala Hat, mo Lav
Ol brata, bae yumi luklukbak long ol laef blong yumi mo stat blong folem eksampol blong Sevya blong stap kaen, gat lav, mo gat bigfala lav.
Ol dia brata blong mi, hem i wan ona mo spesel janis blong mi blong toktok long yufala ol fetful man we i holem prishud prishud blong God. Long aftenun ia mi wantem tekem yumi gobak long wan topik we mi bin tokbaot bifo.
Profet Momon i bin tokbaot wan long ol impoten fasin blong Sevya we ol disaepol blong Hem i mas gat. Hem i talem se:
“… mo sapos wan man i no stap flas mo tingting blong hat blong hem i stap daon, mo i talemaot tru long paoa blong Tabu Spirit se Jisas i Kraes, hem i mas nid gat bigfala lave; from sapos hem i no gat bigfala lav hem i nating; from samting ia hem i mas nid gat bigfala lav.
“Mo bigfala lav i save wet longtaem, mo i kaen, mo i no jalus, mo i no kam bigwan, i no lukaotem samting blong hem nomo, i no save kros kwiktaem. …
“From samting ia, ol brata blong mi we mi lavem tumas, sapos yufala i no gat bigfala lav, yufala i nating, from bigfala lav bae i neva sot. From samting ia, holem taet long bigfala lav, we i moa hae bitim evri samting, from evri samting i mas sot.
“Be bigfala lav i stret lav blong Kraes, mo i stap strong oltaem; mo eni man we oli faenem se hem i gat samting ia long las dei, bae i gud long hem.”1
Ol brata, yumi no save gat ona long prishud blong God sapos yumi no stap kaen long ol nara man.
Wan dia gud fren blong mi, Elda Josef B. Witlin i bin wan tru kaen man. Hem i talem:
“Fasin blong stap kaen hem i fas prinsipol blong wan selestial laef. Fasin blong stap kaen hem i olsem wanem wan man we i gat fasin blong Kraes i tritim ol nara man. Fasin blong stap kaen i fulumap evri toktok mo aksen blong yumi long wok, skul, jos, mo speseli long ol hom blong yumi.
“Jisas, Sevya blong yumi, i bin gudfala eksampol blong kaen fasin mo fasin blong lav mo sore.”2”
Ol skripja i tijim yumi se stret mo gud fasin blong eksasaesem prishud, i dipen long hao yumi laef folem prinsipol blong stap kaen, bigfala hat mo lav. Long Doktrin mo ol Kavenan yumi rid se:
“I no gat eni paoa o fos we man i save yusum o mas yusum tru long prishud, be nomo wetem fasin blong winim tingting blong man, wetem fasin blong gat longfala tingting long hadtaem, wetem fasin we i kwaet mo fasin blong no stap flas, mo wetem fasin blong gat tru lav;
“Tru long fasin blong stap kaen, mo wan klin save, we bae i leftemap sol bigwan mo i no gat fasin blong tufes, mo i no gat fasin blong no stap ones.”3”
Ol brata, bae yumi luklukbak long ol laef blong yumi mo stat blong folem eksampol blong Sevya blong stap kaen, gat lav, mo gat bigfala lav. Taem yumi mekem olsem, bae yumi stap long wan moa gud ples blong singaotem paoa blong heven blong yumiwan, blong ol famli blong yumi, mo blong ol fren blong yumi speseli long rod blong yumi ia we i had tumas blong gobak long papa blong yumi long heven. Mi prea olsem long nem blong Jisas Kraes, amen.