2010–2019
Kirekiroch, Tong Ennet, me Tongen Echipwur
April 2017


Kirekiroch, Tong Ennet, me Tongen Echipwur

Sipwe nenengeni manauach me finata ach sipwe tapweno mwirin ewe Chon Amanau ren ach sipwe kirekiroch, tong, me fangafangoch.

Pwi achengicheng,ua fokkun pwapwa ren ei tufichin afanafan ngeni kemi non ach ei chufengen kich chon kamoch an Kot ewe pristut. Non ei pwinin ua poraus usun ew itenap minne ua fen ani afanafan me akkom.

Ewe soufous Mormon a awewei usun ew me nein ekkewe nikinik an ewe Chon Amanau mi kan auchea, minne noun chon kuno repwe pwan winiti usun.

“Iwe ika emon aramas mi mosonoson me tipetekison non netip, me pwarata me ren ewe manamanen ewe Ngun mi Fel pwe Jises i ewe Kraist, mi auchea pwe epwe wor an tong ennet; pun ika ese wor an tong ennet i mi namotongaw; ina minne mi auchea pwe epwe wor an tong ennet.

“Iwe tong ennet mi nikitu, me mi kirekiroch, me ese nonowo, me ese nuapas, ese kutta pwisin an, ese songokai. …

“Ina minne, ami pwi achengicheng, ika ese wor ami tong ennet, ami mi namotongaw, pun tong ennet ese tongeni morono, minne mi nap seni mettoch meinisin, pun mettoch meinisin repwe morono—

“Nge tong ennet ina ewe nimenimochun tong an Kraist, iwe a nikitu ngeni feinfeino; iwe ion a pwá pwe a wor ren atun ewe ranin soponon, epwe murino ren.”1

Pwi kewe, sise asamonu ewe pristut an Kot ika sise kirekiroch ngeni pwan ekkoch.

Chienei mi achengicheng Elter Joseph B. Wirthlin a ennetin emon mwan mi kirekiroch. A apasa:

“Kirekiroch ina masouen manau ese much. Kirekiroch ina usun napanapen emon cho tapweno miwrin Jises. Kiroch epwe pweni unusan ach kewe kapas, me foffor non angang, sukun, non fan, me aucheanapan non imwach.

“Jises, ach chon amanau, i ewe nenien appiru mi nap ren kirekiroch me tong.”2

Ekkewe Pukefel ra aiti kich pwe anganga ewe pristut non nimoch a anongonong won ach manaueni ekkewe annukun kirekiroch, tong ennet me tong echipwur. Non ewe Doctrine and Covenants sia anneani:

Ese wor och manaman are pochokun epwe nemenem seni chok mwumwutan ewe pristut, nge epwe nemenem ren pesepes, … nikitu, netip pwetete, tekison, pwan ren tong ese much;

Ren kirekiroch, mirit mi nimoch, minne epwe apochokuna ewe ngun, esap wor nikotupotup, are chofona.”3

Pwe kewe mi achengichgeng, sipwe nenengeni manauach me finata ach sipwe tapweno mwirin ewe Chon Amanau ren ach sipwe kirekiroch, tong, me fangafangoch. Ren ach fori ei sipwe fen fich ne koratiw ekkewe manamanen nang, fan itan kich pwisin, ach kewe famini, me pwan chienach chon sai won ei aan mi weires ngeni neniach me nang. Ua ani iotek ekkei mettoch, non itan Jises Kraist ewe Samon, amen.