Te Akoi, Tangira ae Kororaoi, ao te Tangira
Ti a rinanoi maiura ao n iangoia bwa ti na ira ana banna ni katooto te Tia Kamaiu n atataiaomata, tangira ao n akoi.
Tariu aika tangiraki, I karineaki man n reken au tai ni marooro nakoimi n ikotakiia kaain ana nakoanibonga te Atua aika kakaonimaki. N te tairiki aei I rinea atuun te reirei are I a tia n taekinna mai imwaaina.
Te burabeti ae Moomon e kabwarabwara teuana anuan te Tia Kamaiu are a riai ni katotongnga Ana reirei. E taku:
“Ao ngkana e nimamannei ma n nanorinano nanona, ao n taekinna ni mwaakan te Tamnei are e Raoiroi bwa Iesu bon te Kristo, ao e na riai n iai irouna te tangira ae kororaoi; bwa ngkana akea te tangira ae kororaoi irouna ao bon te akea ngaia; ngaia are e riai n iai te tangira ae kororaoi irouna.
“Ao te tangira ae kororaoi e taotaonaki n nano, ao e akoi, ao e aki bakantang, ao e aki kainikatonga, ao e aki ukoukora oin nanona, e aki kakai un. …
“Ngaia are, tariu aika kam tangiraki iroou, ngkana akea iroumi te tangira ae kororaoi, ao bon akea ngkami, bwa akea kabwakan te tangira. Ngaia are, nim ma te tangira ae kororaoi, are e kabanea ni korakora iaon bwaai nako, bwa bwaai ni kabane a na kona ni bwaka—
“Ma te tangira ae kororaoi bon ana tangira Kristo ae itiaki, ao e teimatoa n uaa te toki; ao ane e kuneaki irouna n te kabanea ni bong, ao e na bon nakoraoi ibukina.”1)
Tariu, ti aki karinea ana nakoanibonga te Atua ngkana ti aki nanoangaia tabeman.
Raoraou ae tangiraki ao ana reitaki Unimwaane Joseph B. Wirthlin bon te mwaane ae akoi. E taku:
“Te akoi bon aan te reirei ibukin te maiu ae te teretio. Te akoi bon anuan Kristo ae e na karaoia te aomata nakoia tabeman. Te akoi e riai n riki bwa aan nako ara taeka ao ara mwakuri n te tabo ni mwakuri, n te reirei, n te aro, ao aimoarara riki inanon mweengara.
“Iesu, ara Tia Kamaiu, bon te katooto ae korakora n te akoi ao n te nanoanga.”2
Ti reireinaki ni booki aika tabu bwa kamwakuran te nakoanibonga n te raoiroi e katan iaon maiuakinan te reirei ibukin te akoi, tangira ae kororaoi, ao te tangira. N te Doctrine ao Covenant ti warekia:
Akea te mwaaka ke te kairoro ae kona ke n riai ni kateimatoaaki man tamaroan te nakoanibonga, tii man te anaaki n nano, … man te nanoraoi ao te nimamannei, ao te tangira ae akea tiana.
“Man te akoi, ao te atatai ae itiaki, are e na kakorakora te tamnei n aki mwamwana te aba ao n aki uarao.”3
Tariu, ti na tuoi maiura ao ni baireia n iriira ana katooto te Tia Kamaiu n akoi, n tangira, ao n tituaraoi. Ao ngkana ti karaoia, ti na mena n te nakoa ae tamaroa ni bubuti mwaakan karawa i bon ibukira, ibukiia ara utu, ao raoraora aika taan mwamwananga n tabetai te mwananga ae kaangaanga n okira mweengara i karawa. I tataro n aran Iesu Kristo te Uea, amen.