Pagkamaluluy-on, Putli nga Pagmahal, kag Pagpalangga

Pinalangga ko nga mga kauturan, napasidunggan ako sang pribelihiyo nga maghambal sa inyo sa sining kalibutanon nga pagtililipon sang mga nagakapot sang priesthood sang Dios. Sa sini nga gab-i mahambal ako parte sa isa ka topiko nga nahambal ko na sang una.

Ang propetang si Mormon naglarawan sang isa sang importante nga mga kinaiya sang Manluluwas nga dapat sundon sang Iya mga disipulo. Siling niya:

“Kag kon ang isa ka tawo malulo kag kubos sa tagipusuon, kag nagatuad paagi sa gahum sang Balaan nga Espiritu nga si Jesus amo ang Cristo, kinahanglan gid sia nga may putli nga pagmahal; kay kon wala sia sing putli nga pagmahal balewala sia; gani kinaahanglan may putli sia nga pagmahal.

“Kag ang putli nga pagmahal nagaantus sing madugay, kag maluluy-on, kag wala nagakahisa, kag wala nagapahabok, nga wala nagahandum sing para sa iya kaugalingon, indi madali mapaakig. …

“Gani, pinalangga kong mga kauturan, kon kamo wala sing putli nga pagmahal, wala-wala gid kamo, kay ang putli nga pagmahal wala nagakulang. Gani, magkapyot sa putli nga pagmahal nga amo ang labaw sa nga tanan, kay ang tanan nga mga butang magakulang—

“Apang ang putli nga pagmahal amo ang putli nga gugma ni Cristo, kag ini nagapadayon sa wala’y katubtuban; kag kon sin-o ang makita nga nagaangkon sini sa katapusan nga adlaw, mangin maayo ini para sa iya.”¹

Mga kauturan, wala naton ginatahud ang priesthood sang Dios kon indi kita maluluy-on sa iban.

Ang akon pinalangga nga abyan kag kaupod nga si Elder Joseph B. Wirthlin matuod gid nga maluluy-on nga tawo. Siling niya:

“Ang pagkamaluluy-on amo ang pinakaimportante nga prinsipyo sang langitnon nga kabuhi. Ang pagkamaluluy-on dapat mangin kaundan sang tanan naton nga mga pulong kag mga buhat sa ulobrahan, sa eskwelahan, sa simbahan, kag labi na gid sa aton mga puluy-an.

“Si Jesus, nga aton Manluluwas, amo ang huwaran sang kaluoy kag pag-ulikid.”²

Ang balaan nga mga kasulatan nagatudlo sa aton nga ang matarong nga paggamit sang priesthood nagasandig sa aton pagpangabuhi sang mga prinsipyo sang kaluoy, putli nga pagmahal, kag pagpalangga. Sa Doctrine and Covenants mabasa naton:

“Indi kamo makagamit sang bisan ano nga gahum ukon inpluwensya paagi sa priesthood, kundi lamang sa pag-uloulo, … sa kaayo kag pagkamapainubuson kag paagi sa pagpalangga nga tunay;

“Paagi sa pagkamaluluy-on kag putli nga kaalam, nga tuman nga magapatubo sang espirituhanon nga kinaiya sang kalag nga wala sing pagpakuno-kuno kag wala sing pagdaya.”³

Mga kauturan, usisaon naton ang aton mga kabuhi kag magdesisyon sa pagsunod sa ehemplo sang Manluluwas paagi sa pagkamaluluy-on, pagkamapinalanggaon kag pagmahal sing putli. Kag sa aton paghimo sini, mangin yara kita sa mas maayo nga pagkahimtang nga magpangayo sang mga gahum sang langit para sa aton mga kaugalingon, para sa aton mga pamilya, kag para sa aton kasubong nga mga biyahero sa sining kon-kaisa mabudlay nga pagpanglakaton pabalik sa aton langitnon nga puluy-an. Ini ang akon ginapangamuyo sa ngalan ni Jesucristo nga Ginuo, amen.