Kev Ua Siab Zoo, Kev Siab Hlub, thiab Kev Hlub
Cia peb tshuaj xyuas peb lub neej thiab txiav txim siab ua raws li tus Cawm Seej tus yam ntxwv ua siab zoo, hlub lwm tus, thiab muaj siab hlub.
Kuv cov kwv tij, kuv zoo siab uas kuv muaj cib fim hais lus rau nej nyob hauv kev sib ntsib uas cov tuav Vajtswv lub pov thawj hwj nyob thoob plaws lub ntiaj teb koom ua ke. Hmo no kuv yuav hais txog ib yam uas kuv twb hais tas los lawm.
Tus yaj saub Maumoos qhia txog tus Cawm Seej ib tug cwj pwm tseem ceeb, es Nws cov thwj tim yuav tsum coj raws li Nws tus yam ntxwv. Nws hais tias:
“Thiab yog ib tug neeg txo hwj chim thiab muaj siab mos siab muag, thiab lees los ntawm lub hwj chim ntawm tus Vaj Ntsuj Plig Dawb Huv tias Yexus yog tus Khetos, nws yuav tsum muaj txoj kev siab hlub; vim yog nws tsis muaj txoj kev siab hlub nws tsis muaj nuj nqis dab tsi; yog li ntawd nws yuav tsum muaj txoj kev siab hlub.
“Thiab txoj kev siab hlub tiv taus ntev, thiab siab zoo, thiab tsis xav tau luag tug, thiab tsis khav theeb, tsis xav rau nws tus kheej xwb, tsis chim siab. …
“Yog li ntawd, kuv cov kwv tij uas kuv hlub es, yog nej tsis muaj txoj kev siab hlub ces, nej twb tsis muaj nuj nqis dab tsi, vim txoj kev siab hlub yeej tsis plam ib zaug li. Yog li ntawd, cia li npuab rau txoj kev siab hlub, uas yog yam uas zoo tshaj plaws tag nrho, vim txhua yam yeej yuav plam—
“Tiam sis txoj kev siab hlub yog txoj kev hlub dawb paug ntawm Khetos, thiab nws yuav nyob tas mus li; thiab tus uas raug nrhiav pom muaj nws nyob hauv hnub kawg, tus ntawd yuav tau zoo.”1
Cov kwv tij, peb saib tsis taus Vajtswv lub pov thawj hwj yog peb tsis ua siab zoo rau lwm tus.
Kuv tus phooj ywg thiab tus uas koom nrog kuv ua hauj lwm Txwj Laug Joseph B. Wirthlin yeej yog ib tug neeg siab zoo. Nws hais tias:
“Kev ua siab zoo yog lub ntsiab ntawm ib lub neej xilethi-aus. Ib tug neeg zoo li Khetos yeej ua siab zoo rau lwm tus. Peb yuav tsum ua siab zoo txhua zaus peb hais lus thiab ua tej yam ntawm qhov chaw ua hauj lwm, hauv tsev kawm ntawv, lub koom txoos, thiab nyob hauv peb tsev.
“Yexus, peb tus Cawm Seej, yeej yog tus yam ntxwv zoo tshaj plaws txog kev ua siab zoo thiab kev khuv leej”2
Cov vaj lug kub qhia peb tias yog peb xav siv lub pov thawj hwj raws li kev ncaj ncees, peb yuav tsum ua neej raws li cov ntsiab cai uas yog kev siab zoo, kev siab hlub, thiab kev hlub. Nyob hauv phau Lus Qhuab Qhia thiab Kev Khi Lus peb nyeem hais tias:
Tsis muaj leej twg uas muaj peev xwm los yog tsim nyog siv ib lub hwj chim los yog hwj huam los ntawm lub pov thawj hwj, tsuas yog los ntawm kev yaum, … los ntawm kev siab mos thiab siab muag, thiab los ntawm kev hlub tiag tiag xwb;
“Los ntawm kev siab zoo, thiab kev txawj ntse, uas yuav txhawb tus ntsuj plig tsis muaj kev siab dag, thiab tsis muaj kev ntxias.”3
Cov kwv tij, cia peb tshuaj xyuas peb lub neej thiab txiav txim siab ua raws li tus Cawm Seej tus yam ntxwv ua siab zoo, hlub lwm tus, thiab muaj siab hlub. Thaum peb ua li no, ces peb yuav tsim nyog thov kom txais tau Vajtswv lub hwj chim, kom pab peb tsev neeg, thiab pab peb cov neeg zej zog uas koom nrog peb xav rov qab mus cuag peb lub tsev nyob saum ntuj ceeb tsheej. Kuv thov li no los ntawm tus Tswv Yexus Khetos lub npe, amees.