Kuhlwacng, Luhngse Muhtahl, ac Luhngse
Lwelah kuht in lohacng ke moul lasr uh ac suk in ukwe srihkasrak luhn Mwet Lahngo pa nuh ke in kuhlwacng, in luhngse, ac in luhngse muhtahl.
Tamuhlwel sacohk wiyuck, nga sruikihn pacl se inge ke nga kuh in sramsram nuh suwos fin facluh nohfohn ke tuhkweni luhn mukul luhlahlfongi suc sruok pristut luhn God uh. Oyekuh ngac sramsram ke sifac se ma nga tuh sramsram kac met ah.
Mwet pahluh Mormon el ahkuhtweyac ip yohk srihpac se luhn Mwet Lahngo ac ma mwet tuhma lutlut Lal enenuh in fahsr kac. El fahk:
“Ac fin sie mwet el fakpacp ac inse puhsisacl, ac fahkwack ke kuh luhn Nguhn Muhtahl lah Jisus pa Kraist, enenuh na in oasr luhngse muhtahl yohrohl; tuh fin wacngihn luhngse muhtahl yohrohl na el tiac oacwac; ohinge enenuh na in oasr luhngse muhtahl yohrohl.
“Ac luhngse muhtahl uh mongfihsrwacsr, ac kuhlwacng, ac tiac sok, ac tiac fihlacng, tiac suk kacl sifacna, ac tiac puhrakwack, tiac nuhnkuh ma koluk, ac tiac engan ke ma koluk tuhsruhk engan ke ma pwacye. …
“Ohinge, mwet lili sacohk luhk, fin wacngihn luhngse muhtahl yuruwos, kowos wacngihn, tuh luhngse muhtahl uh tiac wacngihnlac. Ohinge, fungyang nuh ke luhngse muhtahl, suc pa wo emet, tuh ma nuhkwewa ac puhtatlac—
“Tuhsruhk luhngse muhtahl uh pa luhngse suwohs luhn Kraist, ac ma inge muhtweng ne tok ma pahtpaht; ac kuhtwena mwet suc sukokyak in sruokyac na ma inge ke lwen sahflah, ac fah wo nuh sel.”1
Tamuhlwel, kuht tiac ahkfuhlwactye pristut luhn God kuht fin tiac kuhlwacng nuh sie sin sie.
Kawuck sacohk luhk ac wi orekma yuruk Elder Joseph B. Wirthlin pa mwet kuhlwacng nuh pwacye se. El fahk:
“Kuhlwacng pa ma yohk ke moul celestial. Kuhlwacng pa ohiyacn Kraist lah mwet oruh sie sin sie. Kuhlwacng enenuh tuhkuh ke kahs ac mukwikwi nuh kwewa lasr ke orekma, ke lutlut, ke alu, ac yohk nuh ke lohm sesr uh.
“Jisus, Mwet Lahngo lasr, pa srihkasrak ma wo emet ke kuhlwacng ac pahkomuhta.”2
Ma suhmuhslah luti kuht lah orekmakihnyuck suwohswohs luhn pristut wiwina ohiyacn moul lasr ke ip yohk luhn kuhlwacng, luhngse muhtahl, ac luhngse. Ke Doctrine and Covenants kuht riti:
Kowos tiac kuh in us kuhtwena kuh kuh kaiyuck ke pristut fin tiac ke kaiyuck, mong fihsrwacsr, … ohiyac fihsrwacsrsrwacsr ac puhsisacl, ac luhngse pwacye;
Ke kuhlwacng, ac etuh pwacye, ma ac fah ahkyohkye nguhna ke wacngihn wosounkacs, ac wacngihn suhlallacl.3
Tamuhlwel, lwelah kuht in liye moul lasr sifacna ac sulwaclah in ukwi srihkasrak luhn Mwet Lahngo ke mukwikwi kuhlwacng, luhngse, ac luhngse muhtahl. Ac ke kuht oruh, kuht ac tu ke acn wo liki met in pahngon kuh luhn inkuhsrao me kais sie sifacna, ke sucu lasr, ac mwet fuhfahsryucsr lasr ke fuhfahsryucsr upac kuhtuh pacl nuh ke lohm inkuhsrao lasr. Nga pruhe ke inen Leum Jisus Kraist, amen.