Blekokeuii, Bliochel el Beltik el Reng, me a Beltik el Reng

Rodam er ngak, ng chetengakl tial techall el kungedecheduch er kemiu er tia el klou el kldibel er a beluulechad el rokir er a re blak a rengrir loba priesthood er a Dios. Chelechal kesus e ak lmuut el melekl aike el blak dung er a memong.

A profet Mormon a silodii a tara klou a belkul blekerdelel Osobel el kirel mo okesiu er a roltirakl er Ngii. Ng dilu el kmo:

“Alsekum a chad a mo oba delemdemk me a ngariou el reng, e kombesar lokiu a klisichel Chedaol Reng el kmo a Jesus a ngii a Kristo, e ng kirel loba bliochel el beltik el reng; le lak loba bliochel el beltik el reng e ng diak el ngerang; me a leuaisei e ng kmal kirel mo oba bliochel el beltik el reng.

“E a bliochel el beltik el reng a kemanget el ngara ringel, e bekokeuii, e diak el bechechelingaol a rengul, e diak el ngarbab a rengul, diak losiik er a ungil er ngii, e diak el bekengesngasech a rengul. …

“A leuaisei, e kemiu el rodam er ngak, a lak moba bliochel el beltik el reng, e ng diak kom ngerang, le bliochel el beltik el reng a diak lengemed. A leuaisei, e bo murrekodel er a bliochel el beltik el reng, el ngii a kot el ngarbab er a rokui el tekoi, e diak lengemed—

“E ng di a bliochel el beltik el reng a klikiid el beltik el reng er a Kristo, e outekangel el mo er a ulebongel; me ngike el mo oba er a uriul el klebesei, a kmal mo klungiolel.”¹

Rodam, ng diak el sebeched el kullii a priesthood er a Dios a lak de bekokeuii el mo er a rebebil.

A kmal sechelik e ulebengkek loureor er a Elder Joseph  B. Wirthlin a meral mle bekokeuii el chad. Ng dilu el kmo:

“A blekokeuii el tekoi a kot el klou a belkul er sel klengar er a celestial. A blekokeuii a teletelel a chad loba blekerdelel a Kristo sel teloi er a rechad. A blekokeuii a kirel mekeek a rokui el omelkinged me a omerelled a de ngara ureor, skuul, ikelesia, me a rekeblid.

“A Jesus, el Osobeled, a mle okesiu er a blekokeuii me a chubechub. ”²

A chedaol llechukl osischeklid el kmo a melemalt el omerellel a priesthood a ultuil er a otirekled er a osischeklel a blekokeuii, bliochel el beltik el reng, me a beltik el reng. Chelsel a Doctrine and Covenants e kede menguiu el k mo:

Ng diak el sebechem el melemolem loba ngii di el klisichel a priesthood a lak mongelechel, ,  … e medemdemk e le ngariou a rengum, e moba beltik el reng;

E oba blekokeuii me a klikiid el uldasou, el mo meketii e smisichii a rengul a chad e diak momulak el beot a rengum. ”³

Rodam, mei e deluut el merritel a klengar kid e de tibir el mo oltirakl er a okesiul a Osobel el mo bekokeuii, e oubeltik el reng, e oba sel ngii a bliochel el beltik el reng. Esel bo deuaisei, e kid a mo sebeched el kldmokl loltengel a klisiich er a babeluades el kired, kirel a telungalek er kid, e dirrek el kirir a rebebil el osisiu el uai kid el ngara chelsel tial le bebil er a taem e ng meringel lomerael lemuut el mo remei er a babeluades. Tiaikid a nglunguchek el ngara ngklel a Jesus Kristo el Rubak, amen.