Kadek, Limpoak Unsek, oh Sapan
Kitail tehk mwahu mwomwen atail mour oh koasoanehdi idawehn sapwelimen Sounkomouro karasaras sang mi atail pahn kadek. sapan ,oh ahniki limpoak unsek.
Riei ohloko, I tungoaleniki wahu ni ei ahneki ansou mwahukiset pwehn koasoaiong kumwail nan kapokon en sampah wet en me kolokol prihsduhd en Koht. Ni soutik wet I pahn kapwurehieng ehu oaralap me I koasoiahier mwowe.
Soukohp Mormon kawehwe ehu wiewia kesempwal en Sounkomouro me Sapwellime tohnpadahk ko konehng alasang. E mahsani:
“Oh ma mehmen pahn kin ohpampap oh nan mohngiong karakarahk, oh kin wehkada sang ni manaman en Ngehn Sarawi me Sises iei Krais, e uhdahn anahne ahneki limpoak unsek; pwe ma e sohte ahneki limpoak unsek ih sohte mehkot; ihme kahrehda e uhdahn anahne en ahneki limpoak unsek.
“Oh limpoak unsek kin kanengmah, oh kin kadek, oh sohte kin peirin, oh sohte pohnmwahsu. sohte kin roporop ong pein ih, sohte kin mwadang lingeringerda. …
“Eri, riei kempoak kan, ma sohte amwail limpoak unsek, sohte mehkot kumwail, pwehki limpoak unsek kin pweida. Eri, tengediong ni limpoak unsek, iei ih me keieu laud sang koaros, pwe meh koaros sohte pahn kin pweida—
“Ahpw limpoak unsek iei limpoak mehlel en Krais, oh e kin mihmi kohkohlahte; oh mehmen me kin kolokol lao lel ni imwin rahno, e pahn kin mwahu ong ih.”1
Riei ohloko, kitail sohte wauneki prihsduhd en Koht ma kitail sohte kadek ong mehteikan.
Kempoakepei oh iengei Elder Joseph B. Wirthlin wia ohl kadek mehlel men. E mahsani:
“Kadek iei me pahson en mour en wein celestial. Kadek iei duwen en aramas me duwe Krais kin wia ong mehteikan. Kadek anahne pahsone atail koasoai oh mwekid kan nan doadoahk, sukuhl, mwomwohdiso, oh ni mehlel nan imwatail kan.
“Sises, atail Sounkomouro, me wia karasaras keieu mwahu en kadek oh sapan.”2
Pwuhk sarawi padahkiheng kitail me pwehn wia pwukoah en prihsduhd ni pwung kitail anahne momourki mour en kadek, limpoak unsek oh sapan. Nan Doctrine and Covenants kitail wadek me:
“Sohte manaman de kaweid kak de konehng en apwalih pwukoah en prihsduhd, ihte sang ni kamahntik … kadeke oh karakarahk, oh limpoak sang nan loalatail;
“Pwe kadek, oh marain, me pahn kadaiala atail mour kaidehn sang ni liksansalmwahu, oh likamw”3
Riei ohloko, kitail kasawiatail mourkan oh koasoanehdi en idawehn karasaras en Sounkomouro ni atail pahn kadek, sapan oh limpoak unsek. Oh ni atail pahn wia met, kitail pahn ahneki pwung en kamwerehdi manaman en nanleng ong kitail oh atail peneinei kan, oh ong iengatail kan nan seiloak wet me ekei ansou apwalong pwurekihla nan dewetail nanleng. I kapakapki ni mwaren Sises Krais atail Kaun ahmen.