A Chedaol Reng Bo Lomekrael

Rodam me a rodos, ngak, a uai kemiu, el mtebengar a rechedel a urerel a Rubak lokiu a tekingel a President Thomas S. Monson er a tutau. President Monson, ng betik a rengmam er kau, e oldubech er kau, e melemolem el meluluuch el kirem, “kau el profet er kemam.”¹

Kede mla melchesuar a klungel a Chedaol Reng er chelechal sandei. A om ngar tial klou el basio me a omngara rekeblimiu e momes malechub a om kldibel er a tokoro er a ikel cheroid el beluu er a beluulechad, e ng mla ngarngii a techelliu el melchesuar Chedaol Reng er a Rubak. Tiaikid el Chedaol Reng a oterkeklii er a rengmiu me a uldesuiu el kirel a klemerang el mla mosisechakl er tial klou el ongdibel.

Ka molbedebek a tekoi e ra chelsel tial dodengelii el chelitakl:

Ngokiu chedaol ocholt er a uriul-klebesei e kede medengei el kmo a Kledios a uldimukl er ngii a retedei el kakerous el chad: Demad er a Babeluades, me a Di Chimol Ngelekel Sechal, el Jesus Kristo, me a Chedaol Reng. A Chedam me a Ngalek a ngarngii a bedengir er a tech me a chiuius el uaia chad. E a Chedaol Reng a diak a bedengel er a tech me a chiuius ng kora di Deleb. Le omko ng dimlak el uaisei, e a Chedaol Reng a diak el sebechel mei er kid.”³

A klemechek er chelechal sils a melutk el kirel a klou el belkul a Chedaol Reng er a klengar kid. A Demad er a Babeluades a mle medengei el kmo ked emo obangel ongarm, ringel, me a olibesongel er a klengar kid er tial beluulechad; Ngii a mle medengei el kmo ked emo kurusii er a ker, klengit el reng, ongetikaik me a chelitechut. A mo uchul e kede ngmai a olisiich me a chedaol ulekrael er tial klengar, e Ngii a mla meskid Chedaol Reng, el tara ngklel a Chedaol Reng.

A Chedaol Reng omak er kid el mora Rubak. Ngokiu a chedaol urerel, e Ngii a omekellomes, olecholt, olisechakl, e odbechid el mo merael er a llomes er a Rubak. Ng klou a chedaol ngercheled el mo mesuub el mo omtab er a Odbechel er a klengar kid e mo oltirakl.

Molatk er a yaksok er a Rubak: A Rubak a millekoi el kmo Ngii a mo meskid a Chedaol Reng er Ngii el mo omekellomes a uldesued, el mo mekeek a rengud er a deureng. ⁴ Ng meral soak tial klemera el tekoi. A deureng el mekeek a rengud a meskid a diak a ulebengelel osenged el diak el di el uaia bek el sils er a klengar kid. Tial deureng a mei lokiu a budech er a chelsel aikel ongarm me a ringel. Ng meskid ongelaod me a duch el reng, me a klemedengei er a klemerang er a ebangkelio, e kilungii a beltkil a rengud el mora Rubak me a rokui el ngelekel a Dios. Ng uaisei el usbechellel tial klengeltengat a kmal klou, e ng di a beluulechad a mla obes e ouketui er ngii.

Bek el sandei el sel dolai er a chedaol belsoil, e kede soiseb er a telbiil el mo “blechoel melbedebkek er a Rubak el Jesus Kristo, me a tngakireng er Ngii. Sel doltirakl er tial chedaol telbiil, e a yaksok a mei er kid el kmo “a Chedaol Reng er ngii a mo blechoel [lobengked].”⁵

Ng mekera doruul er tiang?

Akot, e kede melasm el mo kiei el klikiid el kirel Chedaol Reng.

A Chedaol Reng a obengterir tirkel tir a “meringel el melbedebek er a Rubak el Dios er tir er a bek el sils.”⁶ El uaia tekingel a Rubak el kmo, ng kired el mo mechei a tekingel a beluulechad, e osiik aikel muut el ungil tekoi,”⁷ le a Reng er a Rubak a diak el sebechel kiei er a chelsel a diak ael klikiid el basio. ⁸ Ng kired el blechoel melasm loltirakl a llechul a Dios, mesuub chedaol llechukl, meluluuch, mo er a temple, e mo oltirakl er sel ongeteruich me a edei el tebechelel a klaumerang, el mo “bleketakl, oumerang, klikiid, bekokeuii, kedung, e … meruul a ungil el mo er a rokui el chad.”

Ongerung, e ng kirel ngarngii er a rengud a mo nguu Chedaol Reng

A Rubak a mla yaksok el kmo ngmo ouchais el mei er a uldesued me a rengud, lokiu Chedaol Reng el ngii a mei er kemiu e mo kiei er a chelsel a rengmiu⁹ Ak ulemuchel el o medengelii tiang er a kngeasek el misionari er a Scotch Plains, er a New Jersey. A talk mal mle mekeald el tutau er a mle chelsel Ongeuid el buil e ngak me a kldemek a ulemelchesiu lomes aikal ngakl el mlara Temple Square el mei. A ki mlora bill a Elwood Schaffer. A Mrs. Schaffer a dimlak el soal lorrenges a klemecham.

Tia er a bocha longesimer er a chesmerel, e ngak a ulemelchesiu el kirek el mrullii a kmo ngerang el dirkak a ta me kuruul er ngii el tekoi! Ak ngiluu ochik el tongetengii a chesimer, e uleker, “Ngarngii a kmo ng techang el locha semeriar lorrenges er a klemecham?” A teruich me a elolem a rekil ngelekel redil a di mla semeriar, e mla ngara nglunguuch el kirel a ulekrael er a uia chelii. A Marti mocha mesuub lobengkemam el di mle telkib el taem, e a delal a mocha mesuub el dirrek. Tir el terung el mlo chedal a Ikelesia.

siasing/Llecheklel

Elder Rasband el missionary

Techolbechelid er a Marti uchul, e a redart me a okedei me a telolem el chad, luldimukl er a betook el chedal a telungalek er ngii a mla metecholb e soiseb er a telbiil er a ebangkelio. Ak mereng a saul el mlo sebechek el rongesii Chedaol Reng e ngiluu ochik loserchii a chesimer er tiaikid el sils er a Ongeuid el buil. A Marti me a bebil er a chedal a telungalek er ngii a ngara tia er a chelechal sils.

Ongedei, e ng kired el mtebengar a Reng sel lemei.

A denguu er a ngak e a Chedaol Reng a blechoel mei el domelchesiu er ngii. Ke melchesuar er a tekoi el ngii a omodengei, el bleketakl el mei er kau, el ngii odbechau. Ka momtab a tekingir a re Nephites er a lorrenges er a Rubak el meluluuch el kirir: “Me tial seked a rirenges e ouchais; me a rengrir a ulebok me tir a mlo medengei er a rengrir a tekoi el ngii a milulluuch el kirir.” ¹⁰ Te ulemelchesiu er a rengrir aikal tekoi el Ngii a milluluuch. A ngerel a Chedaol Reng a chelellakl e kekerei.

Chelsel a Uodel Renged e a Elijah a melekoi er a re priest er a Baal. Tirkal priest a milngiil er a “ngerel” a Baal el me metengel el uaia ngerel a derumk el me metutii a ngau er a uldersir. E ng di dimlak a ngor, e dimlak a ngau.¹¹

A uriul, e a Elijah a mulluluuch. “E a, Rubak a mle chengelakl, e a mesisiich el eolt a tirrakl a risois, e tomall a bad er medal a Rubak; e ng di a Rubak a dimlak le ngar tial eolt: e a uriul er a ses el eolt me a derumk; e ng dimlak a Rubak el ngara derumk:

“E a uriul er a derumk e ng mlorngii a ngau; e ng di a Rubak a dimlak el ngara ngau: e a uriul er a ngau e ng kekerei el ngor.” ¹²

Ko medengelii tial ngor?

A President Monson a mla olisechakl el kmo, “Sel dolemolem er a rael er tial klengar, e desubii a tekingel Chedaol Reng.”¹³ A Chedaol Reng a melekoi a tekoi el domelchesiu. Aikal domelchesiu el teko a medemdemk, kekerei el orimel, el mo meruul er a kmo ngerang. Alsekum e kede omekbeot a rengud er a omengull e rkid, e mechetikaik er a kloklel a beluulechad, e ked emo metik er kid el cheroid er a techall mo omelchesiu. A Nephi a millekoi er a Laman me a Lemuel, el kirel Chedaol Reng el kmo, “Ko mla rongesii a ngerel a lebebil er a taem; e ngii a mla mengedecheduch er kemiu lokiu a chelellakl e kekerei el ngor, e ng di kemiu a ulemekbeot a tekoi, me ng diak molchesuar a klemerang er a [ikal] tekoi.”¹⁴

Tial mlomerek el Ongelolem el buil e ng mlarngii a urerek el mora South America. Aki kmal mle meriked er a chelsel aikal teruich el klebesei loldingel er a Colombia, Peru, me a Ecuador. A klou el desiu a mla mekodeterir a redart el chad, e tomelterir a re kmeed el teruich el telael chad, e tomall a betook el blai me a ikel beluu er a Ecuador er a Portovieji me a Manta. Ak ulmelchesiu el mo oldingel er a rechedal a ikelesia el kiei er a ikal basio. Ng telmellel a rael a uchul, e ng dimlak ki msal medengei el kmo ng sebecham el mora ikal basio. Te dirrek, el silbedemam el kmo ng diak el sebecham el mong, e ng di tial odbechel Chedaol Reng a di mla er ngak. Meng uaisei, el uriul e a ki mlo ngeltengat el mlo sebecham el mo oldingel aikal basio.

M e ng dimlak el sal medengelii tial miting, e ak ulemdasou el kmo te di mekesai el chad loba priesthood a sebechir el mei er a tial kldibel. E ng di, aki mlo er a bek el stake center el di mle mui er a rechad. A rebebil er tir a kmal mesisiich el chedal a ikelesia er a ikal basio, el uaia luchelsel a Ikelesia er ikal beluu, el melisiich er a rebebil el mo teloi er tir el melchesuar a Chedaol Reng er a klengar tir. A redilengchokl er medal a chedal a iekelsia el tir a mla mad a rebetik er a rengrir me a retonari er tir el tial desiu a uchul. Ak ulmelchesiu el mesterir a klengeltengat er a apostol el mo er tirkal rokui el mla er tial ongdibel, el tara kot el klengeltengat el kuldersii. Ng uaisei el kdilechor er medal tial delmerab, e ng di a chimak a uaia le blo el kldoel er a bebul a bderrir a rebek el chad e a mlo omelchesiu a tekingel a Rubak el tuobed er a ngerek.

siasing/Llecheklel

Elder me a Sister Rasband el ngara South America

Ng dimlak bol merek er tiang. Ak ulmelchesiu el mengedecheduch er tir el uaia lurruul a Jesus Kristo er a loldingel er a rechad er a beluu er a Merikel. “Ngilteterir a remekekerei el ngelekir … e ulemekngeltengat er tir, e milluluuch el mora Chedam el kirir.”¹⁵ Kemam a mlara Ecuador, a ki miruul a urerel a Chedam, e tirkang a Ngelekel.

Ongeuang, ng kired lotireklii selkot el odubech.

Molatk a tekingel a Nephi: “Ak mlukrael e a Chedaol Reng, el dimlak kudengei el kmo ngera a ikel bokuruul. Eng di,” ngii a millekoi, “Ak mlong.”¹⁶

E kmal kired. Ng kired el mo ansing er sel kot el odubech. A le bebil er a taem e ngomael er a rengud el melchedech el kmo ng locha chedaol ulekrael a lechub e ng kuk di uldesued. Sel domuchel el mo eru uldesued, malechub el edei a uldesued el kirel a domelchesiu—e kid el rokui el mla uaisei—e kede choridii Chedaol Reng; e uaia le rrau a rengud el kirel chedaol ulekrael. A Profet Joseph Smith a ulsisechakl el mo alsekum e kom rongesii a kot el odubech, e ng melemalt el etui el taem er a chelsel a teruich.¹⁷

Chelechang e tia uleklatk: ng diak momdasou el kmo ng mo er ngii a fireworks le kau el lultireklii Chedaol Reng. Molatk el kmo, kau a meruul a urerel a chelellakl, e kekerei el ngor.

Sera kusiou el merredel er a mission er a New York City, e a kulbengterir a rebebil er a remisionari er a chelsel a bill a blengur er a Bronx. A tal ngeasek el telugalek a siliseb e mlo kiei er bita er kemam. Te ko er a uaia blel kldmokl lorrenges er a ebangkelio. A kulemes er tirkal misionari el ki mdilak, e tial telungalek a ocha merek lomengur me te merolang el tuobed. Ak dula el kmo, “Elders, ngarngii a suobel el desubii er chelechal sils er tiang. Ko milsa telungalek el mle soiseb er tial bill a blengur. Ngera mle sebeched el rullii?”

A tara er a elder a di mle mereched el melekoi el kmo: “Ak ulemdasou a mekiis el mo mengedecheduch er tir. Ak ulmelchesiu er a kmo ngerang, e ng di dimlak kutireklii.”

“Elders,” ak millekoi el kmo, “ng kired el blechoel lotireklii sel kot el odubech. Sel telkib el ngera el mulmelchesiu er ngii a Chedaol Reng!”

A kot el odubech a bliochel el ulekrael er a babeluades. Sel le moterekokl e louchais er kid, e ng kired el mom tab el kmo ngerang e lak de metom er ngii. Ng blechoel, el Chedaol Reng a odbechid el mo ngoseuir a kmo ng techang, oumesingd a rechad er a telungalek me a resechelid. Tiaikid el chelellakl e kekerei el ngor, el mengelulau el mei er kid a rokui el tekoi¹⁸ a ouchais er kid a techall el mo olisechakl er a ebangkelio, e ouchais el kirel a Oluut me a Jesus Kristo, e mo olngeseu e omes, e osiik er a remekreos el ngelekel a Dios.

Momes er ngii el uaia le “kot el chad el mei.” Chelsel a betook el beluu, e tirkel chad el kot el mora basio sel ngarngii a kerior, tellemall, malechub a kodall a rehad er a ngau, rebulis, me a rechad er a ukeruul—te mei el mekerkard otelir, e kdechelii el kmo ng kired el mereng a saul el kirir. A teletelel a Rubak a diak desal mtebengar e ng di dirrek lousbech er a rekot el mong el chad. A Rubak a medengei a usbechellir a rokui el Ngelekel—e Ngii a medengei el kmo ng techa kldmokl el mo olngeseu. Omko kede ouchais er a Rubak lokiu a nglunguched sel tutau el kmo kede kldmokl, e Ngii a mekedongid el mo olngeseu. E sel debong, e Ngii a mo blechoel lomekedong er kid e seikid e kede mometik er kid el ngara sel lomekedong er ngii a President Monson el kmo “kede meruul a urerel a Rubak.”¹⁹ Kede mo kot el chad lodars chedaol ngesou le kede otengel a ngesou er a babeluades.

Sel domtab odbechel el mei er kid, e kede mukeroul er a reng er a chedaol ocholt e lmuut el ngmai a betook el llomes me a ulekrael er a Chedaol Reng. A Rubak a mla dmu el kmo ng kired lotilii a klaumera er kid er a Chedaol Reng el ngii a mekrolid el mo er a klungiaol.²⁰

Bol blak a rengud el nguu el kot el okedongel a Rubak el “ngara deureng, le ngii amo omekrael er kid.”²¹ Ngii omekrael er kid lokiu Chedaol Reng. Bo de kiei el kmeed er a Chedaol Reng, e doltirakl er sel kot el odubech, el medengei el kmo ng mlara Dios el mei. Ak sioning el kirel a klisichel Chedaol Reng el mo omekrael er kid, e mengkar kid, e di obengked, el ngara ngklel a Jesus Kristo, amen.