Tuu Atu i le Agaga Paia e Taitai
O lona tofiga faalelagi, e musuia e le Agaga Paia, molimau mai, aoao, ma uunaia i tatou ia savavali i le malamalama o le Alii.
Uso e ma tuafafine, ua ou iloaina, e pei o outou uma, lo tatou vaaia o le faanatinatiina o le galuega a le Alii e ala mai ia Peresitene Thomas S. Monson ma lana savali i lenei taeao. Peresitene Monson, matou te alolofa ia te oe, lagolagoina oe, ma tatalo pea lava mo oe, “lo matou perofeta pele.”1
Ua matou lagona le faateleina o le Agaga i le faaiuga o lenei vaiaso. Pe o outou i ai iinei i lenei maota tele po o maimoa mai i tou maota po o potopoto i falelotu i vaega mamao o le lalolagi, ua outou maua le avanoa e lagona ai le Agaga o le Alii. Ua faamautinoa atu e le Agaga i o outou loto ma mafaufau ia upumoni ua aoaoina i lenei konafesi.
Mafaufau i upu o lenei viiga masani:
Ua tatou iloa mai faaaliga o aso e gata ai o le Aiga Atua e aofia ai ni tagata patino ma mavaevae: o lo tatou Tama oi le Lagi; Lona Alo e Toatasi na Fanaua, o Iesu Keriso; ma le Agaga Paia. Ua tatou iloa “ua i ai i le Tamā se tino o aano ma ivi e mafai ona paʼi i ai e pei o le tagata; ua faapea foi le Alo; ae o le Agaga Paia e leai se tino o aano ma ivi, ae o se peresona o Agaga. A na le faapea, e le mafai e le Agaga Paia ona mau i totonu o i tatou.”3
O la’u savali i le asō e taulai atu i le taua o le Agaga Paia i o tatou olaga. Na silafia e lo tatou Tama oi le Lagi o le a tatou fetaiai i le olaga faaletino ma luitau, puapuaga, ma faigata; na Ia silafia o le a tatou tauivi ma fesili, faanoanoaga, faaosoosoga ma vaivaiga. Ina ia aumaia ia i tatou le malosi faaletino ma le taitaiga faalelagi, ua Ia tuuina mai le Agaga Paia.
O le Agaga Paia e noatiaina i tatou i le Alii. O lona tofiga faalelagi, Na te musuia, molimau mai, aoao, ma uunaia i tatou ia savavali i le malamalama o le Alii. Ua ia i tatou le tiutetauave paia ina ia aoao ia iloa Lana faatosinaga i o tatou olaga ma tali atu.
Manatua le folafolaga a le Alii: “O le a ou faaali atu ia te oe ai lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli.”4 Ou te fiafia i lena faamautinoaga. O le olioli lea e faatumulia ai o tatou agaga e aumaia faatasi ai ma se vaaiga e faavavau e faatusatusa lea i le olaga o aso taitasi.O lena olioli e oo mai o se filemu i le lotolotoi o faigata po o le lototiga. E aumaia le mafanafana ma le lototele, e faaalia mai upumoni o le talalelei, ma faalautele atu lo tatou alolofa mo le Alii ma fanau uma a le Atua. E ui ua matua manaomia tele ia faamanuiaga, ae ua faagaloina ma lafoai e le lalolagi ia [faamanuiaga] i le tele o auala.
O vaiaso taitasi pe a tatou aai ma feinu i le faamanatuga paia, tatou te osia se feagaiga ina ia “manatua pea o ia,” le Alii o Iesu Keriso, ma Lana taulaga togiola. Pe a tatou tausiaina lenei feagaiga paia, ua tuuina mai ai se folafolaga ina ia tatou “maua pea lona Agaga e faatasi ma i [tatou].”5
E faapefea ona tatou faia lena mea?
Muamua, tatou te taumafai ia ola agavaa mo le Agaga.
E faatasi le Agaga Paia ma i latou o e “tausisi ia manatua le Alii lo latou Atua mai lea aso i lea aso.”6 E pei ona fautua mai le Alii, e tatau ona tatou “tuu ese mea o lenei lalolagi, ma saili mo mea o se lalolagi sili atu ona lelei,”7 aua “e le afio le Agaga o le Alii i malumalu le paia.”8 E tatau ona tatou taumafai e le aunoa ia usiusitai i tulafono a le Alii, suesue i tusitusiga paia, auai i le malumalu, ma ola faamaoni i le mataupu faavae o le faatuatua lona sefulu tolu, “ia faamaoni, amiotonu, nofomama, agalelei, amiomama, ma le … faia o mea lelei i tagata uma.”
Lua, e tatau ona tatou naunau ina ia maua le Agaga.
Na folafola mai e le Alii, “O le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto.”9 Na amata ona ou malamalama i lenei mea a o avea o se faifeautalai talavou i Scotch Plains, New Jersey. I se tasi taeao vevela ia Iulai sa ma lagona ai ma la’u soa le uunaiga e saili se tagata na faasino mai i le Lotoa o le Malumalu. Sa ma tuitui i le faitotoa o le fale o Elwood Schaffer. Na lē taliaina ma le faaaloalo i maua e Mrs. Schaffer.
A o amata ona ia tapunia le faitotoa, sa ou lagona e fai se mea ou te lei faia muamua lava ma ou te lei toe faia lava talu mai lena taimi! Sa tuu lo’u vae i le faitotoa ma fesili atu, “O i ai se isi tagata atonu e fiafia i le ma savali?” O lana tama teine e 16 tausaga o Marti, sa i ai se fiailoa, ma sa tatalo faatauanau mo le taitaiga i le aso na muamua atu. Sa matou feiloai ma Marti, ma i le aluga o taimi, sa auai lona tina i lesona. Na auai uma i laua i le Ekalesia.
O le taunuuga o le papatisoga o Marti, e 136 tagata, e aofia ai le toatele o lona lava aiga, ua uma ona papatiso ma osia ni feagaiga o le talalelei. Ou te faafetai i lo’u faalogo i le Agaga ma tuu lo’u vae i le faitotoa i lena aso vevela o Iulai. O loo i ai iinei i le asō Marti ma se vaega o tagata o lona aiga pele.
Tolu, e tatau ona tatou iloa le Agaga pe a oo mai.
O lo’u aafiaga o i ai e faapea e tele lava ina fesootai mai le Agaga o se lagona. E te lagonaina i upu e te masani ai, e i ai se uiga ia te oe, lea e uunaia oe. Mafaufau i le tali a sa Nifae a o latou faalogo i le tatalo a le Alii mo i latou: “Ma sa faalogo i ai le motu o tagata ma latou molimauina; ma sa matalatala o latou loto ma sa malamalama i o latou loto upu ia na ia tatalo ai.”10 Sa latou lagona i o latou loto ia upu o Lana tatalo. O le leo o le Agaga Paia e filemu ma itiiti.
I le Feagaiga Tuai, na finau ai Elia ma faitaulaga a Paala. Na faamoemoe faitaulaga ina ia oo mai i lalo le “leo” o Paala o se faititili ma faamuina ai la latou taulaga i le afi. Ae sa leai se leo, ma sa leai se afi.11
I se mea na tupu mulimuli ane, sa tatalo ai Elia. “Faauta mai, ua afio ane Ieova, o le matagi tetele foi ma le malosi ua lepetia ai mauga, ma momomo ai papa i luma o Ieova; e le’i i ai Ieova i le matagi: ua mulimuli i le matagi o le mafuie; e le’i i ai Ieova i le mafuie:
“E mulimuli i le mafuie o le afi; e le’i i ai Ieova i le afi: e mulimuli i le afi o le leo filemu ma le itiiti.”12
O e iloaina lena leo?
Na aoao mai Peresitene Monson, “A o tatou malaga i le soifuaga, ia tatou aoao le gagana a le Agaga.”13 E tautala mai le Agaga i upu lea tatou te lagonaina. O nei lagona e mālū, o se uunaiga e faatino, ia faia se mea, ia fai atu se upu, tali atu ai i se auala faapitoa. Afai tatou te faasamasamanoa po o ua faamalieina i la tatou tapuaiga, aveese atu ma matafiese e ala i sailiga o mea faalelalolagi, o le a tatou mauaina i tatou lava ua faaitiitia lo tatou gafatia e lagonaina. Na fai atu Nifae ia Lamana ma Lemuelu, “Sa oulua faalogo i lona siufofoga mai lea taimi i lea taimi; ma sa fetalai mai foi o ia ia te oulua i se leo filemu itiiti, peitai ua oulua te’a atu ma lē toe lagonaina, na oulua le mafafai ai ona lagona ana fetalaiga.”14
Ia Iuni ua tuanai atu, sa ou i ai i se tofiga i Amerika i Saute. Sa matou i ai i se taimi faatulagaina pisi e 10 aso e asiasi ai i Kolumupia, Peru, ma Ekuatoa. O se mafuie tele na fasiotia le fia selau, manunu’a ai le fia sefulu o afe o tagata, faatamaia ma faaleagaina maota ma alalafaga i aai o Ekuatoa o Portoviejo ma Manta. Sa ou lagona le uunaiga e faaopoopo i la matou taimi faatulagaina se asiasiga i tagata o le ekalesia o loo alala i na aai. O le faaleagaina o auala, matou te lei mautinoa ai pe mafai ona matou oo iina. O le mea moni, sa tau mai ia i matou e le mafai ona matou oo iina, ae sa le alu ese le uunaiga. O le mea lea, sa faamanuiaina i matou ma sa mafai ona matou asia uma na aai e lua.
O le puupuu o le taimi na logoina atu ai, sa ou faamoemoe o le a na o ni nai taitai perisitua i le lotoifale o le a auai i na faatasiga na faatatope ona faatulagaina. Ae peitai, sa matou taunuu atu i nofoaga autu o siteki taitasi ma iloa ai ua faatumulia atoa falelotu e oo i tua i le tulaga. O nisi o ni tagata sa auai sa sili ona malolosi o le eria, o ni paionia o e na taofimau pea i le Ekalesia, faamalosiau atu i isi ina ia auai i tapuaiga ma ia lagona le Agaga i o latou olaga.Na saofafai i laina pito i luma ia tagata na maliliu ē pele ia i latou ma tuaoi i le mafuie. Sa ou lagona le uunaiga e faaee atu se faamanuiaga faaaposetolo i luga o i latou uma sa auai, o se tasi o a’u [faamanuiaga] muamua lava na tuuina atu. E ui sa ou tu i luma o le potu, ae sa pei lava o tuu o’u lima i luga o o latou ulu taitoatasi ma sa ou lagona afioga a le Alii o liligi atu.
E lei muta ai iina. Sa ou lagona le uunaiga e tautala atu ia i latou e pei ona faia e Iesu Keriso i le taimi na asiasi atu ai i tagata i Amerika. “Sa ia ave a latou fanau laiti … ma faamanuia i latou, ma tatalo atu i le Tamā mo i latou.”15 Sa matou i ai i Ekuatoa, sa matou i ai i le galuega a le Tama, ma o Ana fanau nei.
Fa, e tatau ona tatou faatinoina le uunaiga muamua.
Manatua ia upu a Nifae. “Ma sa taitai aʼu e le Agaga, ona sa ou lē muaʼi iloa muamua mea e tatau ona ou faia. E ui i lea,” sa ia fai mai ai, “sa ou alu atu.”16
Ma e tatau foi ia i tatou. E tatau ona tatou talitonu i a tatou uunaiga muamua. O nisi taimi tatou te fetuutuunai ai, tatou te mafaufau pe o tatou lagonaina se musumusuga faaleagaga pe na o o tatou lava mafaufauga.A amata loa ona tatou taumateina faalua o tatou lagona, e oo lava i le faatolu—ma ua tatou faia uma lava—ua tatou tulieseina le Agaga; ua tatou fesiligia fautuaga faalelagi. Na aoao mai le Perofeta o Iosefa Samita, afai o le a e faalogo i uunaiga muamua, o le a faaiva ona e mauaina le sa’o mai le sefulu.17
O se lapataiga la lenei: aua e te faamoemoe mo ni mea faapapa ona ua e tali atu i le Agaga Paia. Ia manatua, o loo e i ai i le galuega o le leo itiiti ma le filemu.
Ao auauna atu o se peresitene o le misiona i le Aai o Niu Ioka, sa ou faatasi ai ma nisi o a matou faifeautalai i se fale’aiga i le Bronx. Sa o mai se aiga talavou ma saofafai e latalata mai ia i matou. Sa foliga i latou ua matua saunia mo le talalelei. Sa ou vaavaai i a matou faifeautalai a o faaauau pea ona latou o mai ia te a’u, ona matau atu lea a o faai’u e le aiga la latou taumafataga ma mouese atu i le faitotoa. Ona ou fai atu lea, “Elders, o loo i ai se lesona iinei i le asō. Na tou vaai i se aiga matagofie na o mai i totonu o lenei fale’aiga. O le a se mea sa tatau ona tatou faia?”
Sa vave ona tali mai se tasi o faifeautalai: “Sa ou mafaufau e tu i luga ma alu atu e talanoa ma i latou. Sa ou lagonaina le uunaiga, ae ou te lei tali atu i ai.”
“Elders,” sa ou fai atu ai, “e tatau lava ona tatou faatinoina i taimi uma a tatou uunaiga muamua. O lena uunaiga sa e lagonaina o le Agaga Paia lena!”
O uunaiga muamua o ni musumusuga manino ia mai le lagi. A latou faamaonia mai pe molimau mai ia i tatou, e tatau ona tatou iloaina i latou mo le tulaga o latou i ai ma aua nei o tatou tuuina i latou e see ese atu. O le tele o taimi, o le Agaga lea e uunaia i tatou ina ia aapa atu i se tasi o manaomia se fesoasoani, aemaise lava aiga ma uo. “Ioe … o le leo itiiti ma le filemu, lea e musumusu mai ma ati i mea uma,”18 e faasino mai ia i tatou avanoa e aoao atu ai le talalelei, ia tuuina atu le molimau i le Toefuataiga ma Iesu Keriso, e ofo atu le lagolago ma le popole, ma laveai se tasi o fanau pele a le Atua.
Mafaufau i ai e avea ma se tasi ua ta’ua “o se tagata e muai tali mai. I le tele o nuu, o le tagata e muai tali atu i se faalavelave, mala, po o le malaia o fuimu, leoleo, ma fomai e faigaluega i luga o taavale. Latou te taunuu atu ma moli emoemo, ma ou te fia faaopoopo atu, tatou te matuai faafetai mo i latou. O le ala a le Alii e tau le iloa ae e manaomia ai foi le vave ona tali atu. E silafia e le Alii manaoga o Ana fanau uma—ma e Na te silafia po o ai ua saunia e fesoasoani atu i ai. Afai tatou te tuu atu ia silafia e le Alii i ā tatou tatalo i le taeao ua tatou saunia, o le a Ia valaau mai ia i tatou e tali atu. Afai tatou te tali atu, o le a Ia valaau mai ia i tatou i lea taimi ma lea taimi ma o le a tatou mauaina i tatou lava i lea vaega ua ta’ua e Peresitene Monson o “le galuega a le Alii.”19 O le a avea i tatou ma ē muai tali atu faaleagaga e avatua le fesoasoani mai lugā.
A tatou gauai atu i uunaiga lea e oo mai ia i tatou, o le a tatou tuputupu ae i le agaga o faaaliga ma maua atili se malamalamaaga ma taitaiga e uunaia e le Agaga. Na fetalai mai le Alii, “Tuu lou faalagolago i le Agaga lena lea na te taitai ia fai mea lelei.”20
Tau ina ia tatou manatu mamafa i le valaau a le Alii ina “ia fiafia, ona o le a Ou taitaia outou i le ala.”21 Na te taitaiina i tatou e ala i le Agaga Paia. Tau ina ia tatou nonofo faalatalata i le Agaga, i le vave ona galulue i o tatou uunaiga muamua, i le iloaina latou te o mai mai le Atua. Ou te molimau atu o le mana o le Agaga Paia e taitaia i tatou, puipuia i tatou, ma faatasi ai pea ma i tatou, i le suafa o Iesu Keriso, amene.