2010–2019
Nā te Vārua Mo’a e arata’i
’Ēperēra 2017


Nā te Vārua Mo’a e arata’i

Tā te Vārua Maita’i ’ohipa atua, ’ia fa’auru ïa, ’ia fa’a’ite pāpū, ’ia ha’api’i ’e ’ia tūra’i ia tātou ’ia haere nā roto i te māramarama o te Fatu.

Te mau taea’e ’e te mau tuahine, tē ’ite nei au mai ia ’outou pā’āto’a, i te ha’avitivitira’a o te ’ohipa a te Fatu nā roto i te a’ora’a a te peresideni Thomas S. Monson i teie po’ipo’i. E te peresideni Monson, tē here nei, tē pāturu nei, ’e tē pure nei mātou nō ’oe, « tō mātou peropheta here ».1

’Ua ’ite tātou i te nīni’ira’a o te Vārua i teie hope’a hebedoma. Tei ’ō nei ’outou i roto i teie pū rahi ’aore rā ’e māta’ita’i ra i roto i tō ’outou iho mau ’utuāfare ’aore rā tei ha’aputuputuhia i roto i te mau fare purera’a i te mau vāhi ātea o te ao nei, ’ua fāri’i ’outou i te ha’ama’ita’ira’a ’ia ’ite i te Vārua o te Fatu. ’Ua ha’apāpū taua Vārua ra i roto i tō ’outou mau ’ā’āu ’e mau ferurira’a i te mau parau mau tei ha’api’ihia i teie ’āmuira’a.

’A feruri na i te mau parau nō teie hīmene mātauhia :

Nā te Vārua Mo’a

E arata’i ia tātou;

Nāna e ha’api’i

I te parau mau ia tātou.2

Nā roto i te heheura’a ’āpī ’ua ’ite tātou ē tē vai nei e toru ta’ata ta’a ’ē maita’i i roto i te Atuara’a : tō tātou Metua i te Ao ra ; tāna Tamaiti fānau tahi, ’o Iesu Mesia ; ’e te Vārua Maita’i. ’Ua ’ite tātou ē « ’e tino ’i’o ’e te ivi tō te Metua mai te au iho i tō te ta’ata nei te huru ; ’e te Tamaiti ato’a ho’i; ’āre’a te Vārua Maita’i ra, ’aore ïa tōna ’e tino ’i’o ’e te ivi, terā rā e tino vārua ’oia. ’Āhiri ’aita ra, e ’ore roa ïa e ti’a i te Vārua Maita’i ’ia pārahi i roto ia tātou nei ».3

E fa’atumu tā’u parau poro’i i teie mahana i ni’a i te faufa’a rahi o te Vārua Maita’i i roto i tō tātou mau orara’a. ’Ua ’ite tō tātou Metua i te Ao ra ē i roto i te orara’a tāhuti nei e fa’aruru ïa tātou i te mau tāmatara’a, te ’ati, ’e te ’āhuehuera’a; ’ua ’ite ’oia ē e ’aro tātou i te mau uira’a, te mau ’ino’inora’a, te mau fa’ahemara’a ’e te mau paruparu. Nō te hōro’a ia tātou i te pūai tāhuti ’e te arata’ira’a a te ra’i, ’ua hōro’a mai ’oia i te Vārua Mo’a, te tahi atu i’oa nō te Vārua Maita’i.

E tā’ati te Vārua Maita’i ia tātou i te Fatu. Tāna ’ohipa atua, ’ia fa’auru ïa, ’ia fa’a’ite pāpū, ’ia ha’api’i ’e ’ia tūra’i ia tātou ’ia haere nā roto i te māramarama o te Fatu. E hōpoi’a mo’a tā tātou ’ia ha’api’i ’ia ’ite i tōna mana i roto i tō tātou orara’a ’e ’ia pāhono atu.

’A ha’amana’o i te fafaura’a a te Fatu : « E tu’u atu vau i tō’u nei Vārua ia ’oe na, ’o te ha’amāramarama mai i tō ’oe ferurira’a, ’o te fa’a’ī ho’i i tō ’oe ’ā’au i te ’oa’oa ».4 Mea au nā’u taua ha’apāpūra’a ra. E ’āfa’i mai te ’oa’oa e fa’a’ī nei i tō tātou vārua i te hō’ē hi’ora’a mure ’ore ’ia fa’aauhia i te orara’a i te mau mahana ato’a. E tae mai taua ’oa’oa ra mai te hau i rotopū i te fifi ’aore rā te māuiui. E hōro’a mai te reira i te tāmāhanahana ’e te itoito, e tauturu ia tātou ’ia māramarama i te mau parau mau o te ’evānelia, ’e e fa’arahi i tō tātou here i te Fatu ’e i te mau tamari’i ato’a a te Atua. Noa atu ē ’ua rahi roa te hina’arora’a i taua mau ha’amaita’ira’a ra, ’ua ’aramōinahia ’e ’ua fa’aru’ehia ra te reira e tō te ao nā roto i te mau rāve’a e rave rahi.

I te mau hebedoma ato’a ’ia fāri’i tātou i te rave i te ’ōro’a mo’a, tē rave nei ïa tātou i te hō’ē fafaura’a ’ia « ha’amana’o noa iāna », te Fatu ra ia Iesu Mesia, ’e tāna tusia tāra’ehara. Nā roto i te ha’apa’ora’a i teie fafaura’a mo’a, ’ua hōro’ahia mai te fafaura’a ē « ’ia vai noa tōna Vārua ia [tātou] ».5

Nāhea tātou ’ia rave i te reira ?

’A tahi, e tūtava tātou ’ia vai parau ti’a nō te fāri’i i te Vārua.

E ’āpe’e te Vārua Maita’i i te feiā ’ua « itoito rātou i te ha’amana’o i te Fatu ra i tō rātou Atua ’aita e mahana tu’ua ».6 Mai tā te Fatu i a’o mai, e ti’a ia « ha’apae [tātou] i te mau mea nō teie nei ao, ’e e tītau ho’i i te mau mea nō tei maita’i a’e ra ».7 nō te mea « e ’ore te Vārua o te Fatu e vai i roto i te hiero vi’ivi’i ra ».8 E ti’a ia tātou ’ia tāmata noa i te ha’apa’o i te mau ture a te Atua, ’ia tai’o i te mau pāpa’ira’a mo’a, ’ia pure, ’ia haere i te hiero, ’e ’ia ha’apa’o i te hīro’a fa’aro’o ’ahuru mā toru, « ’ia ora ma te parau ti’a, ma te ha’avare ’ore, ma te vi’ivi’i ’ore, ma te ’ā’au maita’i, ma te ha’apa’o maita’i… ma te hāmani maita’i i te mau ta’ata ato’a ».

Te piti, e ti’a ia tātou ’ia hina’aro i te fāri’i i te Vārua.

’Ua fafau mai te Fatu : « E fa’a’ite au ia ’oe i roto i tō ’oe ferurira’a ’e i roto i tō ’oe ’ā’au na, nā roto i te Vārua Maita’i, ’o te tae mai i ni’a ia ’oe ’e ’o te vai i roto i tō ’oe ’ā’au ».9 ’Ua ha’amata vau i te māramamara i te reira ’ei misiōnare ’āpī i Scotch Plains (New Jersey). I te hō’ē po’ipo’i ve’ave’a i te ’āva’e tiurai ’ua tūra’ihia māua tō’u hoa misiōnare ’ia ’imi i te hō’ē i’oa tei hōro’ahia mai e te Temple Square. ’Ua pātōtō atu māua i te ’ōpani o te ’utuāfare nō Elwood Schaffer. Ma te tura, ’ua pāto’i mai ’o Schaffer vahine ia māua.

’A ha’amata ai ’oia i te tāpiri i te ’ōpani, ’ua mana’o a’era vau ’ia rave i te tahi mea tā’u i ’ore roa i rave nā mua atu ’e i ’ore roa i rave fa’ahou mai taua taime mai ra ! ’Ua tu’u atu vau ’i tō’u ’āvae i te ’ōpani ’e ’ua ui : « Tē vai ra ānei te tahi ta’ata e ’ana’anatae paha i tā māua nei parau poro’i ? » E ’ana’anataera’a tō tāna tamāhine ’o Marti, 16 matahiti, i pure ’ū’ana na ’oia nō te arata’ira’a i te mahana noa nā mua atu. ’Ua fārerei Marti ia māua, ’e i muri mai, ’ua haere mai tōna metua vahine i roto i te mau ha’api’ira’a. ’Ua riro mai rāua ’ei melo no te ’Ēkālesia.

Hōho’a
Elder Rasband ’ei misiōnare

Nā roto i te bāpetizora’a o Marti, 136 ta’ata, tei roto ato’a e rave rahi melo o tōna iho ’utuāfare, tei bāpetizohia ’e tei rave i te mau fafaura’a nō te ’evānelia. ’Auē au i te māuruuru ē ’ua fa’aro’o vau i te Vārua ’e ’ua tu’u i tō’u ’āvae i roto i te ’ōpani i taua mahana ve’ave’a ra nō te ’āva’e tiurai. Tei ’ō nei ’o Marti ’e te tahi mau melo nō tōna ’utuāfare i teie mahana.

Te toru, e ti’a ia tātou ia ’ite i te Vārua ’ia tae ana’e mai.

Tā’u i ’ite e parau pinepine mai te Vārua mai te hō’ē mana’o. E ’ite ’outou i te reira i roto i te mau parau tei mātauhia e ’outou, ’o te hōro’a mai i te tahi aura’a ia ’outou, ’o te « tūra’i ia ’outou ». ’A hi’opo’a na i te pāhonora’a a te mau ’āti Nephi ’a fa’aro’o ai rātou i te Fatu i te purera’a nō rātou : « ’E ’ua fa’aro’o a’era te mau ta’ata, ’e ’ua riro rātou ’ei ’ite, ’e ’ua mahora tō rātou ’ā’au, ’e ’ua ’ite tō rātou ’ā’au i te mau parau tāna i pure ra ».10 ’Ua ’ite rātou i roto i tō rātou mau ’ā’au i te mau parau a tāna pure. E mea iti ha’iha’i te reo o te Vārua Maita’i.

I roto i te Faufa’a Tahito, ’ua mārō atu Eliaha i te mau tahu’a nō Ba’ala. ’Ua tīa’i te mau tahu’a i te « reo » nō Ba’ala ’ia pou mai mai te pātiri ’e ’ia tū’ama i tā rātou tusia i te auahi. ’Aita rā e reo, ’e ’aita e auahi.11

I muri mai, ’ua pure Eliaha. « ’E inaha, ’ua haere ihora Iehova nā reira iho, ’o te mata’i rahi ihora ’e te ’eta’eta, i te ha’apararīra’a i te mou’a, ’e te vāvāhira’a i te mato i mua i te aro o Iehova ; ’aita rā Iehova i roto i taua mata’i ra ; i muri a’era te mata’i, ’o te ’āueue fenua ihora ; ’aita rā Iehova i roto i taua ’āueuera’a fenua ra :

« ’E oti a’era te ’āueuera’a fenua, e auahi ; ’aita rā Iehova i roto i taua auahi ra : ’e oti a’era te auahi, e reo iti ha’iha’i mai ra ».12

’Ua ’ite ānei ’outou i taua reo ra ?

’Ua ha’api’i te peresideni Monson : « ’A tamau ai tātou i tō tātou tere i roto i te orara’a, e ha’api’i na tātou i te reo o te Vārua ».13 E parau mai te Vārua i te mau parau e ’itehia e tātou. Teie mau mana’o e hō’ē ïa fa’aitoitora’a marū ’ia rave, ’ia rave i te tahi mea, ’ia parau i te tahi mea, ’ia pāhono nā roto i te tahi rāve’a. Mai te mea e mea ha’umani ’aore rā e mea fa’aea noa tātou ma te taui ’ore i roto i tā tātou ha’amorira’a, ’e ’ua fa’ahema-’ē-hia atu tātou ’e ’ua manunu tātou i te mau tītaura’a nō te ao nei, e iti mai ïa tō tātou ’aravihi ’ia ’ite. Teie tā Nephi i parau atu ia Lamana ’e Lemuela : « ’Ua fa’aro’o ’ōrua i tōna reo i terā tau i terā tau ; ’e ’ua parau maita’i ra ho’i ’oia ma te reo iti ha’iha’i, ’Aore rā tō ’ōrua e fa’aro’o i ti’a ia ’ōrua ’ia fa’aro’o i tāna parau ».14

I te ’āva’e tiunu i ma’iri a’enei tei Amerika ’Apato’a vau nō te hō’ē tufa’a ’ohipa. E 10 mahana tārena ’ohipa tā mātou nō te tere atu i Colombia, Peru ’e Ecuador. E rave rahi hānere ta’ata tei pohe i te hō’ē ’āueuera’a fenua rahi, tei ha’apēpē e rave rahi tauasini ta’ata ’e tei vāvāhi ’e tei tūparari i te mau fare ’e te mau ’oire i roto i te mau ’oire nō Portoviejo ’e Manta i te fenua Ecuador. ’Ua fa’auruhia vau ’ia tu’u atu i roto i tā mātou tārena i te hō’ē fārereira’a i te mau melo ’e ora ra i roto i taua mau ’oire ra. ’Ua parari haere te mau porōmu ’e ’aita i pāpū ia mātou ē e tae atu mātou i reira. ’Oia mau, ’ua parauhia mātou e’ita e nehenehe ia mātou ’ia haere atu i reira, ’aita rā te fa’aurura’a i haere ’ē atu. I te pae hope’a ’ua ha’amaita’ihia mātou ’e ’ua nehenehe ia mātou ’ia tere atu i roto i nā ’oire e piti.

Nō te poto o te taime fa’aarara’a, ’ua ti’aturi au ē te tahi noa mau fa’atere autahu’ara’a ’o te tae mai i te mau putuputura’a fa’anaho-rū-noa-hia. Terā rā, ’ua tae atu mātou i te mau fare titi ato’a nō te ’ite ē ’ua ’ī roa te mau fare purera’a e tae roa atu i muri i ni’a i te tahua ha’utira’a. Te tahi ’e mau melo pūai roa a’e ïa nō teie tufa’a fenua, te mau pionie tei tāpe’a māite i te ’Ēkālesia, ma te fa’aitoitora’a i te tahi atu mau ta’ata ’ia ’āmui mai ia rātou i roto i te ha’amorira’a ’e ’ia ’ite i te Vārua i roto i tō rātou mau orara’a. I ni’a i te mau ’āna’ira’a mātāmua, tē pārahi nei ïa te mau melo ’ua pohe tō rātou mau fēti’i ’e tō rātou mau ta’ata tupu i roto i te ’āueuera’a fenua. ’Ua tūra’ihia vau ’ia hōro’a i te hō’ē ha’amaita’ira’a ’āpōsetolo i ni’a i te mau ta’ata tei tae mai, te hō’ē o tā’u mau ha’amaita’ira’a mātāmua i hōro’a. Noa atu ē tē ti’a ra vau i mua i te piha, e au ra ē tei ni’a tō’u nau rima i tō rātou upo’o tāta’itahi ’e ’ua ’ite au i te mau parau a te Fatu i te nīni’ira’a mai.

Hōho’a
Elder ’e te tuahine Rasband i Amerika ’Apato’a

’Aita te reira i hope i reira. ’Ua tūra’ihia vau ’ia paraparau ia rātou mai tā Iesu Mesia i rave ’a farerei ai ’oia i te mau ta’ata i Amerika. « ’Ua rave atura ’oia i tā rātou mau tamari’i ri’i, ha’amaita’i tāta’i hō’ē ihora ia rātou, ’e ’ua pure atura i te Mesua nō rātou ».15 Tei Ecuador ra mātou, tē rave ra mātou i te ’ohipa a tō tātou Metua, ’e teie ho’i tāna mau tamari’i.

Te maha, e ti’a ia tātou ’ia ’ohipa i te fa’a’itera’a mātāmua.

’A ha’amana’o i te mau parau a Nephi : « ’Ua arata’ihia vau e te Vārua, e ’aore au i ’ite na i te mau mea tā’u e rave ra », ’ua parau ’oia, « Haere atu ra rā vau ».16

E nā reira ato’a ïa tātou. E ti’a ia tātou ’ia ti’aturi i tā tātou mau fa’a’itera’a mātāmua. E uiui tātou i te tahi mau taime ē tē ’ite ra ānei tātou i te hō’ē fa’a’itera’a vārua ’aore rā e mau mana’o noa nō tātou iho. ’Ia ha’amata ana’e tātou i te uiui fa’ahou, e tae noa atu i te toru o te taime i tō tātou mau mana’o—’ua nā reira tātou pā’āto’a—tē tiahi nei ïa tātou i te Vārua ; tê uiui nei ïa tātou i te a’o a te Atua. ’Ua ha’api’i te peropheta Iosepha Semita ē : « Mai te mea e fa’aro’o ’outou i te fa’a’itera’a mātāmua, e tano ïa ’outou e iva taime i ni’a i te ahuru ».17

Te hō’ē parau fa’aarara’a i teienei : ’eiaha e tīa’i i te mau ha’amaita’ira’a pa’a’inara’a ahitiri nō te mea ’ua pāhono atu ’outou i te Vārua Maita’i. ’A ha’amana’o ē tē pe’e nei ’outou i te ’ohipa a te reo iti ha’iha’i.

I tō’u tāvinira’a ’ei peresideni misiōni i te ’oire nō New York, tei te hō’ē fare tāmā’ara’a vau ’e te tahi o tā mātou mau misiōnare. ’Ua tomo mai te hō’ē ’utuāfare tamari’i ’āpī ’e ’ua pārahi mai i pīha’i iho ia mātou. E au ra ē ’ua ineine rātou no te fāri’i i te ’evanelia. ’Ua māta’ita’i au i te mau misiōnare ’a tāmau ai mātou i te paraparau, ’e ’ua ’ite a’era vau ē ’ua oti te tāmā’ara’a a teie ’utuāfare ’e ’ua haere ’ē atu rātou nā te ’ōpani. I reira ’ua parau atu vau ia rātou : « ’Orometua ma, teie te hō’ē ha’api’ira’a i ’ō nei i teie mahana. ’Ua ’ite ’outou i te hō’ē ’utuāfare nehenehe i te haerera’a mai i roto i teie fare tāmā’ara’a. E aha te mea i ti’a ia tātou ’ia rave ?

’Ua pāhono vitiviti mai te hō’ē o te mau ’orometua : « ’Ua mana’o vau i te ti’a atu nō te haere e paraparau ia rātou. ’Ua ’ite au i te fa’aitoitora’a ’aita rā vau i pāhono atu ».

’Ua parau atu vau : « E te mau ’orometua, e ti’a ia tātou ’ia pāhono i tā tātou fa’a’itera’a mātāmua. Te fa’aitoitora’a tā ’outou i ’ite ’o te Vārua Maita’i ïa ! »

Te mau fa’a’itera’a mātāmua e fa’aurura’a mā ïa nō te ra’i mai. ’Ia ha’apāpū ’aore rā ’ia fa’a’ite pāpū ana’e rātou ia tātou, e ti’a ïa ia tātou ’ia ’ite ia rātou ’e tā rātou ’ohipa ’e ’eiaha roa atu e vaiiho ia rātou ’ia mo’e atu. E mea pinepine, e nā te Vārua e fa’auru ia tātou ’ia haere atu i te hō’ē ta’ata ’o tē fifi ra, te ’utuāfare ’e te mau hoa iho ā ra. « Nō reira… te reo iti marū ra, ’o te parau marū noa nā roto ’e ’o te ha’aputa ho’i i te mau mea ato’a »,18 e arata’i atu ïa ia tātou i te mau rāve’a nō te ha’api’i i te ’evānelia, nō te fa’a’ite pāpū nō ni’a i te Fa’aho’ira’ahia mai ’e nō ni’a ia Iesu Mesia, nō te pūpū i te tauturu ’e te mana’o ’atu’atu, ’e nō te fa’aora i te hō’ē o te mau tamari’i faufa’a a te Atua.

’A ha’amana’o i te mea tei pi’ihia te ta’ata pāhono mātāmua. I roto i te rahira’a o te mau vāhi nohora’a, te mau ta’ata pāhono mātāmua i te pohe, te ’ati, ’aore rā te ahoaho ’o te mau tupohe auahi ïa, te mau muto’i, te mau utuutu ma’i—e tae mai rātou ma te mori purapura, ’e e ti’a iā’u ’ia parau, e māuruuru rahi tō tātou ia rātou. Te rāve’a a te Fatu e’ita ïa mai te reira roa te huru e tītau ato’a rā i te hō’ē pāhonora’a vitiviti. ’Ua ’ite te Fatu i te mau hina’aro o tāna mau tamari’i ato’a—’e ’ua ’ite ’oia ē ’o vai tei ineine i te tauturu. Mai te mea e vaiiho tātou i te Fatu ’ia ’ite i roto i tā tātou mau pure po’ipoi’ ē ’ua ineine tātou, e pi’i ïa ’oia ia tātou nō te pāhono atu. Mai te mea e pāhono tātou, e pi’i ïa ’oia ia tātou i terā taime ’e terā atu taime ’e e ’ite ïa tātou ia tātou iho i ni’a i te mea tā te peresideni Monson i pi’i « te ’ohipa a te Fatu ».19 E riro ïa tātou ’ei feiā vārua pāhono mātāmua ’o te fa’ahaere mai i te tauturu nō ni’a mai.

Mai te mea e ha’apa’o maita’i tātou i te mau fa’aurura’a ’o te tae mai ia tātou, e tupu ïa tō tātou pa’ari i roto i te vārua nō te heheura’a ’e e fāri’i atu ā ïa tātou i te mana’o ’e te arata’ira’a tūra’ihia e te Vārua. ’Ua parau te Fatu : « ’A fa’atae atu i tō ’oe ti’aturira’a i te reira Vārua ’o te fa’aarata’i atu ’ia rave i te ’ohipa maita’i ».20

’Ia ha’apa’o maita’i na tātou i te pi’ira’a a te Fatu « ’a ’oa’oa maita’i na, nō te mea e arata’i atu na vau ia ’outou ».21 E arata’i ’oia ia tātou nā roto i te Vārua Maita’i. ’Ia ora piri noa tātou i te Vārua, ma te ’ohipa vitiviti ’ia fāri’i ana’e tātou i te mau fa’a’itera’a mātāmua, ’e ’ia ’ite ē nō ’ō mai te reira i te Atua ra. Tē fa’a’ite pāpū nei au nō ni’a i te mana o te Vārua Maita’i nō te arata’i ia tātou, nō te tīa’i ia tātou, ’e ’ia vai noa i pīha’i iho ia tātou, nā roto i te i’oa o Iesu Mesia, ’āmene.